རྒོ་དམར་ནི་འཛམ་གླིང་རང་བྱུང་མཉམ་འབྲེལ་གྱི་མིང་ཐོ་དམར་པོ་ཞེས་པའི་སྟོང་ཉེན་ཆེ་བའི་རི་དྭགས་ཀྱི་གྲས་ཅིག་སྟེ། དེ་ནི་ཀྲུང་གོའི་རི་དྭགས་རིགས་ཁྱད་ཐོན་དང་། རྒྱལ་ཁབ་ཀྱི་ཨང་རིམ་དང་པོའི་སྲུང་སྐྱོབ་རི་དྭགས་ཡིན། ད་ལྟ་མཚོ་སྔོན་མཚོ་ཁྲི་ཤོར་རྒྱལ་མོའི་ཉེ་འགྲམ་དུ་མ་གཏོགས་མང་པོ་མི་འདུག ༢༠༡༣ལོའི་ཟླ་༣་པའི་ནང་དུ། མཚོ་སྔོན་པོའི་ཡུལ་སྐོར་སྲུང་སྐྱོབ་དོ་དམ་ཅུས་བཀོད་པ་ལྟར་ན། གྲངས་ཀྱི་ཐོག་ནས་ད་ལྟ་རྒོ་དམར ༨༧༦ལྷག་མ་གཏོགས་མེད་ཟེར།
མཚོ་སྔོན་པོའི་འགྲམ་གྱི་འབྲོག་མི་རྣམ་རྒྱལ་གྱིས་ལྕགས་ར་དེ་དག་གཏོར་བ་ལ་ཤིན་ཏུ་རྒྱབ་སྐྱོར་གནང་གི་ཡོད། རྒྱུ་མཚན་ནི། འདས་ཟིན་པའི་ལོ་༡༠ཡི་ནང་དུ། རྣམ་རྒྱལ་གྱིས་དངོས་སུ་རྒོ་དམར་མང་པོ་ལྕགས་ར་ཐོག་ཏུ་མཆོངས་ནས་ཤི་ཚར་བ་མཐོང་། “ན་ནིང་ལོ་གཅིག་གི་རིང་ལ་ང་དང་སྡེ་བའི་འབྲོག་མིས་རྒོ་དམར ༢༠འདྲ་ལྕགས་ར་ཐོག་ཏུ་མཆོངས་ནས་རྨས་སྐྱོན་བྱུང་པ་དང་ཕྲུ་གུ་བཙས་མ་ཐུབ་པའི་སྣང་ཚུལ་མང་པོ་མཐོང་བྱུང་། རྨ་ཁར་ལྟོས་ན་ལྕགས་ཀྱིས་བྲད་པ་ཡིན་པ་ཤེས་ཐུབ། ”ས་གནས་མང་ཚོགས་ཀྱིས་དེ་དག་ལ་སྲུང་སྐྱོབ་བྱེད་པ་ནི་རང་རེའི་འོས་འགན་ལྟར་དང་ལེན་བྱས་ཏེ་དེ་དག་ལ་སྲུང་སྐྱོབ་ཀྱི་བྱ་བ་སྒྲུབ།
ལོ་རེར་རྒོ་དམར་ ༥༠ལྷག་ལྕགས་རའི་རྐྱེན་གྱི་སྲོག་ཤོར་གྱིན་ཡོད། དེང་སེང་གང་ས་གང་དུའང་རྩྭ་ཐང་མང་པོར་ལྕགས་རས་སྐོར་འདུག་པ་མཐོང་ཐུབ། ལྕགས་ར་དེ་དག་ཆ་སྙོམ་གྱི་མཐོ་ཚད་ནི་སྨི1.2-1.5དང་། ལ་ལའི་རྩེ་ན་ད་རུང་ཚེར་མའི་ལྕགས་དྲྭ་རིམ་པ་གཅིག་ཡོད།
ལྕགས་ར་བཙུགས་པའི་དམིགས་ཡུལ་དང་པོ་ནི་རང་རེའི་རྩྭ་ས་སྐོར་ཐུབ་པ། གཉིས་པ་ནི་རང་རེའི་སྒོ་ཕྱུགས་ཀྱི་དོ་དམ་ལ་ཕན་ཐོགས་པ་དང་ཚེར་མས་ནོར་ཕྱུགས་སོགས་གཞན་གྱི་རྩྭ་ས་ཐོག་ཏུ་འགྲོ་པ་འགོག་ཐུབ་པ་དང་རི་སྐྱེས་རི་དྭགས་མང་པོ་རྩྭ་སའི་ཐོག་ཏུ་ཤོར་བ་ཡང་འགོག་ཐུབ་པ། གཙང་གསུམ་ས་ཁུལ་དུ་༢༠༠༥ནས་བཟུང་ལྕགས་ར་འཛུགས་འགོ་བརྩམས་ཏེ། སྒོ་ཕྱུགས་འཚོ་མི་ཆོག་པ་དང་འཚོ་ཚད་ངེས་ཅན་གྱི་ས་ཆར་ལྷག་པར་དུ་མང་པོ་བཙུགས་བྱུང་། རྒྱལ་ཁབ་གཞན་དུ་རྩྭ་སར་ལྕགས་རས་སྐོར་བ་ཨེ་ཡོད་ཟེར་ན་ཡོད་དེ། དཔེར་ན་ཨོ་ཏྰ་ལེ་ཡར་རྩྭ་སར་ལྕགས་རས་སྐོར་བ་ནི་མིས་རི་དྭགས་ཀངྒ་རུ་ལ་གནོད་རྐྱེན་མི་ཐེབས་པའི་ཆེད་དུ་ཡིན། ཧྥེ་གླིང་གི་རྒྱལ་ཁབ་ཁུན་ནེ་ཡས་ལྕགས་ར་འཛུགས་པ་ནི་རི་དྭགས་རྩ་ཆེན་དག་སྲུང་སྐྱོབ་ཀྱི་ཆེད་དུ་ཡིན་པ། པོད་ཟུ་བ་ནྰས་ལྕགས་ར་སྐོར་བ་ནི་རི་སྐྱེས་རི་དྭགས་ཀྱི་འགོས་ནད་སྣ་ཚོགས་ཁྱིམ་ཕྱུགས་ལ་མི་འགོས་པའི་ཆེད་དུ་ཡིན། ཧྥེ་གླིང་དུ་ལྕགས་ར་བསྐོར་བ་ནི་བསེ་རུ་དག་རྔོན་པའི་ལག་ཏུ་མི་ཤོར་པའི་ཆེད་དུ་ཡིན།
དེ་བས་རྩྭ་སའི་ཐོག་ཏུ་ལྕགས་ར་སྐོར་རྗེས། རི་སྐྱེས་རི་དྭགས་དང་སྒོ་ཕྱུགས་སོགས་ལ་སྔ་མོ་ནས་དབང་པའི་རང་དབང་ནི་མེད་པར་གྱུར་ཟིན། དེའི་མཇུག་འབྲས་ནི་སྲོག་ཆགས་བར་དུ་འཐབ་རྩོད་དང་འབྲེལ་བ་ཅི་ཡང་མེད་སོང་། འདིས་རི་དྭགས་ཀྱི་རིགས་མང་པོ་མེད་པར་འགྲོ་བ་ལ་མཐུན་རྐྱེན་བསྐྲུན། ཤ་གཟན་མང་པོ་ཡང་ཇེ་ཉུང་ནས་ཇེ་ཉུང་དང་། ད་དུང་རིས་སྐྱེས་སྲོག་ཆགས་ཕན་ཚུན་བར་གྱི་འབྲེལ་བ་ལ་ཡང་གནོད་རྐྱེན་ཆེན་པོ་ཐེབས་ནས་རང་བྱུང་སྐྱེ་ཁམས་མ་ལག་ལ་གནོད་པ་བཟོས་པ་ཡིན།
ཕུན་ཕད་གསར་འགྱུར་དྲ་བ་ནས་བསྒྱུར།
ཡོང་ཁུང་དྲ་བ།
