འོད་དཀར་དྲ་ཚིགས།

བཅར་འདྲི་བྱེད་མཁན།  འོད་དཀར།

             ལྡོང་བུ།  ༡༩༨༥ལོར་མདོ་སྨད་འབའ་རྫོང་དུ་སྐྱེས།  ༢༠༠༣ལོར་རྒྱའི་དབུས་གཞུང་མི་རིགས་སློབ་ཆེན་འགྲིམ་ཞིང་ད་ལྟ་སློབ་གྲྭ་དེ་གར་བསླབ་པ་དོན་དུ་གཉེར་བཞིན་གནས། བརྩམས་ཆོས་ལ། སྙན་དེབ༼སྨྱོན་པའི་དུས་ཚིགས༽དང༼གཤིན་པོའི་རོལ་དབྱངས༽འགྱུར་མའི་དེབ༼གཤོག་པ་ནག་པོ༽ སྙན་ངག་ལྷུག་མའི་དེབ་ ༼ཟླ་བའི་རྨི་ལམ༽ བཅས་ཡོད།

དྲི་བ།    ཉེ་བའི་ཆར་ཁྱེད་ཀྱི་བསྒྱུར་རྩོམ་སྙན་ངག་རིང་མོ་ཞིག་ཐོན་ལ་ཉེ། དེ་བསྒྱུར་སྐབས་ཀྱི་ཚོར་སྣང་ཞིག་གསུང་རོགས།

        ལན།   རྒྱ་འགྱུར་མ་དག་ལས་གཅིག་ལ་གཞི་བཅས།     འགའ་ལ་དཔྱད་པའི་ཐབས་ཀྱིས།  འཛམ་གླིང་ལ་གྲགས་པའི་སྙན་ངག་མཁན་པོ།  ཨེལ་ཐུའི་སྙན་ངག་རིང་མོ༼མྱ་ངམ་ཐང༽བོད་དུ་བསྒྱུར་ཚར་མོད། བརྩམས་ཆོས་ཉིད་ཀྱི་འགྲེལ་དོན་དང་ལུང་ཁུངས་མང་པོ་ཞིག་གི་དབང་དང་།  ས་མིང་མི་མིང་དག་ཀྱང་ཐད་ཀར་མ་ཡིག་ལས་བསྒྱུར་ན་འོས་པར་བསམ་པས།  ད་དུང་ཡང་ལེགས་པར་གྲུབ་མེད།  གཞན་དུ་དེ་བསྒྱུར་སྐབས་ཀྱི་ཚོར་བ་ཁོ་ན་ནི།  ལོ་ཙྰ་ནི་གསར་རྩོམ་ལས་ཀྱང་འདེགས་པར་དཀའ་བའི་ལས་ཀ་ལྗིད་ཏིག་གེ་བ་ཞིག་ཡིན་པ་དེའོ།  །

དྲི་བ།  ཡིག་བསྒྱུར་བྱེད་པ་ལ་དཀའ་ངལ་ཆེ་ཤོས་གང་རེད་འདུག  བོད་ཡིག་གིས་མ་འདངས་བའི་དཀའ་ངལ་དེ་འདྲ་བྱུང་སོང་ངམ།

         ལན།   ཁོ་བོར་མཚོན་ན།  རང་རེའི་དམངས་ཁྲོད་ཀྱི་རྩོམ་རིག་དང་སྨྲ་བརྗོད་ལ་རྒྱུས་མེད་པ་ནི་དཀའ་ངལ་ཆེ་ཤོས་སུ་འདུག  དེ་ནི་བོད་ཡིག་གི་མ་འདང་བ་ག་ལ་ཡིན་གྱི།  འུ་བུ་ཅག་བོད་ཀྱི་སྐད་དང་བརྡ་ལ་ཆ་མེད་པས་ལན་ནོ།  །

དྲི་བ།   ཁྱེད་སྙན་ངག་པ་ཞིག་ཡིན་པའི་ཆ་ནས་ཁྱེད་ཀྱིས་སྙན་ངག་ཅེས་པ་ག་འདྲ་ཞིག་ལ་ངོས་འཛིན་བྱེད་ཀྱི་ཡོད།

          ལན།   ག་ལེར་བསམ་ན།  ཨེམ་ལིས་ནང་བཞིན་སྙན་ངག་ནི་བླ་སྲོག་ལ་རང་ཉིད་དང་ལེན་ཞུ་བའི།  བརྡ་དང་ཚིག་གི་རྣམ་པ་ཞིག་ཏུ་ངོས་གཟུང་ཆོག་ལ།  འགས་གཏོར་དང་རྨས་སྐྱོན་གྱིས་གང་བར་མཛད་པའི་རྣམ་ཤེས་ཀྱི་གད་རྒྱངས་དང་ངུ་འབོད་དུའང་ངེས།  དེ་མིན།  ཉི་ཤར་ཙམ་དང་ཆར་རྒྱུན་ཐེངས་ཤིག་ཀྱང་ཚིག་གི་སྲད་བུར་བརྒྱུས་ན།    ཁྱད་དུ་འཕགས་ལ་ཆེས་སྤྱིར་བཏང་བའི་མིའི་འཚོ་གནས་ཀྱི་ཁམས་ཤིག་ལ་སོན་ཐུབ་བོ། །

དྲི་བ།   རྩོམ་པ་པོ་ཞིག་གི་འགན་གཙོ་བོ་དེ་གང་མཐོང་གི་འདུག

ལན།   རྩོམ་པ་པོ་ཞིག་གི་འགན་གཙོ་བོ་ནི་རང་རྐྱ་འཕེར་བའི་ངང་གསར་རྩོམ་ལ་འཇུག་རྒྱུ་དེའོ།  །

ངེད་དྲ་ཚིགས་ཀྱི་ཆོག་མཆན་མེད་པར་རྐུ་འཁྱེར་བརྒྱུད་འགོད་བྱ་མི་ཆོག