ཕྱིན་སོང་ མེ་ལྕེ་དང་འགྲོགས་ནས་ཕྱིན་སོང་།

དཀའ་ཐུབ་ཚེ་རིང་།

ངའི་གཅེན་པོ    ངའི་གཅེན་མོ་

ངའི་གཅུང་མོ།    ངའི་ སྤུན་ཆུང

ངའི་ཕ་ཡུལ་གྱི་མི་རྣམས འདི་ལྟར་ཕྱིན་སོང

མེ་ལྕེའི་ཁྲོད་དུ ་ཁོ་ཚོའི་ཆོ་ངེ་གོ་ཐེངས་རེར

 

མེ་ལྕེའི་ཁྲོད་དུ་འབར་བཞིན་བའི་ལུས་པོར་ལྟ་ཐེངས་རེར

 

ཁུ་སིམ་པོའི་རྩ་ཐང་གི་རྟ་ཡི་རྨིག་སྒྲ་ནི

ཇི་འདྲའི་ལྗིད་ཏིག་ཏིག་ཅིག    ཇི་འདྲའི་སྐྱོ་ལྷང་ལྷང་ཞིག 

སྐབས་འདིར་མ་ཎི་ཡིག་དྲུག་དབྱངས་རྟར་འགྲོགས་ནས

ངས་སྐྱོ་གླུ་འདི་ལེན་དགོས་བྱུང  བརྗེད་མི་ཉན   བརྗེད་ག་ལ་སྲིད

མེ་ལྕེའི་ཁྲོད་ཀྱི་གངས་རིའི་ ཚེ་སྲོག་གི་རྐང་རྗེས།

 

ཕྱིན་སོང་ ཁོ་ཚོ་ཚང་མ་ཕྱིན་སོང

ཚེ་སྲོག་རེ་རེ    མེ་ལྕེ་དང་འགྲོགས་ནས་ཕྱིན་སོང

ཁོ་ཚོའི་ཚེ་སྲོག་གི་མེ་ལྕེ་ལས་ གྲང་ངར་གྱི་གངས་ལྗོངས་ལ་དྲོད་གཤེར་སྐྱེས་བྱུང

ཁོ་ཚོའི་སྐྱོ་གདུང་ དང་ མེ་ལྕེ་ཁྲོད་ཀྱི་བདེན་པའམ་ན་ཚ

ངས་མུ་མཐུད་ཡི་གེར་ཕབ་མི་ནུས  འགྲོ་བ་མིའི་སྐད་ཡིག་ནང་དུའང་བརྗོད་ཐབས་དཀའ

 

མཆོད་མེ་རྐང་གཅིག་ཕུལ་ནས་  སྨོན་ལམ་འདེབས

ཁོ་ཚོ་བཞིན་གངས་རིའི་བླ་སྲོག་གི་ཆེད་དུ

ལུས་སེམས་གཉིས་ཀྱིས་  མཆོད་པ་ཕུལ་མཁན་གྱི་དཔའ་བོ་དང་དཔའ་མོ

བརྗེད་མི་སྲིད   བརྗེད་ག་ལ་སྲིད

མེ་ལྕེ་ཁྲོད་ཀྱི་གངས་རིའི་ཚེ་སྲོག་གི་རྐང་རྗེས།

ངེད་དྲ་ཚིགས།

དཔྱད་མཆན་སྤེལ།

%d bloggers like this: