ཞོགས་འོད། མཚོ་ལྷོ།
ང་ཡིས་ཉིན་མཚན་ཀུན་ཏུ།།
ཡུས་ཀྱི་ཁུར་ཚ་བསྣམས་ཏེ།།
སྐས་ཐེམ་ཀུན་ཏུ་བརྒལ་མཐར།།
ཡི་གེའི་ཕོ་བྲང་དམར་པོ།།
མིག་གི་མཐའ་ལ་སོན་ཏེ།།
སྒོ་དང་སྒེའུ་ཁུང་དག་ལ།།
འོད་ཀྱི་ལག་པས་འཁྱུད་སོང་།།
རྒྱ་མཐོངས་ཐད་དུ་བཞེངས་བའི།།
ལྷ་མོ་སྙན་ངག་མཆོད་མས།།
བུ་ཁྱོད་དུབ་པར་འདུག་པས།།
སྙིང་ནས་ངལ་བ་ལོངས་ཞེས།།
ཕྱག་གིས་གཡབ་མོ་བཏང་ཤག།
ཉི་ཟླ་ཕྲག་ཏུ་ཁུར་ཞིང་།།
མཚོ་མོ་མགྲིན་པར་སྐྱིལ་བའི།།
ང་ཡི་ལུས་ཀྱི་གྲིབ་མས།།
སྒྱུ་མའི་མཆོད་རྟེན་བསྐོར་ཏེ།།
སྒྲིབ་པའི་མེ་ཏོག་འདེབ་ཀིན།།
ལུས་ངག་པད་མའི་གདན་ལ།།
སིམ་པའི་ཐིག་ལེ་གཏོར་བཞིན།།
སེང་གེ་མཆོང་བའི་ཟོལ་གྱིས།།
གནས་མཐའ་རྩལ་གྱིས་སྐོར་སྐབས།།
ཐང་སྟོང་འཇག་མ་སྐྱ་བོས།།
སྣང་སྟོང་མགུར་ཞིག་ཞུས་པས།།
མིག་ཆུ་མིག་ཆུས་ཁུར་འདུག།
༢༠༡༤། ༠༩ ། ༢༩
ས་སྲོས།
ཉི་མས་མགོ་དཀྲིས་ཕག་ནས་ཟུར་མིག་གིས།།
རི་སྐེད་བྱེའུ་ཚོགས་ལ་གྱེས་བརྡ་གཏོང་།།
སུག་པས་མེ་ཏོག་གཅོད་པའི་སྒྲ་ཡི་ཁྱད།།
རི་ཤོད་ཆུ་ཕྲན་དག་གིས་རྣ་བར་འཇུད།།
ཡིད་ཀྱི་དར་ལྕེ་རླུང་གིས་བལྡགས་པའི་ཚེ།།
འཚོ་བའི་ཉིན་སྲིབ་བར་ལ་ཁངས་སྐྱ་ལྷུང་།།
སེམས་བྱུང་འགྱུ་བས་གློ་སྙིང་མཆིན་གསུམ་ལ།།
སེན་འཐོག་བྱས་པས་མིག་ཆུ་ས་ལ་ཨག།
སྤྲིན་དཀར་འོ་མའི་ཟོལ་གྱིས་དཀྲུགས་མཁན་དེའི།།
མགྲིན་པའི་སྦུག་ལ་དབྱངས་ཀྱི་ཆང་བསྙལ་རྗེས།།
ས་སྲོས་མགུར་དུ་བཞེངས་ལ་བློ་བདེ་བ།།
རི་ལུང་ཐང་གསུམ་ཀུན་ཏུ་ཉིན་རྒྱུན་ཟློ།།
གྲིབ་སོའི་གོམ་ཁ་ཤུགས་ཀྱིས་བཀྱགས་པ་ན།།
གོང་མོ་གཅིག་རེ་གཉིས་རེ་མཁའ་ལ་ལྡིང་།།
སྦྲ་འདབས་སྐྱ་ཀ་ཁྲ་མོས་གཤོག་སྣེ་ཡིས།།
ཡར་ཀླུངས་གླུ་པའི་ངག་ལ་གཡབ་མོ་བྱེད།།
ཚོར་བ་མེ་ཏོག་གད་པའི་ཟོལ་གྱིས་བསླེབས།།
དྲན་པ་ཆུ་མོ་བྲུག་པའི་ཚུལ་གྱིས་སུ།།
དོན་སྣ་སྣོད་དྲུག་ཆབ་ལ་བྲན་པའི་རྗེས།།
ཕྱི་དང་ནང་ལ་པད་མའི་རི་མོ་བབས།།
རི་རྩེ་མུན་པས་བཏུམ་ལ་ང་ཉིད་འཇིགས།།
སྨག་ཆེན་གཡེར་ངག་ངོམ་ལ་ང་ཉིད་དོགས།།
ང་ཡི་ལུས་ངག་ཚོར་བར་བསྔོས་པའི་རྗེས།།
འཁྲིས་ཀྱི་གློ་ཉེ་དག་གིས་ང་ལ་སྤྱོ།།
༢༠༡༤། ༠༨། ༡༨
ངེད་དྲ་ཚིགས།
