མགར་བཟའ།

མུན་པའི་མིག་ཟུང་ཐག་རིང་དུ་བསྲིངས་བས།

བདག་གི་ནམ་མཁའ་ཁོ་ན་འོད་དུ་འཚེར།

སྙིང་ཉེ་བའི་སྐད་ངག་ཡོད་ཚད།

ཚེ་སྲོག་གི་གཏིང་མཐའ་ནས་ཡང་ཡང་དྲན།

 

སྐར་མ་རེ་ཟུང་རྒྱང་ན་འཚེར་བའི་རྨི་ལམ

སྨག་ནག་པའི་མཚན་མོ་འདིའི་ཕྲེང་རྒྱུན་ལ་སྨིན་དུས

ཁུ་སིམ་སིམ་གྱི་དྲན་ཤེས་ལ་བཏེགས་པའི་ཟླ་བ

ཉི་འོད་ཁུར་བའི་སང་ཉིན་ནས་མཇལ་ཐུབ་བམ

 

དབྱིངས་འགྲོས་བླ་སྲོག་ལ་སྦྲུམ་པའི་ལོ་ཟླ

སུ་ཚང་གི་སྟོན་ཁ་ཁོ་ནའི་མཛེས་སྡུག་ཡིན་སྲིད

ལམ་ཕྲན་ཞིག་རྒྱང་དུ་འཐེན་པའི་བྱུང་བ་ན

ཡལ་སོང་བའི་མཛེས་སྡུག་གི་སྟོན་ཀ་ག་ཚོད་ཡོད

 

རི་རྒྱུད་ཅིག་སྨུག་པས་བཏུམས་ཚུལ་ནི

ཡུལ་གྱུར་བ་ཞིག་གིས་ས་མཐའ་བསྐོར་ཚུལ་ཡིན་ནམ

སྐབས་རེར་དགའ་ལ་སྐབས་རེར་སྡུག་པའི་ལས་དབང

ཆར་བས་གྱེར་ཅིང་སྨུག་པས་ཟློ

རྣམ་ཤེས་ཡིག་དྲུག་ལ་བཅོལ་བའི་བྱུང་རིམ་ནས

ཁ་བ་ཁོ་ན་གླུ་ངག་ལ་རུམ་པའི་གཏམ་རྒྱུད

མི་ཡུལ་འདིར་ལྷག་པའི་མཛའ་བརྩེ་ཡིན་ནམ

 

གཏམ་རྒྱུད་ཡོད་ཚད་བྱུང་རིམ་ཞིག་ཡིན་ན

སུ་ཞིག་དྲན་པའི་གཏིང་རུམ་ནས་སྨིན་ཞིང

མིག་གི་ཟབ་ཚད་ལ་འཁྱིལ་འོང་དུས

ངག་སྒྲོས་ཐན་ཐུན་རླུང་གིས་ཁྱེར་ཟིན་ན་ཡང

སེམས་པ་འདི་ཁོ་ན་ཁྱེད་ལ་བཞག་ཆོག

དུས་གཏན་དུ་བཞག་ཆོག

2014  11 4ཉིན་བྲིས།

ངེད་དྲ་ཚིགས།