དགའ་ཤར་སློབ་མ་དཀོན་མཆོག་ལྷག་པ།
ཐེངས་གཅིག་ར་མ་བུ་གསུམ་ལུང་པའི་ཕུར་གནས་སྐོར་ཞིག་ལ་འགྲོ་སྐབས། རི་ཟུར་ཞིག་ཏུ་ཚ་ཕོག་རྒྱག་རྒྱུ་བྱས་ཏེ། ར་ཕོས་ཤིང་སྒྲུག་ཏུ་སོང༌། ར་མས་མེ་གཏོང་རྒྱུའི་གྲ་སྒྲིག་བྱས། རེའུས་ཆུ་ལེན་དུ་སོང༌། རེའུ་ཆུ་འགྲམ་དུ་སླེབས་སྐབས་སྤྱང་ཀི་ཞིག་ཐུག་སྟེ་ཁོས་རེའུར་དབང་ཡོད་བཤད་དེ། ངའི་མིང་ལ་གང་ཟེར་རམ། ཞེས་དྲིས་པར་རེའུས། ཁྱེད་ཀྱི་མིང་ལ་ཨ་ཁུ་གཤིན་རྗེ་རྒྱལ་པོ་ཟེར། ཞེས་ལབ་པར་ཡང་སྤྱང་ཀི་དེས། འོ་ན་ངས་གང་གྱོན་འདུག་གམ། ལབ་པར་རེའུ་དེས། ཁྱེད་ཀྱིས་ང་ཚོའི་སྤུ་ལས་བཟོས་པའི་ཕྱུ་པ་ལྗང་ཁུ་ཞིག་གྱོན་འདུག ཅེས་ལབ། ཡང་སྤྱང་ཀི་དེས། བྱས་ན་ངས་གང་བཏགས་འདུག་གམ། ལབ་པར་རེའུ་དེས། ཁྱེད་ཀྱིས་ང་ཚོའི་ལུང་པ་ནས་ཐོན་པའི་གསེར་དངུལ་གྱི་རྒྱན་ཆ་བཏགས་འདུག ཅེས་ལབ་པར་སྤྱང་ཀི་དེས་ཁོང་ཁྲོ་དང་བཅས་སྤྱང་ཀིའི་སྐད་ཐོག་ནས། འོ་གཡའའོ་ཏ་ ཧྲེ་ནི། ཞེས་བོད་སྐད་དུ་བསྒྱུར་ན། ང་ལ་དགོས་པ་དེ་ཁྱོད་ཡིན་ཟེར་ནས་རེའུ་དེ་བསད་དེ་བཟས། ར་ཕ་མ་གཉིས་ཀྱིས་རང་གི་རེའུ་ཡུན་རིང་བསྒུགས་ཀྱང་མ་ཡོང་སྟབས་ར་མ་ཆུ་ལེན་སར་ལྟ་བར་སོང༌། ཆུ་ལེན་ས་དེར་སྤྱང་ཀི་ཁོ་ཐུག་སྟེ་རེའུར་གང་ལབ་པ་བཞིན་ལབ་སྟེ་ར་མ་ཡང་བསད་དེ་བཟས། དེའི་རྗེས་ར་ཕོ་ཆུ་ལེན་ས་དེར་ཡོང་སྐབས་ཏག་ཏག་སྤྱང་ཀི་ཁོ་ཐུག་སྟེ་ཁོས། ངའི་མིང་ལ་གང་ཟེར་རམ། ཞེས་དྲིས་པར་ར་ཕོས། ཁྱེད་རང་གི་མིང་ལ་རྒྱ་ཁྱི་མི་གསོད་ལག་དམར་བ་ཟེར། བརྗོད་པར་ཡང་སྤྱང་ཀི་ཁོས། ངས་ག་རེ་གྱོན་འདུག་གམ། ཞེས་ལབ་པར་ར་ཕོས། ཁྱོད་ཀྱིས་གཡོ་སྒྱུའི་སྤྱང་ལྤགས་སྔོན་པོ་ཞིག་གྱོན་འདུག ཅེས་ལབ་པར་ཡང་ཁོས། འོ་ན་ངས་གང་བཏགས་འདུག་གམ། ལབ་པར་ཡང་ར་ཕོས། ང་ཚོའི་དཔའ་བོ་དཔའ་མོ་གྲངས་ལས་འདས་པ་བསད་པའི་སོར་མོའི་ཕྲེང་བ་ཞིག་བཏགས་འདུག ཅེས་སྤོབས་སེམས་ལྡན་པའི་ངང་བཤད་པར་སྤྱང་ཀི་ཁོ་ཚིག་པ་ཟ་ཐག་ཆོད་ནས། འོ་གཡའའོ་ཏ་ ཧྲེ་ནི། ཞེས་གསོད་གྲབས་བྱེད་སྐབས། ར་ཕོས་ཞེད་སྣང་མེད་པར་ཀྱག་ཀྱག་བྱས་ནས་རིལ་མ་མང་དག་ཅིག་བཏང་པར་སྤྱང་ཀི་དེས། ཁོ་རེ་དེ་གང་རེད་དམ་ཞེས་དྲིས་པར་ར་ཕོས། འདི་ནི་ངའི་དམག་མིར་མདེའུ་གྲ་སྒྲིག་བྱེད་ཀྱི་ཡོད། ཅེས་བཤད་པར་སྤྱང་ཀི་ཁོ་ཞེད་ཐག་ཆོད་ནས་རང་ཡུལ་དུ་བྲོས་སོ། །
རྟུག་དྲི་ཤོར་བ།
མ་ཡཱ་སོར་གཞིས་ཆགས་སུ་ཡོད་པའི་ཕ་ཟླ་བ་ལགས་ཀྱི་བུ་མོ་བུ་འཁྲིད་ཕྱི་རྒྱལ་དུ་ལོ་ལྔ་་ཟབ་སྦྱོང་བྱེད་པར་ཕྱིན་ནས་ནང་དུ་ཚུར་ལོག་ཡོང་སྟེ་ཉིན་ཤས་སོང་རྗེས། གྲོང་ཁྱིམ་ཡིན་པའི་ཕ་ཉི་མ་ལགས་ཀྱིས་གསོལ་ཚིགས་ལ་གདན་འདྲེན་ཞུས་པ་རེད། དེ་ནས་ཁོ་ཚོ་གསོལ་ཚིགས་མཆོད་བཞིན་བཀའ་མོལ་སྙན་པའི་སྐབས་དེར། བུ་མོ་བུ་འཁྲིད་ཀྱིས་ཙིའུང་ཞེས་པའི་རྟུག་དྲི་ཞིག་ཤོར་བས་མོ་རང་ནི་ངོ་ཚ་ཐག་ཆོད་བཞིན་གཞན་རྣམས་ལ་གང་ཡང་ཞུ་མ་ཕོད་ཅིང་གཞན་ཚོས་ཀྱང་བུ་མོར་གང་ཡང་ཞུ་མ་ཕོད་པའི་སྐབས་དེར་མོས་རྐང་པ་གཉིས་མདུན་ལྕོག་དེར་བརྡར་དེ་དེའི་སྐད་དེ་རེད་ཅེས་ལབ་དགོས་བསམས་ནས་རྐང་པ་གཉིས་མདུན་ལྕོག་དེར་རྡོར་སྐབས་མི་ཆོབ་ཚ་བ་ཞིག་གིས། “བུ་མོ་ད་གིན་དང་པོའི་སྐད་ནང་བཞིན་ཡོང་གི་མ་རེད། གཡུག་ཞོག” ལབ་པས་བུ་མོ་དེ་ནི་དེ་བས་ངོ་ཚ་ཐག་ཆོད་ནས་ཞལ་ལག་ཟ་འཕྲོ་ཡང་བཞག་ནས་བྲོས་དགོས་ཆགས་པ་རེད།
ཡོང་ཁུངས་གཞན། ཡི་གེ་བ་གྲུ་ལྷོ་སྐལ་བཟང་ཕུན་ཚོགས།
