(༡)བོད་ཀྱི་གནའ་བོའི་རོལ་མོར་མཉན་པ།
(ཞར་བཀོད་གཅིག)
མཛེས་སེ།
ཀོ་གྲུ་དང་རྐྱལ་གཟིངས་ཕར་ངོགས་སུ་འབྱོར་རྗེས།
རྟ་མཆོག་གི་མཐོང་ལམ་དུ་འཛམ་གླིང་མངོན་བྱུང་།
དུས་ཚོད་ལས་བརྒལ་བའི་རླུང་།
འདས་དང་མ་འོངས་ད་ལྟའི་མཚམས་སུ་བང་གིས་བརྒྱུགས།
རླུང་ཞིག་ལ་ཉན་སྐབས།
མི་རྣམས་ཀྱི་མགོ་བོ་ཀྲོག་ཀྲོག་བྱེད།
རི་སྒང་རེ་རེའི་རྣ་ལམ་དུ།
མཚན་མོའི་སྒྲ་དབྱངས་དུང་སྐད་བཞིན་དུ་གང་སར་ཁྱབ།
གསེར་གྱི་ཉི་མ་དངུལ་གྱི་ཟླ་བ་བསྟུད་མུར་ཤར་ཡོང་།
མཆོད་རྟེན་དཀར་པོ་ངའི་སེམས་ཁོང་ན་འགྱིང་འདུག
བཀག་རྒྱ་བྲལ་བའི་རླུང་།
ས་ཆེན་པོའི་ཤར་ལྷོ་ནུབ་བྱང་ཀུན་ཏུ་བཞད།
རླུང་ཞིག་ལ་ཉན་སྐབས།
མི་རྣམས་ཀྱིས་ཡར་མར་ལ་བལྟ་རྒྱུ་བརྗེད།
ཉ་ཆུང་རེ་རེའི་ལུས་འགྲམ་དུ།
མཚན་མོའི་འདང་བརྩེ་ཆུ་མིག་བཞིན་དུ་འཇམ་ཞིང་
མཉེན།
༢༠༠༩ལོར་ཁྲི་ཀའི་རྫོང་མགོ་རུ།
(༢)དཔྱིད་ལ་ཡིད་རྟོན་མི་རུང་།
དཔྱིད་ཀ་གློ་བུར་དུ་དགུན་གྱི་པང་དུ་ལོག་ཅིང་།
ཡང་མཆོངས་ཐེངས་གཅིག་གིས་དབྱར་གྱི་སྒོ་འགྲམ་དུ་སླེབས།
ཀུན་གྱིས་བཤད་པ་ལྟར་ན།
བུད་མེད་ཀྱི་བློ་ལ་འགྱུར་ལྡོག་ཆེ་ཞེས་གྲགས།
དོན་དངོས་སུ། དཔྱིད་ཀའང་།
སྐྱེས་པ་ནང་བཞིན་ཡིད་རྟོན་མི་རུང་སྟེ།
སྔ་དྲོ་རང་ཉིད་ཡིན་བཞིན་དུ།
ཕྱི་དྲོ་གཞན་ཞིག་ཏུ་གྱུར་འདུག
དགུན་ཁ་འདྲ་ཞིག་མི་འདུག
བློ་གཅིག་སེམས་གཅིག་གིས་གྲང་ངར་ལྡང་།
དབྱར་ཀ་འདྲ་ཞིག་མི་འདུག
ནན་ནན་ཏན་ཏན་གྱིས་ཚ་བ་རྒྱས།
༢༠༡༠ལོའི་ཟླ་༣པའི་ཚེསཨ༩ཉིན་ཟི་ལིང་དུ།
ངེད་དྲ་ཚིགས།