སྨྱུག་མདའ།
ལས་ཀ་ཞིག་མཇུག་གྲུབ་རྗེས། ངས་རང་ཉིད་མཚོན་པའི་མིང་བྱང་ལ་སླར་ཡང་གཅེས་སྤྲས་བྱེད་དགོས་ཡོད།
དེ་ནི་ཁ་རོག་གེར་ཡོད་དུས་ཀྱི་རྨི་ལམ་འཚོལ་མཁན་ཞིག་གམ། རང་ཚོད་ཀྱིས་ངར་བླུག་པའི་ཚོར་བའི་ཡུལ་ལྗོངས་ཤིག་ཟེར་ཆོག འཇིག་རྟེན་ཞེས་པའི་གྲུ་ཟུར་ན་དགའ་སྐྱོ་ཆགས་སྡང་གི་རྣམ་ཤེས། ཡི་གེ་རེ་རེའི་བསླབ་པར་འཐིམ་འདོད་པས་ལོས་ཡིན།
འགྲོ་ཞོར་འདུག་ཞོར་དུ་བྲིས་པའི་ཡིག་ཚོགས་དེ་སྙན་ངག་ཅིག་ཡིན་མིན་ཅི་ཆ། གང་ལྟར་རང་གི་ཚོར་བ་གཟུགས་ངོར་བསྒྱུར་ཏེ། འཚོ་བ་སྐྱ་ཐང་ཐང་བོ་འདི་ཁེར་རྐྱང་གི་ཁྲོད་ཀྱི་གྲྭ་ཤག་མེ་ཡིས་བསྲེག་པའི་འགྱིག་གི་བུ་མོ་ལྟ་བུར་བཞེངས་ཡོད་ལ། ཆོས་གླུ་ཞིག་དལ་གྱིས་བླངས་ཏེ་རྣལ་འབྱོར་མའི་ཚོགས་ལ་མཚོན་ཚུལ་གཞན་ཞིག་སྟོན་སྲིད་པས་ཀྱང་ཡིན།
མེ་ལོང་ནང་གི་གཟུགས་བརྙན་དེ། སྨག་རུམ་ཁྲོད་ཀྱི་སྤྱང་ཀིས་གད་སྐྱིབས་དང་བྲག་སྐྱིབས་ཤིག་ཏུ་འདེད་ཀྱིན་ན།
སྐད་ཆའི་ཆག་འཕྲོ་ཙམ་ཁྱེད་ཚོ་དང་འདྲ་བར་རླུང་གིས་གཙབ། འོན་ཏེ་དགའ་སྐྱོའི་ཚོར་བ་ཆེས་རྣོ་ས་ཞིག་ཏུ“ང“ཡོད་ལ། དེ་གས་ཀྱང་དགོས་མཁོ་ལྟ་བུའི་ཆར་བ་ཞིག་འབབ་དུ་འཇུག་ངེས་སམ། རྒྱུ་མཚན་མེད་པ་ཞིག་ལ་རྒྱུ་མཚན་བཙལ་ན། ངས་ཀྱང་དཀའ་སྡུག་ཆར་ཆུ་ལས་བརྒལ་ནུས་པས་སོ། །
སྒེའུ་ཁུང་ཕྱི་རོལ་གྱི་ངག་ཛ་མཛེར་འདི་དག དྲན་པའི་གསེང་ལ་འཇབ་ཀྱིན་འཇབ་ཀྱིན་ལྷོད་འགྲོ་བ་ཞིག་རེད་དེ།
ལན་རེ་གནའ་གཏམ་ཞེས་པའི་གསེང་ན་གཉིད་དུ་ཡུར་འདུག་གོ ། གང་ལྟར་ཇ་ཁང་ངན་ངོན་ཞིག་ནང་དུ་རང་ཉིད་མཇུག་བསྡུས་ན། འཇིག་རྟེན་དམར་པོ་འདིའི་ལག་མཐིལ་ན་སྙིང་གཅིག་པུ་མིན་པ་རྟོགས་ངེས་སོ། །
ས་སྲོད་འདི་ག་ལེ་ག་ལེར་ཡལ་རྗེས། འཚོལ་བཞིན་པའི་ནང་སེམས་ཀྱི་དབྱར་གཞུང་རག་ལ། ལམ་ཐག་ཅིག་གཞི་ནས་འགོ་བཙུགས་པ་ལོས་ཡིན་སྙམ་མོད། འཚོ་བ་འདིའི་མིག་འབྲས་ཁོ་ན་བཅོལ་ན། བརྡ་འཕྲིན་འཕྲུལ་ཆས་ཀྱིས་དཀྲོགས་པའི་ཀི་རྒྱང་དེ་དགྲ་གཤེད་ལྟ་བུ་ཞིག་རེད་དོ། །
༢༠༡༤ ༩ ༡༣ ཉིན།
ངེད་དྲ་ཚིགས།
