ཁ་སྒང་གཡང་འབུམ་ཚེ་རིང་། ༼ཚན་པ་དང་པོ།༽ ཐུགས་རྗེ་ཉི་མ་འོད་དུ་འཛུམ་པའི་ཕྱག་ན་པད་མོ་གཙུག་གིས་བསྟེན།། རྒྱལ་ཀུན་ཡེ་ཤེས་གཅིག་ཏུ་བསྡུས་པའི་འཇམ་དཔལ་མཁྱེན་པའི་གཏེར་ལ་འདུད།། རྒྱུད་མངས་སྒྲ་ཡིས་ངག་གི་དཔལ་སྟེར་དབྱངས་ཀྱི་ལྷ་མོར་དད་པས་འཁྱུད།། ཚེ་རབས་ཀུན་ཏུ་རྗེས་སུ་འཛིན་པའི་སྐྱབས་གནས་དཀོན་མཆོག་སྤྱི་བོས་མཆོད།། གདོད་ནས་མཐུ་དང་སྨོན་ལམ་གཙང་པས་སྟག་འཚེར་ལིམྦིའི་ཚལ་དུ་བལྟམས།། ཐུབ་བསྟན་རིན་ཆེན་གསེར་གྱི་སྙིང་བོ་འགྲོ་བ་བདེ་བའི་ས་ལ་བཀྲམས།། འཁོར་བར་མི་ལྟུང་སྐྱེ་རྒུ་འདྲེན་པའི་རྣམ་དག་སྒྲོན་མེ་འོད་དུ་འབར།། སྲིད་པ་གསུམ་གྱི་ཡུལ་ཁམས་འདི་ན་བྱམས་བརྩེའི་འོད་རླབས་འཛུམ་གྱིས་སྒེག ། རྣམ་འདྲེན་རྒྱལ་བའི་ཞིང་སར་ཟིན་ཀྱང་འཁོར་གནས་འགྲོ་བའི་དོན་ལ་བཞུགས།། འཁོར་བའི་ཆོས་ཀྱི་རྩ་བ་བཅད་ཀྱང་འཁོར་བར་གནས་རྣམས་ཐུགས་རྗེས་བསྡམས།། ཉིན་མཚན་དུས་ཀྱི་ཆ་ཤས་རེར་ཡང་གཞན་དག་བདེ་བའི་ཆེད་དུ་བརྩོན།། གཏིང་དཔག་དཀའ་བའི་ཐུགས་རྗེ་མེ་ཏོག་སྐྱེ་རྒུ་དགའ་བའི་དཔལ་དུ་བཞད།། སྙིགས་མའི་ལུས་འཛིན་བདུད་ཀྱི་རྐང་བས་འཇིག་རྟེན་ས་ཡི་ལྟོ་བ་རྡུང་།། འཁྲུག་རྩོད་གདོན་གྱི་མཆེ་བ་རྣོན་པོས་ཕན་བདེའི་སྲོག་རྩ་དུམ་བུར་གཅོད།། ཉམ་ཆུང་འགྲོ་བའི་སྡུག་བསྔལ་མུན་པ་ཕྱོགས་དང་མཚམས་ན་དྲག་ཏུ་འཐིབས།། མཐའ་ཡས་སྡུག་བསྔལ་ཉམ་ང་འདི་ལས་སྐྱོབ་པའི་མགོན་དཔུང་ཁྱེད་ལས་སུ།། གང་སྐུ་ལྗོན་པའི་གྲིབ་བསིལ་འོག་ནས་ཚ་བས་གདུངས་རྣམས་ངལ་གསོ་བསྟེན།། བསོད་ནམས་ཁུར་གྱིས་དུད་པ་འདི་ཞེས་སྐྱེ་བོ་མ་ལུས་ཁ་ལས་བསྒྲོགས།། མཚན་གྱི་སྙན་པ་ཐོས་པ་ཡིས་ཀྱང་མི་རྣམས་དད་པའི་སྤུ་ལོང་རྒྱས།། ངོ་མཚར་རྨད་བྱུང་ཀུན་ཁྱབ་འཕྲིན་ལས་སུ་ཞིག་གིས་ནི་བརྗོད་པར་ནུས།། མེས་པོ་རྣམ་པའི་ཞབས་རྗེས་དར་ཆ་པོ་ཏ་ལ་ཡི་རྩེ་ལ་བཙུགས།། རྟུལ་ཕོད་བཙན་པོའི་དཔུང་གི་གྲགས་དཀར་ཡར་ཀླུང་གཙང་བོའི་རྒྱུན་དང་བསྡེབས།། ལོ་པཎ་མཁས་པའི་དཀའ་སྤྱད་འབྲས་བུ་སྲིད་པའི་ཁམས་ལ་རི་མོར་བྱས།། བཙན་པོའི་རྒྱུད་ཀྱི་འདས་མ་ད་གསུམ་ཁྱེད་ཀྱིས་འཛམ་གླིང་ཁྱོན་ལ་བཀྲམས།། སྲོག་ཆགས་ཕྲ་མོའི་བདེ་སྡུག་ཕྱིར་ཡང་ཐུགས་བསྐྱེད་སྨོན་ལམ་རྒྱ་ཆེན་མཛད།། ཁ་བ་རི་བོའི་ཆོས་སྲིད་དཀྱིལ་འཁོར་མི་ནུབ་ལྕགས་ཀྱི་ར་བས་བསྐོར།། འཛམ་གླིང་སྤྱི་ཡི་ཁོར་ཡུག་བསིལ་ཕྱིར་གྲིབ་མ་སྣུམ་པོའི་གདུགས་དཀར་བསྒྲེངས།། གངས་རིའི་མགོན་པོ་ཁྱེད་ཀྱི་མཛད་རླབས་ས་ཆེན་གཡོ་བའི་དཔལ་དུ་འཕྱུར།། སྐུ་རབས་སྔོན་མའི་ཐུགས་བསྐྱེད་ཟླ་བ་དུས་བབ་མཁའ་ཡི་ཐིག་ལེར་འཛུམ།། དུས་འགྱུར་དུས་ཀྱི་འགྲོས་དང་བསྡོངས་ནས་ཀུན་ཕན་བསིལ་ཟེར་འོད་དུ་འཚེར།། གཉིས་ཕན་དབུ་མའི་ཟབ་ལམ་སྲིད་བྱུས་དཀའ་རྙོག་སེལ་བའི་ཐབས་སུ་སྩལ།།...

སེམས་སེམས་བྱུང་གི་རྒྱུ་བ་དང་འབྲེལ་བའི་མྱོང་ཚོར་སྒྱུ་མའི་ལབ་བརྡོལ། ཁ་བ་ཅན། གཙོ་སེམས།ཅི་ཡང་འཆར་ལ་གང་ཡང་གསལ་ནུས་པའི།།དྭངས་གསལ་སེམས་ཀྱི་ཤེལ་དཀར་མ་མ་ལས།།འཇིག་རྟེན་ཟང་ཟིང་རྒོད་པའི་ཞབས་རྗེས་སུ།།ཇི་བཞིན་འབྲང་བའི་སེམས་བྱུང་འདི་ལྟར་འཕྲོས།། ཀུན་འགྲོ་ལྔ།བདེ་སྡུག་འདྲ་མིན་མྱོང་བའི་བྱེད་པོ་ལ།།ཡིན་མིན་སྤུ་རིས་འབྱེད་པའི་འདུ་ཤེས་འཁྲི།།རྣམ་རིག་གཡོ་འགུལ་བྱེད་པའི་སེམས་པ་ཞིག།ཚོར་བའི་རྟེན་དུ་བཞེངས་པའི་རེག་པར་འདྲིས།།ལེགས་ཉེས་གང་ལའང་གཏོད་པའི་ཡིད་བྱེད་བཅས།།ཀུན་འགྲོ་སྤུན་ལྔ་རིག་པའི་མ་མར་འཁྱུད།། ཡུལ་ངེས་ལྔ།གང་ལའང་དོན་གཉེར་བྱེད་པའི་འདུན་པ་རུ།།རིག་པའི་གཏད་སོ་འཛིན་པའི་མོས་པ་མཛེས།།བརྗེད་ངས་གཉེན་པོར་གྱུར་པའི་དྲན་པ་དང་།རྩེ་གཅིག་དམིཊ་པར་གཞོལ་བའི་ཏིང་འཛིན་བཅས།ལེགས་ཉེས་འབྱེད་པའི་ཤེས་རབ་ཟླ་རུ་བཞེངས།། དགེ་བ་བཅུ་གཅིགརྙོག་བྲལ་ཡི་རང་དགེ་བའི་དད་པ་ནི།།རང་དང་གཞན་གྱི་ཁ་ན་མ་ཐོ་བར།།འཛེམས་བྱེད་ངོ་ཚ་ཤེས་དང་ཁྲེལ་ཡོད་བཅས།།དུག་གསུམ་དངོས་ཀྱི་གཉེན་པོ་བསྒོམ་ན་འདོད།།ལེགས་པའི་བྱ་བར་སྤྲོ་བའི་བརྩོན་འགྲུས་དང་།།གནས་ངན་ལེན་གྱི་རྒྱུན་གཅོད་ཤིན་སྦྱངས་སོགས།།ཉོན་མོངས་གནས་ལས་སྲུང་བའི་བག་ཡོད་ལྷན།།བྱིང་རྒོད་ཉམས་པར་བྱེད་པའི་བཏང་སྙོམས་ཤིག།རྣམ་པར་མི་འཚེའི་སེམས་དང་འགྲོགས་ན་སྙམ། རྩ་ཉོན་དྲུག ཟག་བཅས་ཡུལ་ལ་སྲེད་པ་རྒྱུ་ཞིང་སྨྱོ།། རང་རྒྱུད་བརླམས་ཤིང་གནོད་པའི་ཁོང་ཁྲོ་འཁྲུགས།།ཁེངས་ཤིང་མཐོ་སེམས་ང་རྒྱལ་སྐྱེ་ཉེན་ཆེ།།ལས་ཉོན་ཀུན་གྱི་རྟེན་གྱུར་མ་རིག་པ།།ཕྱིན་ཅི་ལོག་པའི་ལྟ་ངན་མཐིལ་དུ་ཟུག།ལས་འབྲས་སོགས་ལ་ཡིད་གཉིས་ཟ་བའི་བློ།།ཐེ་ཚོམ་ཉོན་མོངས་ཅན་གྱི་སེམས་འདིར་སྐྲག། ཉེ་ཉོན་ཉི་ཤུ། གནོད་པའི་ཐབས་ལ་སྦྱོར་བའི་ཁྲོ་བ་དང་།།ཁོང་ཁྲོ་འདྲེན་ཞིང་མི་བཟོད་འཁོན་འཛིན་སེམས།།ཀུན་སློང་ངན་པས་ཁ་ན་མ་ཐོ་འཆབ།། འཁོན་འཛིན་སྔོན་དུ་སོང་ཞིང་ཚིག་རྩུབ་སློང་།།གཞན་གྱི་ཕུན་ཚོགས་གཞོམ་འདོད་ཕྲག་དོག་རྒོད།།རྙེད་དང་བཀུར་སྟིར་ཞེན་པའི་སེར་སྣ་མང་།།སུ་ཞིག་རྨོངས་དང་བསླུ་བར་བྱེད་འདོད་པའི།།གཡོ་སྒྱུའི་སྤུན་ཟུང་གཞན་ལ་གཏོང་ཉེན་འདུག།རྒྱགས་པའི་འདུ་ཤེས་སྤོབས་པའི་ཉོན་མོངས་དང་།།གང་ལའང་ཐོ་འཚམས་འདོད་པའི་འཚེ་བ་སོགས།།བདག་གཞན་སོ་སོའི་ཉེས་སྤྱོད་སྣ་ཚོགས་པར།།མི་འཛེམས་བསམ་པའི་ངོ་ཚ་ཁྲེལ་མེད་མངོན།།སེམས་མུན་བབས་པས་རྨུགས་པ་བློང་བློང་པོར།། དམིགས་པ་གཅིག་ལས་གཡོ་བྱེད་རྒོད་པ་བྲལ།།ཡིད་ཆེས་འགལ་ཟླར་གྱུར་པའི་མ་དད་པ།།དགེ་བར་ཞུམ་པའི་ལས་ཅན་ལེ་ལོར་བསྙེས།།ངན་པར་སེམས་མི་སྲུང་ཞིང་བག་མེད་སྤྱོད།།ལེགས་ཚོཊ་ཤོར་ཞིང་གཡེང་བའི་བརྗེད་ངས་འཐིབ།།གང་ལའང་དཔྱོད་མིན་གྱ་ཚོམ་འཇུག་བྱེད་ཅིང་།།དམིགས་པར་མི་གཏོད་འཕྲོ་བའི་རྣམ་གཡེང་འདུར།། གཞན་འགྱུར་བཞི།དབང་ཤེས་ནང་དུ་སྡུད་བྱེད་རྨོངས་པའི་གྲོགས།།བཟང་ངན་སོ་སོར་མི་དགའ་འགྱོད་པའི་སེམས།ཡུལ་ལ་རྩིང་བར་འཇུག་པའི་རྟོག་པ་བཅས།།ཕྲ་ཞིང་ཞིབ་པར་བརྟག་པའི་དཔྱོད་པ་རྣམས།།དགེ་སྡིག་གར་འགྲོ་རང་གི་འདུན་པར་རག། དེ་ལྟར་སེམས་དང་སེམས་བྱུང་སྣ་ཚོགས་ཤིག།རང་སེམས་དྭངས་གསལ་ཤེལ་གྱི་མེ་ལོང་ལས།།ཅི་ལྟར་འཕྲོས་པའི་མྱོང་ཚོར་ལབ་བརྡོལ་ཞིག།འཕྲལ་དུ་སྨྱུག་རྩེར་དྲངས་ཏེ་ཤར་མར་བཀོད།། ཕྱི་ལོ་ ༢༠༡༤ ཟླ་ ༨ ཚེས་ ༡༧ རེས་གཟའ་ཉི་མའི་དགོང་མོར་ཁ་བ་ཅན་པས། ངེད་དྲ་ཚིགས།...

གཟུངས་ཕྱུག་སྐྱིད། རི་བོ་ཀེར་གྱིས་འགྲེང་ཡང་མུན་པ་མཐའ་རུ་མ་སངས།། མཚན་མོ་ལྟེམས་ཀྱིས་འཁྱིལ་དུས་རླབས་སྒྲ་གང་ལ་ཡལ་སོང་།། གོམ་ཆུང་མདུན་དུ་སྤོས་ཀྱང་ཕྱོགས་བཞི་གཡང་ལ་གཟེད་འདྲ།། རྨི་ལམ་ཞགས་པ་དཀར་པོ་སུ་ཡི་སྐེ་ལ་བསྐོན་ཡོད།། གླུ་ཞིག་རྒྱང་དུ་གྱེར་བ་ནགས་མའི་ཀློང་ནས་འཇགས་སོང་།། དུང་སེམས་འོ་ཡི་རི་མོ་ས་རྡོའི་གསེང་ལ་ཐིམས་སོང་།། ལུས་དྲིའི་རེག་བྱ་རེ་རེ་མཚན་མོས་ཧྲུག་ཧྲུག་འཆའ་དུས།། ཚོར་བ་སྐྱུར་མོ་སྐྱུར་མོ་ད་དུང་སུ་ལ་བསྲིངས་ཡོད།། རི་བོའི་ཕ་རོལ་དེ་ལ་འཇའ་ཡི་སྐས་ཤིག་བཙུག་ཀྱང་།། ཚུར་རུའི་མཚོ་མོའི་ངོགས་ནས་གྲུབ་རིས་གང་དུ་ཡལ་སོང་།། ནམ་མཁའ་མཐོན་པོ་མཐོན་པོ་མིག་གི་ནང་ལ་བཅུས་པས།། ས་གཞི་ཆེན་པོ་ཆེན་པོས་ལུས་ལ་ལྷག་རླུང་བརྒྱབ་བྱུང་།། རྒྱུ་སྐར་ཕྲེང་རྒྱན་རིང་མོ་དགུ་ཚིགས་ངོས་ན་འཛུམ་དུས།། མིག་གི་རྒྱུན་ཐག་ཕྲ་མོ་ཞོགས་མཚམས་མེད་པར་བཞུར་སོང་།། ཉི་ཟླའི་ཁ་རླངས་དཀར་པོ་རི་ཐང་གཉིས་ལ་ཁྱབ་ཀྱང་།། སྨག་གི་ཡོལ་བ་ནག་པོ་བར་མཚམས་ད་དུང་མ་གསལ། ༢༠༡༤ ༨ ༩ ངེད་དྲ་ཚིགས།...

༄༅། །ལེགས་པར་བཤད་པ་ཤིང་གི་བསྟན་བཅོས་ལུགས་གཉིས་ ཡལ་འདབ་བརྒྱ་ལྡན་ཞེས་བྱ་བ་ཞུགས་སོ། ། གོང་ཐང་བསྟན་པའི་སྒྲོལ་མེ། ཨོཾ་བདེ་ལེགས་སུ་གྱུར་ཅིག རིན་ཆེན་སེམས་ཀྱི་རྩ་བ་བརྟན། །རླབས་ཆེན་ཚོགས་གཉིས་ཡལ་ག་རྒྱས། ། སྐུ་གསུམ་འབྲས་བཟང་སྙེ་མས་དུད། །སངས་རྒྱས་ལྗོན་པ་དེ་ལ་འདུད། ། སྣང་བ་དཔེ་རུ་ཤར་བ་ཡི། །རྣལ་འབྱོར་དེ་ལ་གདམས་ངག་མང་། ། ནགས་ཀླུང་སྟུག་པོའི་དོ་ར་རུ། །ཤིང་ལོའི་ཕུང་པོ་ཟད་པ་མེད། ། དཔག་བསམ་ཤིང་ལ་བརྟེན་བྱས་ན། །དགོས་འདོད་ཐམས་ཅད་ཆར་དུ་བསྙིལ། ། དེ་བཞིན་བཤེས་གཉེན་དམ་པ་ལ། །བརྟེན་ན་ལེགས་ཚོགས་ལྷུན་གྱིས་གྲུབ། ། བཤེས་ལ་མི་གུས་སྐྱེ་བོ་དེས། །གཞུང་བརྒྱ་ཤེས་ཀྱང་དོན་མི་འགྱུར། ། ཤིང་སྐམ་ལོ་བརྒྱ་ཆུར་འཕངས་ཀྱང་། །ལོ་འདབ་སྐྱེ་བ་སྲིད་ན་མེད། ། དད་ལྡན་རང་བཞིན་བཟང་པོ་དེར། །ཚིགས་བཅད་གཅིག་ཙམ་གྱིས་ཀྱང་ཕན། ། རྐང་འཐུང་གསར་པའི་མྱུ་གུ་དེ།...

རྩོམ་པ་པོ། ལྷ་ཀླུ་ཚེ་དབང་རྡོ་རྗེ།          ལུང་ཤར་ནི་ཟུང་ཆུང་ཤེས་རབ་གྲགས་པའི་མི་རྒྱུད་ཡིན་པ་དང་། ལུང་ཤར་གྱི་འཛིན་ཁོངས་ཤར་ཕྱོགས་ཟུར་ཆུང་པའི་བཞུགས་ཡུལ་རྙིང་པ་དེར་དེང་སང་ཟུར་ལུང་ཞེས་གྲགས། དེར་བརྟེན་ཏྭ་ལའི་བླ་མ་སྐུ་ཕྲེང་ལྔ་པའི་དུས་ས་གནས་སྲིད་གཞུང་གི་དཔོན་རིགས་ནང་ཞུགས། མི་རྒྱུད་རིམ་པ་ནས་སྲིད་གཞུང་གི་ཞབས་སྡོད་ཞུས། ལུང་ཤར་ནི་གཞིས་རྩེ་ཀྲོན་ཆུས་བཞད་མཐོང་སྨོན་རྫོང་ཁོངས་རྟ་ནག་ཁུལ་གྱི་སྒེར་པའི་གྲས་ཤིག་རེད། ངའི་མེས་པོ་སྲིད་གཞུང་གི་དྲུང་འཁོར་ལུང་ཤར་ལྷུན་གྲུབ་རྡོ་རྗེ་དང་། རྨོའོ་བདེ་ཆེན་པད་མོ་གཉིས་ཀྱི་བུར་བོད་ལྕགས་སྦྲུལ་༼༡༨༨༡༽ལོར་ཕ་དམ་པ་དེ་འཁྲུངས་ཤིང་། མཚན་ལ་རྡོ་རྗེ་ཚེ་རྒྱལ་ཞེས་བཏགས།     ཁོང་དགུང་ལོ་བརྒྱད་ཙམ་ལ་སླེབས་དུས་ཡབ་གཤེགས་འདུག་ཀྱང་། ཡུམ་ནས་གཅེས་པར་བསྐྱངས་ཏེ་འཚར་ལོངས་བྱུང་ཞིང་། ཤེས་ཡོན་རིག་གནས་སློབ་སྦྱོང་ཐད་ལའང་ཡུམ་གྱིས་ཐུགས་འཁུར་གནང་སྟེ་དགེ་རྒན་མང་པོ་བསྟེན་སྟབས་སྦྱང་འབྲས་ཧ་ཅང་ཡག་པོ་བྱུང་འདུག དེར་བརྟེན་ཁོང་གིས་ཡུམ་ལ་ཐོག་མཐའ་བར་གསུམ་དུ་གུས་བརྩེ་ཧ་ཅང་ཆེན་པོ་གནང་གི་འདུག ངའི་ཕ་ནི་བོད་ལུགས་གསོ་བ་རིག་པ་སྦྱང་རྒྱུར་དགའ་པོ་ཡོད་སྟབས་དགེ་རྒན་བསྟེན་བཏུགས་ཀྱིས་སྨན་དཔྱད་བྱེད་སྒོ་སློབ་སྦྱོང་ཧུར་བརྩོན་གནང་རྐྱེན་ལག་རྩལ་ཡག་ཙམ་ཤེས་ཐུབ་པ་བྱུང་། རྗེས་སུ་ང་ཚོ་ལོ་ན་སོན་དུས་ཀྱང་པྭ་ལགས་ནས་ལས་ཞོར་ནད་པར་རྩ་ཆུ་བརྟག་དཔྱད་ དང་། བོད་ལུགས་ཀྱི་སྨན་སྟེར་བ་སོགས་གནང་གི་འདུག དེ་བཞིན་ཁོང་དགུང་ལོ་ཆུང་དུས་ནས་གཞས་དང་ཞབས་བྲོ་ལའང་ཧ་ཅང་དགའ་པོ་ཡོད་སྟབས་རྒྱུན་དུ་ཧའོ་ཅིན་དང་ཡང་ཅིན་གཏོང་གནང་བ་མ་ཟད།  སྐབས་འགར་ལྷ་སར་ཡོད་པའི་རོལ་ཆ་གཏོང་མི་རྣམས་བསྡུ་རུབ་གནང་སྟེ་མཉམ་གཏོང་སྤྲོ་སྐྱིད་ཡང་ཡང་གནང་གི་འདུག དེའི་ནང་རོལ་ཆ་གཏོང་རོགས་སུ་ཡོང་མཁན་གཙོ་བོ་སྦ་ཡི་ཝ་ལི་༼ཧུད་རིགས༽དང་། དལ་ཞོལ་ལི༼རྒྱ་རིགས༽ འ་མན་རི། རྣམ་རྒྱལ། ནང་མའི་གཞས་གཏོང་མཁན་ཡེ་ཚ༼ཧུད་རིགས༽སྟོད་གཞས་གཏོང་མཁན་ཕུར་བུ་སྒྲོལ་མ་དང་། བསོད་ནམས་སྐྱིད་འཛོམས། དབྱང་སྐྱིད་ཟེར་བ་བཅས་སྐད་གྲགས་ཡོད་པ་བུ་མོ་གསུམ་སོགས་ཡོད།     དགུང་གྲངས་ཉི་ཤུ་སྐོར་ལ་ཕེབས་དུས་རྟ་ནག་སྒེར་ལྷས་ཁུད་པའི་བུ་མོ་མདུན་ཐབས་སུ་བཞེས་པ་དེ་ལ་ཕྲུ་གུ་ཆ་པ་རུ་ཟུར་དབང་ཆེན་གཡུ་ལྷ་དང་། སྒྲོལ་མ་ཕུག་པད་མ་གཉིས་བཙས།...