སོབ་སོབ།
སྨྱུག་མདའ།
ཆར་རླུང་འཇམ་པོ་དལ་གྱིས་ལྡང་བ་ཡིས།།
འཚོ་བ་ཞིག་གི་དྲི་བསུང་འཐུལ་པར་བྱས།།
སེམས་ཉིད་བསམ་གཏན་བདེ་བའི་སྒོམ་ཁང་དུ།།
རྐུན་པོ་གང་གི་ཞགས་པས་དམ་དུ་བཅིངས།།
མེ་ཏོག་རྒས་པའི་ཉམས་ཤ་བཏོད་པ་ན།།
ཕྱི་རོལ་ཆར་གྱིས་ནང་དུ་ཁོག་འདར་བྱེད།།
སྒེའུ་ཁུང་སྟོང་བའི་འགྲམ་དུ་ཅི་ཞིག་ལྷག།
ལྕགས་རྔ་དབྱུ་གུས་བསྣུན་པ་བོས་སོང་ངོ་།།
གཅིག་ཏུ་བསྡུས་ཏེ་མཆོངས་ལྡིང་བྲོ་གར་འཁྲབ།།
ཐིག་ཕྲེང་བར་ནས་ད་ནི་ཐུགས་ལྷོད་ཆགས།།
དུས་ཚོད་འཚུབ་པོ་ནམ་ཞིག་རྙེད་གྱུར་ན།།
སྲིད་པའི་གྲོང་ཚོ་འདི་ལ་དབུགས་རྩ་དྲོད།།
དམིགས་པ་གཏོར་ཞིང་དམིགས་པའི་དབུ་རྩེ་རུ།།
གནའ་ཤུལ་ཡིག་འབྲུ་འགའ་ཡིས་བྱིལ་བྱིལ་བྱས།།
ནམ་ཟླ་ཡག་པའི་ཚིག་རྐང་ཞིམ་པོ་ལ།།
མི་སྲོལ་ལམ་ལུགས་ཤིག་གིས་གསུབ་སྟེ་འུད།།
ཤིང་སྒོ་ཁམ་ནག་དེད་པ་རྒྱུ་མཚན་འདུག།
མདང་གི་གཏམ་རྒྱུད་ཅིག་གི་འབྲི་འཕྲོ་བཞག།
སྐུད་པའི་ཁ་ཤོམ་འདྲོགས་པའི་ངོས་དག་ན།།
སྟོན་པ་འགད་རྫས་ཇི་བཞིན་བཏེགས་ཏེ་ལུད།།
འཇག་རྩྭས་གླིང་བུ་འབུད་པའི་སྒྱུ་འཕྲུལ་ལ།།
གནས་སྡུག་བུ་མོ་ཞིག་གིས་དེ་ཉིད་གླེང་།།
ཞོགས་པ་དཀྱུས་མ་ཞིག་གི་འགུལ་ཤུགས་ན།།
གསུང་ཆེན་མཚོ་ལ་འཐིམ་པའི་སྐྱ་ཐིག་བརྒྱབ།།
སྨུག་པའི་ནང་ལ་བཟི་སྐད་ལྡབ་ལྡིབ་ཅིག།།
དབང་བོའི་སྒོ་བརྒྱ་ཆགས་པས་བེར་བེར་བྱས།།
འཁོར་བའི་སྒྲ་དབྱངས་གཅེར་བུར་འགྲེང་བ་འདི།།
ཁེར་རྐྱང་ངུ་མོ་དགོད་ཅིག་འདམ་ལ་ཟགས།།
རི་བོའི་དཀྱོགས་ལ་ཕྱིར་མིག་ཁྱུག་ཙམ་བལྟས།།
གློག་སྒྲོན་མོག་པོས་བྲབས་ནས་དམར་ཤུར་རེད།།
ན་བཟའ་མདངས་ཤོར་ཤེལ་མིག་ཚག་ཚག་བརྡབས།།
སྐྱེ་བོ་སྐོར་ཞིག་རླུང་གིས་ཡང་ཡང་རྒུད།།
༢༠༡༤ ༨ ༢ ཉིན་བྲིས།
ངེད་དྲ་ཚིགས།
མཆན་ཞོག