འོད་དཀར་དྲ་ཚིགས།

<<ཁྲག་ཡིག>>དང་<<སྒེར་གཅོད>>བཀླགས་པའི་མྱོང་ཚོར།

  བདེ་འཚོ། 

༡   ཁྲག་གི་བྲིས་རིས།

  བཙན་བྱོལ་དུ་འབྱོར་ནས་མི་ལོ་བརྒྱད་ལྷག་བསྐྱལ་ཚར་བའི་བརྒྱུད་རིམ་ནང་དུ་ངས་རྟག་ཏུ་ཐོས་བྱུང་བ་ནི་གསར་འགྱུར་བརྒྱུད་ལམ་ཁག་ནས་བསྒྲགས་འོང་བའི་སྐད་ཆ་ཡང་མོ་དག་དང་།  ཡང་ན་ཚོར་ཤེས་ཀྱི་ན་ཟུག་སྟོང་བའི་ཚོགས་སྡེ་ཁག་གི་སྤྱི་བསྒྲགས་ཙམ་ལས། མི་སེམས་རློན་པ་ནས་བཞུར་འོང་བའི་ཆེས་སྙིང་ཉེ་བའི་སྐད་ཆ་ཞིག་དང་། ཆེས་བབ་ཆགས་པའི་སེམས་འདུན་ངོ་མ་ཞིག་ཕལ་ཆེར་ངའི་ཚོར་ཤེས་ཀྱི་དབང་བོ་རེ་རེ་རྟུལ་སོང་བས་མིན་ན་ཐོས་དཀའ་ཚོད་དུ་སྣང་།  དེ་བས་ལོ་འདི་དག་ནི་ང་ལ་མཚོན་ན་ཆེས་སུན་སྣང་དང་སྐྱོ་གདུང་། ཡང་ན་ཁེར་རྐྱང་ལྟ་བུའི་འཁྱོལ་དཀའ་བའི་ཉིན་ཞག་གི་རྩིས་ཐོ་རེ་རེ་ལས་མ་འདས།  འདི་ལོའི་སྤྱི་ཟླ་༤པའི་ཚེས་༡༥ཉིན་མདོ་སྨད་ཀིརྟི་བྱེས་དགོན་གྱི་རྩོམ་དེབ་བརྒྱ་ལོངས་པའི་མཛད་སྒོར་འགྲོ་བའི་གོ་སྐབས་ལས་ཐེའུ་རང་གི<<ཁྲག་ཡིག>>ལ་དངོས་སུ་མཇལ་བའི་བསྐལ་བ་བྱུང་སོང་། སྤྱིར་ཐེའུ་རང་དང་<<ཁྲག་ཡིག>>ཞེས་པའི་ཡིག་འབྲུ་འདི་གཉིས་བོད་ཕྱི་ནང་གཉིས་ཀྱི་གཞོན་སྐྱེས་དག་གི་སྐད་ཆའི་བར་གསེང་རེ་ནས་རྟག་ཏུ་ཐོས་མྱོང་ཡོད་ཀྱང་།བཙན་བྱོལ་སྤྱི་ཚོགས་ལ་མཚོན་ན་དེ་ལྟ་བུའི་སྤྱི་བསྒྲགས་དག་ནི་ཆེས་རྒྱུན་ལྡན་གྱི་སྣང་ཚུལ་ཞིག་ཡིན་པས་ངས་ཀྱང་དེ་ཙམ་གྱིས་དོ་སྣང་ཆེན་པོ་མ་བྱས་པ་ནི་ད་ལྟ་བསམ་ན་རང་ཉིད་ཀྱི་ནོར་འཁྲུལ་ཆེན་པོ་ ཞིག་རེད། དེ་བས་ཐེའུ་རང་གི་<<ཁྲག་ཡིག>>དངོས་སུ་ལག་ཏུ་འབྱོར་བས་ངས་དབུགས་ཐེངས་གཅིག་གིས་དེ་ཉིད་བམ་ཀློག་ཐེངས་ཤིག་བྱས་ཤིང་ཕྱིས་སུ་ཡང་བསྐྱར་ཞིབ་ཀློག་ཐེངས་ཤིག་ཀྱང་བྱས་པ་ཡིན།  སྐབས་དེར་<<ཁྲག་ཡིག>>ཞེས་ པའི་ཁ་བྱང་ཙམ་པོ་དེས་ཀྱང་ང་ལ་ན་ཟུག་དང་ཕྱིར་དྲན་གྱི་བློས་བསླངས་མང་པོ་ཞིག་སྐྱེས་སུ་བཅུག་སོང་།  ཅིས་ཕྱིར་ཞེས་ན་ཁྲག་ནི་འགྲོ་བ་མི་དང་རླབས་ཆེ་བའི་ཚེ་སྲོག་མང་པོ་ཞིག་གི་རྒྱུ་བ་གསོ་བྱེད་ཀྱི་དྭངས་མ་ཡིན་པས།  ཁྲག་སྐམ་ཚེ་འཇིག་རྟེན་སྟེང་གི་མཛེས་སྡུག་གི་ཚེ་སྲོག་རེ་རེ་ནི་ཇི་སྲིད་བར་དུ་འཚོ་དཀའ་ཞིང་གནས་མི་ཐུབ་པ་ཞིག་ཡིན་པས་སོ།དེ་བས་ཁྲག་རྒྱུན་གྱིས་ཤར་ཤར་བྲིས་པའི་ཡིག་འབྲུ་འདི་དག་གིས་ང་ཚོར་རྒྱུ་མཚན་དང་གནས་ལུགས་མང་པོ་ཞིག་བཙན་འོག་ནས་བརྗོད་ཀྱིན་འདུག  འདི་ལྟར་བསམ་འོང་ན<<ཁྲག་ཡིག>>ནི་དམར་ལྷོག་ལྷོག་བཞུར་བའི་མི་ཕོ་ཞིག་གི་ཁྲག་གི་བཞུར་རྒྱུན་ཡིན་ནམ། ཡང་ན་ཚ་ལམ་ལམ་དུ་ཁོལ་བའི་ཚེ་སྲོག་ཁྲི་ཕྲག་གི་སེམས་ཀྱི་གདུང་འབོད་ཡིན།  འདི་ལྟར<<ཁྲག་ཡིག>>གིས་ ང་ཚོ་ལ་རྨ་ཁ་ཞིག་བསྟན་བྱུང་།  ལོ་ངོ་དུ་མ་ཞིག་གི་སྔ་རོལ་ནས་གསོས་མ་ཐུབ་པའི་རྨ་ཁ་ཞིག་བསྟན་བྱུང་ལ། ད་ལྟ་ཡང་ད་དུང་ཡང་ཁྲག་དམར་ལྷོག་ལྷོག་བཞུར་གྱིན་པའི་རྨ་ཁ་ཞིག་བསྟན་བྱུང་བས་མ་ཚད།  མ་འོངས་པའི་མི་རབས་ནས་མི་རབས་བར་དུ་དྲག་སྐྱེད་འབྱུང་དཀའ་བའི་རྨ་ཁ་ཞིག་བསྟན་བྱུང་།
བླ་སྲོག་གི་གླུ་སྐད་མ་འཇགས་ན། རུས་རྐང་གི་ཁྲག་རྒྱུན་མ་ཡལ་ན།ང་རང་ཚོ་རང་དབང་དང་བསྡོངས་ཏེ་གངས་སུལ་དུ་འཐིམ་ཆོག  འདི་ནི་<<ཁྲག་ཡིག>>གིས་ཁུར་འོང་བའི་སེམས་པ་དམར་པོ་ཡིན་ལ།  <<ཁྲག་ཡིག>>གིས་རང་ཉིད་ལ་ཆེད་དུ་བརྐོས་པའི་རྟག་བརྟན་གྱི་དུངས་པ་ཞིག་ཀྱང་རེད།  སྐབས་འདིར་ཁྲག་ཡིག་གི་དམར་ཧྲང་ཧྲང་དུ་བཀྲམ་པའི་ཡིག་འབྲུ་རེ་རེ་ན་ཟུག་གི་འཕག་འཚག་ རེ་རེ་དང་འགྲོགས་ཏེ་ངའི་དྲན་ཤེས་དང་སེམས་པ་ཡོད་ཚད་རྨང་ནས་སྒུལ་བྱུང་།  ཞེ་སྡང་ཤ་འཁོན  ན་ཟུག ལྕགས་སྒྲོག  བདག་གི་ཤ་གསེང་རུས་རྐང་ན།  ལྗིད་ཏིག་ཏིག་གི་ཡིག་འབྲུ་གཉིས་ཀྱིས་ཚ་འདྲི་སློང་གིན་འདུག  འདི་ནི་<<ཁྲག་ཡིག>>གིས་ གྱེར་བྱུང་བའི་རླབས་ཆེ་བའི་ཚེ་སྲོག་ཅིག་གིས་གཞི་ནས་རྙེད་པའི་ཚོར་འདུའི་ གཟུགས་རིས་ཤིག་རེད། དེ་ལས་ལྕགས་སྒྲོག་གིས་དམ་དུ་བསྡམས་པའི་ཞེ་སྡང་དང་ཤ་འཁོན། ཡང་ན་ན་ཟུག་རེ་རེ་ཡིས་འགུལ་སྐྱོད་བྱེད་བཞིན་པའི་རྣམ་པ་ཞིག་ང་ཚོར་བསྟན་བྱུང་བ་ནི་སྙན་ངག་མཁན་གྱི་དུངས་སེམས་དངོས་དང་རྟོགས་འཆར་གཉིས་ཀ་གཞི་གཅིག་ཏུ་ བསྲེས་པའི་ཁྱད་འཕགས་ཀྱི་ཐབས་རྩལ་ཞིག་ཏུ་སྣང་།  ང་ཚོར་འདི་ལྟ་བུའི་བརྩེ་སེམས་དངོས་ཀྱིས་ཕྱུག་པའི་སྙན་ངག་མཁོ་ལ་འདི་ལྟ་བུའི་རང་དབང་སྙེག་ཕོད་པའི་གདོང་མཆོང་གི་སྙིང་སྟོབས་དེ་བས་ཀྱང་མཁོ། འདི་ནི་རང་ག་བའི་མི་ཆུང་ཞིག་གིས་རང་གི་མ་ཡུམ་གངས་ལྗོངས་ཀྱི་ན་ཟུག་དང་ཉམས་ཉེས་མ་བཟོད་པའི་ཀི་སྒྲ་ཐེངས་ཤིག་ཡིན།  འདི་ནི་མགྲིན་པ་གངས་ཆུས་གསོས་པའི་དུས་རབས་ཀྱི་གླུ་བ་ཞིག་གིས་ཚེ་སྲོག་དང་དུངས་སེམས་མཉམ་དུ་བརྒྱུས་ནས་བླངས་པའི་གླུ་ངག་རིང་མོ་རེད། གང་ལྟར་ཁྲག་ཡིག་བཀླགས་རྗེས་ངས་མི་ཞིག་དྲང་པོར་སོང་ས་ནས་རྐང་རྗེས་གསལ་བོ་ཞིག་ཡོད་འོས་པའི་ བདེན་ལུགས་ཁོ་ན་རྙེད་བྱུང་། དེ་བས་ཀྱང་ཐེའུ་རང་གིས་འཚོལ་གྱིན་པའི་ནང་སེམས་ཀྱི་དབྱངས་རྟ་ངོ་མ་ཞིག་ཐོས་ཤིང་།  <<ཁྲག་ཡིག>>གིས་ཕབ་ཀྱིན་པའི་སྣང་བརྙན་གསོན་པོ་དེའི་གྲག་འགུལ་རྟོགས་བྱུང་བས།   མཇུག་ཏུ་ང་རང་ཉིད་ཀྱང་ཁྲག་ཐིགས་ཤིག་ཏུ་གྱུར་ཏེ<<ཁྲག་ཡིག>>དང་མཉམ་དུ་བཞུར་བཞིན་འདུག

༢  སྒེར་གཤིས།

      མིའི་ཚེ་སྲོག་གི་རིན་ཐང་ནི་འདུ་ཤེས་ཀྱི་འགུལ་སྐྱོད་ལ་བརྟེན་ནས་བྱུང་གི་ཡོད་ལ། དེ་བཞིན་འདུ་ཤེས་ཀྱི་འགུལ་སྐྱོད་ནི་དགའ་སྡུག་གི་ཚོར་བ་དངོས་དང་འབྲེལ་ནས་བྱུང་གི་ཡོད་པས། མི་ཞིག་གི་དགའ་སྡུག་གང་རུང་གི་ཚོར་བ་དངོས་ནི་ད་གཟོད་རང་ཉིད་འགྲོ་བ་མི་ཞིག་ཡིན་པའི་ཚད་ཤིང་ར་འཕྲོད་བྱེད་ཀྱི་བདེན་དཔང་ལྟ་བུ་ཞིག་ཏུ་ཆགས་ཡོད། བཙན་བྱོལ་སྤྱི་ཚོགས་ཁྲོད་སྙན་ངག་ལ་དགའ་མཁན་ཧ་ཅང་ཉུང་བའི་གནད་ཀྱང་གདོད་མ་ནས་མངའ་བའི་མིའི་བརྩེ་སེམས་དང་ཚོར་ཤེས་སོགས་ཉམས་བཞིན་པའི་མཚོན་རྟགས་ངན་པ་ཤིག་གམ། ཡང་ན་མིའི་ལྷན་སྐྱེས་ཀྱི་དབྱངས་རྟ་འགག་བཞིན་པའི་གནད་དོན་གཞན་ཞིག་ཀྱང་ཡིན་སྲིད། ཏག་ཏག་སྐབས་འདི་འདྲ་ཞིག་ལ་<<སྒེར་གཅོད>>ཀྱིས་འགན་འཁྲིའི་འདུ་ཤེས་ཤིག་དང་ན་ཟུག་གི་ཚོར་བ་ཞིག་དྲུད་ནས་སླེབས་བྱུང་། <<སྒེར་གཅོད>>ནི་ཡུལ་གྱར་པའི་འཚོ་གནས་ཤིག་ནས་གཏན་ཚིགས་ཀྱི་རང་གཤིས་སྦྲུམ་པའི་ལོ་ཆུང་སྤྲུལ་སྐུ་ཞིག་གི་མདུན་བསྐྱོད་ཀྱི་ཚོད་ལྟ་ཐེངས་ཤིག་ཡིན་སྲིད་ལ། ས་མཐའི་གྲུ་ཟུར་ཞིག་ན་འཕག་འཚག་བྱེད་ཀྱིན་པའི་མི་སེམས་རློན་པ་ཞིག་གི་ཚོར་སྣང་ལས་བྱུང་བའི་ན་ཟུག་གི་འོ་དོད་དངོས་ཀྱང་ཡིན་པས།

ʼʼངའི་སེམས་ཀྱི་རྨ་ཁ་ཁྲག་ཡིན་ལ

ཁྲག་ཐིགས་གི་འཕར་རྩ་རེ་རེ་ན

དངོས་གཏན་མེད་པའི་བཟོད་བྲལ་གྱི་སྡུག་བསྔལ་ཞིགʼʼ

  འདི་ནི<<སྒེར་གཅོད>>ཀྱིས་ཐེག་ཏུ་དཀའ་བའི་ནང་སེམས་ཀྱི་སྐྱོ་གདུང་དམར་པོ་རེད།  འདི་ལས་ང་ཚོར་བསྟན་བྱུང་བ་ནི་གསོན་པོར་འཕག་འཚག་རྒྱག་བཞིན་པའི<<སྒེར་གཅོད>>ཀྱི་འགན་འཁྲིའི་འདུ་ཤེས་རེད། སྐབས་འདིར་ངས་ད་གཟོད་ན་ཟུག་ཡོད་ཚེ་འགན་འཁྲི་ཡོད་ཅེས་པའི་སྙན་ངག་པ་ཞིག་གི་སྒེར་གཤིས་ལྟ་བུའི་སྡོམ་ཚིག་དེ་དྲན་བྱུང་། རྒྱུ་མཚན<<སྒེར་གཅོད>>ཀྱིས་ཁུར་དུ་བླངས་པའི་སྐྱོ་གདུང་དེ་ནི་རང་ཉིད་ཁོ་ནའི་བདེ་སྡུག་ཙམ་ལ་གྱེར་བ་ཞིག་མ་ཡིན་པར། སྤྱི་ཡོངས་ཀྱིས་ཐེག་པར་དཀའ་བའི་གནས་བབ་ཅིག་བརྗོད་བཞིན་ཡོད་པ་མ་ཟད། དེ་རིང་གི་མཐོང་སྣང་ན་འགྱེལ་བཞིན་པའི་ཚེ་སྲོག་མང་པོ་ཞིག་གི་ཁྲག་མདོག་གི་མྱ་ངན་ཚོར་བས་རེད། སྐྱ་ཧྲང་ཧྲང་དུ་གནས་པའི་འཚོ་གནས་ཤིག་གི་ཉེན་ཁ་གསར་བ་མཐོང་བས་རེད།

ʼʼའདི་ལྟར་བསམས་ན

ངུ་འབོད་ཀྱི་ཀི་སྒྲ་སྒྲོག་འདོད

ཨ་ཨ་་་་་་སེམས་ཀྱི་མེ་ལྕེ་དམར་པོ་ཇི་ལྟར་བརྗོད་དགོས

ང་ཡི་རྒྱང་རིང་གི་ཕ་གཞིས་སྣུམ་པོʼʼ འདི་ལས་ང་ཚོས་ཅི་ཞིག་རྟོགས་ཐུབ་བམ། སྤྱིར་བཤད་ནའང་མིའི་སེམས་ནང་གི་ཚོར་བ་དངོས་ནི་སྐད་ཆས་ཀྱང་ཐད་ཀར་མཚོན་མི་ཐུབ་པས<<སྒེར་གཅོད>>ཀྱིས་ ཀྱང་མེ་ལྕེ་ལྟ་བུའི་སེམས་ནང་གི་ཚོར་བ་དེ་རང་ཉིད་ཀྱིས་ཉིན་མཚན་དུས་དྲུག་དུ་དྲན་བཞིན་པའི་ཕ་གཞིས་སྣུམ་པོར་བརྗོད་མ་ཐུབ་པའི་འཁང་སེམས་དེ་ལ་ང་ཚོས་བདེན་ཁ་མི་སྟེར་རང་སྟེར་ཏུ་ཆགས་ཡོད། འདི་ལས་ཁོས་ཅི་ཡང་བརྗོད་མ་ཐུབ་པའི་བཅོས་མིན་གྱི་ཚོར་ཤེས་ཟབ་མོ་དེ་སྦ་གསང་ཅི་ཡང་མེད་པར་ང་ཚོའི་སྤྱན་ལམ་དུ་བསྟར་བ་ནི་སྙན་ངག་འབྲི་མཁན་ཞིག་གི་བཅོས་མིན་གྱི་རང་གཤིས་ངོ་མ་ཕྱིར་ཀློག་པ་པོ་དག་ལ་གསལ་རྗེན་དུ་བསྟན་པས་ཡིན་སྲིད།
ʼʼརྨི་ལམ་ལྟ་བའི་འཇིག་རྟེན་ན

དམྱལ་བ་ལྟ་བུའི་དྲན་ཤེས་ཀྱིས་ཁྱེད་ཚོར་སྒུག་བཞིན་ཡོད

ད་དུང་སྒུག་བཞིན་ཡོད དཔའ་རྒོད་ཚོʼʼ  འདི་ལྟར་ཉམས་དམའ་བའི་འཚོ་གནས་གཉིས་ཀྱི་གདོང་རིས་འཚོལ་བཞིན་པའི<<སྒེར་གཅོད>>ཀྱིས་རང་གཤིས་བརྟན་པོ་ཞིག་དང་བཀྱེད་ཡངས་ཀྱི་སྙིང་སྟོབས་ཤིག   ཡང་ན་འཚོལ་སྙེག་གི་བློས་བསླངས་གསར་བ་ཞིག་བསྣབས་ཏེ་ཕེབས་བྱུང་བས།  འདི་ནི་བཙན་བྱོལ་སྤྱི་ཚོགས་བྲན་གཤིས་ལས་གྲོལ་བའི་དུང་བརྡ་ལྟ་བུར་བཤད་ཀྱང་མི་ཆོག་པ་མེད་པར་སྣང་།  རྒྱུ་མཚན<<སྒེར་གཅོད>>ཀྱིས་ད་ལྟའི་བར་དུ་རང་གིས་བདམས་ཟིན་པའི་ལམ་ཁ་དེ་རང་ཉིད་ཀྱིས་འཚོལ་རྒྱུ་ལས་ཚོགས་སྡེ་དང་མི་ཆེན་སུ་ཞིག་ལའང་ཁ་གཡང་དང་ངོ་བསྟོད་ཀྱི་ཚིག་འབྲུ་གཅིག་ཀྱང་སྐྱོར་མྱོང་མེད་ལ། དེ་ལས་ཀྱང་ཤེས་དགོས་པ་ཞིག་ནི་ཚང་མས་རྒྱུན་ཐག་གཅིག་གི་སྟེང་ན་གཅིག་མཚུངས་ཀྱི་རྟིང་སྐུལ་ཙམ་ལ་སྐྱབས་སུ་རེ་བའི་འདོད་བློ་དེ་ཡང་ཡོངས་སུ་དོར་ཚར་བས་ཡིན། མཐའ་དོན།  <<སྒེར་གཅོད>>ནི་བྱེར་གྱུར་བོད་པ་ཚང་གི་བྲན་གཤིས་སྲུངས་མ་ཐུབ་པའི་བསམ་བློའི་སྒེར་གཅོད་ཅིག་ཡིན་ལ། གཞིས་སྡོད་བོད་མི་ཚོའི་ཁྲག་རྒྱུན་གྱིས་བསླངས་པའི་རིགས་ཞེན་གྱི་ངར་ཤུགས་དེ་ལས་མ་འདས་སོ།
༢༠༡༠ལོའི་ཟླ་༤  ༢༩ཉིན་བྲིས།

ངེད་དྲ་ཚིགས།