སྣང་བ”བརྟགས་པའི་མགུར།

སྨྱུག་མདའ།

 གཏི་མུག་རོལ་དབྱངས་ལ་རྒྱུས་སྐད།།

སྣང་བ་འོད་གསལ་ལ་ཞུགས་ཞེས།།

འཆར་ནུབ་རེས་མོས་ཀྱི་དོན་འདི།།

མི་གསལ་རྨི་ལམ་གྱི་ངོགས་སོ།།

ང་ཡི་དམིགས་འདུན་གྱི་རི་མོ།།

ཧ་ཅང་དྭངས་གཙང་གིས་བྲིས་ཟིན།།

སྒོ་གླེགས་རེ་རེ་བཞིན་རྡུང་ན།།

སྒྲ་དབྱངས་སྙན་མོ་ཞིག་དཀྲོལ་ལམ།།

མདང་ནུབ་སད་འཕྲོར་གྱི་རྨི་ལམ།།

འཆར་ཡན་རྒྱ་མཚོ་ལ་འཐིམ་འདུག།

ཁ་ཞེ་གཏིང་འགལ་གྱི་འུར་བ།།

ཚིག་འགྲོས་སྤྲིན་པ་དང་འདྲ་འོ།།

འཛུམ་དཀར་ལྷུག་ལྷུག་གི་ཞལ་ཁ།།

ཚོར་བའི་གཏིང་མཐའ་ན་བཙས་མོད།།

གདོད་མའི་བག་ཆགས་ཀྱི་འཇིག་རྟེན།།

བདག་ཉིད་ཅིས་ཀྱང་ནས་ཚུད་དོ།།

ཞོགས་ཀའི་ཉི་ཟེར་ལ་འགྲོགས་པའི།།

རྩལ་ཐོགས་སྨྱུག་ཁྱུ་དེ་སྐྱེལ་འོང་།།

ཉིན་འབབ་མཚན་འབབ་ཀྱི་ཁ་བ།།

ཡི་གེའི་ཐིག་རྩ་རུ་བཏབ་ཡོད།།

རི་བོ་ཧི་མ་ལའི་མགྲོན་པོ།།

ཤར་ནུབ་ཕྱོགས་མེད་དུ་ཆས་སོ།།

ཡར་ཀླུང་གཙང་བོ་ཡི་གླུ་སྐད།།

དྲན་སློང་གདུང་བ་ལས་མི་འདུག།

དཀར་ཡོལ་ལག་ཐོགས་ཀྱི་ཨ་མ།།

སེམས་རྩར་ལྷང་ལྷང་དུ་མཆིས་སོ།།

སྣང་སྲིད་སྒྱུ་མ་ཡི་ཀློང་ནས།།

རྒྱང་རིང་འོ་སྐལ་དེ་ཝ་ལེར།།

ཕྲག་དོག་གཡབ་མོ་འདིའི་གསེབ་ཏུ།།

བརྩེ་བའི་ལག་འཇུ་ཡང་ལྷོད་འགྲོ།།

ཚེ་སྲོག་ཤིང་ལོ་བཞིན་འཐོར་དུས།།

འགྱོད་པའི་ཤུགས་རིང་ཞིག་མ་འབྱིན།།

དུས་ནམ་སྤྲོ་འཛུམ་གྱི་མྱི་ལ།།

སྟོན་ཀ་གློ་བུར་དུ་སླེབས་སོང་།།

སེམས་གཏམ་གྲངས་མེད་ཅིག་རུམ་སྟེ།།

ས་མཐའི་རྡོ་གཅལ་ལ་གྱེས་འགྲོ།།

ད་ནི་དུས་ཚོད་ཀྱི་རེའུ་མིག།

སེམས་པ་ཉེ་ཉེ་རུ་བཞག་སྟེ།།

གནའ་བོའི་ཤེས་རབ་ཀྱི་གླེགས་བམ།།

སྙིང་གའི་བཟོ་བཀོད་དང་འདྲེས་སོ།།

           ༢༠༡༤  ༡༠  ༤ མཚན་མོ།

 ངེད་དྲ་ཚིགས།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s