གོང་ས་མཆོག་གི་རླབས་ཆེན་གྱི་ཐག་གཅོད།

༧གོང་ས་ཏྭ་ལའི་བླ་མ་སྐུ་འཕྲེང་བཅུ་བཞི་པ་མཆོག་གི་ཐུགས་དཀྱེལ་ཆེ་ལ་གཟིགས་རྒྱང་རིང་བའི་རླབས་ཆེན་གྱི་ཐག་གཅོད།

ཀུན་བཟང་།

         ཁ་སྔོན་སྤྱི་ཟླ་གསུམ་པའི་ཚེས་བཅུ་བཞིའི་ཉིན་། བཞུགས་སྒར་རྡ་རམ་ས་ལར་འཚོགས་པའི་སྐབས་བཅུ་བཞི་པའི་བོད་མི་དམངས་སྤྱི་འཐུས་ལྷན་ཚོགས་ཀྱི་ཚོགས་དུས་བཅུ་གཅིག་པའི་ཐོག  གོང་ས་ཏྭ་ལའི་བླ་མ་མཆོག་ནས་ད་ཆ་སྐུ་ཉིད་ཀྱི་བཙན་བྱོལ་བོད་གཞུང་གི་ཆབ་སྲིད་ཀྱི་ཐུགས་འགན་ཐམས་ཅད་།  མི་དམངས་ཀྱི་འོས་འདེམས་བྱས་པའི་འགོ་ཁྲིད་སོ་སོར་གནང་རྒྱུ་དང་།  ཐེངས་དེའི་གྲོས་ཚོགས་ཀྱི་ཚོགས་དུས་དེའི་ཐོག་བཅའ་ཁྲིམས་གཙོ་བོར་གྱུར་བའི་ཁྲིམས་སྒྲིག་ཁག་ལ་བསྐྱར་བཅོས་དགོས་ངེས་རྣམས་བསྐྱར་བཅོས་ཀྱིས་། གོང་ས་མཆོག་གི་མཚན་གནས་རྗེས་འབྲེལ་གྱི་ཆབ་སྲིད་དང་འཛིན་སྐྱོང་གི་བྱེད་སྒོ་གང་ཡང་མི་དགོས་པ་ཞིག་ངེས་པར་བྱེད་དགོས་པའི་གསུང་འཕྲིན་ཞིག་བསྩལ་གནང་མཛད་ཡོད་།  དེ་འདྲའི་གོང་ས་མཆོག་གི་སྐུ་ཉིད་ཀྱི་ཆབ་སྲིད་ཀྱི་ཐུགས་འགན་ཆ་ཆང་།  མི་དམངས་ཀྱི་འོས་འདེམས་བྱས་པའི་འགོ་ཁྲིད་སོ་སོར་གནང་རྒྱུའི་ཐག་གཅོད་དེ་ནི།  གོང་ས་མཆོག་གི་ཐུགས་དཀྱེལ་ཆེ་ལ་གཟིགས་རྒྱང་རིང་བའི་རླབས་ཆེན་གྱི་ཐག་གཅོད་ཞིག་ཡིན་མ་ཟད་། ད་དུང་གོང་ས་མཆོག་ནས་བོད་མི་རིགས་ཀྱི་དམངས་གཙོའི་བྱ་གཞག་ཐོག་ལ་འཇོག་གནང་མཛད་པའི་མཛད་རྗེས་དུ་མའི་ཁྲོད་ཀྱི་ཆེས་རླབས་ཆེན་གྱི་མཛེས་རྗེས་ཤིག་དང་།  ང་ཚོ་གཞིས་བྱེས་བོད་མི་ཡོངས་དང་། མ་འོངས་པའི་བོད་ཀྱི་མི་རབས་རྗེས་མ་ཚོས་ཡང་ཡང་བཀའ་འདྲིན་རྗེས་དྲན་ཞུ་བའི་བོད་མི་རིགས་ཀྱི་ལོ་རྒྱུས་ཐོག་གི་སྤོབས་པ་བྱེད་འོས་པའི་གཏམ་སྙན་ཞིག་ཏུའང་འགྱུར་ངེས་ཡིན།

གོང་ས་མཆོག་གི་ཐག་གཅོད་དེ་ནི་བོད་རིགས་ཀྱི་དམངས་གཙོའི་བྱ་གཞག་ཐོག་ལ་ཡུན་རིང་དགོངས་པ་ཟབ་པོ་བཞེས་པའི་ཐག་གཅོད་ཤིག་ཡིན་།

           དེའང་གོང་ས་མཆོག་ལ་སྐུ་ན་ཆུང་དུས་ནས་བོད་ལ་དམངས་གཙོའི་ལམ་ལུགས་ཀྱི་བསྒྱུར་བཅོས་གནང་རྒྱུའི་དགོངས་པ་ཡོད་ཅིང་།  དེའི་ཐོག་འབད་བརྩོན་ཡང་གང་ཐུབ་ཞིག་གནང་ཡོད་པ་དང་།  འོན་ཀྱང་སྐབས་དེའི་གནས་སྟངས་ཀྱི་རྐྱེན་པས་དམིགས་བསལ་གྱི་གྲུབ་འབྲས་ཆེན་པོ་ཞིག་ཐོན་མེད་།  ཡིན་ནའང་རྗེས་སུ་གོང་ས་མཆོག་བཙན་བྱོལ་དུ་ཕེབས་འབྱོར་བྱུང་བ་ནས་བཟུང་།  གོང་ས་མཆོག་ནས་བོད་ཀྱི་དམངས་གཙོའི་བྱ་གཞག་ཐོག་འབད་བརྩོན་གང་ཡོང་གནང་ཏེ།  ད་ཆ་བཙན་བྱོལ་བོད་མིའི་སྤྱི་ཚོགས་ནང་སྤྱི་འཐུས་དང་བཀའ་བློན་ཁྲི་པ་མང་ཚོགས་ནས་ཐད་ཀར་འོས་འདེམས་བྱ་རྒྱུའི་དེང་རབས་ཀྱི་དམངས་གཙོའི་ལམ་སྲོལ་ཞིག་ལག་ལེན་བྱེད་ཐུབ་པ་བྱུང་ཡོད་ཅིང་།  ད་བར་འདས་ཟིན་པའི་ལོ་ངོ་ལྔ་བཅུ་ལྷག་གི་རིང་།  བཙན་བྱོལ་བོད་མིའི་དམངས་གཙོའི་བྱ་གཞག་ལ་གྲུབ་འབྲས་མངོན་གསལ་དོད་པོ་ཞིག་ཐོབ་ཐུབ་ཡོད།  དེ་ནི་བཙན་བྱོལ་བོད་མི་ཡོངས་དང་བོད་ནང་གི་གཞིས་ལུས་མི་མང་ཚོས་དགའ་སྤོབས་བྱེད་འོས་པའི་གནས་ཚུལ་བཟང་པོ་ཞིག་ཡིན་པ་ཙམ་དུ་མ་ཟད་།  ད་དུང་ང་ཚོས་རྒྱུན་ཆད་མེད་པར་ང་ཚོའི་དམངས་གཙོའི་ལམ་ལུགས་མུ་མཐུད་འཐུས་སྒོ་ཚང་རུ་བཏང་བ་ཡིན་ན།  མཐའ་མཇུག་དེ་རྒྱ་ནག་གུང་ཁྲན་ཏང་གི་དབང་བསྒྱུར་ལ་འགྲན་བརྩོད་དང་།  དེ་ལས་རྣམ་པར་རྒྱལ་ཐུབ་པའི་སྟོབས་ཤུགས་ཤིག་ལ་འགྱུར་ངེས་ཡིན་པས་།  གནས་ཚུལ་དེ་རྒྱ་ནག་གཞུང་ནས་གསལ་པོ་ཤེས་ཀྱི་ཡོད་ཅིང་།  དེར་བརྟེན་རྒྱ་ནག་གཞུང་ནས་ད་ཆའི་གོང་ས་མཆོག་གི་ཐག་ཆོད་དེའི་ཐོག་དེ་སྔ་ལས་ལྷག་པའི་དངངས་སྐྲག་དང་ཕྲག་དོག་ཆེན་པོ་ཞིག་བྱེད་ངེས་ཡིན་ཞིང་།  དེ་བས་ང་ཚོ་བོད་མི་ཚོའི་ངོས་ནས་གོང་ས་མཆོག་གི་ཐག་གཅོད་གནང་བ་བཞིན་ཚང་མས་བློ་སེམས་གཅིག་སྒྲིལ་གྱི་སྒོ་ནས་བོད་མིའི་དམངས་གཙོའི་ལམ་ལུགས་མུ་མཐུད་འཐུས་སྒོ་ཚང་རུ་བཏང་དགོས་པ་ཞིག་ཡིན། བཤད་ཆོག་པ་ཞིག་ལ་། ད་བར་བཙན་བྱོལ་བོད་མིའི་དམངས་གཙོའི་བྱ་གཞག་ལ་གྲུབ་འབྲས་མངོན་གསལ་དོད་པོ་ཞིག་ཐོབ་ཡོད་རུང་།  ཡིན་ནའང་ད་དུང་མུ་མཐུད་འཕེལ་རྒྱས་དང་འཐུས་སྒོ་ཚང་རུ་གཏོང་དགོས་པ་ཞིག་ཡིན་།  དཔེར་ན།  རྒྱ་ནག་གཞུང་ནས་དུས་དང་རྣམ་པ་ཀུན་དུ་བཙན་བྱོལ་བོད་མིའི་དམངས་གཙོའི་ལམ་ལུགས་དེ་ནི་། ཕྱི་ཚུལ་རྣམ་པའི་ཐོག་གི་དམངས་གཙོ་ཙམ་ཞིག་ལས་།  དོན་དངོས་སུ་དེ་ནི་དེ་སྔའི་སྡུག་རྩུབ་ཤིན་ཏུ་ཆེ་བའི་ཡོ་རོབ་ཀྱི་དུས་རབས་དཀྱིལ་མིའི་ཆོས་སྲིད་ཟུང་སྦྲེལ་གྱི་ལམ་ལུགས་ནང་བཞིན། ཏྭ་ལའི་བླ་མས་ཆོས་སྲིད་གཉིས་ཀྱི་དབང་ཆ་ཡོངས་རྫོགས་འཛིན་པའི་ཆོས་སྲིད་ཟུང་སྦྲེལ་གྱི་ལམ་ལུགས་ཤིག་ཡིན་པ་དང་།  དེ་འདྲའི་ལམ་ལུགས་ཀྱི་བཅིངས་པའི་སྤྱི་ཚོགས་དེ་ནི་དབང་འཛིན་པ་ཚོའི་ལྷ་ཡུལ་ཞིག་དང་མི་དམངས་མང་ཚོགས་ཀྱི་དམྱལ་བ་གསོན་པོ་ཞིག་ཡིན་པའི་སྐྱོན་འཛུགས་བྱེད་ཀྱི་ཡོད།  རྒྱ་ནག་གཞུང་གི་དེ་འདྲའི་སྐྱོན་འཛུགས་དེ་ལ་རྒྱལ་སྤྱིའི་སྤྱི་ཚོགས་ཐོག་མི་ཚོས་ཆ་འཇོག་བྱེད་མཁན་མེད་ལ་།  ང་ཚོ་བོད་མི་ཚོས་ཀྱང་སྣང་ཆུང་བྱེད་ཀྱི་ཡོད་།  ཡིན་ནའང་རྒྱ་ནག་གཞུང་གི་སྐྱོན་འཛུགས་དེས་།  རྒྱ་ནག་གི་མི་དམངས་མི་ཉུང་བ་ཞིག་གི་ཁྲོད་བཙན་བྱོལ་བོད་མིའི་དམངས་གཙོའི་ལམ་ལུགས་དེ་བཞིན་མིང་དོན་མཚུངས་པའི་དམངས་གཙོའི་ལམ་ལུགས་ཤིག་ཡིན་མིན་ཐོག་ཐེ་འཚོམ་ཆེན་པོ་ཞིག་ཡོང་གི་ཡོད།  སྤྱིར་ཁོང་ཚོས་རྒྱ་ནག་གཞུང་གི་དྲིལ་བསྒྲགས་ལ་སྔ་ས་ནས་ཡིད་ཆེས་ཤོར་ཟིན་ཡོད་རུང་།  ཡིན་ནའང་།  བོད་ལ་དོན་དངོས་སུ་ཏྭ་ལའི་བླ་མ་སྐུ་འཕྲེང་ལྔ་པ་ནས་དབུ་ཚུགས་ཏེ། ད་བར་ཏྭ་བླ་མའི་སྐུ་འཕྲེང་རིམ་འབྱོན་ནས་ཆོས་སྲིད་གཉིས་ཀྱི་དབུ་ཁྲིད་ཀྱི་ཐུགས་འགན་ཆ་ཚང་བཞེས་པའི་ལོ་ངོ་བརྒྱ་ཕྲག་ཁ་ཤས་ཀྱི་བོད་ཀྱི་ལོ་རྒྱུས་གནས་སྟངས་དེ་འདྲ་ཞིག་ཆགས་ཡོད་ལ།  དེའི་ཐོག་གོང་ས་མཆོག་ནས་དབུ་ཁྲིད་གནང་བའི་བཙན་བྱོལ་བོད་མི་ཚོས།  བཙན་བྱོལ་བོད་མིའི་སྤྱི་ཚོགས་ནང་དམངས་གཙོའི་ལམ་ལུགས་ཀྱི་བཅོས་བསྒྱུར་རབ་དང་རིམ་པ་གནང་ཞིང་།  ད་ཕན་ལོ་ངོ་ལྔ་བཅུ་ལྷག་ཙམ་ཞིག་ཕྱིན་ཟིན་ཡོད་ཀྱང་།  ད་དུང་གོང་ས་ཏྭ་ལའི་བླ་མ་མཆོག་ནས་གཞི་རྩའི་ཆོས་སྲིད་གཉིས་ཀྱི་དབུ་ཁྲིད་ཀྱི་ཐུགས་འགན་བཞེས་པའི་གནས་སྟངས་དེ་མུ་མཐུད་གནས་མུས་ལས་མཇུག་གཙང་མ་ཞིག་འགྲིལ་ཐུབ་མེད་པས།  གོང་ས་མཆོག་ནས་ཀྱང་དེ་འདྲའི་བོད་ཀྱི་ལོ་རྒྱུས་ལས་གྲུབ་པའི་ཏྭ་ལའི་བླ་མའི་སྐུ་འཕྲེང་རིམ་འབྱོན་ནས་ཆོས་སྲིད་གཉིས་ཀྱི་ཐུགས་འགན་ཡོངས་རྫོགས་བཞེས་པའི་ལམ་སྲོལ་དེ་ནི་། དེང་དུས་འཇམ་གླིང་ཐོག་དར་སྲོལ་ཆེ་བའི་དམངས་གཙོའི་ལམ་སྲོལ་དང་ཐ་དད་ཡིན་ཞིང་།  བོད་ལའང་དེ་འདྲའི་ཡང་དག་པའི་དམངས་གཙོའི་ལམ་སྲོལ་ཞིག་འཛུགས་གལ་ཆེ་བར་གཟིགས་ནས་ད་བར་འབད་རྩོན་རྒྱུན་ཆད་མེད་པར་གནང་ཡོད་ལ།  ལྷག་དོན་དུ་ད་རེས་ཉེ་ཆར་གོང་ས་མཆོག་ནས་ཏྭ་ལའི་བླ་མ་སྐུ་འཕྲེང་རིམ་འབྱོན་གྱིས་བོད་ཀྱི་ཆོས་སྲིད་གཉིས་ཀྱི་ཐུགས་འགན་ཆ་ཚང་བཞེས་པའི་དེ་སྔའི་ལམ་སྲོལ་དེ་།  ད་ཆ་དངོས་སུ་མེད་པ་བཟོས་གནང་རྒྱུའི་ལོ་རྒྱུས་ཀྱི་དོན་སྙིང་ཧ་ཅང་ཆེན་པོ་ལྡན་པའི་ཐག་གཅོད་གནང་ཡོད་།  གོང་ས་མཆོག་ནས་ཐག་གཅོད་དེ་འདྲ་ཞིག་གནང་དགོས་པའི་དགོས་པ་རྒྱུ་མཚན་གྱི་ཐོག་ལ་།  ད་ཆ་རྒྱལ་པོ་དང་བླ་མས་རྒྱལ་ཁབ་ལ་དབང་བསྒྱུར་བྱེད་པའི་དུས་ཚོད་ཡོལ་ཟིན་པ་དང་།  དེ་སྔོན་ལོ་རྒྱུས་ཀྱི་དགོས་དབང་ལ་བརྟེན་ཏེ་ཏྭ་ལའི་བླ་མ་སྐུ་འཕྲེང་ལྔ་པ་མཆོག་ནས་བོད་ཀྱི་ཆོས་སྲིད་གཉིས་ཀྱི་དབུ་འཛིན་གྱི་ཐུགས་འགན་བཞེས་དགོས་བྱུང་པ་དང་།  ད་ཆ་ངའི་དུས་སུའང་ལོ་རྒྱུས་ཀྱི་དགོས་དབང་ལ་བརྟེན་ཏེ། ཏ་ལའི་བླ་མས་མུ་མཐུད་བཙན་བྱོལ་བོད་གཞུང་གི་ཆབ་སྲིད་ཀྱི་ལས་འགན་ཁུར་མི་དགོས་པར་ཐམས་ཅད་།  མི་དམངས་ཀྱི་འོས་འདེམས་བྱས་པའི་འགོ་ཁྲིད་སོ་སོར་སྤྲོད་རྒྱུའི་དུས་ལ་བབས་ཡོད་པའི་བཀའ་བསྩལ་གནང་ཡོད་པ་མ་ཟད་།  ད་དུང་གོང་ས་མཆོག་ནས་ང་མུའུ་སྦའ་རག་ག་ནང་བཞིན་བྱེད་འདོད་མེད་ཅེས་དང་། ད་རེས་ངའི་ཐག་གཅོད་དེའི་ཐོག་ནས།  རྒྱ་ནག་གཞུང་གི་དུས་རྒྱུན་དུ་ནས་བཙན་བྱོལ་བོད་མིའི་དམངས་གཙོའི་ལམ་ལུགས་ལ་སྐྱོན་འཛུགས་བྱེད་པའི་།  བཙན་བྱོལ་སྤྱི་ཚོགས་ཀྱི་དམངས་གཙོ་དེ་ནི་ཕྱི་ཚུལ་ཙམ་ཞིག་ལས་།  དོན་དངོས་སུ་ཆོས་སྲིད་ཟུང་སྦྲེལ་གྱི་ལམ་ལུགས་ཤིག་ཡིན་པའི་བཤོད་སྟངས་དེ་ཚོའང་།  རང་བཞིན་དུ་ཁུངས་ལུང་མེད་པའི་གཏམ་འཆལ་ཞིག་ཏུ་འགྱུར་འགྲོ་རྒྱུ་ཡིན་ཞེས་སོགས་ཀྱི་བཀའ་སློབ་རིམ་པ་གནང་བ་དང་ཆབས་ཅིག  གོང་ས་མཆོག་གི་ད་རེས་ཐག་གཅོད་དེ་ནི་བོད་མི་རིགས་ཀྱི་དམངས་གཙོའི་བྱ་གཞག་ལ་དམིགས་པ་ཞིག་ལས་། གཞན་གྱི་གནོན་ཤུགས་འོག་དང་ཡང་ན་གཞན་ལ་ལད་མོ་བྱས་པའི་མཛེས་ཆོས་ཙམ་ཞིག་མ་ཡིན་པའི་གནས་ཚུལ་འགྲེལ་བརྗོད་ཧ་ཅང་གསལ་པོ་ཞིག་གནང་ཡོད་པས།  གོང་ས་མཆོག་གི་ཐག་གཅོད་དེ་ནི་བོད་མིའི་དམངས་གཙོའི་བྱ་གཞག་ཐོག་ལ་ཡུན་རིང་དགོངས་པ་ཟབ་པོ་བཞེས་པའི་མཐར་ཐུག་གི་ཡང་དག་པའི་ཐག་གཅོད་ཤིག་ཡིན་པ་སྨོས་མ་དགོས་པ་ཞིག་ཡིན།

དམངས་གཙོའི་ལམ་ལུགས་དེ་ནི་མི་དམངས་ཀྱི་རང་དབང་ཐོབ་ཐང་འགན་ལེན་ཆེ་ཤོས་བྱེད་ཐུབ་པ་དང་།  དབང་འཛིན་པ་ཚོ་ལ་ཚོད་འཛིན་ཆེ་ཤོས་བྱེད་ཐུབ་པའི་འཐུས་སྒོ་ཚང་ཤོས་དང་དགེ་མཚན་མང་ཤོས་ལྡནཔའི་ཆབ་སྲིད་ལམ་ལུགས་ཤིག་ཡིན།

          སྤྱིར་དམངས་གཙོའི་ལམ་ལུགས་དེ་ལ་ཞན་ཆའང་ཡོད་རུང་། ཡིན་ནའང་ད་ཕན་འགྲོ་བ་མིའི་ཆབ་སྲིད་ལམ་ལུགས་ཐོག་ཐོན་པའི་ལམ་ལུགས་སྣ་ཚོགས་ཤིག་བྱུང་ཡོད་པའི་ཁྲོད་ནས། དམངས་གཙོའི་ལམ་ལུགས་དེ་ནི་མི་དམངས་ཀྱི་རང་དབང་ཐོབ་ཐང་འགན་ལེན་ཆེ་ཤོས་བྱེད་ཐུབ་པ་དང་།  དབང་འཛིན་པ་ཚོ་ལ་ཚོད་འཛིན་ཆེ་ཤོས་བྱེད་ཐུབ་པའི་འཐུས་སྒོ་ཚང་ཤོས་དང་དགེ་མཚན་མང་ཤོས་ལྡནཔའི་ལམ་ལུགས་ཤིག་ཡིན་པས་།  དེར་བརྟེན་ད་ཆ་དམངས་གཙོའི་ལམ་ལུགས་དེ་བཞིན་འཛམ་གླིང་རྒྱལ་ཁབ་ཁག་གི་མི་དམངས་ཚོས་དགའ་ཞེན་ཆེན་པོ་བྱེད་པ་དང་།  མི་དམངས་ཀྱི་རང་དབང་ཐོབ་ཐང་ལ་མཐོང་ཆེན་བྱེད་མཁན་ཡར་ཐོན་ཅན་གྱི་རྒྱལ་ཁབ་ཚོས་དེ་དང་དུ་ལེན་པའི་ཆབ་སྲིད་ཀྱི་ལམ་ལུགས་ཤིག་ཆགས་ཏེ།  ད་ཆ་དམངས་གཙོའི་ལམ་ལུགས་དེ་འཛམ་གླིང་གི་འཕེལ་ཕྱོགས་གཙོ་བོ་ཞིག་ཏུ་འགྱུར་ཡོད་།  ཡིན་ནའང་དེ་འདྲའི་མི་དམངས་ཀྱི་རང་དབང་ཐོབ་ཐང་འདོན་སྤེལ་ཆེན་པོ་བྱེད་པ་དང་།  དབང་འཛིན་པ་ཚོ་དམ་ལ་བཏགས་པའི་དམངས་གཙོའི་ལམ་ལུགས་དེ་ལ་།   ད་དུང་འཇིག་རྟེན་འདིའི་ཐོག་གནས་དང་གནས་མུས་ཡིན་པའི་སྲིད་དབང་སྒེར་གཅོད་པ་ཚོས་སྐྲག་སྣང་ཆེན་པོ་བྱེད་པ་དང་།   ཁོང་ཚོས་དྲ་རྒྱ་དང་གསར་ཤོག་དུས་དེབ་ལ་སོགས་པའི་གསར་འགྱུར་རྒྱུད་ལམ་ཁག་ལ་དམ་བསྒྲགས་ཆེན་པོ་བྱས་ཏེ་།  རང་དབང་དང་དམངས་གཙོ་ལ་འདོད་པའི་རང་ཉིད་རྒྱལ་ཁབ་ཀྱི་མི་དམངས་ཚོར་།  ཕྱི་ཕྱོགས་རྒྱལ་ཁབ་གཞན་གྱི་མི་དམངས་ཚོའི་དམངས་གཙོའི་གནས་ཚུལ་ཤེས་མི་ཐུབ་པ་བཟོ་བ་དང་།  ད་དུང་ཁོང་ཚོས་ཉེན་རྟོག་པ་དང་དམག་དཔུང་ལ་བརྟེན་ནས་།  རང་ཉིད་ལ་ངོ་རྒོལ་བྱེད་མཁན་མི་དམངས་ཚོར་དྲག་གནོན་སོགས་བྱས་ཏེ་།  གང་ལྟར་ཁོང་ཚོས་ཐབས་བརྒྱ་ཇུས་སྟོང་གི་སྒོ་ནས་ཁོ་པ་ཚོའི་དབང་ཆར་ཚད་མཐོའི་འགན་ལེན་བྱེད་པའི་སྲིད་དབང་སྒེར་འཛིན་གྱི་ལམ་ལུགས་དེ་མུ་མཐུད་གནས་ཐུབ་པའི་འབད་བརྩོན་ཆེན་པོ་ཞིག་བྱེད་ཀྱི་ཡོད་པས།  ཉེ་ཆར་བྱང་ཨ་ཕི་རི་ཀ་དང་དབུས་ཤར་རྒྱལ་ཁབ་ཁག་ཅིག་གི་མི་དམངས་ཚོས་འུ་ཐུག་ཐབས་ཟད་ཀྱི་སྒོ་ནས།  མཐར་ཐང་ཆེན་དང་ཁྲོམས་གཞུང་ཐོག་འདོན་ཡོང་ཏེ་། ལོ་མང་རང་ཉིད་ཀྱི་རང་དབང་ཐོབ་ཐང་བཙན་འཕྲོག་བྱེད་མཁན་སྲིད་དབང་སྒེར་གཅོད་པ་ཚོར་ངོ་རྒོལ་བྱས་ཡོད་ཅིང་། ངོ་རྒོལ་གྱི་ལས་འགུལ་དེ་ཚོའི་ཐོག་མི་དམངས་ཀྱི་ཁྲག་དང་། རྩ་ཆེའི་ཚེ་སྲོག་མི་ཉུང་བ་ཞིག་ཀྱང་བློས་བཏང་བྱེད་དགོས་བྱུང་ཡོད་པ་མ་ཟད་།  སླི་སྦི་ཡའི་སྲིད་དབང་སྒེར་གཅོད་པ་རྒའ་རྡའ་ཕིའི་ནས་ད་དུང་དབང་ཆ་བློས་བཏང་བྱེད་འདོད་རྩ་བ་ནས་མེད་པར་མུ་མཐུད་དབང་ཆ་འཛིན་རྒྱུའི་འདོད་རྔམས་ཀྱི་དམྱོས་ཏེ། རང་ཉིད་ཀྱི་མི་དམངས་ཚོར་དམག་དཔུང་ལ་བརྟེན་ནས་དྲག་གནོན་བྱེད་ཀྱི་ཡོད་པས། ད་ཆ་སླི་སྦི་ཡའི་མི་དམངས་ཚོས་རང་ཉིད་ཀྱི་རང་དབང་དང་དམངས་གཙོའི་ཆེད་དུ་། མུ་མཐུད་ཁྲག་དང་ཚེ་སྲོག་བློས་བཏང་བྱེད་དགོས་འཁེལ་བཞིན་ཡོད་ལ་།  དངོས་འབྲེལ་ད་ཆ་འཇིག་རྟེན་འདིའི་ཐོག་གི་དམངས་གཙོའི་ལམ་ལུགས་ཡིན་པའི་རྒྱལ་ཁབ་ཁག་གི་དམངས་གཙོའི་འཕེལ་རིམ་ལ་བལྟས་ན།  རྒྱལ་ཁབ་མང་ཆེ་བའི་མི་དམངས་ཚོས་རང་ཉིད་ཀྱི་ཁྲག་དང་རྩ་ཆེའི་ཚེ་སྲོག་བློས་བཏང་གི་འཐབ་བརྩོད་བྱས་ཏེ།   མཐར་དབང་འཛིན་པ་ཚོའི་ལག་ནས་མི་དམངས་རང་ཉིད་ཀྱི་རང་དབང་དང་དམངས་གཙོའི་ཐོབ་ཐང་བརྩོད་ལེན་བྱས་ཡོད་པ་ཤ་ཏག་ཡིན་པ་ལས་།  ཁྲག་དང་ཚེ་སྲོག་བློས་བཏང་གི་འཐབ་རྩོད་ལ་བརྟེན་མི་དགོས་པར་།  དབང་འཛིན་པ་ཚོས་མི་དམངས་ལ་བསམ་གཞིགས་བྱས་ཏེ་།  མི་དམངས་ལ་རང་དབང་དང་དམངས་གཅོའི་ཐོབ་ཐང་སྤྲད་བཞག་པ་ཧ་ཅང་དཀོན་པོ་ཡིན་ཞིང་།  ཡིན་ནའང་། མི་ཚོའི་སམ་ཡུལ་ལས་འདས་པ་ཞིག་ལ།  ལོ་ངོ་ཉི་ཤུ་ལྷག་ཙམ་ཞིག་གི་གོང་། དེ་སྔའི་ཨུ་རུ་སུའི་འགོ་ཁྲིད་མི་སྣ། མི་ཧའ་ཡི་ཨེར་།  ཀོར་པ་ཆའོ་ཕུས་ཨུ་རུ་སུའི་མི་དམངས་ཀྱི་རང་དབང་དང་དམངས་གཙོའི་ཐོབ་ཐང་ལ་དགོངས་བཞེས་གནང་ནས་། རང་གི་བླ་ན་མེད་པའི་ཨུ་རུ་སུའི་རྒྱལ་ཁབ་ཀྱི་སྲིད་འཛིན་དབང་ཆ་ཆ་ཚང་བློས་བཏང་གནང་ཐོག ཨུ་རུ་སུའི་རྒྱལ་ཁབ་ཀྱི་དེ་སྔའི་ཚད་མཐོའི་དབང་ཆ་གཅིག་བསྡུས་ཀྱི་ཆབ་སྲིད་ལམ་ལུགས་དེ་བཞིན།  དེང་དུས་དམངས་གཙོའི་ལམ་ལུགས་ཀྱི་ཡར་ཐོན་ཅན་གྱི་ཕྱོགས་སུ་སྣེ་འཁྲིད་གནང་ཡོད་ལ། ཨུ་རུ་སུའི་མི་དམངས་ཚོས་ཁྲག་དང་ཚེ་སྲོག་བཅས་གང་ཡང་བློས་བཏང་བྱེད་མི་དགོས་པར་། ཞི་བའི་ཐོག་ནས་ཁོང་ཚོ་རང་དབང་དང་དམངས་གཙོ་ལྡན་པའི་ཡར་ཐོན་ཅན་གྱི་སྤྱི་ཚོགས་སུ་བསྐྱོད་ཐུབ་པའི་རྨང་གཞི་གཏིང་གནང་ཐུབ་ཡོད་།  སྟབས་ལེགས་པ་ཞིག་ལ།  ང་ཚོ་བོད་མི་ཚོ་ལའང་ཀོར་པ་ཆའོ་ཕུ་ནང་བཞིན་གྱི་མི་དམངས་ཀྱི་བདེ་སྡུག་དང་རང་དབང་དང་དམངས་གཙོའི་ཆེད་དུ་།  རང་ཉིད་ཀྱི་ཆེས་མཐོའི་དབང་ཆ་ཆ་ཚང་བློས་བཏང་གནང་ཐུབ་མཁན་གྱི་དབུ་ཁྲིད་མི་སྣ་ཞིག་ཡོད་ལ། ཁོང་ནི་གོང་ས་ཏྭ་ལའི་བླ་མ་སྐུ་འཕྲེང་བཅུ་བཞི་པ་རྒྱལ་དབང་བསྟན་འཛིན་རྒྱ་མཚོ་མཆོག་ཡིན།

   རྒྱལ་ཁབ་གང་འདྲ་ཞིག་ཡིན་རུང་།  རྒྱལ་ཁབ་དེ་ལོ་རྒྱུས་ཀྱི་འཕེལ་ཕྱོགས་དང་མཚུངས་པའི་ཡར་རྒྱས་གོང་འཕེལ་གཏོང་རྒྱུར་།  གཙོ་བོ་རྒྱལ་ཁབ་དེའི་མི་དམངས་ཀྱི་ཧུར་བརྩོན་རང་བཞིན་ལ་བརྟེན་དགོས་པ་ལས།  དབུ་ཁྲིད་མི་སྣའི་རྣམ་དཔྱོད་ལ་ཡིད་ཆེས་བློས་འགེལ་ཅིག་པུ་བྱེད་མི་རུང་བ་ཞིག་ཡིན།

       ང་ཚོ་བོད་མིར་རླབས་ཆེན་གྱི་དབུ་ཁྲིད་ཤིག་ཡོད་པ་དང་།  ད་ཆ་རླབས་ཆེན་གྱི་དབུ་ཁྲིད་དེས་བོད་ཀྱི་མ་འོངས་པའི་གནས་སྟངས་ལ་དགོངས་པ་ཟབ་པོ་བཞེས་ཏེ།  སྐུ་ཉིད་ཀྱི་བཙན་བྱོལ་བོད་གཞུང་གི་ཆབ་སྲིད་ཀྱི་སྐུ་དབང་ཐམས་ཅད་།  མི་དམངས་ཀྱི་འོས་འདེབས་བྱས་པའི་འགོ་ཁྲིད་མི་སྣ་སོ་སོར་གནང་ཞིང་།  ཏྭ་ལའི་བླ་མ་སྐུ་འཕྲེང་རིམ་འབྱོན་གྱིས་བོད་ཀྱི་ཆོས་སྲིད་གཉིས་ཀྱི་ཐུགས་འགན་ཆ་ཚང་བཞེས་པའི་ལམ་སྲོལ་དེ་མེད་པ་བཟོས་གནང་རྒྱུ་དང་།  བོད་ཀྱི་ལོ་རྒྱུས་ཐོག་ཡུན་རིང་གནས་པའི་ཆབ་སྲིད་ཟུང་སྦྲེལ་གྱི་གནས་སྟངས་དེ་ནམ་ཡང་མཚམས་འཇོག་གནང་རྒྱུའི་དེ་འདྲའི་གཏིང་ཟབ་ལ་བློ་རྒྱ་ཆེ་བའི་རླབས་ཆེན་གྱི་ཐག་གཅོད་གནང་ཡོད་པས།  ད་ཆ་བོད་ཀྱི་དམངས་གཙོའི་བྱ་གཞག་དེ་བཞིན་། འཛམ་གླིང་སྤྱི་ཡོངས་ཀྱི་འཕེལ་ཕྱོགས་དང་འཚམས་པའི་མུ་མཐུད་འཕེལ་རྒྱས་གཏོང་རྒྱུའི་གནད་འགག་དེ་བོད་ཀྱི་དབུ་ཁྲིད་ལ་རག་ལུས་མེད་པར་། བོད་མི་དམངས་ཀྱི་རྣམ་དཔྱོད་ལ་རག་ལུས་ཡོད།  སྤྱི་ལོ་༡༦༤༢ལོར་ཏྭ་ལའི་བླ་མ་སྐུ་འཕྲེང་ལྔ་པ་མཆོག་ནས་དབུ་ཚུགས་ཏེ་། ཏྭ་ལའི་བླ་མའི་སྐུ་འཕྲེང་རིམ་འབྱོན་ཚང་མས་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་གནང་ཏེ་།  ད་བར་ལོ་གྲངས་༣༦༩འདས་ཟིན་ཡོད་ཅིང་།  དེ་འདྲའི་ལོ་རྒྱུས་དུས་མཚམས་རིང་པོ་དེའི་ནང་། རྒྱུན་ཆད་མེད་པར་གནས་པའི་ཆོས་སྲིད་ཟུང་སྦྲེལ་གྱི་ལམ་ལུགས་དེས་།  བོད་མིའི་སྤྱི་ཚོགས་ནང་བག་ཆག་ཧ་ཅང་གཏིང་ཟབ་པོ་བྱུང་ཡོད་པ་དང་།  ད་ལྟའང་ལམ་ལུགས་དེ་བོད་མིའི་སྤྱི་ཚོགས་ནང་རྒྱུན་ལྡན་གྱི་གནས་སྟངས་ཤིག་དང་ཚང་མས་ཡིན་ཤག་ཤག་བྱེད་པའི་གནས་ཚུལ་ཞིག་ཆགས་ཡོད་།  ད་ཆ་གོང་ས་ཏྭ་ལའི་བླ་མ་མཆོག་ནས་དེ་འདྲའི་ཆོས་སྲིད་ཟུང་སྦྲེལ་གྱི་ལམ་ལུགས་དེ་མཚམས་འཇོག་གནང་རྒྱུའི་ཐག་གཅོད་གནང་རྗེས། བཙན་བྱོལ་དུ་ཡོད་པའི་བོད་མི་དམངས་ཀྱི་འཐུས་མི་ཡིན་པའི་སྤྱི་འཐུས་རྣམས་པས་འཕྲལ་དུ་གོང་ས་མཆོག་གི་ཐག་གཅོད་དེ་དང་ལེན་ཞུ་ཐུབ་མེད་ཅིང་།  དེའི་ཐོག་མི་ཚོས་གོ་ཤེས་བྱེད་ཐུབ་པ་ཞིག་ཡིན།  ཡིན་ནའང་།  སྤྱི་འཐུས་རྣམས་པས་དང་ལེན་ཞུས་གནང་མེད་པ་དེ།  བོད་མི་དམངས་ཀྱི་རྣོ་སེམས་ཟབ་པོ་བཞེས་པའི་མཐའ་མའི་ཐག་གཅོད་ཤིག་མིན་ངེས་ཡིན།  གང་ཡིན་ཟེར་ན།  གོང་ས་མཆོག་གི་ཐག་གཅོད་དེ་ནི་བོད་ཀྱི་ཆབ་སྲིད་ལམ་ལུགས་དེ་བཞིན་། ཆོས་སྲིད་ཟུང་སྦྲེལ་གྱི་རྣམ་པ་ལྡན་པའི་ལམ་ལུགས་དེ་མ་ཡིན་པར་། དེ་དང་རྦད་དེ་ཐ་དད་དུ་འགྱུར་བའི་ཡང་དག་པའི་དམངས་གཙོའི་ལམ་ལུགས་ཀྱི་ཕྱོགས་སུ་སྣེ་འཁྲིད་གནང་བ་ཞིག་ཡིན་པས་།  དེ་ནི་བོད་ཀྱི་སྤྱི་ཚོགས་དེ་ཤེས་རིག་ལྡན་པ་དང་ཡར་ཐོན་གྱི་ཕྱོགས་སུ་བསྐྱོད་ཐུབ་པའི་རྨང་གཞི་ཞིག་ཡིན་ལ། དེ་འདྲའི་ཡང་དག་པའི་དམངས་གཙོའི་ལམ་ལུགས་དེས། མི་དམངས་ཀྱི་རང་དབང་ཐོབ་ཐང་ཚང་མ་འགན་ལེན་བྱེད་ཐུབ་ཀྱི་ཡོད་ཅིང་།  དེ་བས་དེ་འདྲའི་དམངས་གཙོའི་ལམ་ལུགས་དེ་ནི། བོད་མིའི་ཡང་དག་པའི་འགྲོ་ལམ་ཅིག་པུ་དེ་རང་ཡང་ཡིན་པས་། དེར་བརྟེན་ལོ་རྒྱུས་ཡུན་རིང་ལྡན་པ་དང་ཤེས་རིག་དཔལ་ཡོན་གྱི་ཕྱུག་ཤིང་།  དེ་བས་དམངས་གཙོ་དང་རང་དབང་ལ་དགའ་ཞེན་ཆེ་བའི་བོད་མི་དམངས་ཚོས།  སྤྱི་ནོར་གོང་ས་ཏྭ་ལའི་བླ་མཆོག་གི་དེ་འདྲའི་ཡང་དག་པའི་ལམ་བསྟོན་གནང་བར་།  སྙིང་ཁོངས་རུས་པའི་གཏིང་ནས་ཐུགས་རྗེ་ཆེ་ཞུ་རྒྱུ་མ་ཟད་། གོང་ས་མཆོག་གི་ལམ་བསྟོན་གནང་བའི་དམངས་གཙོའི་འགྲོ་ལམ་ཐོག་བློ་སེམས་འགྱུར་མེད་ཀྱི་སྒོ་ནས་མདུན་བསྐྱོད་གནང་ངེས་ཡིན།

མ་འོངས་གོང་ས་ཏྭ་ལའི་བླ་མ་མཆོག་གི་དབུ་ཁྲིད་མེད་པའི་འོག  བོད་མིར་གནད་དོན་དང་དཀའ་ངལ་དེ་བས་མང་བ་ཞིག་འཕྲད་སྲིད་ངེས་ཡིན་པས།  ད་ལྟ་ནས་ང་ཚོ་བོད་མི་ཚོས་བསམ་བློའི་ཐོག་ནས་གྲ་སྒྲིག་ཡག་པོ་ཞིག་བྱེད་དགོས།

         གལ་ཏེ་གོང་ས་ཏྭ་ལའི་བླ་མ་མཆོག་ནས་ཐག་གཅོད་གནང་བ་བཞིན་ལག་ལེན་དོན་འཁྱོལ་བྱུང་ཚེ།  སླད་ཕྱིན་བོད་བཙན་བྱོལ་གཞུང་དང་མི་དམངས་ལ་གང་ཅིའི་དཀའ་ངལ་མང་པོ་འཕྲད་སྲིད་པ་ཞིག་ཡིན་ཞིང་།  དེའི་ཐོག་ད་ལྟ་ནས་བཟུང་མ་འོངས་བཙན་བྱོལ་གཞུང་གི་དབུ་ཁྲིད་དུ་འཁོད་རྒྱུའི་མི་སྣ་ཚོ་དང་། སྤྱི་འཐུས་། དེ་བཞིན་བོད་མི་སྤྱི་ཡོངས་ནས་བསམ་བློའི་ཐོག་གི་གྲ་སྒྲིག་སྔ་ས་ནས་བྱེད་དགོས་པ་དང་།  དཀའ་ངལ་འཕྲད་སྐབས་དཀའ་ངལ་ལ་གདོང་ལེན་བྱེད་ཐུབ་པ་བྱེད་དགོས་པ་ལས།   དེ་ལས་ལྡོག་ཏེ་དེ་སྔ་བཙན་བྱོད་བོད་མིའི་ལོ་རྒྱུས་ཐོག་ཡང་ཡང་ཐོན་མྱོང་ཡོད་པའི་བོད་གཞུང་དམངས་གཉིས་ཀྱི་རང་རང་སོའི་དམངས་གཙོའི་ཐོབ་ཐང་ཆ་ཚང་གོང་ས་མཆོག་ལ་བརྩིས་ཕུལ་ཞུ་བའི་ཐབས་རྡུག་གི་གནས་ཚུལ་དེ་ཚོ་བསྐྱར་དུ་མ་ཐོན་པ་བྱེད་དགོས་ལ།  ལྷག་པར་དུ་དེའི་ཐོག་མ་འོངས་པའི་བཙན་བྱོལ་བོད་གཞུང་གི་དབུ་ཁྲིད་མི་སྣ་དང་།  སྤྱི་འཐུས་རྣམས་པས་དགོངས་པ་ནན་པོ་ཞིག་བཞེས་དགོས་པ་ཞིག་ཡིན་ཞིང་། གལ་ཏེ་ད་ཕན་དགོངས་པ་བཞེས་ཡོད་ན་གླེང་མེད་དང་།  ད་དུང་དགོངས་པ་བཞེས་མེད་ན་།  ངེས་པར་དུ་ད་ལྟ་ནས་འགོ་ཚུགས་ཏེ། སླད་ཕྱིན་གོང་ས་མཆོག་གི་ལམ་བསྟོན་མེད་པའི་སྐབས་སུ་། བཙན་བྱོལ་གཞུང་ལ་གནད་དོན་དང་དཀའ་ངལ་གང་འདྲ་ཞིག་འཕྲད་སྲིད་མིན་ཐོག་ཞིབ་འཇུག་ནན་པོ་གནང་དགོས་པ་མ་ཟད་། ད་དུང་ཇི་ལྟར་བྱས་ཏེ་གནད་དོན་དང་དཀའ་ངལ་དེ་ཚོ་སེལ་རྒྱུའི་ཐོག་བསམ་བློའི་གྲ་སྒྲིག་ཡག་པོ་ཞིག་ཡོད་པ་གནང་དགོས་།  ལྷག་པར་དུ་དེའི་ཐོག་གི་གནད་འགག་གཙོ་བ་ཞིག་ནི།  ང་ཚོ་བོད་མི་ཚོ་ཡང་དག་པའི་དམངས་གཙོའི་ལམ་ལུགས་དེའི་ཐོག་བསྐྱོད་རྒྱུ་དེ་ནི་། གོང་ས་མཆོག་གི་དགོངས་པ་དང་། ང་ཚོ་བོད་མི་ཡོངས་ཀྱི་ཡང་དག་པའི་གདམས་ག་གནང་བ་ཞིག་ཡིན་པ་མ་མ་ཟད་།  ད་དུང་ང་ཚོ་བོད་མི་ཚོའི་ཡང་དག་པའི་བསྐྱོད་ལམ་ཅིག་པུ་དེ་རང་ཡིན་པར་།  ང་ཚོས་ལུས་ངག་ཡིད་གསུམ་གྱི་ཐོག་ནས་ཡིད་ཆེས་བློས་འགེལ་བྱེད་ཐུབ་མིན་ལ་རག་ལུས་པ་ཡིན་ཞིང་།  གལ་ཏེ་ང་ཚོས་ཡང་དག་པའི་དམངས་གཙོའི་ལམ་ལུགས་དེ་གོང་ས་མཆོག་གི་དགོངས་དོན་དང་།  བོད་མི་ཡོངས་ཀྱི་ཡང་དག་པའི་གདམས་ག་གནང་བ་ཞིག་ཡིན་པར་བློ་བརྟན་འགྱུར་མེད་ཀྱི་སྒོ་ནས་ཡིད་ཆེས་བློས་འགེལ་གནང་བ་ཡིན་ན།  མ་འོངས་གོང་ས་ཏྭ་ལའི་བླ་མ་མཆོག་གིས་ཆབ་སྲིད་ཐུགས་འགན་མི་བཞེས་པ་དང་ཡང་ན་གོང་ས་མཆོག་བཞུགས་མེད་པའི་གནས་སྟངས་གང་འདྲ་ཞིག་ཐོན་པ་ཡིན་རུང་།  བོད་གཞུང་དམངས་གཉིས་བློ་སེམས་གཅིག་སྒྲིལ་གྱི་སྒོ་ནས་དཀའ་ངལ་དང་གནད་དོན་ཐམས་ཅད་གདོང་ལེན་བྱེད་ཐུབ་པ་དང་གནད་དོན་དང་དཀའ་ངལ་ཚང་མ་སེལ་ཐུབ་པ་ཞིག་ཀྱང་ཡིན།

དམངས་གཙོ་ནི་ཡང་དག་པའི་ཆབ་སྲིད་ལམ་ལུགས་ཤིག་ཡིན་པ་དང་།  དེ་དང་ཆབས་ཅིག་དམངས་གཙོ་ནི་གནད་དོན་ཐམས་ཅད་ཀྱི་འགོ་ཚུགས་ས་ཤིག་ཀྱང་ཡིན།

          སྲིད་དབང་སྒེར་གཅོད་ཀྱི་ཆབ་སྲིད་ལམ་ལུགས་འོག  སྤྱི་ཚོགས་ཐོག་ཐག་གཅོད་བྱེད་ཐབས་ཐུབ་མེད་པའི་གནད་དོན་མང་དག་ཞིག་དང་དཀའ་ངལ་མང་པོ་ཞིག་ཐོན་གྱི་ཡོད་རུང་།  ཡིན་ནའང་ལམ་ལུགས་དེའི་ངོ་བོའི་ཐོག་ནས་གནད་དོན་དང་དཀའ་ངལ་ཐམས་ཅད་སྦད་གང་ཐུབ་བྱེད་པ་ལས་།  སྲིད་གཞུང་ནས་གནད་དོན་དང་དཀའ་ངལ་གདོང་ལེན་བྱེད་མི་ཐུབ་པ་དང་། དེ་བས་གནད་དོན་དང་དཀའ་ངལ་དེ་ཚོ་སེལ་ཐུབ་ཐབས་མེད་པ་ཞིག་ཡིན།  ཡིན་ནའང་དམངས་གཙོའི་ལམ་ལུགས་འོག་སྤྱི་ཚོགས་ཐོག་གནས་པའི་གནད་དོན་དང་དཀའ་ངལ་ཐམས་ཅད་།  དམངས་གཙོའི་ཐོབ་ཐང་རྩོད་ལེན་བྱེད་པའི་གོ་རིམ་བརྒྱུད་དེ་ཚང་མ་ཕྱིར་འདོན་ཡོང་གི་ཡོད་པ་མ་ཟད་།  ད་དུང་སྲིད་གཞུང་ནས་གནད་དོན་དང་དཀའ་ངལ་ཚང་མ་གདོང་ལེན་བྱས་ཏེ་དེ་ཚོ་སེལ་ཐུབ་པའི་འབད་བརྩོན་ཆེན་པོ་བྱེད་དགོས་ཀྱི་ཡོད་པས།  དེར་བརྟེན་དམངས་གཙོའི་སྤྱི་ཚོགས་ནང་།  གང་སར་གནད་དོན་དང་དཀའ་ངལ་མཐོང་རྒྱུ་ཡོད་པས།  མ་འོངས་པའི་བོད་མིའི་དམངས་གཙོའི་བསྐྱོད་ལམ་དེའི་ཐོག་གནད་དོན་དང་དཀའ་ངལ་མང་པོ་ཞིག་འཕྲད་རྒྱུ་ཡིན་པ་གླེང་མི་དགོས་པས།  གལ་སྲིད་བོད་མི་སུ་འདྲ་ཞིག་གིས་གནད་དོན་དང་དཀའ་ངལ་འཕྲད་རྒྱུར་སྐྲག་ནས།  སོ་སོའི་དམངས་གཙོའི་ཐོབ་ཐང་སླར་ཡང་སྟབས་བདེ་པོའི་སྒོ་ནས་གོང་ས་མཆོག་ལ་བརྩིས་ཕུལ་ཞུ་ཐབས་བྱས་ཤིང་།  གོང་ས་མཆོག་ནས་བསྐྱར་དུ་ཆོས་སྲིད་གཉིས་ཀྱི་ཐུགས་འགན་བཞེས་དགོས་པའི་དགོས་འདུན་བཏོན་པ་ཡིན་ན།  དེ་ནི་གོང་ས་མཆོག་གི་ཐུགས་དང་རྒྱབ་འགལ་བྱས་པ་ཞིག་ཡིན་པ་མ་ཟད་།  བོད་མི་དམངས་ཀྱི་གཞི་རྩའི་ཁེ་ཕན་དང་ཡང་ཡོངས་སུ་རྒྱབ་འགལ་བྱས་པ་དང་།  བོད་ཀྱི་སྤྱི་ཚོགས་ཡར་རྒྱས་དང་གོང་འཕེལ་གཏོང་རྒྱུན་ཕན་ཐོགས་མེད་པ་ཞིག་ཡིན་པས།  དེར་བརྟེན་ང་ཚོས་མ་འོངས་པར་གནད་དོན་དང་དཀའ་ངལ་ཆེན་པོ་གང་འདྲ་ཞིག་འཕྲད་རུང་།  ཞུམ་པ་མེད་པར་བློ་སྟོབས་ཆེན་པོའི་སྒོ་ནས་གོང་ས་མཆོག་གི་ལམ་བསྟོན་གནང་བ་དང༌། ང་ཚོ་བོད་མི་ཡོངས་ཀྱི་གདམས་ག་བྱས་པའི་ཡང་དག་པའི་དམངས་གཙོའི་འགྲོ་ལམ་ཐོག་མདུན་བསྐྱོད་བྱེད་དགོས།

གོང་ས་མཆོག་དང་ཀོར་པ་ཆའོ་ཕུ་རྣམས་གཉིས་།  འགྲོ་བ་མིའི་རིགས་དེ་མུ་མཐུད་ཡར་ཐོན་ཅན་གྱི་སྤྱི་ཚོགས་ཕྱོགས་སུ་སྐུལ་འདེད་མཛད་རྒྱུར་། གཟེངས་སུ་ཐོན་པའི་མཛད་རྗེས་འཇོག་གནང་མཁན་གྱི་འཛམ་གླིང་གི་རླབས་ཆེན་མི་སྣའི་མིང་གཞུང་ཐོག་མཉམ་དུ་འཁོད་ངེས་ཡིན།

      ད་ལོའི་སྤྱི་ཟླ་གསུམ་པའི་ཚེས་གཉིས་ཀྱི་ཉིན་མོ་དེ་ནི།  དེ་སྔའི་ཨུ་རུ་སུའི་འགོ་ཁྲིད་མི་སྣ་མི་ཧའ་ཡི་ཨེར་།  ཀོར་པ་ཆའོ་ཕུ་དགུང་གྲངས་བརྒྱ་བཅུ་ལ་ཕེབས་པའི་འཁྲུངས་སྐར་གྱི་ཉིན་མོ་དེ་ཡིན་ཞིང་། ཉིན་དེར་ད་ཆའི་རོ་ཤི་ཡའི་སྲིད་འཛིན་Dmitry Medvedev རྡེ་མི་ཐ་རུས། མེ་རྡེ་ཕུ་རྡི་ཕུ་མཆོག་ནས་སྲིད་འཛིན་ཕོ་བྲང་དུ་།  ཀོར་པ་ཆའོ་ཕུ་མཆོག་ལ་རོ་ཤི་ཡའི་ཆེས་མཐོའི་གཟེངས་བསྟོད་ཀྱི་རྟགས་མ་ཕུལ་གནང་ཞིང་།  ཁོང་གི་འཁྲུངས་སྐར་དུས་ཆེན་ལ་བཀྲིས་རྟེན་འབྲེལ་ཞུས་གནང་ཏེ།  ཐེངས་འདིའི་ཀོར་པ་ཆའོ་ཕུའི་འཁྲུངས་སྐར་ཉི་མོ་དེ་། འདས་པའི་ལོ་ངོ་ཉི་ཤུའི་རིང་བྱུང་མྱོང་མེད་པའི་རྒྱ་ཆེ་ཟབ་རྒྱས་ཞིག་བྱུང་ཡོད་ལ།  དེ་དང་དུས་མཚུངས་རོ་ཤི་ཡའི་དམངས་ཁྲོད་དུའང་།  མི་དམངས་ཀྱི་དང་བླངས་ཐོག་ཀོར་པ་ཆའོ་ཕུ་མཆོག་ལ་ཐུགས་རྗེ་ཆེ་ཞུ་བའི་ལས་འགུལ་གཞི་རྒྱ་ཆེན་པོ་ཞིག་སྤེལ་ཡོད་པ་དང་།  རོ་ཤི་ཡའི་གྲོང་ཁྱེར་དང་གྲོང་གསེབ་ཀྱི་ཁྲོམས་གཞུང་གང་སར་།  ཀོར་པ་ཆའོ་ཕུ་ལ་ཐུགས་རྗེ་ཆེ་ཞུ་ཞེས་བྲིས་ཡོད་པའི་འཕྲེད་དར་ཆེན་པོ་དེ་འདྲ་གང་སར་བཙུགས་ཡོད་པ་མཐོང་རྒྱུ་ཡོད་ཅིང་།  ད་ཆ་རོ་ཤི་ཡའི་མི་དམངས་ཁྲོད་ཀོར་པ་ཆའོ་ཕུའི་བརྩི་མཐོང་ཉིན་བཞིན་ཆེ་རུ་འགྲོ་བཞིན་ཡོད་ལ།  ཡིན་ནའང་ཀོར་པ་ཆའོ་ཕུས་།  དང་ཐོག་དེ་སྔའི་ཨུ་རུ་སུའི་སྲིད་དབང་སྒེར་གཅོད་ཀྱི་ལམ་ལུགས་དེ་ལ་འགྱུར་བ་གཏོང་རྒྱུའི་ཕྱག་ལས་དབུ་ཚུགས་གནང་སྐབས་།  ཨུ་རུ་སུའི་སྐབས་དེའི་ཁེ་ཕན་ལྡན་པའི་དཔོན་རིགས་ཚོ་བརྗོད་མི་དགོས་པར་། མི་དམངས་མང་པོ་ཞིག་གིས་ཀྱང་། ཁོང་གི་ཕྱག་ལས་གནང་ཕྱོགས་ལ་མོས་མཐུན་མེད་པའི་རྣམ་འགྱུར་སྣ་ཚོགས་བསྟན་ཡོད་། ལྷག་པར་དུ་རྗེས་སུ་ཨུ་རུ་སུའི་དེ་སྔའི་རྒྱལ་ཁབ་ཆེན་པོ་དེ་ཁ་ཐོར་དགུ་ཐོར་དུ་ཕྱིན་ཞིང་།  དཔལ་འབྱོར་གྱི་གནས་སྟངས་དཀའ་འཚེགས་ཆེ་བའི་གནས་སུ་གྱར་བ་དང་། ད་དུང་གནད་དོན་དང་དཀའ་ངལ་མང་པོ་ཞིག་ཐོན་ཡོང་སྐབས་།  ཐ་ན་ཨུ་རུ་སུའི་མི་མང་པོ་ཞིག་གིས་ཀོར་པ་ཆའོ་ཕུ་མཆོག་ལ་ཚང་མ་ཀོར་པ་ཆའོ་ཕུས་བཟོས་སོང་ཞེས་པའི་སྐྱོན་བརྗོད་དེ་འདྲ་ཤུགས་ཆེ་བྱས་ཡོད་།  ཡིན་ནའང་དེ་ནས་རིམ་བཞིན་རོ་ཤི་ཡའི་མི་དམངས་ནས་དམངས་གཙོའི་ལམ་ལུགས་ཀྱི་དགེ་མཚན་ལོངས་སྤྱོད་བྱེད་ཐུབ་པ་དང་།  རང་རང་སོ་སོའི་དཔལ་འབྱོར་འཕེལ་རྒྱས་འགྲོ་བ།  དེ་བཞིན་ཁོང་ཚོའི་རང་དབང་ཐོབ་ཐང་ཚང་མ་ལམ་ལུགས་རང་བཞིན་གྱི་འགན་ལེན་བྱེད་ཐུབ་ཅིང་། རྒྱལ་ཁབ་ཀྱི་གནས་སྟངས་ཀྱང་ཉིན་བཞིན་བཟང་ཕྱོགས་སུ་འཕེལ་རྒྱས་འགྲོ་བཞིན་པའི་གནས་ཚུལ་མང་དག་ཞིག་གཟིགས་ཏེ་།  ད་ཆ་ཁོང་ཚོས་དེ་སྔ་ཀོར་པ་ཆའོ་ཕུས་གནང་བའི་ཕྱག་ལས་དེ་དག་ནི་།  འགྲོ་བ་མིའི་སྤྱི་ཚོགས་ཡར་རྒྱས་གཏོང་རྒྱུའི་ཐོག་ལོ་རྒྱུས་ཀྱི་རང་བཞིན་ལྡན་པའི་ནུས་པ་ཆེན་པོ་འདོན་གནང་མཛད་པ་ཤ་ཏག་ཡིན་པར་གཅིག་འགྱུར་གྱི་ངོས་འཛིན་ཞུ་བཞིན་ཡོད་ལ་། མི་ཚོས་ཡིད་ཆེས་བྱེད་ཆོག་པ་ཞིག་ལ། གོང་ས་ཏྭ་ལའི་བླ་མ་སྐུ་འཕྲེང་བཅུ་བཞི་པ་མཆོག་ནས་།  ད་བར་བོད་ཀྱི་དམངས་གཙོའི་བྱ་གཞག་ཐོག་མཛད་པའི་ཕྱག་ལས་ཐམས་ཅད་དང་།  ལྷག་པར་དུ་ཉེ་དུས་གནང་བའི་ཐག་གཅོད་དེའི་ཐོག   གཅིག་བྱས་ན་གནས་སྐབས་ཕལ་ཆེར་བོད་མིའི་ཁྲོད་གོ་བ་ཡག་པོ་ལེན་མི་ཐུབ་པའི་གནས་ཚུལ་ཡོང་སྲིད་ཀྱང་།  དེ་ནས་སླད་ཕྱིན་གོང་ས་མཆོག་གི་ཐག་གཅོད་གནང་བ་བཞིན་ལག་ལེན་དོན་འཁྱོལ་ཡོང་བ་བྱེད་སྐབས།  གནད་དོན་དང་དཀའ་ངལ་མང་དག་ཞིག་འཕྲད་ངེས་ཡིན་པ་དང་། ཡང་དེ་འདྲའི་གནད་དོན་དང་དཀའ་ངལ་མང་པོ་ཞིག་འཕྲད་སྐབས་། མི་འགའ་རེར་ཕྱིར་བཤོལ་བྱེད་རྒྱུའི་འདོད་པ་ཡང་ཡོང་སྲིད་པ་ཞིག་ཡིན་། ཡིན་ནའང་དེ་ཚོ་ཚང་མ་སྐབས་འཕྲལ་ཙམ་ཞིག་ལས་།  རིམ་བཞིན་གོང་ས་མཆོག་གི་ད་ཆ་གནང་བའི་རླབས་ཆེན་གྱི་ཐག་གཅོད་དེའི་ཁྲོད་ནས།  མི་ཚོས་མཛད་མཐའ་མེད་པའི་རང་དབང་དང་དམངས་གཙོ་ལྡན་པའི་བདེ་སྐྱིད་ཀྱི་འཚོ་བ་ལོངས་སུ་སྤྱོད་ཐུབ་པ་དང་།  བོད་ཀྱི་མ་འོངས་པར་འོད་སྣང་ལྡན་པའི་མདུན་ལམ་ཆེན་པོ་ཞིག་ཡོད་པ་གཟིགས་ཐུབ་སྐབས་།  ཁོང་ཚོས་དེ་བས་གོང་ས་མཆོག་ལ་དད་གུས་ཆེན་པོ་ཞུ་ངེས་ཡིན་ལ།  སྐབས་དེར་གོང་ས་མཆོག་དང་ཀོར་པ་ཆའོ་ཕུ་རྣམས་གཉིས་།  འགྲོ་བ་མིའི་རིགས་དེ་མུ་མཐུད་ཡར་ཐོན་ཅན་གྱི་སྤྱི་ཚོགས་ཕྱོགས་སུ་སྐུལ་འདེད་མཛད་རྒྱུར་། གཟེངས་སུ་ཐོན་པའི་མཛད་རྗེས་འཇོག་གནང་མཁན་གྱི་འཛམ་གླིང་གི་རླབས་ཆེན་མི་སྣའི་མིང་གཞུང་ཐོག་མཉམ་དུ་འཁོད་ངེས་ཡིན།

ངེད་དྲ་ཚིགས།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s