རྒྱ་གར་རང་བཙན་ཉིན་མོ་དང་འབྲེལ་ཁྱེད་ཚོ་བལྟས་པ།
སྨྱུག་མདའ།
ངུ་ཤུམ་ལ་བདེན་པའི་མེ་ཏོག་བཏུས།།
ཁྱོད་ཉིད་ཀྱིས་ཞི་བའི་གོམ་འགྲོས་བཙུགས།།
རྨི་ལམ་གྱི་ཤ་ཚུགས་འདྲེས་ས་ན།།
ཤེད་པོ་ཡི་རང་ཚུགས་ཡར་ལ་བཀྱགས།།
ངེས་མེད་ཀྱི་གངས་རིའི་མགྲོན་པོ་ཚོ།།
གྲོགས་པོ་ཡི་ངོ་སྐལ་བཞག་པ་བྲོད།།
བསམ་ཞིང་གི་རིགས་པའི་ཆུ་མིག་ན།།
སྤྲང་བོ་ཚོའི་འཛུམ་མདངས་འཐུ་འཕྲོ་ཡོད།།
ཚེ་སྲོག་གིས་བསྡུས་པའི་ཉི་འོད་ཅིག།
སེམས་ངོས་སུ་དུངས་པའི་རྣམ་ཐར་ཟིན།།
ཆེན་པོ་སུས་བཙན་གྱིས་མགོ་བོ་བཀད།།
མཚོ་ངོགས་ཀྱི་བདེན་པ་མཁའ་རུ་འཕུར།།
དེ་རིང་ཡང་རྣམ་དཔྱོད་བཀྱགས་ཏེ་ངར།།
བག་ཡངས་ཀྱི་མཛེས་པ་བསྟུད་མར་བཞད།།
ཁྱེད་ཉིད་ཀྱང་ཀེར་ཀེར་འགྲེང་སྟེ་འདུག།
ཁྱེད་ཚང་གི་དུས་ཚོད་ག་ལེར་བཀྲ།
འཕགས་ཆེན་ཚོའི་ཤུལ་ཏེ་རབ་རིབ་རེད།།
ཐག་རིང་ཚོས་སྦུགས་ནས་འཁྱེར་གྱིན་ནོ།།
གླེགས་བམ་དེ་དལ་མོར་སློག་པ་ན།།
འཛམ་གླིང་གི་སྲང་ལམ་བདེ་ཚོད་རེད།།
ཁང་རྩེག་གི་འདབ་ཀ་རང་བྱུང་མ།།
རྐང་རྗེས་ཤིག་བརྩིས་ཆོག་གནའ་བོའི་བུ།།
རི་མོ་ཡིས་རུས་ཚིགས་ངོམ་ཙ་ན།།
ཚེ་རབས་ལ་སྦྱར་བའི་བསྔོ་ཡིག་མང་།།
ལྟ་གྲུབ་ཀྱི་ནང་ཤེད་གཞུང་དུ་ཤན།།
སྒོམ་ཆེན་དེའི་གྲོང་སྡེ་མཚར་ལེ་རེད།།
སྒྲུང་ཡིག་གི་གཏམ་པའི་ཟུར་ག་ན།།
རྒྱ་དཀར་ཚོ་སྡོམ་པའི་མ་རྩ་རེད།།
ཤེལ་སྒམ་ནས་ཤེལ་སྒམ་བརྟོལ་པ་ན།།
འགྲུལ་བཞུད་ཚོའི་འགུལ་ཤུགས་ཇེ་གསལ་རེད།།
མིད་པ་རུ་སྙན་ཆ་དོད་ན་ཐང་།།
ཁང་མིག་ཏུ་འཁྱག་ཤུད་ཕུད་ངེས་སོ།།
༢༠༡༤ ༨ ༡༥ ཉིན།
ངེད་དྲ་ཚིགས།
