ངའི་རྩྭ་ཐང་། ངའི་རྟ་མཆོག (བོད)

གཉའ་གོང་ལྷ་བྷེ།

མིག་གིས་མཐོང་ཚད་དེ་གནམ་ས་འདྲེས་མཚམས་སུ་སྣང་བ་ནི

ངའི་རྩྭ་ཐང་ལ་ཕ་མཐའ་མེད་པའི་རྐྱེན་གྱིས་ཡིན

ངའི་རྟ་མཆོག་གིས་སྐྱེས་ལུས་འདི་རུ་བླངས་ནས

སུག་བཞིའི་རྐང་རྗེས་འདི་རུ་དཔར་གྱིན་ཡོད

སྒོ་དང་ལྕགས་རི  ཀླད་ཁེབས་མེད་པའི་ངའི་རྩྭ་ཐང

ཉི་ཟེར་གྱིས་འོ་སྦྱོར་བྱེད་ས  ཆར་འཇམ་གྱིས་འགྲམ་པ་བརླན་ས

སྨུག་པ་དང་འཇའ་ཚོན་རེས་མོས་ཀྱིས་འཁོར་ས

རླུང་དམར་གྱི་རྩྭ་སྐྱའི་ཚོགས་ལ་བསེར་བུའི གཤོག་པ་སྤྲོད་ས

ངའི་རྟ་མཆོག་གི་ཕ་ས་ཕ་ཡུལ

སྐར་མ་ལྟ་བུའི་ཨུ་ཁུང་ཁྲི་ཕྲག་གི་མཚན་མོའི་མཁའ་དབྱིངས

ངའི་རྩྭ་ཐང་གི་དགོང་མོའི་སྤྲིན་པ་དཀར་ནག་གི་ཉིན་མོའི་ནམ་མཁའ

ངའི་རྩྭ་ཐང་ཆེན་པོ་འདིའི་ཉིན་དཀར་གྱི་ཤོམ་ལྭ་ཡིན་དགོས་ཨང

 

ལོ་འདི་འགར  ངའི་རྟ་མཆོག་ཆང་གིས་བཟི་བཞིན

རྩྭ་ཐང་གི་རྒྱ་ཁྱོན  རྩྭ་ཐང་གི་ཕྱི་ནང

རླུང་གི་གཤོག་པ་ལ་བསྟེན་ནས་སེམས་ཀྱིས་གཞལ་དགོས་ཟེར

དགའ་སྐྱོ་ཟུང་འབྲེལ་གྱི་རྨིག་རྗེས་རྩྭ་ཐང་གི་ག་ས་གང་དུ་བཞག

 

ངའི་རྩྭ་ཐང་ན  ངས་མིང་མི་ཤེས་ལ་ངོའང་མི་ཟིན་པའི

མི་མང་བོས་བདེ་སྐྱིད་ཀྱི་འཚོ་བའི་དཔལ་དུ་རོལ་གྱིན་མཆིས

 

ངས་བརྗོད་ཟིན་པ་ལྟར  ངའི་རྩྭ་ཐང་ལ་སྒོ་དང་ལྕགས་རི་མེད

ངའི་རྩྭ་ཐང་ན་རང་བྱུང་གི་སྤྱང་ཀི་ཡོད

 

ད་དུང་གང་ནས་ཡོང་བ་མི་ཤེས་པའི་ཁྱི་ལྡོམ་གྱི་ཚང་ཡོད

ངའི་རྩྭ་ཐང་གཞན་དགོ་བ་ཡོད  འཕྱི་བ་ཡོད

རི་བོང་ཡོད  རི་དྭགས་གྲངས་མེད་ཅིག་ཡོད

འདབ་ཆགས་ཀྱང་རྫོགས་མཐའ་མེད་པ་ཞིག་ཡོད

ངའི་རྩྭ་ཐང་དུ་རང་དབང་གི་ཁྲག་དྲི་ཡོད

ཁྲག་དྲི་ལ་འཁོར་བའི་ཞི་བདེའང་ཡོད

 

ངའི་རྟ་མཆོག  ངའི་རྟ་མཆོག་ལ་མཆེ་བ་མེད  སྡེར་མོ་མེད

ངའི་རྟ་མཆོག་དམར་ཟས་ལ་ཞེན་པ་ལོག་གི་ཡོད

ངའི་རྟ་མཆོག   དེ་ལྟ་བུའི་ཕྱི་གཙང་ནང་གཙང་ཡིན

ངའི་རྩྭ་ཐང    དེ་བཞིན་དུ་ཕྱི་གསལ་ནང་གསལ་ཡིན

ངའི་རྩྭ་ཐང་ལ་མི་ཡིས་གཅར་བརྡུངས་བྱས་པའི་ཤུལ་རྗེས་ཡོད

ངའི་རྟ་མཆོག་ལ་ཁྱི་ཚོགས་ཀྱིས་རུབ་རྨུགས་བྱས་པའི་རྨ་ཤུལ་ཡོད

ངའི་རྩྭ་ཐང་དུ  སྲོག་ཆགས་མང་བོས་རྒྱུད་སྤེལ་གྱིན་ཡོད

ཐ་ན་ཁྱི་སྤྱང་མཉམ་འདྲེས་ཀྱི་རྒྱུད་ཀྱང་སྤེལ་གྱིན་ཡོད

དེའི་ཁྲོད་དུ  ངའི་རྟ་མཆོག་གིས་ཀྱང

ཕོ་རྟེའུ་ནག་པོ་ཞིག་དང་མོ་རྟེའུ་དཀར་པོ་ཞིག

ངའི་རྩྭ་ཐང  གནམ་གོ་ལ་ལས་ཆུང་ཙམ་དང

སའི་གོ་ལ་ལས་ཆེ་ཙམ་ཡོད

 

ངའི་རྟ་མཆོག  རྩྭ་ཐང་གི་འགྲིམ་འགྲུལ་ཡོ་བྱད་ཅིག་མིན

ད་དུང་ངའི་ཕོ་རྟེའུ་ནག་པོ་དང་མོ་རྟེའུ་དཀར་པོ ……

 ངེད་དྲ་ཚིགས།

དཔྱད་མཆན་སྤེལ།

%d bloggers like this: