October ༢༠༡༤

རྒྱ་ནག་གི་གོང་མ་གསར་བ——ཞི་ཅིན་ཕེང་།

འབྲོག་མྱི།     ཞི་ཅིན་ཕེང་གིས་སྲིད་དབང་བཟུང་ནས་ལོ་གཉིས་ཀྱི་རྗེས་སུ། ཁོང་ཉིད་རྒྱ་ནག་གི་ཆབ་སྲིད་པ་རྩེ་གྲ་དེ་ཡིན་པའི་གོ་ས་སྲ་བརྟན་ངང་སྲུང་ཐུབ་ཡོད། ཁོང་ནི་མའོ་ཙེ་ཏུང་དང་ཏིན་ཞོ་ཕེང་གི་རྗེས་སུ་བྱུང་བའི་དབང་ཤུགས་ཅན་གྱི་འགོ་ཁྲིད་ཞིག་ལ་རྒྱལ་སྤྱིའི་སྤྱི་ཚོགས་ཀྱིས་ངོས་འཛིན་བྱས་ཡོད། ཡིན་ན་ཡང་། ཁོང་གི་གཡས་དང་གཡོན་ན་མི་སྒེར་ལ་དད་བཀུར་གྱི་རྣམ་པའང་རིམ་གྱིས་གྲུབ་ཀྱིན་ཡོད། རྒྱ་ནག་དམར་ཤོག་ཚོགས་པའི་ཚོགས་ཆེན ༡༨འི་ཚོགས་ཐེངས་བཞི་བ་དེ་ནི་ཞི་ཅིན་ཕེང་ཧ་ཅང་དགའ་མོས་བྱེད་པའི་ཡུལ་དུས་ངང་ཚུལ་དེ་ཡིན་ལ། དུས་དེ་རུ་འབྱུང་འགྱུར་རྒྱ་ནག་དེ་ཁ་ཕྱོགས་གང་ལ་བསྐྱོད་རྒྱུ་ཞི་ཅིན་ཕེང་རང་ཉིད་ཁོ་ནས་ཐག་གཅོད་བྱས་ཆོག ཉིན་ཤས་སྔོན། ཞི་ཅིན་ཕེང་གིས་མི་དམངས་ཚོགས་ཁང་ཆེན་མོ་རུ་སྒྱུ་རྩལ་བ་དང་། གློག་བརྙན་བཟོ་སྒྲིག་མཁན།     རྩོམ་པ་པོའི་དཔུང་སྡེ་བསྡུས་ནས་ཕྱི་ལོ ༡༩༤༢ ལོར་མའོ་ཙེ་ཏུང་གིས་བསྐོང་བའི་ཡན་ཨན་རིག་རྩལ་ལས་དོན་ཚོགས་འདུ་དང་གཉིས་སུ་མ་མཆིས་པའི་རིག་རྩལ་ཚོགས་འདུ་ཞེས་པའི་སྟེང་གཏམ་བཤད་སྐབས། སྤྱི་ཚོགས་རིང་ལུགས་ཀྱི་གཞི་རྩའི་རིན་ཐང་དང་རྒྱ་ནག་གི་སྲོལ་རྒྱུན་རིན་ཐང་ཚང་མར་གུས་བཀུར་ཞུ་དགོས། ཞེས་ནན་སྐུལ་བྱས་ཡོད་པ་དེས། མཱ་ཁི་སི་རིང་ལུགས་དང་རྒྱ་ནག་གི་རོའུ་ཇཱ་རིག་པ་གཉིས་ཟུང་འབྲེལ་བྱ་རྒྱུའི་ལྟ་བ་བཟུང་ཡོད་པས། དེར་མི་རྣམས་ཡ་མཚར་སྐྱེས་ཡོད། རྒྱ་ནག་གི་ལོ་རྒྱུས་སྨྲ་བ་སྐུ་ཞབས་ཀྲང་ལའེ་ཧྥན་གྱིས། ངས་བལྟས་ན་ཞི་ཅིན་ཕེང་ནི་དེབ་རབས་ཀྱི་བསམ་བློ་ཅན་གྱི་འགོ་ཁྲིད་མི་སྣ་ཞིག་མ་རེད། ཁོང་ནི་སྲོལ་རྒྱུན་བསམ་བློ་བ་ཞིག་རེད། ཁོང་གིས་རྒྱ་ནག་གི་སྲོལ་རྒྱུན་ལས་དབང་བསྒྱུར་ཐབས་ལམ་འཚོལ་སྙེག་བྱེད་ཀྱིན་ཡོད་པས། ད་བར་དུ་ཁོང་གིས་བཏོན་པའི་རྒྱལ་ཁབ་སྐྱོང་པའི་རིགས་ལམ་ནི་གོང་མའི་རིགས་ལམ་དང་། ཡང་ན་གོང་མའི་དབང་བསྒྱུར་བྱེད་ཐབས་ཡིན། ཞེས་བརྗོད་འདུག ཞི་ཅིན་ཕེང་གིས་རྒྱ་ནག་གི་དབང་ཆ་གསུམ་གཅིག་ལྕོགས་བྱས་པའི་འདས་པའི་ལོ་གཉིས་ཀྱི་ནང་དུ། རྒྱལ་ཁབ་བདེ་འཇགས་ལྷན་ཁང་དང་བཅོས་བསྒྱུར་ཚོགས་ཆུང་སོགས་ལྷན་ཁང་དང་ཚོགས་ཆུང་མང་པོ་ཞིག་གསར་འཛུགས་བྱས་ནས། ལྷན་ཁང་དང་ཚོགས་ཆུང་དེ་དག་གི་འགན་འཛིན་རང་ཉིད་ཀྱིས་གཅིག་ལྕོགས་བྱས་པ་བརྒྱུད་དབང་ཆ་ཡོད་ཚད་སྒེར་སྡོམ་བྱས་ཡོད། ལྷག་པར་དུ་དམར་ཤོག་ཚོགས་པ་ནང་ཁུལ་དང་རྒྱལ་ཁབ་ཀྱི་སྒྲིག་གཞི་ཡོད་ཚད་དུ་ལྐོག་ཟ་རུལ་སུངས་ལ་རྡུང་རྡེག་གི་ལས་འགུལ་ཚ་ཚ་འུར་འུར་དུ་སྤེལ་ཞིང་།...
དེ་ལས་མང་པ།

བོད་ཁུལ་གྱི་གསང་གྲངས་གློག་བརྙན་དུ་ཕབ་འཆར།

     ཨ་རིའི་ཧོ་ལེ་ཝུ་ཌི་གློག་བརྙན་བཟོ་སྐྲུན་ཁང་གིས་ཨ་སྒོར་དུང་ཕྱུར་ལྔ་ལྷག་བཏོན་ནས་<<བོད་ཁུལ་གྱི་གསང་གྲངས>> ཞེས་པའི་བརྩམས་སྒྲུང་“རིག་གནས་མྱུལ་ཞིབ”་ཀྱི་གློག་བརྙན་ཆེན་པོ་ཞིག་ཏུ་ཕབ་འཆཪ་ཡོད་འདུག  རྒྱ་རིགས་རྩོམ་པ་པོ་ཧི་མཱ་ཡིས་བརྩམས་པའི་བོད་དང་བོད་ཀྱི་རིག་གནས་རྒྱབ་ལྗོངས་འོག་བཞེངས་འབྲི་བྱས་པའི་ཉུལ་ཞིབ་ཀྱི་སྒྲུང་གཏམ་རིང་མོ། མི་སྟོང་ཕྲག་ཡར་སྔོན་གྱི་བོད་ཀྱི་གསང་བའི་ལོ་རྒྱུས་དང་། བོད་ཀྱི་ལོ་རྒྱུས་ཀྱི་ཤུལ་དུ་ལུས་པའི་གནད་དོན་བརྗོད་བྱར་བྱས་པའི་<<བོད་ཁུལ་གྱི་གསང་ཨང་>> ཞེས་པ་དེ། ཨ་རིའི་ཧོ་ལེ་ཝུ་ཌི་(Hollywood) གློག་བརྙན་འཁྲབ་སྟོན་ཁང་དང་གན་རྒྱ་བཞག་སྟེ་ལོ་གཅིག་ཙམ་སོང་ཡོད་པ་མ་ཟད། ད་ལོའི་ཕྱི་ཟླ་༧ པའི་ནང་གློག་བརྙན་གྱི་འཁྲབ་གཞུང་ཡོངས་སུ་ཚར་ཏེ། ལོ་རྗེས་མའི་ཕྱི་ཟླ་༤ པའི་ནང་དངོས་སུ་གློག་བརྙན་འཁྲབ་འགོ་རྩོམ་རྒྱུ་ཡིན་པ་དང་། ཕྱི་ལོ་༢༠༡༦ ལོའི་ལོ་མཇུག་ཏུ་འཁྲབ་ཐེངས་དང་པོ་འགྲེམ་སྤེལ་བྱ་རྒྱུ་ཡིན་འདུག <<བོད་ཡུལ་གྱི་གསང་གྲངས>> ཞེས་པའི་པོད་ཆ་ཚང་ལ་ཁྱོན་དེབ་ཕྲེང་བཅུ་ཡོད་ཅིང་། སྒྲུང་རིང་དེའི་གཙོ་གནད་ཡིག་འབྲུ་ཁྲི་ལྔ་ལྷག་དབྱིན་ཡིག་ཏུ་བསྒྱུར་ཏེ་གློག་བརྙན་འཕྲིན་བཟོ་སྐྲུན་ཁང་སྤྲད་ཡོད་པ་དང་། མིག་སྔར་<<བོད་ཡུལ་གྱི་གསང་གྲངས>>་ཞེས་པའི་བརྩམས་ཆོས་དེ་གློག་བརྙན་དུ་རྩོམ་སྒྲིག་གི་འགྲོ་གྲོན་ཨ་སྒོར་འབུམ་གསུམ་ལྷག་ཡིན་འདུག གློག་བརྙན་བཟོ་གྲྭའི་འབྲེལ་ཡོད་འགན་ཁུར་པས་བརྗོད་པ་ལྟར་ན། <<བོད་ཡུལ་གྱི་གསང་གྲངས>>་ཞེས་པའི་བརྩམས་དེབ་དེ་གློག་བརྙན་དུ་ཕབ་སྐྲུན་བྱ་རྒྱུའི་དམིགས་ཡུལ་གཙོ་བོ་ནི། གཏིང་ཟབ་པའི་ཤར་ཕྱོགས་རིག་གནས་དང་བྱེ་བྲག་བོད་ཀྱི་རིག་གནས་ལས་འཕྲོས་ཏེ། གོ་ལ་ཧྲིལ་པོའི་བོད་ཀྱི་གློག་བརྙན་ལ་དགའ་མོས་ཡོད་པའི་མི་རྣམས་ཀྱི་སེམས་ལ་བོད་ཡུལ་དེ། སྔར་ལས་ཡ་མཚར་བའི་ཡུལ་གྲུ་ཞིག་ཏུ་ངོས་འཛིན་པའི་སྣང་བརྙན་ཇེ་ཟབ་ཏུ་གཏོང་རྒྱུའི་ཆེད་ཡིན་ཟེར། དེ་བཞིན་གནས་ཚུལ་ནང་ཐོན་པར་གཞིགས་ན། སྤྱིར་ད་ལྟའི་ཆར་གློག་བརྙན་འཁྲབ་ཁྲིད་པ་དང་འཁྲབ་སྟོན་པ་ད་དུང་གཏན་ཁེལ་བྱས་མེད་ཀྱང་། གློག་བརྙན་འཁྲབ་སྟོན་པའི་མིང་ཐོ་ཞིག་བརྒྱུད་ལམ་ཁག་ཏུ་ཕྱིར་བསྒྲགས་བྱས་ཡོད་པའི་ནང་། འཁྲབ་སྟོན་པ་དང་འཁྲབ་ཁྲིད་པའི་འོས་མི་དང་མིང་རྟགས་བཀོད་མེད་པ་ཙམ་ལས་གཞི་རྩའི་ཆ་ནས་འོས་མི་གོ་སྒྲིག་ལེགས་པར་གྲུབ་ཟིན་པའི་ཁྲོད། ཧོ་ལེ་ཝུ་ཌི་ཡི་གློག་བརྙན་འཁྲབ་སྟོན་པ་གྲགས་ཅན་ཌན་ཇོན་ཧ་སོན་(Dwayne Johnson) དང་ཌེ་ཝེ་ཌི་བྷེལ། (David Bell)...
དེ་ལས་མང་པ།

ཚངས་མགུར།

༧ རྒྱལ་བ་ཚངས་དབྱངས་རྒྱ་མཚོ། ཤར་ཕྱོགས་རི་བོའི་རྩེ་ནས། ། དཀར་གསལ་ཟླ་བ་ཤར་བྱུང༌།། མ་སྐྱེས་ཨ་མའི་ཞལ་རས། ། ཡིད་ལ་འཁོར་འཁོར་བྱས་བྱུང༌། ། ན་ནིང་བཏབ་པའི་ལྗང་གཞོན།། ད་ལོ་སོག་མའི་ཕོན་ལྕོག ། ཕོ་གཞོན་རྒས་པའི་ལུས་པོ། ། ལྷོ་གཞུ་ལས་ཀྱང་གྱོང་བ། ། རང་སེམས་སོང་བའི་མི་དེ། ། གཏན་གྱི་འདུན་མར་བྱུང་ན།། རྒྱ་མཚོའི་གཏིང་ནས་ནོར་བུ། ། ལོན་པ་དེ་དང་འདྲ་བྱུང༌། ། འགྲོ་ཞོར་ལམ་བུའི་སྙིང་ཐུབ།། ལུས་དྲི་ཞིམ་པའི་བུ་མོ།། གཡུ་ཆུང་དྲུག་དཀར་རྙེད་ནས། ། བསྐྱུར་བ་དེ་དང་འདྲ་བྱུང༌། ། མི་ཆེན་དཔོན་པོའི་སྲས་མོ།། ཁ་འབྲས་མཚར་ལུགས་བལྟས་ན།། ཁམ་སྡོང་མཐོན་པོའི་རྩེ་ནས། ། འབྲས་བུ་སྨིན་དང་འདྲ་བྱུང༌།...
དེ་ལས་མང་པ།

ཤེས་ཡོན་སློབ་གསོའི་སྐོར།

མཁན་ཆེན་འཇིགས་མེད་ཕུན་ཚོགས་འབྱུང་གནས་ཀྱི་གསུང་།       མི་ལ་ཤེས་ཡོན་མེད་ན་ལྟོ་གོས་ཀྱི་རྩོལ་སྒྲུབ་ཕལ་བ་ཙམ་མ་གཏོགས་ཁྱད་འཕགས་ཀྱི་བྱ་བ་གང་ཡང་སྒྲུབ་དཀའ། གལ་ཏེ་མི་རིགས་ཧྲིལ་བོ་དེ་ལྟར་གྱུར་ན་མི་རིགས་དེ་སྔོན་ཐོན་གྱི་གྲལ་དུ་ནམ་ཡང་ཚུད་ཐབས་མེད་པས་ཤེས་ཡོན་སྦྱང་རྒྱུ་འདི་ཤིན་ཏུ་གལ་ཆེ་བ་ཡིན་ཡང་། ང་ཚོ་བོད་ནང་ན་རིག་གནས་གཞན་དུ་མ་ཟད་བོད་རང་གི་བཅུ་ཕྲག་རིག་གཞུང་ཆ་ཚང་སྦྱང་རྒྱུ་ཡོད་པའི་སློབ་གྲྭ་ཧ་ཅང་དཀོན་མོ་རེད། གཞན་ཡང་ཕ་མ་ཚོས་ཕྲུ་གུ་རྣམས་སློབ་གྲྭར་གཏོང་འདོད་མེད་པའི་གོམས་གཤིས་ཤིག་ཆགས་འདུགའདིའི་རྒྱུ་རྐྱེན་གྱི་རྩ་བ་ནི་སྔ་སོར་སློབ་ཆུང་རྣམས་སུ་རྒྱ་ཡིག་ཁོ་ན་མ་གཏོགས་བོད་ཡིག་སྦྱང་རྒྱུ་མེད་པ་དང་། རྒྱ་ཡིག་སྦྱངས་ཏེ་སློབ་འབྲིང་སོགས་མཐར་ཕྱིན་ཀྱང་བོད་དུ་བྱ་བ་སྒྲུབ་པའི་ཁོར་ཡུག་བཟང་པོ་ཅི་ཡང་མེད་པས་སླར་ཁྱིམ་དུ་ལོག་ནས་ཕྱུག་འཚོ་བ་དང་། ལུད་སྐྱེལ་བ་སོགས་བྱེད་དགོས་པ་དང་ད་ལྟ་བོད་ཡིག་ཅུང་ཟད་དེ་སྦྱང་རྒྱུ་ཡོད་ཀྱང་དེས་སྤྱི་ཚོགས་ཐོག་དེ་ཙམ་གྱིས་གོ་ཆེན་པོ་ཆོད་ཀྱི་མི་འདུག་པས་གང་ལྟར་ཡང་དགོས་པ་ཆེར་མི་འདུག་སྙམ་དུ་བསམ་ཏེ་སློབ་གྲྭར་མི་གཏོང་བ་ཡིན་པར་མངོན་ནོ། འདི་དག་རྒྱུ་མཚན་གཏན་ནས་མེད་པ་ཞིག་མ་རེད་མོད། འོན་ཀྱང་ད་ཕྱིན་ཆད་འགལ་རྐྱེན་དེ་དག་སེལ་ཐབས་དང་། ཕྲུ་གུ་ཚོ་ཅིས་ཀྱང་སློབ་གྲྭར་གཏོང་དགོས། རང་རེའི་མི་རབས་རྗེས་མ་རྣམས་ཀྱིས་རིག་གནས་གཞན་མ་ཟད་ཡི་གེ་ཙམ་ཡང་མི་ཤེས་པར་གྱུར་ན་བོད་ཀྱི་མདུན་ལམ་ཟད་ཚར་བ་རེད། ལར་ད་ལྟ་བོད་ཀྱི་ཡུལ་ན་བོད་ཀྱི་སྐད་ཡིག་ལ་རིན་ཐང་ཅི་ཡང་མི་འདུག་སྟེ། ཐ་ན་འཕྲིན་ཡིག་ཅིག་བསྐུར་དགོས་ཀྱང་ཡིག་ཤུབས་སྟེང་དུ་མི་རིགས་གཞན་གྱི་ཡི་གེ་འབྲི་མ་ཤེས་ཕྱིན་བོད་ཡིག་བྲིས་ན་ཡུལ་གཞན་དུ་མི་འཕྲོད་པར་མ་ཟད་བོད་ཀྱི་ཡུལ་ནང་ཕན་ཚུན་དུའང་མི་འཕྲོད། གློག་འཕྲིན་ནི་བོད་ཡིག་གིས་གཏོང་ས་ཞིག་གང་དུའང་མཐོང་རྒྱུ་མི་འདུགའགྲིམ་འགྲུལ་ཐད་ལ་བོད་ཡིག་གཤིས་ཕྱིན་པ་ཞིག་ཤེས་ཀྱང་རླངས་འཁོར་འགྲོ་འོང་གི་དུས་ཚོད་དང་། འཛིན་ཤོག་ཐོག་གི་རྐུབ་སྟེགས་ཀྱི་ཨང་གྲངས་ཙམ་ཡང་ཤེས་དཀའ། གཞན་ཡང་ཐ་ན་རྫོང་གྲོང་ཞིག་ནས་སྨན་ཁང་དང་ཚོང་ཁང་ཞིག་བཙལ་དགོས་ནའང་བོད་ཡིག་ཤེས་པས་ནི་ཕལ་ཆེར་ཕན་པ་ཅི་ཡང་མི་འདུག་པ་ལྟ་བུའི་མཚོན་ནས་ཤེས་པར་བྱའོ།། སྐད་ནི་བོད་སྐད་རྐྱང་བ་མ་གཏོགས་གཞན་མི་ཤེས་པ་རྣམས་ཀྱིས་ཉེར་མཁོ་ཕྲན་བུ་ཞིག་ཉོ་དགོས་ཀྱང་བརྡ་མི་འཕྲོད་པར་འདུག་པས་དེ་ལྟར་བོད་ཀྱི་སྐད་ཡིག་གཉིས་ཀྱིས་བོད་རང་གི་ཡུལ་ནས་གོ་མི་ཆོད་ན་གཞན་གང་ཞིག་ནས་གོ་ཆོད་དགོས་པ་ཡིན། འདི་འདྲའི་ངང་མུ་མཐུད་དེ་ཕྱིན་ན་ནམ་ཞིག་བརྡ་སྤྲོད་ཀྱི་ཐོབ་ཐང་ཅི་ཡང་མེད་པར་སྐད་རིགས་ཀྱི་གྲལ་ནས་ངང་ངམ་ཤུགས་ཀྱིས་འབུད་པའི་ཉེན་ཡོད་པས་ཤིན་ཏུ་གཟབ་པར་བྱ་དགོས་སོ།།     དེས་ན་རང་རེའི་སྐད་ཡིག་འདིས་འཛམ་གླིང་ཐོག་ཏུ་གོ་ཆོད་པ་ཞིག་འོང་ཐབས་མ་ཐོན་ཀྱང་རང་ཡུལ་དུ་གོ་ཆོད་པ་ཞིག་ནི་ཅིས་ཀྱང་དགོས་ཏེ། དེ་ཙམ་ཡང་མ་བྱུང་ན་ཆེས་ཡིད་ཕམ་དགོས་པའི་གནས་སོ།། ཉེ་ཆར་ཁམས་ཕྱོགས་སུ་ཤ་ཞེན་ཅན་གྱི་སྐྱེ་བོ་འགའ་རེས་སྒེར་གྱི་སྒོར་མོ་འབུམ་ཐེར་མང་པོ་བཏང་སྟེ་བོད་ཀྱི་ཤེས་རིག་སྦྱང་སའི་སློབ་གྲྭ་འཛུགས་ཀྱིན་འདུག་ཁོང་ཚོའི་སློབ་གྲྭ་འདི་ནས་རིག་གནས་ཆེན་པོ་ཞིག་ཤེས་མ་ཐུབ་རུང་བོད་སྐད་དག་མ་ཞིག་དང་། རྩམ་པ་བརྫི་ཤེས་པ་ཞིག་འོང་བའི་རེ་བ་བཅངས་ཡོད་ཟེར་རོ།། བསམ་པ་བཟང་པོ་འདི་འདྲ་བས་རང་རིགས་དང་རང་རིགས་ཀྱི་ཡོན་ཏན་རྣམས་ཀྱི་དོན་དུ་འབད་པ་བྱེད་རྒྱུ་འདི་ཤིན་ཏུ་ཡི་རངས་བའི་གནས་དང་། དེང་དུས་སུ་མེད་དུ་མི་རུང་བ་ཞིག་ཀྱང་རེད།གཞན་ཡང་རང་རེ་བོད་ལ་རྒྱུས་མངའ་མེད་པའི་དངོས་ཁམས་དང་། རྫས་འགྱུར་སོགས་ནུབ་ཕྱོགས་ཀྱི་རིག་པ་གསར་བ་རྣམས་ལས་ཁོར་ཡུག་སོགས་ལ་གནོད་པ་མེད་པ་དག་ནི་ངེས་པར་དུ་སྤྱོད་ཤེས་དགོས་པར་འདུག། འདི་རྣམས་འཛམ་གླིང་གི་མི་རིགས་དེ་སྙེད་ཅིག་གིས་སྦྱངས་ནས་ཤེས་འདུག་པ་བོད་ཀྱིས་མི་ཤེས་པའི་རྒྱུ་མཚན་ཅི་ཞིག་ཡོད། དེ་ཡང་བོད་རང་གི་སྐད་ཡིག་གི་སྟེང་ནས་སྦྱང་རྒྱུ་ཡོད་དགོས། དེའི་ཕྱིར་དུ་ཡིག་བསྒྱུར་གྱི་བྱ་བའང་མང་པོ་ཞིག་བྱེད་དགོས་པར་འདུགརང་གི་སྐད་ཡིག་གི་ས་མ་ཤོར་བའི་སྟེང་ནས་གཞན་གྱི་སྐད་ཡིག་སྦྱང་རྒྱུའང་ཤིན་ཏུ་གལ་ཆེ་སྟེ། བརྡ་མ་འཕྲོད་ན་གཞན་དང་འབྲེལ་བ་བྱེད་པའི་ཐབས་མེད།སུ་དང་ཡང་འབྲེལ་འདྲིས་མེད་པར་ལུང་ཀྱོག་ཞིག་ཏུ་གནས་ན་ཤེས་རིག་དང་དཔལ་འབྱོར་གང་ལའང་ཡར་རྒྱས་འོང་དཀའ་བ་ཡིན་ནོ།། དེ་སོགས་མང་པོ་ཞིག་དུས་རབས་གསར་བའི་བོད་ཀྱི་ན་གཞོན་ཚོའི་ལས་ཀྱི་བགོ་སྐལ་དུ་བབ་ཡོད་དོ།།...
དེ་ལས་མང་པ།

བོད་དང་དབྱར་རྩྭ་དགུན་འབུ།

མི་ཁོམ་པའི་རྒྱལ་སྲས།         འཛམ་གླིང་ཧྲིལ་བོ་སྤྱི་ཚོགས་འཕེལ་རྒྱས་དང་དཔལ་འབྱོར་འཛུགས་སྐྲུན། ཆ་འཕྲིན་དུས་རབས་ཀྱི་བཙིར་ཡོང་དུས་ང་ཚོ་མགོ་ནག་བོད་པ་ཚང་གི་སེར་སྐྱ་ཕོ་མོ་རྒན་གཞོན་སུ་ལའང་འདིས་གནོན་ཤུགས་དང་བག་ཆགས་མི་འཇོག་མི་སྲིད་སྟེ་རང་རང་གི་ལྟོ་གོས་ཀྱི་ཕྱིར་དུ་ཐུབ་ཚོད་ནུས་ཚོད་ཀྱིས་ལས་ཀ་ཙག་ཙིག་རེ་སྒྲུབ་པའི་ལམ་ཁ་རེ་ཅིས་ཀྱང་ཡོད་ངེས་རེད།  མི་རེའི་འཇོན་ཐང་གི་ཁྱད་པར་དག་ལས་རང་གི་གཉེར་བྱའི་ལས་ཀའང་རིགས་མི་འདྲ་བ་མང་དུ་བྱུང་ཡོད། འོན་ཀྱང་དེང་སང་རང་རེའི་རོང་འབྲོག་ས་ཁུལ་གྱི་གཞི་རིམ་མང་ཚོགས་ཀ་ཁའི་མགོ་རྔ་མི་ཤེས་མཁན་སུས་ཀྱང་དཔལ་འབྱོར་གོང་སྤེལ་གྱི་ལམ་ཁ་༼མཐར་གཏུགས་ན་སྒོར་མོ་བཙལ་ཐབས༽ཡག་ཤོས་ཤིག་ཡོད་པ་ནི་ལོ་རེའི་ཧོར་ཟླ་གསུམ་པའི་ཟླ་དཀྱིལ་ནས་འགོ་བཙུགས་ཏེ་ཟླ་ངོ་གསུམ་ལྷག་གི་རིང་ལ་མགོ་ལོག་དང་ཡུལ་ཤུལ། རྩི་གོར་ཐང་ངམ་དར་མཚོ་སོགས་སུ་སོང་དེ་དབྱར་རྩྭ་དགུན་འབུ་བརྐོ་རྒྱུ་དེར་ངོས་འཛིན་གྱིན་ཡོད་པ་རེད། རྒྱུ་མཚན་ནི་ད་བར་དུ་གཞི་རིམ་མང་ཚོགས་ཚོར་མཚོན་ན་ལོ་གཅིག་གི་ཡོང་འབབ་ནི་སྒོར་རྐྱང་ཁྲི་ཚོ་འགའ་རེའི་ཡན་ཆོད་དུ་བུད་མྱོང་མེད་པས་ཟླ་ངོ་གསུམ་ལྷག་གི་རིང་ལ་དབྱར་རྩྭ་དགུན་འབུ་བརྐོས་ན་མ་ཐ་ཡང་མི་རེར་ཡོང་འབབ་སྒོར་ཁྲི་ལྷག་རེག་གི་ཡོད་པ་འདིས་རོང་འབྲོག་མང་ཚོགས་ཀྱི་ཕོ་མོ་རྒན་གཞོན་སུ་ལའང་བྲེལ་ཤ་ལངས་སུ་བཅུག་ཡོད་པ་མ་ཟད་འབྲོག་ཕྱོགས་སུ་ཆེད་དུ་སློབ་གྲྭའི་སློབ་མ་རྣམས་ལ་ཟླ་ངོ་གསུམ་ལྷག་ལ་གནང་བ་བྱིན་དེ་རི་མགོར་མངགས་ཀྱིན་ཡོད་པ་རེད།༼གལ་ཏེ་དགེ་རྒན་ཚོས་གནང་བ་མ་བྱིན་ཚེ་སློབ་མའི་ཁྱིམ་བདག་དག་གིས་དགེ་རྒན་དང་སློབ་གྲྭ་ལ་ངོ་རྒོལ་བྱས་ཏེ་བྱིས་པ་ཚོ་སློབ་གྲྭར་གཏོང་གི་མ་རེད། ༽འདི་ནི་དམིགས་གསལ་ས་ཁུལ་ནས་དམིགས་གསལ་སློབ་གསོའི་བྱ་བ་སྒྲུབ་ཚུལ་ཡིན་ལོས་ཆེ། དབྱར་རྩྭའི་ཡོང་འབབ་ཀྱི་ངོས་གཞན་ཞིག    རོང་འབྲོག་གི་ཕོ་མོ་རྒན་གཞོན་ཕལ་ཆེར་འདི་ལྟར་ཟླ་ངོ་གསུམ་ལྷག་ལ་གོག་ནུར་གྱིས་ལུས་ཟད་མིག་བསྐྲང་གིས་དབྱར་རྩྭ་དགུན་འབུའི་སྟེང་དུ་ཧུར་ཐག་འབད་ཐག་བྱས་ཏེ་བརྐོས་ཡོང་བའི་དབྱར་རྩྭ་རྣམས་བདག་གཉེར་དང་ཚགས་ཆུད་དང་དོ་དམ་ལེགས་པོ་བྱས་ཏེ་ཟི་ལིང་དུ་ཐོན་དུས་ཡོད་ཚད་ཀྱི་ལུས་རིད་ཅིང་ངོ་མདོག་ཡོངས་སུ་ཤོར་ཡོད་ནའང་དབྱར་རྩྭ་སྟོང་ཕྲག་ཡོད་པས་སྣང་བ་མཐོན་པོ་དེས་ཞིང་གྲོང་བ་ཚོའི་མི་ཡུལ་གྱི་གྲོང་ཁྱེར་ཆེན་པོ་ཟི་ལིང་བོད་མིའི་ཁྲོམ་གྱི་སྲང་ལམ་དོག་མོ་དེ་ན་འཚང་ཁ་ཤིག་ཤིག་གིས་ཕར་འགྲོ་ཚུར་འོང་གིས་ཉིན་ཞག་འགའ་རེ་བསྐྱལ་གྱིན་ཡོད་པ་མ་ཟད་དབྱར་རྩྭ་བརྒྱ་ཕྲག་འགའ་ཤས་དེ་ག་ན་དབྱར་རྩྭ་བརྐོ་མཁན་བོད་པའི་ཞིང་གྲོང་བ་ཚོར་རེ་སྒུག་གིས་མིག་ཟུང་དང་རྐང་ལག་དག་ལ་བྲེལ་ཤ་ལངས་ཏེ་བོད་སྐད་ད་མ་དིག་བཤད་ཤེས་པའི་རྒྱ་རིགས་དང་ཁ་ཆེ་བ་སྐོར་དང་སྐོར་བྱས་ཏེ་བོད་པ་ཞིང་གྲོང་བ་གཉོམ་ཆུང་ཚོའི་ལག་གི་དབྱར་རྩྭ་རྣམས་ཐབས་བརྒྱ་ཇུས་སྟོང་གཡོ་ལེན་བྱེད་ཀྱིན་པའི་མི་རྐྱང་ངམས་ནག་དེ་དག་ལ་བཙོངས་རྗེས་སྒོར་རྡོག་སྟོང་ཕྲག་རེ་བཟུང་སྟེ་ཟི་ལིང་བོད་མིའི་ཁྲོམ་གྱི་ཟ་ཁང་རྫོབ་པོ་དེ་དག་གི་ནང་ནས་འཐེན་ཐུག་དཀར་ཡོལ་གང་རེ་འཐུང་རྗེས་འབོལ་ཁྲིའི་སྟེང་དུ་གཡས་ལོག་གཡོན་ལོག་གིས་རྡུང་ལེན་འོད་སྡེར་དག་བལྟས་ཡོད་པ་དང་སྣང་བ་སྐྱིད་པོ་རེ་བྱེད་བསམ་ནས་ས་རུབ་པ་དང་འཛམ་གླིང་ན་ཆེས་འཇིགས་ཉེན་ཆེ་བའི་༼ཨེ་ཙིའི་ནད་༽ཟེར་བ་གོ་ཡང་མ་མྱོང་བའི་ཞིང་གྲོང་གི་སྐྱེས་པ་དག་གིས་ལྐོག་མིག་ལིང་ལིང་གིས་སྨད་འཚོང་མ་ཁྱུ་དང་ཁྱུ་ཡོད་སར་རུབ་ཏེ་འཚང་ཁ་ཤིག་ཤིག་གིས་སྨད་འཚོང་ཁང་དུ་ཉུལ་གྱིན་ཡོད་ལ་བུད་མེད་དག་གིས་བོད་མིའི་ཁྲོམ་གྱི་སྲང་ལམ་གཡས་གཡོན་གྱི་ཐང་དུ་བཤམས་ཡོད་པའི་གྱོན་ཆས་རྙིང་རྡུགས་འཚོང་ས་དག་ན་གོན་པ་དང་ཀོ་ལྷམ་རྙིང་བ་དག་ཕར་སློག་ཚུར་སློག་བྱས་བྱས་མཐར་རོ་ཤུན་ལྟ་བུའི་གོས་རྙིང་སྒྱེ་མོ་གང་རེ་ཉོས་ཏེ་ཕ་ཡུལ་དུ་ལོག་འགྲོ བོད་ལ་དབྱར་རྩྭ་གདོན་ཚུལ།   དུས་རྒྱུན་དུ་བོད་པ་ཚང་གིས་གཞན་གྱི་མི་གཙང་བ་ཁྱིམ་དུ་ཁྱེར་ཡོང་ན་ཁྱིམ་གྱི་སྲུང་མར་མནོལ་གྲིབ་ཤོར་འགྲོ་གལ་ཏེ་མི་གཙང་མནོལ་གྲིབ་ཤོར་ན་ཁྱིམ་ཚང་དེར་ཕར་ཞོག་ཡུལ་ཕྱོགས་དེར་ཆག་ཆེ་ཉམ་ང་སླེབས་འོངས་ཚུལ་བཤད་མོད་ཟི་ལིང་གི་སྨད་འཚོང་ཡུགས་ས་མ་དག་ལ་ཤ་འབྲེལ་ལུས་འབྲེལ་བྱས་ཏེ་ཁྱིམ་དུ་ཐོན་ན་ཅང་ཡང་མི་སྐྱོན་པ་གང་རེད་དང་། གཞན་གྱི་རོ་ཤུན་མཛེ་ཤུན་དག་སྒྱེ་མོ་གང་རེ་ཁྱིམ་གྱི་ཡ་ཕུག་གི་སྒམ་ནང་དུ་བཅུག་བཞག་ནའང་གྲགས་འགུལ་ཅི་ཡང་མེད་དོན་གང་རེད།  ནད་རིགས་བཞི་བརྒྱ་རྩ་བཞི་འགོས་ན་སྐྱེས་པ་དེ་དག་དང་གདོན་རིགས་སུམ་བརྒྱ་དྲུག་ཅུ་རྗེས་ལ་འབྲངས་ན་བུད་མེད་དེ་དག་གི་གདོན་རྫས་དག་གི་རྗེས་ལ་འབྲངས་ཏེ་གདོན་ཆོག་མོད་སྲུང་མ་དག་གིས་ཀྱང་ཁྱིམ་གྱི་ཡ་ཕུག་ན་ཕྱི་ཡི་ནད་གདོན་རང་ཁྱིམ་དུ་གཡབ་མོ་བྱེད་པ་ཇི་བཞིན་ཁྱོད་ཚོ་ལ་ནད་ཡམས་གང་ཡང་མི་འབྱུང་བ་ཡ་མཚན་ཆེ། ཐ་ན་ལྷ་མོ་རྩིས་གསུམ་གྱི་མགོ་བསྐོར་གཏོང་མཁན་དེ་དག་གིས་ཀྱང་གདོན་རྫས་ངོ་མ་གདོན་དུ་མ་བབས་པ་ནི་གཞི་རིམ་མང་ཚོགས་དེ་ཚོར་གདོན་རྫས་ལོངས་སུ་སྤྱོད་པའི་སྐལ་བ་ཡོད་པ་ལོས་ཡིན། དབྱར་རྩྭའི་རིན་ཐང་མི་ཤེས་པའི་བོད།   བརྒྱ་ལ་འབུ་བརྐོ་མང་ཚོགས་དག་བདེ་བླག་ངང་ཕ་ཡུལ་དུ་ཐོན་པའི་དབང་དུ་བཏང་ནའང་ཤི་གསོག་རོ་གསོག་བྱས་པའི་དབྱར་རྩྭ་རྣམས་གཞན་དུ་བཙོངས་རྒྱུ་ནི་ཁོ་ཚོར་མཚོན་ན་ཤིན་ཏུ་ནས་དཀའ་ཁག་ཆགས་བསྡད་ཡོད་པ་རེད། གཅིག་ན་ཚོང་ལས་ཀྱི་ཉམས་མྱོང་མེད་པ་དང་གཉིས་ན་རྒྱལ་སྤྱིའི་ཚོང་རྭའི་སྒང་གི་རིན་གོང་སོགས་ག་འདྲ་ཡིན་པ་ཤེས་མཁན་མེད་ལ་གསུམ་ན་ཟི་ལིང་གྲོང་ཁྱེར་ཆུང་ཆུང་འདི་ལས་རྒྱལ་ནང་གི་གྲོང་ཁྱེར་དག་ལ་ཉུལ་ནས་ཉོ་འཚོང་བྱེད་ཐུབ་མཁན་དེ་བས་ཀྱང་མེད་པས་ཟི་ལིང་གི་གཡོ་ཚོང་བ་རྒྱ་དང་ཁ་ཆེ་ད་དུང་བོད་པའི་མི་རྐྱང་ཧམ་ཅན་སྐོར་ཞིག་བརྒྱུད་མར་༼ཁྱི་སྤྱང་ངན་འབྲེལ་༽བྱས་ཏེ་ཉོ་སྡུད་བྱེད་ཀྱིན་པ་དག་ལ་མི་སྤྲོད་ཐབས་མེད་བྱུང་ཡོད་པ་རེད། སྤྱིར་ན་དབྱར་རྩྭ་འགུན་འབུ་ནི་བོད་མདོ་འབུས་མཐོ་སྒང་ན་མ་གཏོགས་མེད་པས་རང་བྱུང་གི་རྩྭ་སྨན་རྩ་ཆེན་ཞིག་ཡིན་པར་རྒྱལ་ཁབ་ཕྱི་ནང་གི་མི་ཚང་མས་ཁས་ལེན་ཡིད་ཆེས་བྱེད་ཀྱིན་ཡོད་པ་མ་ཟད་མི་སྒེར་སོ་སོའི་སྨན་རྫས་གཞན་གང་གིས་ཀྱང་བསྲེས་ལྷད་མ་བྱས་པར་ཆང་གིས་སྦངས་ཏེ་འཐུང་ན་ནད་བརྒྱ་སྨན་གཅིག་ཏུ་ངོས་འཛིན་བྱེད་ཀྱིན་ཡོད་མོད་ཡིད་ཕངས་པ་ཞིག་ལ་མང་ཚོགས་ཚོའི་ལག་གི་དབྱར་རྩྭ་དག་ལ་རིན་གོང་འཕར་ཐབས་མི་འདུག་པ་གང་ཡིན་ནམ།  ས་ཆའི་མཐོ་དམན་གྱི་ཡིན་ནམ་དབྱར་རྩྭའི་ལྕི་ཡང་དང་སྦོམ་ཕྲ། ཁ་དོག་སོགས་མི་འདྲ་བའི་དབང་གིས་དབྱར་རྩྭའི་རིན་གོང་གི་མཐོ་དམན་ཡང་འདྲ་གི་མ་རེད།  ང་ཚོས་ཉེ་ལམ་བཙོངས་ཀྱིན་པ་དག་གི་རིན་གོང་ནི་རྒྱ་མ་གང་༼དབྱར་རྩྭ་སྟོང་གཉིས་ཡས་མས་༽ལ་སྒོར་ཁྲི་གསུམ་དང་སྟོང་བརྒྱད་ནས་བཞི་ཁྲི་ལྔ་སྟོང་གི་གཡས་གཡོན་ནས་མ་གཏོགས་བཙོངས་ཐུབ་ཀི་མེད།འདི་ནས་ཤེས་ཡོང་བ་ནི་རང་ཡུལ་ན་ཡོད་པའི་སྨན་རྩྭ་དང་གཏར་ཁ་དག་གི་རིན་ཐང་ང་ཚོ་རང་ཉིད་ཀྱིས་རྟོགས་ཀྱི་མེད་པ་དང་ལྷག་པར་ང་ཚོར་ ཆེད་མཁས་པ་མེད་པས་ལན་པ་རེད། བོད་ཀྱི་དབྱར་རྩྭའི་རིན་ཐང་གླེང་བ།    གལ་ཏེ་ང་ཚོ་བོད་རང་ལ་ཆེད་མཁས་པ་མང་པོ་ཞིག་ཡོད་རྒྱུ་ན་རིན་ཐང་ལྡན་པའི་རྩྭ་སྨན་འདི་འདྲ་ཟི་ལིང་གི་འཁྱམ་པོ་འགའི་ལག་ཏུ་སྤྲོད་དགོས་མི་འདུག་སྙམ། སྐབས་ཤིག་ལ་གསར་འགྱུར་བརྒྱུད་ལམ་ཁག་ཏུ་དབྱར་རྩྭ་དགུན་འབུའི་ཕན་ནུས་གླེང་སྐབས་དབྱར་རྩྭ་གཅིག་དང་ཤ་མོ་གཅིག་ལས་ཤ་མོ་༼ལུད་ནང་དུ་སྐྱེ་བས་གཅིན་ཤའང་ཟེར། ༽གཅིག་ཟོས་ན་ལུས་ལ་ཕན་ཚུལ་གླེང་གིན་འདུག འདི་ནི་སྐྱུག་བྲོ་བའི་སྐད་ཆ་ཞིག་ཡིནའང་སྐད་ཆ་འདིས་མང་ཚོགས་ཀྱི་ཡོང་འབབ་རྩ་དགག་བྱེད་པའི་དམིགས་ཡུལ་དང་ཀུན་སློང་ངན་པ་གང་ཡིན་ཡང་སྐབས་དེ་ནས་མང་ཚོགས་ཀྱི་ཡོང་སྒོར་འགོག་རྐྱེན་ངན་པ་བཟོས་སོང་། ཀུ་རེ་དང་བཅས་བཤད་ན།  ང་ཚོས་འཚོང་ལས་ཀྱི་གྲུ་ཁ་གཙོ་བོ་ནི་ཟི་ལིང་ཡིན་པས་ཟི་ལིང་གི་ཚོང་བ་གཉོམ་ཆུང་དག་གིས་རིན་གོང་མ་བྱིན་ཚེ་ང་ཚོས་ཀྱང་ཐབས་གཞན་བཙལ་གྱི་ཡོད་པ་མ་རེད། དྲ་རྒྱའི་ནང་དུ་དབྱར་རྩྭའི་རིན་གོང་དང་རིན་ཐང་། ཕན་ཡོན། ནུས་པ། བསྟེན་ཚུལ། བདག་གཉེར་བྱེད་ཚུལ་ལ་སོགས་པའི་ཡིག་ཆ་རབས་དང་རིམ་པ་མང་པོ་ཡོད་ནའང་བོད་ཀྱི་ཤེས་ཡོན་པ་ཚོས་འདི་དག་བོད་ཡིག་ཏུ་བསྒྱུར་བའམ་ཡང་ན་དྲ་རྒྱའི་སྒང་གི་གནས་ཚུལ་དག་མང་ཚོགས་དག་ལ་ཁྱབ་བསྒྲགས་བྱེད་པའི་བསམ་བློ་མེད་པ་འདིའང་རང་མི་རང་ལ་ཤ་མ་ཚ་བའི་རྟགས་རེད་སྙམ། བོད་ཀྱི་ཤེས་ཡོན་པ་ཚོར་འགན་འཁྲི་ཨེ་ཡོད། བོད་པའི་ཤེས་ཡོན་པ་ཚོའི་ཁྲོད་དུའང་འདིའི་ཐད་དུ་ཐབས་ཤེས་དང་ཉམས་མྱོང་བཤད་མཁན་ཡང་མེད་ལ་གནས་སྐབས་གང་དུ་དབྱར་རྩྭའི་རིན་གོང་ག་འདྲ་ཡིན་པའི་གནས་ཚུལ་སྒྲོགས་མཁན་ཡང་གཅིག་ཀྱང་མི་འདུག འདི་ནི་མདོར་དེད་ན་མང་ཚོགས་ལ་སྲི་ཞུ་སྒྲུབ་པའི་ཆེད་དུ་གོ་ཆོག་མོད་ཁ་བཤད་ལ་མཁས་པ་ཚོས་ད་དུང་མང་ཚོགས་མིག་ལ་མ་རན་པར་བསྡད་འདུག རྒྱུན་དུ་མཚོ་སྔོན་བོད་སྐད་རླུང་བརྙན་འཕྲིན་དག་གིས་གཞན་གྱི་ཁ་པར་དང་བཏུང་ ཆུ་སོགས་ལ་བསྟོད་པ་དགུ་བརྩེགས་འཐེན་དེ་ཡང་ཡང་ཁྱབ་བསྒྲགས་བྱེད་ཀྱིན་ཡོད་མོད་བོད་མདོ་དབུས་མཐོ་སྒང་གི་རང་བྱུང་རྩྭ་སྨན་ཁྱད་འཕགས་འདི་འདྲའི་ཟུར་ཙམ་ཡང་གླེང་ཁོམ་མེད་པ་འདིའང་ཁོ་ཚོ་དང་བོད་ཀྱི་ཤེས་ཡོན་པ་ཚོ་བོད་གཞི་རིམ་མང་ཚོགས་དང་ཉེ་བཅར་བྱེད་མ་ཐུབ་པས་གཏན་ཚིགས་རེད་དོ། མཚམས་འདིར་བསམ་ཞིང་བསམ་ན་གཞི་རིམ་མང་ཚོགས་ནི་གཞི་རིམ་ནས་ནར་སོན་ཞིང་གཞི་རིམ་ནས་ཤི་རྒྱུ་ལས་ཐབས་མེད་པ་དེའོ།  ...
དེ་ལས་མང་པ།

རྒྱལ་སྤྱིའི་བྱིས་པའི་གཟེངས་རྟགས།

དེ་རིང་ད་ལོའི་རྒྱལ་སྤྱིའི་བྱིས་པའི་གཟེངས་རྟགས་དེ་ནོ་བྷེལ་ཞི་བདེའི་གཟེངས་རྟགས་ཐོབ་མཁན་མཱ་ལཱ་ལཱ་དང་མི་གཞན་གཉིས་ལ་སྤྲད་ཡོད་འདུག དེ་རིང་ཡུ་རོབ་སུད་ཝེ་ཌན་(Sweden)གྱི་རྒྱལ་སར། ༢༠༡༤ ལོའི་རྒྱལ་སྤྱིའི་བྱིས་པའི་གཟེངས་རྟགས་དེ་བུད་མེད་ཀྱི་ཤེས་ཡོན་ཐོབ་ཐང་རྩོད་ལེན་པ་དང་འདི་ལོའི་ནོ་བྷེལ་ཞི་བདེ་གཟེངས་རྟགས་ཐོབ་མཁན་ལོ་ན་ཆུང་ཤོས་པཱ་ཀི་སི་ཐན་གྱི་བུ་མོ་མཱ་ལཱ་ལཱ་ (MalalaYousafzai) ལགས་དང་། ཨ་རིའི་མེ་ཀོར་སོབ་ཌི་(Microsoft) ཁེ་ལས་ཀྱི་འཛིན་སྐྱོང་འགན་འཛིན་ཟུར་པ་ཇོན་ཝུ་ཌི་ (John Wood)ལགས། བལ་ཡུལ་གྱི་བཙོན་པའི་བུ་ཕྲུག་དག་ལ་བདག་སྐྱོང་སློབ་སྦྱོང་སྤྲོད་མཁན་བུད་མེད་ཨིན་དྷ་ར་ (Indira Ranamagar) ལགས་བཅས་སུ་སྤྲད་ཡོད་པ་མ་ཟད།  གཟེངས་རྟགས་དེ་དང་མཉམ་དུ་ཨ་སྒོར་འབུམ་གཅིག་གི་ལེགས་སྐྱེས་ཀྱང་གནང་ཡོད་འདུག འདིའི་ཐད་གཟེངས་རྟགས་ཚོགས་ཆུང་གིས། “འཛམ་གླིང་རྒྱལ་ཁབ་ ༡༡༠ ཡི་སློབ་གྲྭ་ ༥༩༧༤༨ ཀྱིས་དེབ་སྐྱེལ་བྱས་ཡོད་པའི་རྒྱལ་སྤྱིའི་བྱིས་པའི་ཚོགས་པ་ཡིས་བྱིས་པ་ས་ཡ་ ༣༦ ཁྲོད་ནས་བྱིས་པ་ས་ཡ་ ༧།༡ གིས། འདི་ལོའི་རྒྱལ་སྤྱིའི་བྱིས་པའི་གཟེངས་རྟགས་ཀྱི་འོས་མི་ཁག་ལ་དྲ་ཐོག་འོས་བསྡུ་བྱས་པ་བརྒྱུད་བུ་མོ་མཱ་ལཱ་ལཱ་དང་ཇོན་ཝུ་ཌི། ཨིན་དྷ་ར་བཅས་ལ་འོས་གྲངས་མཐོ་ཤོས་ཐོབ་སྟེ་གཟེངས་རྟགས་འདི་འབུལ་གཏན་འཁེལ་བ་ཞིག་ཡིན་པ་དང་། དེ་ནི་ཁོ་ཚོས་བྱིས་པའི་སློབ་གསོ་ཡར་རྒྱས་གཏོང་ཐབས་ལ་ནུས་པ་འདོན་སྤེལ་བྱས་ཡོད་སྟབས། ཁོ་ཚོའི་བྱས་རྗེས་ལ་ངོས་འཛིན་དང་ཡི་རངས་ཞུ་ཆེད་གཟེངས་རྟགས་དེ་སྤྲད་པ་ཞིག་ཆགས་ཡོད།” ཅེས་བརྗོད་འདུག རྒྱལ་སྤྱིའི་བྱིས་པའི་གཟེངས་རྟགས་དེ་ ༢༠༠༠ ལོར་མགོ་འཛུགས་བྱས་ཡོད་ཅིང་། དེའི་དམིགས་ཡུལ་ནི་རྒྱལ་སྤྱིའི་ཐོག་བྱིས་པའི་སློབ་གསོ་འཕེལ་རྒྱས་གཏོང་ཐབས་ལ་བྱས་རྗེས་འཇོག་མཁན་གྱི་གང་ཟག་དག་ལ་ཆེ་བསྟོད་ཞུ་ཆེད་ཡིན་པ་དང་།...
དེ་ལས་མང་པ།