འབའ་སྲས།
སྔ་མིན་འཕྱི་མིན་མལ་ལས་ལངས།།
ནངས་ཇ་དྲོས་ཇ་མཉམ་དུ་བྱས།།
དཀར་ཡོལ་སྡེར་མ་འགའ་རེ་བཀྲུས།།
ཆུང་མར་རོགས་རམ་ཉུང་ཙམ་ཐུབ།།
ཕ་ཁྱིམ་ནང་ལ་མིག་རེ་ཅེར།།
མདའ་རྫོང་ནང་དུ་གཏམ་རེ་བཤད།།
ཞི་མོ་ཚོ་ལ་ཁ་རེ་རྩེས།།
ལག་ཡོང་མེད་ཀྱང་སེམས་པ་རེད།།
སྐད་འཕྲིན་རྒྱབ་ཏུ་ཐེངས་རེ་བལྟས།།
གྲོགས་ཀྱིས་གྲོགས་ལ་བསྟོད་ཅིང་བསྔགས།།
ངོ་དེབ་དྲ་ཚིགས་འགའ་རེར་བསྙེགས།།
ང་བཟང་ཁྱོད་ངན་གཤག་རེས་བྱེད།།
བུ་ཕྲུག་ཚོ་ལ་སེམས་པ་གླན།།
སྙིང་གི་དམར་ཆུང་འདི་ན་ལྡིང་།།
ཆུང་མར་མིག་གི་ཟུར་གྱིས་བལྟས།།
མཛེས་སྡུག་ངོ་མ་འདི་ན་བཞད།།
ཕྱི་རོལ་འཇིག་རྟེན་ཆེ་བ་ཡང་།།
ང་ལ་བདེ་སྐྱིད་མེད་པ་མཐོང་།།
རང་གི་ཁྱིམ་ཚང་ཆེས་ཆུང་ཡང་།།
དགའ་སྤྲོའི་མཛོད་ཁང་ཡིན་པ་ཤེས།།
ཆུང་མ་དགའ་བཞིན་ཁྲོམ་དུ་ཆས།།
བུ་ཕྲུག་སྤྲོ་བཞིན་རྩེ་རུ་སོང་།།
ཕ་རྒན་སྐྱིད་བཞིན་ཁྱིམ་དུ་གནས།།
ཞོར་ནས་སྐད་ཆ་འདི་ཙམ་ཐལ།།
༡༡/༡༡/༡༤ ཕྱི་དྲོར་གློ་བུར་དུ།
ངེད་དྲ་ཚིགས།
