བཅུད་པར་རྫ་སྐྱེས།
འཆར་སྣང་མག་མོག་གི་ཀློང་ན
འོད་ཟེར་ཆེམ་ཆེམ་འཕྲོ་བའི་པོ་ཏ་ལ
གོ་ལའི་ཡང་རྩེ་ན
ཁྱེད་ཀྱི་ལོ་རྒྱུས་ཀྱི་ཤ་དྲོད་ལ་ཚ་རླབས་འཕྱུར
པོ་ཏ་ལ ཁྱེད་ཀྱིས་བཞག་པའི་ལོ་རྒྱུས་ཀྱི་རྨ་ཁ་རེ་རེ
ང་ཚོའི་མདུན་སྐྱོད་ཀྱི་བགྲོད་ལམ་ཡིན
སྙན་ངག་པའི་པིར་རྩེ་ན ཁྱེད་ཀྱི་དབྱངས་སྙན་སིལ་ལི་ལི
གངས་ཕྲུག་ཚོའི་ཕུགས་འདུན་ན་ཁྱེད་ཀྱི་འཕར་རྩ་ལྷོག་ལྷོག་ལྡིང
བཞུད་པའི་བགྲོད་ལམ་རེ་རེ་རྟོགས་བརྗོད་ལ་བྲིས་ཤིང
འཚོ་བའི་ལྷག་བསམ་དཀར་པོ་ཁ་བཏགས་ཀྱིས་དཀྲི་་བཞིན
བསམ་གཞིགས་ཀྱི་བློས་བསླངས་ལ་མེ་ཁ་གསོས
པོ་ཏ་ལ ས་མཐོའི་མི་རིགས་ཤིག་གི་བློ་གྲོས་ཀྱི་དྭངས་མ་ཡ
རྒྱང་བཞུད་དཔའ་བོ་ཚོའི་དཔའ་སྙིང་གི་གཡུ་འབྲུག
ད་དུང ཁྱེད་ཀྱི་མཁའ་དབྱིངས་ན་ལྡྀ་རི་རི
སྲོང་བཙན་གྱིས་ཐེམ་སྐས་རེ་རེ་བར་སྣང་ལ་བསྒྲེངས་དུས
ཁྱེད་ལ་སྤོབས་པའི་ངར་ཆུ་ཅི་འདྲའི་མང་པོ་ཞིག་རྒྱས་ཡོད་ཨང
དེ་དུས གངས་རི་ཨ་མའི་དབུ་རྩེ་ན་སྨུག་སྤྲིན་དྭངས་ཤིང
གཙང་ཆབ་སྔོན་མོའི་བཞུར་རྒྱུན་ལ་དལ་བ་མེད
ཁྱེད་ཀྱིས་ལྷག་བསམ་དར་གྱིས་བྱུགས་པའི་མི་རིགས་འདིའི
གཤིས་རྒྱུད་དང་སྙིང་སྟོབས བརྩོན་འགྲུས་དང་བརྟུལ་ཕོད
ཡོད་ཚད་ཡར་ཀླུང་གཙང་བོའི་འབབ་རྒྱུན་ལ་བཅོལ་ཨེ་ཡོད
པོ་ཏ་ལ ལོ་ངོ་སྟོང་ཕྲག་གི་རི་ཐང་ན
གཡང་དཀར་འཚོ་བའི་ཨ་ཕ་ཚོའི་ཤུགས་རིང་ནར་མོ
ཁ་བཏགས་དཀར་པོའི་གནས་ལམ་ན
ལང་ཚོ་ཤོར་བའི་ཨ་མ་ཚོའི་མིག་ཆུ་སྐྱུར་རོ
ད་དུང རྐང་རྗེན་ལ་སྤང་ཐང་ན
ཨ་བྲ་འཛིན་པའི་བྱིས་པ་ཚོའི་དྭངས་གཙང་གི་རྨི་ལམ་མོད་པོ
ཡོད་ཚད་ཁྱེད་ལས་ཟློག་པའི་སྐྱོ་གར་ཨེ་ཡིན
པོ་ཏ་ལ སྙན་ངག་པའི་བློས་བསླངས་སྒུལ་མཁན
བཙན་པོའི་མངའ་ཐང་གི་གསེར་ཁྲི་མཐོན་པོ
དར་མ་འུ་དམ་གྱི་གླང་རྭས་བཤིགས་པ་ནས་བཟུང
རྩྭ་ལྗང་དང་མེ་ཏོག་གི་ཁ་དོག་རིམ་གྱིས་རྙིད་ཅིང
ནགས་ལོ་དང་ཆུ་ཕྲན་གྱིས་ཤུགས་གླུ་གྱེར་བ
ཁྱེད་རྐྱང་རྐྱང་གིས་མཐོང་ཐེངས་རེར
པོ་ཏ་ལ སྐྱོ་ངལ་དང་མིག་ཆུས་མི་ཡུལ་བངས་པ་སུ་ཡིས་རྟོགས
པོ་ཏ་ལ
རྨོངས་པའི་དམུས་ལོང་གི་རལ་གྲི་རྣོན་པོ་སྙིང་ཁར་གཏད་དུས
ནང་འཁྲུག་གི་རྩྭ་ཕུང་འཚུབ་མས་འཁུར་བཞིན
ལོ་ངོ་ཅི་ཙམ་འགོར
དེ་ནས་བཟུང རྫ་ཁྲ་ཡག་འབྲོང་རྒོད་ཀྱི་རྭ་ཟུང་བསྐམས་ཤིང
ནགས་རྒྱ་རྫོང་རྒྱ་སྟག་གི་ཐིག་ལེ་ནོགས
གངས་རི་ཨ་མའི་སྙིང་ཁ་ནས་རོལ་དབྱངས་འཇགས
ལོ་རྒྱུས་ཀྱི་རྨ་ཁ་ལ་དེ་ལྟར་མིག་ཟུང་བགྲད་པའི་པོ་ཏ་ལ
འཁྱགས་ཟིན་པའི་དུར་ཕུང་ཞིག་གི་གཟི་བརྗིད་གླེང་བཞིན
གང་དུ་བགྲོད
འཛམ་གླིང་གི་ཡང་རྩེ་ན་ཡུན་གྱིས་བགྲོད་པའི་པོ་ཏ་ལ
ང་ཚོ་ལ་ཡང་བསྐྱར་ཕྱི་མིག་ཅིག་ཅིས་ཀྱང་གཟིགས་དང
གནས་འདི་ན རེ་སྒུག་གི་རླབས་རྒྱུན་དྲག་ཏུ་སྨིན
༡༩༩༨་༧་༤ ལན་གྲུ།
<<རོ་ལངས>>སྙན་དེབ་ལས་བདམས།
ངེད་དྲ་ཚིགས།
