གངས་རི་དེ་མེད་ན། ང་ལ་རྩ་ཐང་མི་དགོས།

   —འདས་པོ་དྲིན་ཅན་སྙན་ངག་པ་ཡི་དམ་ཚེ་རིང་སྐུ་གཤེགས་ནས་བགྲང་བྱ་བཅུ་ལ་འབོད་པ།

ཙོང་ཁ་ཚེ་བརྟན་རྒྱལ།

ཕ་རོལ་དང་ཚུར་རོལ་གྱི་སེར་ཀ་བསམ་ན

གངས་རི་དེ་རི་མོ་རུ་འཁྲུལ

ངའི་རྒོད་པོ།  ངའི་རྒོད་པོ།

མིག་ཆུ་མིད་པའི་ལས་སྐལ་ཁུར་ནས

བྲག་ཆ་ཞིག་ལ་ཉུལ

མིག་ཟུང་ལ་འགོས་པའི་ནམ་མཁའ

འདར་སིག་བྱེད་བཞིན

 

ངག་སྒྲུང་ཞིག་ཏུ

སྤྱང་ཚོགས་ཤར་འོང

སོ་སྒྲ།  ངུ་ཟུག སྡེར་འབྲད།  རེ་རེ་བགྲང་ན

མིག་ཆུ་དང་མིག་ཆུ་བར་ལ་འབྱར་འོང

ཨོ  སྤྱན་རིས་གཟིགས།

ཨོ།  རྫེ་བཙུན་སྒྲོལ་མ

ད་ནི་སྙིང་རྗེ་ཁྱེར་ཤོག་དང

ངུ་སྐད་ཀྱིས་བཏུམ་པའི་རྣམ་ཤེས་ཚོགས

དོན་མེད་དུ་བར་དོ་ལ་མ་སྤྱུགས

 

ང་ལ་ཉི་མ་དགོས

རྒོད་པོ་ཕྱིར་རུ་འཕུར་འོང་ན

ང་ལ་ཟླ་བ་དགོས

རྣམ་ཤེས་ཚོགས་མི་ལུས་སུ་ཞུགས་ན

ཚེར་མ་ལྟར་སེམས་ལ་ཟུག་པའི་སྙན་ངག

སུ་ལའང་མི་སློང

2014,10,23—24

ངེད་དྲ་ཚིགས།

One thought on “གངས་རི་དེ་མེད་ན། ང་ལ་རྩ་ཐང་མི་དགོས།

  1. ཀརྨ་བློ་གསལ། ཕྱི་ལོ། ༢༠༡༤ ཟླ། ༡༠ ཚེས། ༢༥ at ༥:༠༦ am

    སྲོལ་རྒྱུན་གྱི་གསོལ་འདེབས་རིམ་པ་ལས་བརྒལ་ནས་སློང་མོ་རིམ་པར་སླེབས་འདུག སྙན་ངག་པོ་རེད་ལབ་དགོས་བྱུང་སོང་།

དཔྱད་མཆན་སྤེལ།

%d bloggers like this: