འོད་དཀར།
དཔྱོད་ཤེས་རྒྱང་འབོད་ས་ལ་འཕོས་པས་ཞོགས་དུང་རྒད་པོ་བོད་ཀྱིས་ཤེས། །
སྒལ་ཚིགས་སྲ་མོ་ཁྱེད་ལ་བདོག་པས་མི་བུའི་དཔྱོད་ཤེས་བདག་པོར་གྱུར། །
གླེན་པ་སྐོར་ཞིག་མགོ་བོ་རྨོངས་ནས་ཁྱོད་ལ་ལྟ་ལོག་ལྟས་ངན་བརྗོད། །
བདག་གི་སེམས་ཀྱི་སྐྱ་རེངས་དཀྲོགས་པ་ཞོགས་པའི་དུང་དེ་ཁྱེད་ཉིད་ཡིན། །
མགོ་བོ་རྨོངས་པའི་བོད་པ་ཚང་ལ་དུས་རབས་གསར་བའི་སྙིང་སྟོབས་སྩལ། །
རང་ཚུགས་མེད་པའི་བྱིས་པ་ཚོ་ལ་སྒལ་ཚིགས་སྲ་མོའི་མན་ངག་གནང་། །
ད་དུང་བདག་གིས་མ་འཇོན་ཟེར་བའི་རང་སྐྱོན་ཁས་ལེན་དཔའ་བོའི་ཚུལ། །
ཁྱེད་ཀྱི་གཤིས་ལ་ཤུགས་ཀྱིས་མངོན་པས་དེ་རིང་ཡིད་དབང་འཕྲོག་ནས་ཐལ། །
གནམ་ས་གོ་འབྱེད་མི་ཡུལ་འཕོས་པས་དགྱ་རོའི་མགོ་སྟེང་ལོག་ནས་ཐལ། །
གནམ་ས་གོ་འབྱེད་བོད་ལ་འཕོས་པས་དཔྱོད་ཤེས་རྒད་པོ་གྲགས་ནས་ཐལ། །
གནམ་ས་གོ་འབྱེད་ཕྱི་ལ་འཁྱམས་པས་ཁྲམ་པ་མང་པོ་སྐྲག་ནས་ཐལ། །
གནམ་ས་གོ་འབྱེད་ཁྱེད་ལ་ཕོག་པས་ཁྱིམ་ཚང་གང་པོ་གཏོར་ནས་ཐལ། །
དེ་ལྟར་གནམ་ས་གོ་འབྱེད་དེ་ནི་ཁྱེད་ཀྱི་རུས་པའི་རྐང་ནས་ཐོན། །
བོད་ཀྱི་ངུར་སྨུག་ཞི་རྒོལ་དེ་ཡིས་གནམ་ས་གོ་འབྱེད་བཙུར་ནས་ཐོན། །
བོད་ཀྱི་གསར་རྗེ་ཞི་རྒོལ་དེ་ཡིས་གནམ་ས་གོ་འབྱེད་བཞུར་ནས་ཐོན། །
མདོར་ན་གནམ་ས་གོ་འབྱེད་དེ་ནི་ཆོལ་གསུམ་བོད་མིའི་གཟུངས་ཁྲག་ཡིན། །
རྒྱང་རིང་སྡུག་གི་ས་མཐའ་ཞིག་ནས་གནམ་ས་གོ་འབྱེད་ཞིབ་བལྟས་ནས། །
ཁ་ཡི་རྐྱེན་ལས་མགོ་བོ་ཤོར་ཡང་འགྱོད་པ་མེད་ཅེས་གཏན་ཚིགས་དེར། །
ལྟ་བཞིན་ལྟ་བཞིན་སྐྱོ་བས་ཁེངས་ཏེ་ངུ་འབོད་ཞིག་གིས་སྙན་ཚིག་འདི། །
དྲན་གདུང་སེམས་ཀྱིས་དབང་མེད་ཤོར་བས་ཞོགས་དུང་ཁྱེད་ལ་རྒྱང་འབོད་སྐད། །
སྐུ་ཞབས་ཞོགས་དུང་བཟུང་རྗེས་གནམ་ས་གོ་འབྱེད་ཀློག་བཞིན་པའི་སྐབས་ཞིག་ལ་དབང་མེད་དུ་ཤོར་ཐལ། ༢༠༡༠།༤།༢༦
ངེད་དྲ་ཚིགས།
