འོད་དཀར་དྲ་ཚིགས།

གཙུག་གཡུ།  (སེ་ར)

ལྗོན་པའི་ཟིལ་བ་དབྱར་གྱི་ན་བཟའ།།

མཁའ་དབུགས་ཡུག་ཡུག་རྨི་ལམ་རྗེས་ན།།

འཇིག་རྟེན་འདི་འང་ལུས་ཤུབས་དྲོ་བས།།

ཚེ་རབས་ངོས་ལ་སྟོབས་ཀྱི་དཔུང་སྐྱོམ།།

 

འོད་ཀྱི་དེ་ཉིད་ས་མཐར་སྤེལ་དུས།།

གངས་རིའི་འདབས་ཀྱི་ཀྱག་ཀྱོག་དྲན་འོང་།།

གཙང་བོ་བརྒལ་བའི་ཕར་གྱི་དེ་རིང་།།

གདན་ས་མཇལ་བ་དད་པའི་ལྟས་འགྲིག།

 

ཀླུ་སྒྲུབ་ལྟ་བ་མཆིད་པའི་གཤོག་པ།།

ང་ཡིས་རྡོག་ཁྲེས་འཁུར་བའི་རེ་བཞག།

ནཱ་ལེན་རིག་པའི་སྙིང་སྟོབས་འདི་ཀོ།།

ངར་གྱིས་རྒྱུག་པའི་ལྕེ་རྩེར་འགུལ་ལོ།།

 

གང་དུ་གཞོལ་ཞིང་སྙེག་པའི་ཁྱུ་ཚོགས།།

ཐ་སྙད་བློ་ཡི་སྣང་བ་འདག་ཅིག།

བདེན་མེད་རིགས་པའི་རྟེན་འབྱུང་ངོས་ལ།།

དོ་ནུབ་ཨ་གསར་ཉམས་ཤིག་བསྡུས་སོང་།།

 

རྨི་ལམ་གཉོར་ཞིང་ཚ་རླབས་བརྟོལ་བའི།།

རྟེན་འདི་བཞད་པའི་སྐལ་བ་འཕྲད་དོ།།

གསེར་གྱི་སྐུད་སྣེར་བརྒྱུས་པའི་ཁྱེད་ཅག།

སེམས་ལ་འོད་ཟེར་སྒྲོན་པའི་གླེགས་ཐག།

 

ཀླུ་ཟླའི་གཤིས་དང་རིགས་པའི་ནང་སྙིང་།།

བྲང་གཞུང་ཟ་འཕྲུག་ལངས་པས་ཅི་ཕན།།

ཙོང་ཁའི་སྙིང་སྟོབས་སྣེ་རུ་འཁྱིལ་པས།།

རང་ཡིད་འོད་དུ་བསྟིམས་ཏེ་སྲིངས་ཤིག།

 

རེ་བ་སྙིང་ལ་བསྒོམས་པའི་ཟླ་ཚེས།།

དཀར་ངོགས་སྟེགས་བུ་བརྒྱུད་ནས་རྙེད་བྱུང་།།

མི་ཚེའི་རིན་ཐང་ཞིག་ཏུ་བཀོད་མོད།།

ད་དུང་རི་བོ་འདི་རུ་འགྱིང་ངེས།།

 

ད་ནངས་ཞོགས་པའི་འཛུམ་ཀོང་ཡག་བྱུང་།།

དག་པའི་ཁམས་ཀྱི་དཔལ་དང་འཁྱུད་དོ།།

ཕུགས་འདུན་གསར་བ་དཀྲོལ་བའི་དར་ལིང་།།

འགོག་མེད་སྙིང་གི་རོལ་མོར་དཀྲིས་སོ།།

2014_11_17  ཉིན”སེ་ར་ཆོས་སྒར་དུ་འཛིན་གྲོགས་ཚོར་བྲིས་པ་དགེའོ། །

ངེད་དྲ་ཚིགས།