༄༅། །ཤར་གངས་རི་དཀར་པོའི་རྩེ་མོ་ན།།
སྤྲིན་དཀར་པོ་གནམ་ལ་སྙེག་འདྲ་བ།།
དེ་མཐོང་བའི་མོད་ལ་བླ་མ་དྲན།།
དྲིན་བསམས་ཤིང་བསམས་ཤིང་དད་པ་སྐྱེས།།
སྤྲིན་དཀར་པོ་ལྡིང་བའི་ཤར་ཕྱོགས་ན།།
འབྲོག་དགེ་ལྡན་རྣམ་པར་རྒྱལ་བ་དེར།།
མཚན་བརྗོད་པར་དཀའ་བའི་རིན་པོ་ཆེ།།
ཕ་བློ་བཟང་གྲགས་པ་ཡབ་སྲས་བཞུགས།།
ལམ་རིམ་པ་གཉིས་ཀྱི་རྣལ་འབྱོར་སོགས།།
ཆོས་ཟབ་ལ་ཤིན་ཏུ་རྒྱས་པར་གསུངས།།
བོད་ཁ་བ་ཅན་གྱི་སྐལ་ལྡན་ལ།།
མགོན་ཁྱོད་ཀྱི་བཀའ་དྲིན་བསམ་མི་ཁྱབ།།
སྒོས་སྙོམས་ལས་འཛིན་པའི་དགེ་འདུན་གྲུབ།།
བློ་ཅུང་ཟད་ཆོས་ལ་ཕྱོགས་པ་དེ།།
རྗེ་ཡབ་སྲས་རྣམས་ཀྱི་བཀའ་དྲིན་ཡིན།།
དྲིན་ཆེ་བར་ངེས་སོ་ཡབ་སྲས་རྣམས།།
དུས་དེང་ནས་བྱང་ཆུབ་སྙིང་པོའི་བར།།
རྗེ་ཡབ་སྲས་ཁྱེད་རྣམས་མ་གཏོགས་པར།།
སྐྱབས་རེ་ས་གཞན་ནས་མི་འཚོལ་བས།།
ཐུགས་བརྩེ་བའི་ལྕགས་ཀྱུས་དྲང་དུ་གསོལ།།
དྲིན་ཇི་བཞིན་འཁུར་བར་མ་ནུས་ཀྱང་།།
སེམས་ཆགས་སྡང་དབང་དུ་མ་སོང་བར།།
མགོན་ཁྱོད་ཀྱི་བསྟན་པ་འཛིན་པ་ལ།།
དུས་ནམ་ཡང་བརྩོན་པ་བགྱིད་པར་སྨོན།།
ལར་ད་ལྟ་གངས་རིའི་ཁྲོད་འདི་ན།།
རང་བསྟན་པ་འཛིན་པར་ཁས་ལེན་ཞིང་།།
གཞན་བསྟན་འཛིན་དགྲ་བོའི་དྭངས་མར་འཛིན།།
ཚུལ་འདི་ལ་སྐྱོ་བ་གཏིང་ནས་སྐྱེས།།
གཞན་ཕུང་བར་འདོད་པའི་ཀུན་སློང་དང་།།
རྒྱུད་མཚན་འཛིན་དམ་པོས་བཅིངས་ལགས་ཀྱང་།།
ལམ་མཐོན་པོར་གནས་པའི་ཁས་ལེན་བྱེད།།
འདི་བརྟགས་ན་ཀུན་གྱིས་ཁྲེལ་བའི་རྒྱུ།།
ལམ་གོལ་སར་རྒས་པའི་སྡུག་ཡུས་ཀྱིས།།
ཆོས་ཚུལ་བཞིན་བྱེད་པའི་གང་ཟག་ལ།།
རྒྱུད་ཁོང་ནས་འཁྲུགས་པའི་གདུག་སེམས་ཅན།།
གདོན་ཐུགས་ལ་ཞུགས་པ་མ་ལགས་སམ།།
དགྲ་ཉོན་མོངས་འདུལ་ཐབས་མི་བྱེད་པར།།
གཤགས་འགྱེད་པ་ཙམ་གྱི་འཆད་ཉན་ཡང་།།
འདྲེ་ཤར་སྒོའི་ཕྱོགས་སུ་གནས་པ་ལ།།
གླུད་ནུབ་སྒོར་གཏོར་བ་དོན་རེ་ཆུང་།།
དོན་དེ་ལྟར་གོ་བའི་བཤེས་གཉེན་རྣམས།།
སྤྱིར་ལུས་ཅན་ཀུན་ལ་བཀའ་དྲིན་སོམས།།
སྒོས་ཆོས་མཛད་ཡོངས་ལ་དག་སྣང་སྦྱོངས།།
དགྲ་ནང་ན་གདུག་པའི་ཉོན་མོངས་འདུལ།།
མི་ཁོ་བོའི་རྗེས་འཇུག་གྲོགས་པོ་ཀུན།།
ཡིད་ཕྱོགས་སུ་ལྟུང་བས་མ་འཆིང་བར།།
བློ་གཟུ་བོར་གནས་པའི་རྟོག་དཔྱོད་ཀྱིས།།
ལམ་དྲང་པོར་ཞུགས་པ་ཅིས་ཀྱང་ལེགས།།
གཏམ་འདི་ལ་བརྟེན་ནས་འགྲོ་བ་རྣམས།།
བྱམས་སྙིང་རྗེས་དྲངས་པའི་སེམས་བསྐྱེད་དང་།།
དབྱིངས་སྤྲོས་བྲལ་རྟོགས་པའི་ལྟ་བ་ཡིས།།
དཔལ་བླ་མེད་བྱང་ཆུབ་མྱུར་ཐོབ་ཤོག།
སྐུ་ལ་མཚན་དཔེའི་དཔལ་འབར་ཞིང་།།
གསུང་དབྱངས་ཡན་ལག་དྲུག་ཅུས་བརྒྱན།།
ཐུགས་ནི་ཟབ་ཡངས་མཁྱེན་བརྩེའི་གཏེར།།
དཔལ་ལྡན་བླ་མའི་བཀྲ་ཤིས་ཤོག །
——ཅེས་པ་འདི་ནི་ཐམས་ཅད་མཁྱེན་པ་དགེ་འདུན་གྲུབ་ཀྱིས་རང་གི་བླ་མ་དྲན་མགུར་གྱི་ཚུལ་དུ་བསྟོད་པའོ།། །།
ངེད་དྲ་ཚིགས།
