༄༅། །ཕྱི་ལོ་ ༡༩༥༩ ལོར་རྒྱ་ནག་དམར་པོའི་གཞུང་ནས་བོད་ཀྱི་སྣོད་བཅུད་ཡོངས་རྫོགས་དྲག་པོས་དབང་འཛིན་བྱས་ཏེ། བོད་མིའི་དབུ་འཁྲིད་༸གོང་ས་༸སྐྱབས་མགོན་ཆེན་པོ་མཆོག་གི་དབུས་བོད་མི་རྣམས། སྔ་ལམ་ལྟར་མཉམ་གནས་ཐུབ་ཐབས་བྲལ་ནས། གཞིས་བྱེས་གཉིས་སུ་གྱུར་དགོས་པའི་ཡིད་སྐྱོའི་གནས་ཚུལ་རྒྱལ་རབ་ལོ་རྒྱུས་ནང་དཀའ་སྡུག་ཆེ་བའི་ལེའུ་ཞིག་ཆགས་ཏེ། སྐྱབས་མེད་མགོན་མེད་དུ་གྱུར་བའི་སྐབས་དེར། ༸གོང་ས་མཆོག་གི་དབུ་འཁྲིད་ལམ་སྟོན་འོག་བོད་མི་རིགས་རིག་གཞུང་དང་བཅས་པ་འཛམ་གླིང་འདིའི་སྟེང་གསོན་གནས་ཐུབ་ཐབས་སུ། བུ་ཕྲུག་ཚོར་གནའ་དེང་གི་ཤེས་ཡོན་སྤྲོད་རྒྱུ་དེ་བཞིན་གལ་ཆེའི་ནང་ནས་གལ་ཆེ་ཤོས་ཤིག་ཏུ་རྩ་འཛིན་གནང་སྟེ། སློབ་སྡེ་གསར་འཛུགས་ཕྱག་བཞེས་གནང་བའི་ནང་གསེས་ཤིག་ཏུ། བོད་ཕྲུག་ཁྱིམ་སྡེ་འདི་ཡང་བཞུགས་སྒར་རྡ་རམ་ས་ལར་ཕྱི་ལོ་ ༡༩༦༠ ལོ། ༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་ཇི་ཕེབས་ཀྱི་དགོངས་དོན་བཞིན་དབུ་འཛུགས་གནང༌།
སྐབས་དེར་སྐུའི་གཅེན་མོ་ཞིང་གཤེགས་ཚེ་རིང་སྒྲོལ་མ་མཆོག་ནས་དབུ་འཁྲིད་གནང་བ་དང༌། དེའི་རྗེས་སྐུའི་གཅུང་མོ་རྗེ་བཙུན་པདྨ་མཆོག་ནས་ཐུགས་འགན་བཞེས་གནང་མཛད་པ་བཞིན། སྐུ་ཚེ་ཧྲིལ་པོ་བུ་ཕྲུག་ཚོའི་བདེ་དོན་ཆེད་གཏོང་གནང་མཛད་པ་སོགས། ༸གོང་ས་མཆོག་གི་བཀའ་དགོངས་འགལ་མེད། ལྷག་བསམ་ཆེན་པོས་སྐུ་ངལ་ཧུར་བཞེས་གནང་འབྲས་སུ། ལོ་རེ་བཞིན་ཡར་རྒྱས་ཀྱི་ཕྱོགས་སུ་བསྐྱོད་ཐུབ་པ་ཙམ་མ་ཟད། དུས་བསྟུན་དགོས་གལ་དང་བསྟུན་ནས་རྒྱ་སྐྱེད་འཛུགས་སྐྲུན་གནང་སྟེ། ད་ཆ་ཁྱིམ་སློབ་ཡན་ལག་ཆེ་ཆུང་བསྡོམས་ ༣༥ ཡོད་པ་རྣམས་འདི་ལྟར།
ཁྱིམ་སྡེ་ཁག ༥ ནང་གཏན་སློབ་གྲངས། ༥༩༦༤
གཏན་སློབ་ཁག ༦ ནང་གཏན་སློབ་གྲངས། ༢༠༨༢
གོང་གི་སློབ་ཁག་ནང་ཉིན་སློབ་གྲངས། ༦༠༧
ཏཱ་ལའི་བླ་མ་མཐོ་སློབ་ནང་མཐོ་རིམ་སློབ་གཉེར་བ། ༢༨༦
མཐོ་སློབ་གཞན་ཁག་ནང་མཐོ་རིམ་སློབ་གཉེར་བ། ༡༤༥༨
ཉིན་སློབ་ཁག ༦ ནང་ཉིན་སློབ་གྲངས། ༦༡༥
ཉིན་མོའི་བུ་བཅོལ་ཁག་ ༩ ནང་བུ་ཕྲུག ༣༣༩
བཟོ་སློབ་སྡེ་ཚན་ ༢ ནང་བཟོ་རིག་སློབ་གཉེར་བ། ༣༢༥
རྒས་གསོ་ཁག་ ༤ ནང་བགྲེས་སོང་གྲངས། ༥༢༧
ཕྱི་རོགས་སྡེ་ཚན་ནང༌། ༩༠༡
ཡན་ལག་ཆེ་ཆུང་ཁག་ནང་ལས་བྱེད་གྲངས། ༡༤༨༩
བཅས་ཁྱོན་བསྡོམས་བོད་ཁྱིམ་ཁག་ནང་ལས་སློབ་གྲངས། ༡༤༥༩༣ ཡོད།
སློབ་འཇུག་དང་ཕྱིར་ཐོན་གནས་སྟངས།
༢༠༡༤ ལོར་སློབ་འཇུག་ཞུས་པ་གྲངས། ༨༡༠
༢༠༡༤ ལོར་སློབ་ཐོན་སོང་བ་གྲངས། ༦༦༥
༡༽ ཤེས་ཡོན་སྐོར།
ཤེས་ཡོན་སློབ་སྦྱོང་སྤྲོད་རྒྱུའི་ལས་རིམ་སྤྱི་དང༌། ལྷག་པར་བོད་མི་རིགས་རང་ཉིད་ཀྱི་ངོ་བོ་མཚོན་པའི་ཁྱད་ཆོས་སྣ་ཚོགས་ཤིག་ཡོད་པ་རྣམས། བོད་མི་རྣམས་གཞིས་བྱེས་གཉིས་སུ་གྱར་རྗེས་བོད་མི་རིགས་རིག་གཞུང་དང་བཅས་པ་རྩ་མེད་འགྲོ་རྒྱུའི་ཉེན་ཁའི་གནས་སུ་གྱར་སྟབས། ༸གོང་ས་༸སྐྱབས་མགོན་ཆེན་པོ་མཆོག་གིས་མི་རིགས་རིག་གཞུང་དང་བཅས་པ་སྲུང་སྐྱོབས་བྱ་རྒྱུ་དེ་ནི་མི་རིགས་རང་ཉིད་ཀྱི་ལས་འགན་ཞིག་ཡིན་པའི་ལམ་སྟོན་ཇི་ཕེབས་ཀྱི་དགོངས་དོན་ལྟར། རང་མི་རིགས་ཀྱི་རིག་གཞུང་དང་གོམས་སྲོལ་བཟང་པོ་ཡོད་པ་རྣམས་བུ་ཕྲུག་ཚོའི་རྒྱུན་གཤིས་སུ་འཇགས་ཐབས། དེ་བཞིན་གནའ་དེང་ཤེས་ཡོན་གྱི་འདབས་གཤོག་གཉིས་ལྡན་གྱི་རྒྱལ་གཅེས་པ་ནུས་ལྡན་འབའ་ཞིག་འཚར་ལོངས་ཐུབ་ཐབས་སུ་འབྲེལ་ལས་ཡོངས་ནས་ལྷག་བློ་ཆེན་པོས་ཧུར་འབུངས་ཞུས་འབྲས་སུ་ལོ་རེ་བཞིན་རྒྱལ་ཡོངས་ཡིག་ཚད་ལེགས་ཐོན་ཡོང་བཞིན་པའི་ནང་ནས། འདི་ལོའི་སློབ་ཁག་གི་རྒྱལ་ཡོངས་ཡིག་ཚད་ཀྱི་གྲུབ་འབྲས་ནི།
འཛིན་རིམ་བཅུ་པ་དང༌། བཅུ་གཉིས།
ཀ། འཛིན་རིམ་བཅུ་པ་ཡོད་པའི་སློབ་ཁག ༨ ཀྱི་ཡིག་ཚད་གྲུབ་འབྲས།
འཛུལ་ཞུགས་སློབ་གྲངས་ ༨༠༢
ཡིག་ཚད་འཁྱོལ་བ་གྲངས། ༨༠༡
སླར་གཏོང་དགོས་པ། ༡
འཁྱོལ་བའི་བརྒྱ་ཆ། ༩༩་༩
ཁ། འཛིན་རིམ་བཅུ་གཉིས་ཡོད་པའི་སློབ་ཁག ༤ ཡིག་ཚད་གྲུབ་འབྲས།
འཛུལ་ཞུགས་སློབ་གྲངས་ ༦༦༥
ཡིག་ཚད་འཁྱོལ་བ་གྲངས། ༦༡༤
སླར་གཏོང་དགོས་པ། ༣༨
མ་འཁྱོལ་བ་གྲངས། ༡༦
འཁྱོལ་བའི་བརྒྱ་ཆ། ༩༢་༣
༢༠༡༤ ལོའི་རྒྱ་གར་རྒྱལ་ཡོངས་འཛིན་རིམ་ ༡༢ ཡིག་རྒྱུགས་ནང་ཡང་རྩེར་སོན་པ།
༡། འབྱུང་རིག་སྡེ་ཚན་ནས་དྷ་སྟེང་བོད་ཁྱིམ་གྱི་སློབ་མ་བསོད་ནམས་དབྱངས་ཅན། བརྒྱ་ཆ་ ༩༡་༨
༢། ཚོང་རྩིས་སྡེ་ཚན་ནས་སྦེལ་ཀོབ་བོད་ཁྱིམ་གྱི་སློབ་མ་ཚེ་རིང་སྒྲོལ་མ། བརྒྱ་ཆ་ ༩༣་༢
༣། ཚན་རིག་སྡེ་ཚན་ནས་སེ་ལ་ཀུཡེ་བོད་ཁྱིམ་གྱི་སློབ་མ་བསོད་ནམས་བཟང་མོ། བརྒྱ་ཆ་ ༩༣་༢
༢༽ ནང་ཆོས་དང་འབྲེལ་བའི་མཛད་རིམ།
ཀ། ༢༠༡༤ ཕྱི་ཟླ་ ༦ ཚེས་ ༤ ནས་ཚེས་ ༦ བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་སྟེང་བོད་ཁྱིམ་དུ་ནང་ཆོས་ངོ་སྤྲོད་ཚོགས་ཆུང་ནས་ཇི་ལྟར་གདན་ཞུས་བཞིན་ཆིབས་བསྒྱུར་བཀའ་དྲིན་བསྐྱངས་གནང་མཛད་དེ། ན་གཞོན་ཚོར་ཤེས་རབ་སྙིང་པོ་དང་འབྲེལ་བའི་སྒོ་ནས་ནང་ཆོས་ངོ་སྤྲོད་དང༌། གང་བློ་མའི་ལུང༌། ཉིན་གསུམ་པར་སྤྱན་རས་གཟིགས་ཀྱི་དབང་བཅས། ཐུགས་བརྩེ་བ་ཆེན་པོས་འདི་ཕྱི་གཉིས་སྨན་གྱི་ལམ་སྟོན་བཀའ་དྲིན་བསྐྱངས་གནང་མཛད་པ་སོགས་མགོན་པོ་གང་གི་བྱིན་གྱིས་རླབས་པའི་སྐལ་བཟང་གི་གོ་སྐབས་ཐོབ་པ་བྱུང༌།
ཁ། སྔ་དགོང་ཞལ་འདོན་སྐར་མ་ ༣༠ རེ་ཡོད་པ་དེའི་སྐབས་ཆོས་དགེ་རྣམ་པ་ཚོའི་ཐོག་ནས་ཞལ་འདོན་ཁག་གི་ནང་དོན་གོ་རྟོགས་ཐུབ་ཕྱིར་འགྲེལ་བརྗོད་དང་ལམ་སྟོན་དགོས་གལ་བཞིན་གནང་མུས།
ག། ལོ་འཁོར་གྱི་མཛད་རིམ་ནང་གསལ་ལྟར་ཆོས་དགེ་རྣམ་པའི་ཐོག་ནས་ནང་ཆོས་ངོ་སྤྲོད་གནང་དགོས་པ་བཞིན་འཛིན་རིམ་སོ་སོར་གཞིགས་པའི་ནང་ཆོས་ཀྱི་གོ་རྟོགས་སྤེལ་གནང་མཛད་མུས།
༣༽ རིགས་ལམ་སློབ་ཁྲིད་སྐོར།
༡། རིགས་ལམ་སློབ་ཁྲིད་ཀྱི་རྩོད་ལམ་དེ་སློབ་ཚན་གཞན་ལའང་དེ་མཚུངས་འབྱུང་ཐབས་ཕེབས་དགོངས་ལྟར་ལག་བསྟར་ཞུ་བཞིན་ཡོད་པ་མ་ཟད། ད་ལྟའི་འཆར་འཛིན་རིམ་ ༣ ཡན་ལ་རིགས་ལམ་སློབ་ཁྲིད་ཀྱི་ལམ་སྟོན་ཞུ་བཞིན་ཡོད། སློབ་སྡེ་ནང་ཁུལ་རིགས་ལམ་གོ་རྟོགས་སྤེལ་རེས་ཆེད། ལོ་ལྟར་འདུ་འཛོམས་བྱ་རྒྱུ་ཞུས་པ་དེ་ཡང་སློབ་སྡེ་སོ་སོའི་ནང་ནས་ཡང་རྩེར་སོན་པ་རྣམས་སྔ་ལོ་ཅོན་ཏ་ར་བོད་ཁྱིམ་སློབ་གྲྭར་འཛོམས་ནས་ཚད་མ་རིག་པའི་སྐོར་སྤྱི་དང༌། བྱེ་བྲག་རྒྱུ་འབྲས་ཆེ་ཆུང་སོགས་དང༌། ཨང་རྩིས་རྒྱ་ཁྱོན། ཚན་རིག་ལས་ནུས་ཤུགས་བཅས་ཀྱི་སྐོར་རྩོད་རྒྱུའི་ལས་རིམ་ལག་བསྟར་ཞུས།
༢། ཤེས་རིག་ལས་ཁུངས་གཙོ་གྱུར་གྱིས་རིགས་ལམ་དང་འབྲེལ་བའི་ལས་རིམ་སྤེལ་བའི་ནང་སློབ་སྡེ་སོ་སོ་ནས་འཛུལ་ཞུགས་བྱ་རྒྱུའི་གོ་སྐབས་གང་ཐོབ་ཞུས་ཡོད།
༣། འདི་ལོ་ཁྱིམ་སྡེ་ཁག་གི་ལས་འཆར་ལྟར་རྡ་སྟེང་བོད་ཁྱིམ་དུ་ཚེས་ ༢༣ ནས་ ༢༤ བཅས་ཀྱི་མཛད་རིམ་ནང་གསལ་ལྟར་རིགས་ལམ་རྩོད་འགྲན་ཞུ་ངེས་ཡིན།
༣། ཤེས་ཡོན་སློབ་ཁྲིད་ཀྱི་ནུས་པ་གོང་འཕེལ་ཡོང་ཐབས་ཀྱི་ལས་འགུལ།
༡། འདི་ལོའི་ནང་ཤེས་རིག་ལས་ཁུངས་དང་ཁྱིམ་སྡེ་བཅས་ནས་སློབ་ཚན་ཁག་སོ་སོའི་ཟབ་སྦྱོང་དང༌། གོ་བསྡུར་ལྷན་ཚོགས་ཀྱི་ལས་རིམ་མི་འདྲ་བ་ ༡༡ སྤེལ་བ་རྣམས་ལ་སྐབས་བསྟུན་འབྲེལ་ལས་རྣམས་ནས་གོ་སྐབས་ཞུས་ཡོད།
༢། སློབ་ཚན་སོ་སོའི་ཆེད་ལས་པ་རྣམས་པས་སློབ་སྡེ་སོ་སོར་ཆེད་བཅར་གྱིས་མྱོང་འཚོར་སྤེལ་རེས། དཔྱད་ཞིབ་ལམ་སྟོན་དང༌། སླར་ཞིབ་སོགས་ཞུ་སྒོའི་རིགས་འཐུས་གཙང་ཞུ་ཐུབ་པ་བྱུང་ཡོད།
༣། ལོ་འདིའི་ནང་དམིགས་བསལ་ནུས་འདོན་ཞུ་རྒྱུའི་ལས་འཆར་འགྲོ་མུས་སུ་ཡོད་པ།
ཀ། ལོ་འདི་སྤྱི་ནོར་༸གོང་ས་༸སྐྱབས་མགོན་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུར་ངེས་པ་བཞིན་ཁྱིམ་སློབ་ཚང་མའི་ནང་མཛད་རིམ་སྣ་ཚོགས་ཤིག་སྤེལ་མུས།
ཁ། གཞི་རིམ་འོག་མའི་བོད་ཡིག་དང་འབྲེལ་བའི་གནས་ཚད་ཡར་རྒྱས་གོང་འཕེལ་གཏོང་རྒྱུ།
ག། གཞི་རིམ་བར་མའི་ཨིན་ཇིའི་སྐད་ཡིག་གི་གནས་ཚད་ཡར་རྒྱས་གཏོང་རྒྱུ།
ང༌། གཞི་རིམ་གོང་མ་དང༌། བར་མའི་ནང་སློབ་ཕྲུག་གི་གཞི་རྩའི་ནང་ཆོས་ཀྱི་གོ་རྟོགས་ ཀྱི་ནུས་པ་གོང་འཕེལ་གཏོང་ཐབས་སུ་དམིགས་པའི་ལས་འགུལ་སྣ་ཚོགས་ཤིག་སྤེལ་མུས།
༤༽ སྒྲིག་སྲུང་སྐོར།
སློབ་མ་ཚོའི་ཕྱི་ནང་གི་འཚར་ལོངས་གོང་འཕེལ་ལོ་རེ་བཞིན་འགྲོ་བ་དང༌། ཆབས་ཅིག་སྒོ་གསུམ་གྱི་སྤྱོད་ཚུལ་དེ་ཡང་བཟང་པོའི་མིག་དཔེ་འོས་པ་ཞིག་འཚར་ལོངས་ཐུབ་པ་བྱ་རྒྱུ་དེ་བཞིན་ང་ཚོའི་སྐབས་སུ་བབ་པའི་ལས་འགན་གཙོ་གྲས་ཤིག་ཡིན་པ་དེ་ཡང༌། བུ་ཕྲུག་ཚོའི་ལུས་སེམས་ཀྱི་བདེ་སྐྱིད་ལ་དོ་ཕོག་དང༌། འཚེ་བ་མེད་པའི་སྒོ་ནས་སྐྱོངས་དགོས་པའི་ཐོག ༸གོང་ས་༸སྐྱབས་མགོན་ཆེན་པོ་མཆོག་གིས། ལས་བྱེད་ཚོར། བུ་ཕྲུག་རྣམས་ལ་བརྩེ་བས་མ་ཕོངས་པ་ཞིག་དགོས་གལ་ཆེ་བའི་ལམ་སྟོན་ཕེབས་མྱོང་ཡོད་པའི་དགོངས་གཞི་དང༌། དེ་བཞིན་ཉེས་བརྡུང་རྩུབ་བཅོས་སོགས་རྒྱལ་སྤྱིའི་བྱིས་པའི་ཐོབ་ཐང་དང༌། ས་གནས་སྲིད་གཞུང་གི་ལག་བསྟར་འགྲོ་བཞིན་པའི་སྒྲིག་ཁྲིམས། བོད་མིའི་སྒྲིག་འཛུགས་ཀྱི་བཅའ་ཁྲིམས་ལེའུ་དང་པོའི་དོན་ཚན་དྲུག་པའི་ནང་རྒྱལ་སྤྱིའི་ཁྲིམས་ལུགས་དང༌། ཡུལ་ཁྲིམས་ལ་བརྩི་སྲུང་དགོས་པ་ཇི་བཞིན་ཞུ་རྒྱུ་ལས་གཞན་ཐབས་མ་མཆིས་སྟབས། དེ་འབྲེལ་གྱི་ཐབས་བྱུས་བཀོད་སྒྲིག་ཞུ་བཞིན་པའི་ནང་ནས་བུ་ཕྲུག་ཚོས་སྤང་བླང་དགོས་པའི་ལམ་སྟོན་སྒྲིག་གཞི་དོན་ཚན་ ༡༡ དང༌། སྒྲིག་གཞི་ལམ་སྟོན་ཆེ་ཁག་དོན་ཚན་བཞི་བཅས་ལག་བསྟར་འགྲོ་བཞིན་ཡོད། དེ་བཞིན་སློབ་གྲྭ་སོ་སོའི་མཛད་འཆར་ལོ་ཐོའི་ནང་བཀོད་ནས་འགྲེམས་སྤེལ་ཞུ་བཞིན་ཡོད།
བར་ལམ་སྤྱི་ཚོགས་དང༌། ཁྱིམ་སློབ་ཁག་ནང་ངན་གོམས་འདི་རིགས་རྩ་བ་ནས་མེད་པ་ཞིག་བཟོ་རྒྱུར་དམིགས་ཏེ་སློབ་སྡེ་སོ་སོའི་འགན་འཛིན་རྣམ་པ་དང༌། མང་གཙོའི་ལམ་ལུགས་ལྟར་འདེམས་ཐོན་བྱུང་བའི་ལམ་སྟོན་ཚོགས་ཆུང་གི་ཚོགས་མི་རྣམ་པས་ངེས་མེད་ཞིབ་འཇུག་ཞུ་ལམ་ལྟར། འདི་ལོ་ཕྱི་ཟླ་ ༨།༩ པའི་ནང་དཔྱད་ཞིབ་གནང་བ་ཕྱོགས་བསྡོམས་ཞུས་པར། མྱོས་རྫས་ཉལ་ཐག་གི་རིགས་བེད་སྤྱོད་བྱས་རིགས་མེད་ཀྱང༌།
ཁེ་ནི་ལོངས་སུ་སྤྱད་པ་གྲངས། ༤
དཀར་སུབ་རྔུབ་མཁན་གྲངས། ༧
བཅས་ཁྱོན་བསྡོམས་བུ་ཕྲུག ༡༡ བྱུང་འདུག་པ་རྣམས་ལ་ངན་གོམས་ཡོང་བའི་ནད་ལྟ་བུར་རྩིས་ཏེ་སློབ་གསོའི་ལས་རིམ་སྤེལ་ཆེད་ཉེན་བརྡ་དང་འབྲེལ་འགོག་ཐབས་ཇི་དགོས་ཁོངས་སོ་སོ་ནས་ལམ་སྟོན་ཞུ་མུས་སུ་ཡོད།
༥༽ ཁྱིམ་ཚང་ཕ་ཚབ་མ་ཚབ་རྣམས་ཀྱི་ནུས་སྟོབས་གོང་སྤེལ་ཆེད་ཟབ་སྦྱོང་ཕུལ་བ།
༡། ཟླ་བ་ ༣ ནང་ཕ་མའི་ཆེད་ལས་གོང་སྤེལ་བྱ་ཕྱོགས་ལ་ལམ་སྟོན། སློབ་མའི་སེམས་ཚོར་དྲག་པོར་བསམ་ཤེས་དང་བྱམས་བརྩེས་སྲུང་སྐྱོབས། སྤྱི་ཚོགས་ཀྱི་འཕེལ་རིམ་ནང་མདུན་བསྐྱོད་ཀྱིས་ལམ་ནས་མཉམ་སྡེབ་བྱ་ཕྱོགས་ཀྱི་ཟབ་སྦྱོང་བོད་ཁྱིམ་སློབ་ཡོངས་ཀྱི་ཕ་ཚབ་མ་ཚབ་གྲངས་ ༡༨༩ ལ་ཉིན་བཞི་རེའི་ཟབ་སྦྱོང་ཕུལ་ཡོད།
༢། Palampur University, Agricultural College, Department of Vegetable Science ཀྱི་ Professor Dr. Ak Shrama ནང་ཆེད་དུ་གདན་ཞུས་ཀྱིས་ཀང་ར་རྫོང་ཁོངས་སུ་ཡོད་པའི་བོད་ཁྱིམ་སློབ་ཁག་གི་ཕ་ཚབ་མ་ཚབ་གྲངས་ ༡༡༣ ལ་འཕྲོད་བསྟེན་དང་རྒྱུན་གྲོན་གཉིས་ཕན་ཆེད་རྫས་སྦྱོར་མེད་པའི་ཚལ་དང་ཤིང་འབྲས་འདེབས་ལས་ཐོག་ཟབ་སྦྱོང་ཕུལ་ཡོད།
༣། ཟླ་བ་ ༥ ནང་བྱིས་པའི་བདེ་འཇགས་ལ་སྲུང་སྐྱོབ་དང་ལྷག་དོན་དུ་བུ་མོར་ཆགས་སྤྱོད་ཀྱི་གསུན་བརྩེར་དང་བཙན་གཡེམ་སོགས་གདོང་ལེན་བྱ་ཕྱོགས་ལ་ཁྲིམས་མཐུན་གྱི་རྒྱུད་ལམ་རྣམས་སློབ་ཁག་གི་ཕ་ཚབ་མ་ཚབ་དང་མ་བྱན་བཅས་མི་གྲངས་ ༢༤༠ ལ་ཉིན་གཉིས་ རེའི་ལམ་སྟོན་ཟབ་སྦྱོང་ཕུལ་ཡོད།
༦༽ འཕྲོད་བསྟེན་སྐོར།
མིའི་རྣམ་དཔྱོད་ཡོད་པ་ཇི་བཞིན་འཛམ་གླིང་འདིའི་ནང་ཕན་བདེའི་ཞབས་འདེགས་འགྲུབ་མིན་སོགས་ལུས་ཁམས་བདེ་མིན་ལ་གཏོད་ཆེ་བའི་གནས་སྟངས་ཤིག་ཡིན་པ་མངོན་གསལ་དང༌། བུ་ཕྲུག་ཚོའི་བདེ་དོན་དང་འབྲེལ་བའི་ཞུ་བྱའི་ནང་གསེས་གལ་འགངས་ཆེ་ཤོས་ཤིག་འཕྲོད་བསྟེན་གྱི་ཞུ་སྒོ་སྤྱི་དང༌། ལྷག་པར་བུ་ཕྲུག་ཚོའི་སེམས་རྒྱུད་ལ་དོ་སྣང་འཇགས་ཐབས་ཞུ་རྒྱུ་དེ་བཞིན་གལ་ཆེར་རྩིས་ཏེ་ལས་འགུལ་ལག་བསྟར་འགྲོ་བཞིན་པའི་ནང་ནས་དཔེ་མཚོན་དུ་སྙན་སེང་ཞུ་རྒྱུར།
༡། བུ་ཕྲུག་ཡོངས་ལ་དཔྱད་ཞིབ།
བོད་ཁྱིམ་སློབ་སྡེ་ཚང་མའི་ནང་ལོ་འཁོར་གཅིག་གི་ནང་གཟུགས་སྤྱིར་བརྟག་དཔྱད་ཐེངས་རེ་བྱས་ཏེ་དེ་ནས་དོགས་གཞི་ཡོད་པ་རྣམས་ལ་སླར་ཡང་དཔྱད་ཞིབ་དང༌། དེ་འབྲེལ་གྱི་སྨན་པར་བསྟེན་ནས་སྨན་བཅོས་ཀྱི་ཞུ་སྒོ་ཇི་མཆིས་ཞུ་བཞིན་ཡོད།
༢། ཁྱིམ་སློབ་ཁག་གི་ནང་གློ་ནད་སྨན་བཅོས་འགྲོ་བཞིན་པའི་བུ་ཕྲུག་གྲངས་ ༢༦ ཡོད་པ་དེའི་ནང་འགོད་ནད་ཅན་གྱི་ནད་པ་གཅིག་ཀྱང་མེད།
༣། སྔོན་འགོག
བུ་ཕྲུག་ཚོར་ནད་རིགས་སྔོན་འགོག་གི་སྨན་ཁབ་རྒྱག་རྒྱུ་སོགས་ཐབས་ལམ་ཇི་མཆིས་ལོ་རེ་བཞིན་ལག་བསྟར་ཞུ་བཞིན་ཡོད།
༤། འཕྲོད་བསྟེན་ལས་ཁུངས་ནས་གློ་ནད་གཙོ་གྱུར་གྱིས་འཕྲོད་བསྟེན་ཐོག་དཔྱད་ཞིབ་ལས་འཆར་སྤེལ་གནང་མཛད་ཁོངས་སུ། ཁྱིམ་སློབ་ཁག་ལའང་གོ་སྐབས་གཅིག་གྱུར་གནང་ སྟེ་ཕན་རླབས་ཆེན་པོ་བྱུང་ཡོད།
༧༽ མཐོ་རིམ་སློབ་གཉེར་བའི་གནས་སྟངས།
སྤྱི་ཁྱབ་སློབ་ཡོན་སྡེ་ཚན་གྱི་ཁོངས་ནས་སློབ་ཡོན་དང་འབྲེལ་བའི་སྡེ་ཚན་ཁག་གི་འབྲེལ་མཐུད་འོག་ཕྱི་ལོ་ ༢༠༡༤ ལོའི་ནང་སློབ་གཉེར་བྱེད་བཞིན་པའི་གནས་སྟངས་ནི།
༡། བོད་མི་རིགས་ཀྱི་རིག་གཞུང་དང་འབྲེལ་བའི་སློབ་གཉེར་བ། ༡༤༣
༢། ཉེ་བའི་གཙུག་ལག་རབ་འབྱམས་པ།
ཀ། འབྱུང་རིག་སློབ་གཉེར་བ། ༣༥༣
ཁ། ཚོང་རྩིས་སློབ་གཉེར་བ། ༡༨༡
ག། ཚན་རིག་སློབ་གཉེར་བ། ༡༡༥
༣། གཙུག་ལག་རབ་འབྱམས་པ།
ཀ། འབྱུང་རིག་སློབ་གཉེར་བ། ༥༣
ཁ། ཚོང་རྩིས་སློབ་གཉེར་བ། ༥༢
ག། ཚན་རིག་སློབ་གཉེར་བ། ༣༡
༤། འབུམ་རམས་པ། ༡༣
༥། ཆེད་ལས་སློབ་གཉེར་བ། ༡༨༦
༦། འཕྲོད་ལས་སློབ་སྦྱོང་ཁག་ནང༌། ༤༡༣
༧། ཤེས་ཡོན་སློབ་ཚན་ཁག་ནང་སློབ་གཉེར་བ། ༡༡
༨། ལས་རིགས་སློབ་སྦྱོང་ཁག་ནང་སློབ་གཉེར་བ། ༣༢༥
བསྡོམས། ༡༨༧༦
སྤྱི་ཚོགས་ཀྱི་མིའི་ནུས་ཤུགས་གོང་འཕེལ་ཡོང་རྒྱུར་དམིགས་ཏེ་མཐོ་རིམ་ཤེས་ཡོན་དང༌། དེ་བཞིན་ལས་རིགས་སྦྱོང་བརྡར་ལ་མོས་ནུས་ཡོད་པའི་སློབ་མ་གང་མང་ལ་གོ་སྐབས་ཐོབ་ཐབས་ཞུས་ཏེ་མཐར་རིགས་གཅིག་རྐང་འཛིན་ཅན་གྱི་མི་ཅ་སྐྲུན་རྒྱུར་འབད་བརྩོན་ཞུ་བཞིན་ཡོད་སྟབས། སློབ་མའི་གྲངས་འབོར་ལོ་ལྟར་འཕར་བཞིན་པའི་གནས་སྟངས་ཤིག་ཆགས་ཡོད། ༢༠༡༣། ༢༠༡༤ ལོའི་ནང་མཐོ་རིམ་སློབ་ཡོན་དང་འབྲེལ་བའི་འགྲོ་གྲོན་ཧིན་སྒོར་ ༡༠༣༧༡༣༨༢༡་༠༦ སོང་ཡོད།
༨༽ འཛུགས་སྐྲུན་དང་འབྲེལ་བའི་ལས་གཞི།
༡། བར་ལམ་བོད་ནས་གཉེན་འཕྲད་དུ་ཡོང་མཁན་དང༌། ལྷག་པར་ཤེས་ཡོན་སློབ་སྦྱོང་ཆེད་ཡོང་རྒྱུར་རྒྱ་ནག་གཞུང་ནས་དམ་བསྒྲགས་ཤུགས་ཆེ་བྱུང་དབང་གིས་བོད་ནས་ཡོང་མཁན་དེ་ཙམ་མེད་སྟབས། ཁྱིམ་སློབ་རྒྱ་སྐྱེད་ཞུ་རྒྱུའི་དམིགས་བསལ་ལས་འཆར་མེད་ཀྱང༌། ཡོད་པ་རྣམས་ཕྱོགས་གང་ཆ་ནས་སྤུས་ཚད་ལྡན་ཐབས་དང་ཚགས་ཚུད་ཡོང་རྒྱུར་འབད་འབུངས་ཞུ་བཞིན་ཡོད།
༢། ༸གོང་ས་ཏཱ་ལའི་བླ་མ་མཐོ་རིམ་སློབ་གཉེར་ཁང་དེ་བཞིན་ཁྱིམ་སྡེའི་ལས་འཆར་གཞི་རྒྱ་དང་གལ་གནད་ཆེ་ཤོས་ཤིག་ཡིན་པ་མ་ཟད། ཨར་ལས་འཛུགས་སྐྲུན་དང༌། དཔལ་ འབྱོར་འདུ་འགོད་སོགས་ཀྱི་གཟིགས་སྐྱོང་བཀའ་ཟུར་སྐུའི་གཅུང་མོ་རྗེ་བཙུན་པདྨ་མཆོག་གིས་ཐུགས་འགན་གཙོ་བཞེས་ཀྱིས་བཀའ་དྲིན་བསྐྱངས་མུས་ཡིན། ལས་འཆར་འདིའི་དགོས་དམིགས་ལྟར། བོད་མི་རིགས་ཀྱི་རིག་གཞུང་མུ་མཐུད་སྦྱང་མོས་ཅན་ཚང་མར་གོ་སྐབས་ཐོབ་ཐབས་ཞུ་རྒྱུ་ཡིན།
༩༽ ༢༠༡༣།༢༠༡༤ ལོའི་བྱུང་སོང་གི་གནས་སྟངས།
༡། བྱུང༌། བསྡོམས། ༥༧༥༩༠༢༧༥༡་༨༩
༢། སོང་ཁག
ཀ། རྒྱུན་གྲོན་ཐོག ༤༩༩༠༦༦༩༤༨་༤༢
ཁ། འཆར་གཞིའི་ཐོག ༡༠༥༡༨༢༤༨༣་༨༤
བསྡོམས། ༦༠༤༢༤༦༦༨༠་༣༧
༡༠༽ བཀའ་དྲིན་རྗེས་དྲན་དང་ཐུགས་རྗེ་ཆེ་ཞུ།
དེ་རིང་གི་གོ་སྐབས་འདི་བརྒྱུད་ཐུགས་རྗེ་ཆེ་ཞུ་དང༌། བཀའ་དྲིན་རྗེས་དྲན་ཞུ་དགོས་པ་༸གོང་ས་༸སྐྱབས་མགོན་ཆེན་པོ་མཆོག་ནས་ཐོག་མར་བོད་ཁྱིམ་དབུ་འཛུགས་དགོས་གལ་གྱི་ལམ་སྟོན་དང༌། དེ་བཞིན་ལས་སློབ་རྣམས་ལ་ཐུགས་བརྩེ་བ་ཆེན་པོས་བླང་དོར་བཀའ་སློབ་བཀའ་དྲིན་བསྐྱངས་གནང་མཛད་པ་སོགས་བྱིན་གྱིས་རླབས་པའི་བཀའ་དྲིན་ཉག་ཅིག་ལ་བརྟེན། ཁྱིམ་སྡེ་ཚོགས་པའི་ལས་སློབ་ཡོངས་ཀྱི་ཚབ་ཞུས་ཏེ་བཀྲིན་རྗེས་དྲན་ཞུ་བ་དང་ཆབས་ཅིག་བསྟན་དང་འགྲོ་བའི་སླད་དུ་ཞབས་པད་སྐལ་བརྒྱར་བརྟན་པའི་གསོལ་འདེབས་ཞུ་རྒྱུ་ཡིན།
སྐུའི་གཅེན་མོ་ཞིང་གཤེགས་དམ་པ་དེ་ཉིད་དང༌། སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་གིས་དབུ་སྐྱོང་བླ་མེད་གནང་བའི་འོག་དབུ་འོག་དཔུང་འདེགས་ཞུ་མཁན་གྱི་ལས་བྱེད་འདས་གསོན་རྣམས་ནས་བོད་མི་རིགས་ཀྱི་ས་བོན་དུ་གྱུར་པའི་ན་གཞོན་རྣམས་ཀྱི་ཕྱི་ནང་འཚར་ལོངས་དོན་ལྡན་ཞིག་ཡོང་ཕྱིར་ཞབས་ཞུ་གནང་མཁན་ཡོངས། རྒྱ་གར་དབུས་སའི་གཞུང་དང༌། ཕྱི་ནང་གི་སྤྱི་སྒེར་འབྲེལ་ཆགས་ཡོངས་ནས་མུ་མཐུད་མཐུན་འགྱུར་ཇི་དགོས་གནང་བར་བོད་ཕྲུག་ཁྱིམ་སྡེའི་ལས་སློབ་ཡོངས་ཀྱི་ཚབ་ཞུས་ཏེ་བཀྲིན་རྗེས་དྲན་ཞུ་བ་དང་འབྲེལ་བཅོས་མིན་ཐུགས་རྗེ་ཆེ་ཞུ་རྒྱུ་ཡིན། ང་ཚོའི་ངོས་ནས་ཀྱང་ཞུ་བའི་ལས་དོན་ཐོག་ལྷག་བློ་གཡོ་མེད་ཀྱི་འབད་བརྩོན་མུ་མཐུད་ཞུ་རྒྱུ་ཡིན། མཐའ་དོན་གཞིས་བྱེས་གཉིས་ཀྱི་འདི་ཕྱིའི་མགོན་སྐྱབས་༸གོང་ས་སྐུ་འཕྲེང་བཅུ་བཞི་པ་ཆེན་པོ་མཆོག་སྐུ་ཚེ་ཞབས་པད་བརྟན་ཅིང༌། ཐུགས་ཀྱི་བཞེད་དགོངས་ལྷུན་གྱི་འགྲུབ་དང༌། གཞིས་བྱེས་མཉམ་འཛོམས་ཡོང་བའི་སྨོན་འདུན་ཞུ་རྒྱུ་བཅས།།
བཀྲིས་བདེ་ལེགས།
ཡོང་ཁུངས་བོད་གཞུང་དྲ་བ།
