གཟུངས་ཕྱུག་སྐྱིད།
ཆུ་བོ་གངྒཱ གསེར་འོད་འཚེར་བའི་ས་ཆེན་གྱི་ལང་ཚོ་ཁྱེད
གསེར་མདོག་གི་ཉི་འོད་དང་ལྷན་དུ་གང་ནས་ཡོང
འདམ་སྙིགས་ཀྱིས་གྲུབ་པའི་བ་ཚྭའི་བཞུར་རྒྱུན་ཁྱེད
བྲེལ་ཟིང་གི་མི་ཚོགས་དང་མཉམ་དུ་གང་ལ་འགྲོ
སའི་སྤྱི་གཙུག་ནས་བཞུར་འོངས་པའི་ཤེལ་གྱི་མགུལ་རྒྱུན་དྭངས་མོ
རང་བྱུང་དང་ཉི་འོད་ཀྱི་ཞི་འཇམ་བསུ་བཞིན
དྭངས་གཙང་གི་ཀློང་ནས་ཅི་ཞིག་འབོད་ཀྱིན་ཡོད
ས་སྲོད་ཀྱི་ཉི་ཟེར་དམར་པོའི་སྙན་འཇེབས་བཀྲོལ་ཀྱིན
འདམ་སྙིགས་ཀྱི་གསེབ་ཏུ་ཅི་ཞིག་འབོར་བཞིན་ཡོད
ཆུ་བོ་གངྒཱ། ས་ཆེན་པོའི་སྙིང་ཁྲག་ལྟར་ཁོལ་བའི་ཁྱེད་རང་
འདི་ལྟར་སྐྱོ་མདོག་གིས་བཞུར་དོན་སུ་ཡི་ཆེད་དུ་ཡིན
འདི་ལྟར་ངལ་དུབ་ཀྱི་གཟེར་ནས་ཅི་ཞིག་འཚོལ་བཞིན་ཡོད
ང་རང་ཁྱེད་ཀྱི་ཞི་འཇགས་ཀྱི་གཙང་འགྲམ་ནས་འགྲེང་བཞིན
ཁྱེད་ཀྱི་སྙན་འཇེབས་ཀྱི་རོལ་དབྱངས་ལ་རྣ་བ་བླགས་དུས
གསེར་སྤྲིས་འཁྱུད་པའི་འབབ་རྒྱུན་རེ་རེ
དེ་རིང་གི་གད་སྙིགས་སུ་འགྱུར་ཚུལ་མཐོང་ཞིང
ཆེས་རང་བྱུང་ངམ་སྟོབས་ཀྱིས་བརྡོལ་བའི་འཚོལ་སྙེག་དྭངས་མོ
སུ་ཞིག་གི་མགྲིན་པ་ནས་མཆེད་པའི་སྐྱོ་ངག་དང་སྨྲེང་པ་ཐོས་བྱུང
ཆུ་བོ་གངྒཱ
ཁྱེད་ལ འཛད་མཐའ་བྲལ་བའི་གོམས་འགྲོས་འདི་སུ་ཡིས་གནང་སོང་
ཁྱེད་ལ འཇགས་སུ་མེད་པའི་འགྱུར་ཁུགས་འདི་སུ་ཡིས་བསྩལ་བྱུང་
ངེད་དྲ་ཚིགས།
