འོད་ཀྲིག་ཀྲིག་གི་རྒྱ་མཚོ། གྲང་བསིལ་བསིལ་གྱི་མཚོ་རླུང་།

༈ འོད་ཀྲིག་ཀྲིག་གི་རྒྱ་མཚོ། གྲང་བསིལ་བསིལ་གྱི་མཚོ་རླུང་།

རྩོམ་མཁན། རྡོ་རྗེ་རིན་ཆེན། (སྐྱ་རེངས)

ཐོས་བྱུང་། ངས་མཚམས་མེད་པར་ཐོས་བྱུང་།
རྒྱ་མཚོའི་ཕ་རོལ་ནས་འཕྱོ་འོངས་པའི་རླབས་སྒྲ་ཞིག་ཐོས་བྱུང་།
དེ་ནི། སུན་སྣང་གིས་དཀྲུགས་པའི་ངའི་ཡ་ཆུང་ལ་ཟུག་ཅིང་།
ཁེར་རྐྱང་གིས་གདུང་བའི་ངའི་བྲང་གཞུང་ལ་འདྲེས།

དངུལ་ཆུ་བཞིན། འོད་ཀྲིག་ཀྲིག་གི་རྒྱ་མཚོ།
ཟིལ་ཐིགས་ལྟར། གྲང་བསིལ་བསིལ་གྱི་མཚོ་རླུང་།
ཡོད་ཚད། གསང་བ་ལྐོག་གྱུར་གྱི་ཁོ་མོ་བཞིན།
དོན་ནུབ། བདག་གི་བླ་སྲོག་བཅིངས་པར་གྱུར།

ཟླ་འོད་ཁོ་ནས། ད་གཟོད་ང་དང་ཁོ་མོའི་གཏམ་རྒྱུ་ཤེས་ཤིང་།
རྒྱ་མཚོ་ཁོ་ནར། ད་གཟོད་ངས་ང་དང་ཁོ་མོའི་སྙིང་གཏམ་བརྗོད་མྱོང་།
ཆུ་རླབས་སོང་ཤུལ་གྱི་བྱེ་ཁུལ་དུ། ངས་ཁོ་མོའི་མིང་བྱང་བྲིས་ཤིང་།
དཀར་འོང་འོང་གི་བྱེ་ཐང་དུ། ངས་ཁོ་མོའི་རྐང་རྗེས་བཙལ།

སྟངས་ཀ་དང་བྱས་ཏེ་གཞུར་ཡོང་བའི་མཚོ་རླབས་ཀྱིས།
ལ་ལ་ཆུང་ཞིང་། ལ་ལ་སྙིང་ཉེ་བའི་རྐང་རྗེས་དག་སུབ་ཀྱིན།
ཡང་ནས་ཡང་། ངའི་རྐང་མཐིལ་ལ་མཆུ་གླན་བཞིན།
སྙིང་ཉེ་བའི་ཁོ་མོ་ལྟར། བདག་ལ་དམ་དུ་འཁྱུད་པར་བརྩོན།

ཁྲུང་ཁྲུང་ལྟར་དཀར་བོའི་ཆུ་སྐྱར་དག རྒྱང་དུ་ཕུར་རྗེས།
ནག་ཡོར་ཡོར་གྱི་མཚོ་མོ་འདིས། ད་དུང་ང་ལ་ཅི་ཞིག་བརྗོད་ཀྱིན་པ་འདྲ་ནའང་།
ཁེར་རྐྱང་གི་གླིང་ཕྲན་འདིའི་སྟེང་། རྒྱང་རིང་དུ་ངས་ཇི་ལྟར་རྣ་བ་གླགས་ཀྱང་།
རླབས་སྒྲ་ཙམ་ལས། སྔར་བཞིན་ངས་ཅི་ཡང་མི་ཐོས།

2014/11/24/

ངེད་དྲ་ཚིགས།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s