འོད་དཀར་དྲ་ཚིགས།

ཕྱི་ཚེས་༡༩འི་ཉིན་འདི་གར་འབྱོར་བའི་གནས་ཚུལ་ལྟར་ན།  ཕྱི་ལོ་༢༠༡༢་ལོའི་ཟླ་གཉིས་པར་མཚོ་སྔོན་ཞིང་ཆེན་ཐེམ་ཆེན་རྫོང་བོང་སྟག་དགོན་ པའི་དགེ་བསྐོས་ཟུར་བ་དང་། དཔེ་ཁྲིད་དགེ་རྒན་དམ་ཆོས་བཟང་པོ་ལགས་ཀྱིས་བོད་མི་རིགས་ཀྱི་རང་དབང་ཆེད་རང་ ལུས་མེར་བསྲེགས་ནས་གྲོངས་རྗེས། དོན་རྐྱེན་དེ་བསྙད་ནས་རྒྱ་ནག་གཞུང་གིས་བོང་སྟག་གི་ཨེ་ཝམ་ཏ་རེ་དགོན་པའི་དགེ་ འདུན་པ་དགུ་དང་མི་སྐྱ་གཅིག་བཅས་ལ་ལོ་གཅིག་ནས་བཅུ་བར་གྱི་བཙོན་འཇུག་ཁྲིམས་ཆད་བཅད་ཡོད་པ་དང་། དེའི་ཁྲོད་ཀྱི་ཕ་ཡུལ་ཐེམ་ཆེན་རྫོང་མཁར་དམར་ཡུལ་ཚོའི་དགེ་འདུན་པ་དམ་ཆོས་ཚུལ་ ཁྲིམས་ལགས་ཟླ་བ་འདིའི་ཚེས་༡༩ཉིན་ལོ་གཉིས་དང་ཕྱེད་ཀའི་བཙོན་དུས་ལོན་ཏེ་གློད་ བཀྲོལ་ཐོབ་འདུག
ཡང་གནས་ཚུལ་ལྟར་ན། ཐེམ་ཆེན་རྫོང་སྲིད་ཁྲིམས་མི་སྣས་མང་ཚོགས་ཀྱིས་ཁོང་ལ་ཕེབས་བསུ་ཞུ་མི་ཆོག་ པའི་བཀའ་རྒྱ་བཏང་སྟེ་བཙོན་འཇུག་བྱེད་སའི་ཟི་ལིང་བཙོན་ཁང་ནས་ཐད་ཀར་མཁར་དམར་ཡུལ་ཚོའི་རང་ཁྱིམ་དུ་བསྐྱལ་ཡོད་འདུག
ཡིན་ནའང་དགེ་འདུན་པ་དམ་ཆོས་ཚུལ་ཁྲིམས་ལགས་རང་ཁྱིམ་དུ་འབྱོར་མ་ཐག་ཁོང་གི་ཆོས་གྲོགས་དང་། ནང་མི། ཡུལ་ཚོའི་མི་མང་བཅས་ཀྱིས་མཇལ་དར་ཕུལ་བ་དང་། ཟས་སྣེས་སྡེར་ཁ་བསྒྲིགས་ནས་ཕེབས་བསུ་ཞུས་ཡོད་པ་རེད།
ཡང་གནས་ཚུལ་ཡོང་ཁུངས་ཀྱིས།  དགེ་འདུན་པ་དམ་ཆོས་ཚུལ་ཁྲིམས་ལགས་ཀྱི་གཟུགས་གཞིའི་བདེ་ཐང་དང་།  ཁོང་དགོན་པར་ཆོས་ཞུགས་བྱེད་ཆོག་མིན་སོགས་ད་ལྟ་གསལ་ཆ་མེད་ཚུལ་འགྲེལ་བརྗོད་ གནང་བྱུང་།
ཕྱི་ལོ་༢༠༡༢ལོའི་ཟླ་༢་པའི་ཚེས་༡༧འི་ཉིན། བོང་སྟག་དགོན་པའི་དགེ་བསྐོས་ཟུར་བ་དང་། དཔེ་ཁྲིད་དགེ་རྒན་དམ་ཆོས་བཟང་པོ་ལགས་ཀྱིས་རང་ལུས་མེ་རུ་བསྲེགས་ནས་གྲོངས་ རྗེས། སྐྱ་སེར༢༠ལྷག་འཛིན་བཟུང་བྱས་པའི་ཁྲོད་ནས་ལོ་༡༠ཡི་ཁྲིམས་ཆད་ཕོག་པའི་དགེ་བཤེས་མཁས་གྲུབ་རྒྱ་མཚོ་དང་། ལོ་དགུའི་ཁྲིམས་ཆད་ཕོག་པའི་སངས་རྒྱས་རྒྱ་མཚོ་སྤུན་མཆེད་གཉིས་དང་། ཡང་ལོ་༨ཀྱི་ཁྲིམས་ཆད་ཕོག་པའི་སྐལ་བཟང་བྱང་སེམས་བཅས་ད་ལྟ་ད་དུང་རྒྱ་གཞུང་གི་བཙོན་འོག་ན་ཡོད་འདུག