November ༢༣, ༢༠༡༤

ནང་ཆོས་ལ་སྐྱ་བོའི་འཇིག་རྟེན་གྱི་ངན་ཤུགས་ཐེབས་པ།

དབང་འབུམ།     ཆོས་ལུགས་འཆོལ་ཉོག་ཏུ་འགྲོ་བ་ནི་ད་ལྟའི་དུས་ཁོ་ན་མ་ཡིན་པར་སྔོན་ཆད་ཀྱི་དུས་རིམ་སོ་སོའི་ནང་ཆོས་ལུགས་སོ་སོར་བྱུང་མྱོང་པའི་སྣང་ཚུལ་ཞིག་རེད།    དེ་ཡང་ཆོས་ལུགས་ནི་རིག་གནས་ཀྱི་སྣང་ཚུལ་གྱི་ཆ་ནས་བརྒྱུད་པའི་གོ་རིམ་ཁྲོད་སྐྱ་མིའི་འཇིག་རྟེན་གྱི་ངན་ཆགས་ཞུགས་པ་རེད།  ཡིན་ཡང་ཆོས་ལུགས་དེ་འཇིག་རྟེན་པའི་འདམ་རྫས་ལས་གྲོལ་ཏེ་དག་གཙང་ཇི་ལྟར་བྱེད་རྒྱུ་དེ་ནི་འདང་རྒྱག་དགོས་པའི་གནད་དོན་ཞིག་རེད།  དེའི་རྒྱུ་མཚན་ནི་ཆོས་ལུགས་ནི་ནམ་ཡང་འཇིག་རྟེན་ལས་བརྒལ་བའི་ཚད་མཐོ་བའི་བསམ་བློ་ཞིག་ཡིན་པས་འཇིག་རྟེན་གྱི་སྲིད་དང་དབང་ཆ།  དཔལ་འབྱོར།  ལམ་ལུགས་སོགས་ཀྱི་བཀག་རྒྱར་ཚུད་མི་རུང་།  རང་རྒྱལ་གྱི་མིག་སྔའི་ནང་ཆོས་ལ་སྐྱ་མིའི་ངན་ཆགས་ཞུགས་པའི་གནད་དོན་འདི་ནི་ཚང་མའི་མིག་མཐོང་ལག་ཟིན་གྱི་གནས་བབས་ཤིག་རེད།  དེ་ལ་ལྟ་ཚུལ་མི་འདྲ་བ་ཡོད་སྲིད་རྒྱུ་རེད།  ཡིན་ཡང་ང་རང་གི་ལྟ་ཚུལ་ནི་ནང་ཆོས་ལ་འཇིག་རྟེན་པས་ཤན་ཞུགས་པ་འདི་ནི་བཟང་བོ་རེད་སྙམ་གྱི་མི་འདུག་པས་འདི་ལ་བཀག་འགོག་དང་དོ་དམ།  འདང་ཞིབ་མོ་རྒྱག་དགོས་པར་སྙམ། གཅིག  མི་ཡུལ་གྱི་ནང་ཆོས་ཟེར་བའི་བསམ་བློ་དེ་ལ་གཞུང་ལུགས་ཀྱི་སྟེང་ནས་འགྲེལ་ཡང་དག་རྒྱག་དགོས།   ལོ་འདི་འགའི་རིང་ལ་མི་ཡུལ་གྱི་ནང་ཆོས་ཞེས་པའི་བསམ་བློ་ལ་མི་རྣམས་ཀྱིས་རྣམ་པ་ཙམ་དང་སྲོལ་ངན་གྱི་ལྟ་ཚུལ་ཞིག་ཆགས་ཀྱིན་ཡོད།  ངས་བལྟས་ན་མི་ཡུལ་གྱི་ནང་ཆོས་ཟེར་བ་ནི་ཆོས་པ་དང་ཆོས་དོན་དག་སྐྱ་བའི་འཇིག་རྟེན་དང་བསྟུན་དགོས་ཟེར་བ་མ་ཡིན་ལ།  ཆོས་པ་དག་གིས་འཇིག་རྟེན་ཆོས་བརྒྱད་ཀྱིས་ནང་ཆོས་ཀྱི་དཔལ་འབྱོར་སྤེལ་ཟེར་བ་ནི་དེ་བས་ཀྱང་མ་ཡིན་ཏེ།  དེའི་དོན་ནི་ཆོས་པ་དག་གི་བྱིན་རླབས་མི་ཡུལ་དུ་ཁྱབ་པར་བྱེད་དགོས་པའི་དོན་དང་།  ཡང་ན་ཁོང་ཚོས་འཚོ་བ་དང་འགྲོ་འདུག་སྤྱོད་གསུམ་སོགས་དུས་རབས་ཀྱི་འགྱུར་བ་ལྟར་བསྒྱུར་དགོས་ཟེར་བ་མ་ཡིན་ཏེ།  ནང་ཆོས་ཀྱི་སྙིང་བོ་མི་ཡུལ་གྱི་ཁྱབ་པར་བྱེད་དགོས་ཞེས་པའི་དོན་རེད།   བྱིན་རླབས་མི་ཡུལ་དུ་ཁྱབ་པར་བྱེད་པ་ཟེར་བ་ནི་དགོན་པའི་དངོས་པོའི་སྟོབས་ཤུགས་སོགས་བཀོལ་ཏེ་སྤྱི་ཚོགས་ལ་ཞབས་ཞུ་བྱེད་པ་སྟེ་དཔེར་ན་ཧོང་ཀོང་སོགས་མཐའ་འཁོར་གྱི་ནང་ཆོས་རྩ་འཛུགས་དག་ལྟར་དུ་སློབ་གྲྭ་འཛུགས་པ་དང་། སྨན་ཁང་འཛུགས་པ།  དུར་ཁྲོད།  ན་གཞོན་གྱི་ལྟེ་གནས།  གཉོར་སྐྱོང་ཁང་སོགས་འཛུགས་པ་ལྟ་བུས་སྤྱི་ཚོགས་ལ་ཞབས་ཞུ་བྱེད་དགོས་པའི་དོན་རེད།  ནང་ཆོས་ཀྱི་སྙིང་བོ་མི་ཡུལ་དུ་ཁྱབ་པར་བྱེད་པ་ཞེས་པ་ནི་ནང་ཆོས་ཀྱི་ལྟ་བ།  ནང་ཆོས་ཀྱི་ཤེས་རབ་མི་ཡུལ་དུ་ཁྱབ་པར་བྱས་ཏེ་མི་ཡུལ་གྱི་སྡུག་བསྔལ་སེལ་བ་དང་།  ཆགས་སྡང་ཞི་བར་བྱེད་པ།  འགལ་བ་བསྡུམ་པར་བྱེད་དགོས་པའི་དོན་རེད།  ཆོས་པ་སྲིད་སྟེགས་སུ་སོང་སྟེ་དགོན་པས་སྒྲ་དང་འོད།  གློག་ལ་བརྟེན་ནས་འཛུགས་སྐྲུན་གཟབ་འཆོར་པ་ཞིག་བྱེད་པ་ནི་མི་ཡུལ་ནང་ཆོས་གཏན་ནས་མིན།  དེ་ནི་ཏག་ཏག་སྐྱ་བའི་འཇིག་རྟེན་ཀྱི་ངན་ཆགས་ཞུགས་པའི་ནང་ཆོས་ཡིན།  ངས་བལྟས་ན་མི་ཡུལ་གྱི་ནང་ཆོས་ཀྱི་དོན་རྣལ་མ་བླ་མ་མཁས་པ་དག་གིས་ཡང་དག་གིས་འགྲེལ་ནས་གསལ་བཤད་བྱེད་དགོས། ...
དེ་ལས་མང་པ།

དགེ་རྒན་ཆེན་མོ་བཛྲ་ཚུལ་ཁྲིམས་མཆོག

        གངས་ལྗོངས་ཤེས་རིག་ནོར་བུའི་སློབ་གླིང་གི་རྒྱུན་ལས་སློབ་གཙོ་བཞོན་པ་དང་ནུབ་བྱང་མི་རིགས་སློབ་གྲྭ་ཆེན་མོའི་གདན་ཞུས་སློབ་དཔོན་ཆེན་མོ།    བཛྲ་ཚུལ་ཁྲིམས་མཆོག་ནི་མདོ་སྨད་བསྟན་པའི་འབྱུང་གནས་དཔལ་ལྡན་བཀྲ་ཤིས་གཡས་སུ་འཁྱིལ་བའི་ཆོས་སྡེ་ཆེན་པོའི་ཤར་ཕྱོགས། ས་ལ་དགེ་བཅུ་ཚང་བའི་ཡུལ་ཕྱོགས་མཛོད་དགེ་རུ་སྟོད་མ་ཞེས་པའི་སར་སྤྱི་ལོ་ ༡༩༦༥ ལོའི་དབོ་ཟླ་བའི་དམར་ཕྱོགས་རྒྱལ་བ་གཉིས་པའི་ཉིན་སྐུ་འཁྲུངས། གཞོན་ནུ་ཉིད་ནས་ཐོས་པ་འཚོལ་བའི་འདུན་པ་འགོག་མེད་ཅིག་མངའ་བས་སློབ་གྲྭ་ཆུང་འབྲིང་རིམ་པར་བརྒྱུད། སྐབས་དེར་ཁོང་ཕེབས་སའི་སློབ་གྲྭ་དེ་དག་ཏུ་སྦྱང་བྱ་ཡོད་ཚད་རྒྱ་ཡིག་ཡིན་གཤིས། ཁོང་ལྟ་བུའི་འབྲོག་ཕྲུག་རྣལ་མ་ཞིག་ལ་མཚོན་ན་དཀའ་ངལ་མི་ཉུང་བ་དང་འཕྲད་མྱོང་བ་ནི་སྨོས་མ་དགོས་མོད། འོན་ཀྱང་ཟླ་མེད་ཀྱི་རྣམ་དཔྱོད་དང་ལྷོད་མེད་ཀྱི་བརྩོན་པ་ཟུང་དུ་སྦྲེལ་བས་དཀའ་ཁག་ཀུན་ལས་རྒྱལ་ཞིང་དགེ་སློབ་ཡོངས་ཀྱི་བསྔགས་ཡུལ་དུ་གྱུར། སྤྱི་ལོ་༡༩༨༠ལོར་དལ་འབྱོར་ལ་སྙིང་བོ་འཚོལ་ཕྱིར་བཤད་སྒྲུབ་བསྟན་པའི་འབྱུང་གནས་བླ་བྲང་བཀྲ་ཤིས་འཁྱིལ་དུ། འདུལ་བ་འཛིན་པའི་ཁྱུ་མཆོག་འཕགས་པ་ཉེ་བར་འཁོར་གཉིས་པ་རྗེ་དགེ་འདུན་རྒྱ་མཚོའི་སྤྱན་སྔར་རབ་ཏུ་བྱུང་སྟེ་རྨད་བྱུང་ཐོས་བསམ་གླིང་དུ་ཞུགས།  ཡོངས་ཀྱི་དགེ་བའི་བཤེས་གཉེན་ཆེན་པོ་རྗེ་དགེ་འདུན་རྒྱ་མཚོ། གནས་ལྔ་རིག་པའི་པཎ་ཆེན་རྗེ་དམུ་དགེ་བསམ་གཏན་ཚང་། སྨད་སོག་བཛྲ་ཚང་། བཤེས་གཉེན་ཆེན་པོ་རྗེ་འཇམ་དབྱངས་རྒྱ་མཚོ། ཁྲི་ཆེན་གུང་ཐང་སྐུ་འཕྲེང་བདུན་པའི་ཡོངས་འཛིན་རྗེ་འཇིགས་མེད་དཔལ་ལྡན་ཚང་སོགས། ས་ཆེན་པོས་ཀྱང་འདེགས་མི་བཟོད་པ་ལྟ་བུའི་སར་གནས་དམ་པ་མང་བོ་བསམ་སྦྱོར་རྣམ་པར་དག་པས་ཚུལ་བཞིན་བསྟེན་ནས་མདོ་སྔགས་རིག་གནས་དང་བཅས་པ་ལེགས་པར་སྦྱངས། སྤྱི་ལོ་༡༩༨༥ལོར་ཀན་སུའུ་ནང་བསྟན་སློབ་གླིང་དུ་ཞུགས་ཤིང་ལོ་ལྔའི་རིང་ལ་ཕར་ཕྱིན་དང་དབུ་ཚད་འདུལ་མཛོད་ཀྱིས་མཚོན་པའི་མཚན་ཉིད་སྐོར་དང་། གཞན་ཡང་ཐ་སྙད་རིག་གནས་དང་། ལོ་རྒྱུས། ཆབ་སྲིད། རྒྱ་ཡིག་སོགས་ལ་ལེགས་པར་སྦྱངས་ནས་མཐར་ཕྱིན་ཆེད་རྩོམ་ལ་༼རྟོགས་བརྗོད་འདུན་ལེགས་མའི་འགྲེལ་བ་དད་པའི་དྲི་གསུང་འཐུལ་བའི་རྫིང་བུ་༽བྲིས་པར་དགེ་བའི་བཤེས་གཉེན་རྣམས་ཀྱིས་བསྟོད་བསྔགས་ཆེས་ཆེར་གནང་ཞིང་སློབ་གྲྭ་ཆེན་མོའི་མཐར་ཕྱིན་དཔང་རྟགས་བཞེས། དེ་ནས་སླར་ཡང་ཆོས་གྲྭར་འགྲིམས་ཤིང་མཁས་མང་ལི་ཁྲིའི་ཆུ་གཏེར་མཁའ་ལ་འཕྱོ་བའི་དབུས་སུ་ཕར་ཕྱིན་དམ་བཅའ་བཞག སྤྱི་ལོ་༡༩༩༢ལོར་སླར་ཡང་ཀྲུང་གོའི་བོད་བརྒྱུད་ནང་བསྟན་སློབ་གླིང་དུ་ཞུགས་ཤིང་ལོ་གསུམ་གྱི་རིང་ལ་རིག་གནས་སྤྱི་དང་ཁྱད་པར་དུ་སྒྲ་ཀཱ་ཙན་དབྱངས་གསུམ་ལ་སྦྱངས་པས་ནང་བསྟན་སྒྲ་རིག་ཆེད་སྦྱོང་གི་འཛིན་ཡིག་ཐོབ། ཆེད་རྩོམ་ལ་༼སྒྲ་རིག་དར་སྤེལ་དང་བརྒྱུད་འཛིན་བྱེད་པར་བསྐུལ་བའི་ཅོང་སྒྲ༽ཞེས་པ་བྲིས། དེ་ནས་གྲོང་ཁྱེར་གྱི་འཚོ་བ་སོགས་ལ་ཐུགས་མ་ཞེན་པར་མདོ་སྔགས་ཀྱི་གཞུང་ལ་སྔར་བས་ཐོས་བསམ་གཏིང་ཟབ་མོ་ཞིག་བགྱི་འདུན་གྱིས་སླར་ཡང་བཀྲ་ཤིས་འཁྱིལ་དུ་ཕེབས། ཡིན་ནའང་མདོ་སྨད་བསྟན་པའི་མངའ་བདག ༧ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེ་དང་རིགས་བརྒྱའི་ཁྱབ་བདག་རྡོ་རྗེ་འཆང་ཆེན་པོ་ཁྲི་ཆེན་གུང་ཐང་བསྟན་པའི་དབང་ཕྱུག་རྣམ་གཉིས་ཀྱིས་བཀའ་ནན་སྤྱི་བོར་བསྩལ་བའི་ངོ་མ་བཟློག་པར་རང་ཁོ་ནའི་ཐོས་བསམ་གྱི་བྱ་བ་ཅམ་གྱིས་བཞག་སྟེ་སྤྱི་ལོ་༡༩༩༥ནས་བཟུང་། ད་ལྟའི་བར་མི་ལོ་བཅུ་ཕྲག་གཉིས་ལ་ཉེ་བའི་རིང་དུ།...
དེ་ལས་མང་པ།