རྨི་ལམ་མང་བའི་མཚན་མོ།
སྨྱུག་མདའ།
སྐྱོ་བ་རླུང་ལ་བསྐུར་ཡོད་རྣ་ལོང་གསེར་སྐུད།།
ཚིག་ཤེད་དད་པ་བརྒྱུས་སོང་མེ་ཏོག་ཚལ་དེར།།
དམར་མདངས་དེ་ཙམ་འཁྱིལ་བ་འཇིག་རྟེན་མདུད་པ།།
ལག་རྡང་ཉི་མས་སྦྲེལ་པས་དུས་ཚོད་བདའ་འོ།།
འཇག་མས་ཤུགས་གླུ་གྱེར་བ་སྲང་བར་འཁྱམས་འདུག།
མཆི་མ་ཁོག་ཏུ་མིད་པ་ང་ཡི་སྐྲ་ཚོགས།།
སྐྱ་རེངས་དཀར་བོའི་ངོགས་ན་འཛུམ་ཆུང་ལྟེམས་སེ།།
སྨག་རུམ་ཕ་མཐའ་ཆས་པ་དཀར་ནག་མང་ངོ་།།
ཞོགས་པ་བསྐྱོར་བའི་སྐད་ཆ་གཙུག་རིམ་ཡོད་བཞག།
མྱགས་པའི་རི་བོ་བྲིས་ཏེ་རལ་བ་བཙུགས་སམ།།
ཕོར་བ་མར་ཁུས་བཀང་བ་ངར་ཞིག་བསླངས་ཡོད།
དགའ་སྐྱོ་འདྲེས་མའི་དུང་བ་རྨི་ལམ་འཁོར་འོང་།།
ཚེ་ཡི་འདོམ་པ་སྔུན་ན་བསྔོ་ཡིག་སྒྲིག་འདུག།
མིག་ཟུང་བཙུམས་པ་སྐྲག་སོང་གཤེད་པོ་འདི་ཀོ།
རྣམ་ཤེས་རུམ་ལ་མི་འཇུག་ཐབས་ཤིག་ཡོད་ན།།
སྒེག་མའི་ཟུར་ལང་གན་དུ་རང་སར་གྲོལ་ཆོག།
སྙན་ངག་དམར་པོ་བཏུང་ན་རྩ་ལམ་སྦྲིད་དེ།།
དུག་གི་རྣམ་གྲངས་འགའ་ཡང་ཉེ་རུ་བཅར་བ།།
དོ་ནུབ་ཡི་གེ་དག་ཀྱང་མུན་པར་ཟུག་སོང་།།
ཚིག་བཅད་དུམ་བུ་འདི་ལ་ཕྱི་ཐུམ་བརྒྱབ་ཡོད།།
༢༠༡༤ ༩ ༣༠ མཚན་མོ།
ངེད་དྲ་ཚིགས།
མཆན་ཞོག