༄༅། །མཁྱེན་པའི་གཏིང་མཐའ་མི་མངོན་ཞིང༌། ཐུགས་རྗེའི་ཡིད་བཞིན་ནོར་གྱིས་གཏམས། །
མཛད་པའི་རླབས་ཕྲེང་གཡོ་བ་ཅན། །ཐུབ་དབང་ཆོས་ཀྱི་རྒྱ་མཚོ་རྒྱལ། །
རྙོག་བྲལ་དྭངས་བའི་ཆུ་རྒྱུན་གྱིས། །ལུས་ཅན་གདུང་བ་ཞི་བྱེད་ལྟར། །
ལེགས་བཤད་གསར་པའི་བདུད་རྩི་ཡིས། །བློ་ལྡན་སྐྱེ་བོ་དབུགས་དབྱུང་བྱ། །
དྲི་བཟང་བསྒོས་པའི་ཆུ་གཙང་དེ། །མཆོད་ཡོན་ཞབས་བསིལ་བསང་གཏོར་སོགས། །
གང་དུ་བྱས་ཀྱང་ལེགས་པ་ལྟར། ལེགས་བཤད་གཏམ་ནི་ཀུན་ལ་མཛེས།
ལུགས་གཉིས་བླང་དོར་ཤེས་པ་ཡིས། །གནས་སྐབས་མཐར་ཐུག་དོན་འགྲུབ་སྟེ། །
བརྟག་པ་ཀུན་ལ་མཁས་པ་ཡི། །དེད་དཔོན་རྒྱ་མཚོར་ཞུཌ་པ་བཞིན། །
ཆུ་ཕྲན་བརྒལ་བར་མི་ནུས་དེས། །རྒྱ་མཚོ་རྐྱལ་གྱིས་ག་ལ་ཆོད། །
ཡ་རབས་ལུགས་ཀྱང་མི་ཤེས་ན། །ཆོས་ཀྱི་དེ་ཉིད་ཇི་ལྟར་རྟོགས། །
གཟུར་གནས་རིག་པ་ལྡན་པ་དེས། །གཞན་གྱི་ཡོན་ཏན་ལེན་པར་བྱེད། །
སྤང་ལྗོངས་གཙང་མའི་དལ་འགྲོ་མ། །ལྷུང་ལྷུང་ཟེར་ཞིང་མེ་ཏོག་འཐུ། །
ངན་པས་ཕྱོགས་མཐའ་བསྐོར་ན་ཡང༌། །སྐྱོན་གྱི་རིགས་རྣམས་སྡུད་པར་བྱེད། །
ངམ་གྲོག་ས་རལ་ཅན་གྱི་ཆུས། །འདམ་གྱི་སྙིགས་མ་འདྲེན་དང་མཚུངས། །
ཡོན་ཏན་དང་པོ་སློབ་དཀའ་ལ། །ཤེས་བཞིན་མེད་ན་ཉམས་པ་སླ། །
ཆུ་ཐིཌ་བསཌ་པས་འགེངས་དཀའ་ཡང༌། །བོ་ན་ཅིག་ཅར་ཉིད་དུ་འཛད། །
དཀའ་སྤྱད་ཁུར་དུ་འཁྱེར་ནུས་ན། །བྱ་བ་གང་ཡང་དཀའ་བ་མེད། །
ཆུ་ཡི་ནང་དུ་ཞུགས་པ་དེར། །ཆར་གྱིས་ལྷག་པར་གནོད་མི་འགྱུར། །
རྒྱུན་ཆགས་བརྩོན་པ་མ་བཏང་བར། །བགས་ཀྱིས་བསྒྲུབས་ན་ཅི་ཡང་འགྲུབ། །
ཆུ་བོ་དལ་གྱིས་འབབ་པ་ཡིས། །ཡངས་པའི་ས་ཆེན་བསྐོར་ནས་འགྲོ། །
བྱ་བ་ཆེན་པོ་ཡུན་གྱིས་བསྒྲུབ། །ངང་ཐུང་འབད་པས་མཐར་མི་ཕྱིན། །
ཀླུང་ཆེན་དལ་ཡང་རིང་འགྲོ་ལ། །རྦ་རླབས་དྲག་ཀྱང་ཆེར་མི་འགྲོ། །
བྱ་བ་ཉམས་ཀྱིས་མི་ལྕོགས་ན། །གཞན་གྱིས་རྦད་ཀྱང་བྱར་མི་རུང༌། །
རྐྱལ་མི་ཤེས་ན་གཞན་དག་གིས། །བསྐུལ་ཡང་ཆུ་ནང་ཅི་ཕྱིར་མཆོངས། །
ཆུ་བོ་ཐུན་མོང་མཆོད་ཡོན་ཏེ། །ཉི་ཟླ་ཐུན་མོང་སྒྲོན་མེ་གསལ། །
དམ་པ་ཐུན་མོང་གཙུག་རྒྱན་དང༌། །དམ་ཆོས་ཐུན་མོང་བདུད་རྩི་ཡིན། །
དར་ཆེན་གྲུ་གཟིངས་རྒྱ་མཚོའི་རྒྱན། །སྤྲིན་བྲལ་ཟླ་བ་ནམ་མཁའི་རྒྱན། །
མཁས་པའི་སྐྱེ་བོ་བསྟན་པའི་རྒྱན། །རུ་འདྲེན་དཔའ་བོ་དཔུང་གི་རྒྱན། །
ཡ་རབས་བཟང་སྤྱོད་དཔོན་དང་འབངས། །ཕན་ཚུན་ལེགས་ཚོགས་གོང་དུ་སྤེལ། །
རྒྱ་མཚོ་ཆེ་དང་ཆུ་བོ་རྣམས། །རེས་མོས་ཚུལ་གྱིས་གྲོགས་སུ་འགྱུར། །
རྗེ་དཔོན་ངན་དང་གཡོག་ངན་པ། །གཉིས་ཀས་གཉིས་ཀ་རྒུད་བྱེད་དེ། །
རྫ་གསར་ནང་དུ་ཆུ་བླུགས་ན། །གཉིས་ཀ་ཆུད་ཟོས་བརླག་པར་འགྱུར། །
ཤེས་རློམ་དབང་ཅན་མང་བ་ཡིས། །ཡུལ་ཁམས་མདུན་གྲོས་འཇིག་འགྱུར་ཏེ། །
གཡས་གཡོན་ཀུན་ནས་ཆུ་འབུར་བའི། །ས་ལ་མཁར་ཁྱིམ་བརྟན་མི་སྲིད། །
རྗེ་འབངས་མཐུན་ན་དགྲ་སྡེ་ཡིས། །ཐུབ་དཀའ་སོ་སོར་གྱེས་ན་མིན། །
རྟ་ཡིས་བརྒལ་དཀའི་ཆུ་བོ་ཡང༌། །མང་དུ་གྱེས་ན་ལུག་ཀྱང་བགྲོད། །
ཆོས་ལྡན་རྒྱལ་པོས་ཁྲལ་བསྡུས་ཀྱང༌། །དེ་ཉིད་ཀྱིས་ནི་འབངས་རྣམས་སྐྱོང༌། །
སྤྲིན་ཆེན་རྒྱ་མཚོའི་ཆུ་དྲངས་ཏེ། །དལ་གྱིས་འབེབས་པས་འཛིན་མ་སྐྱོང༌། །
རྒྱལ་ངན་འབངས་ཀྱི་ཟས་ནོར་ཀུན། །འཕྲོགས་ཀྱང་ད་དུང་ལྟོགས་ཤིང་བཀྲེན། །
རྒོད་མ་ཁ་ཡིས་རྒྱ་མཚོའི་ཆུ། །འཐུངས་ཀྱིན་རྟག་ཏུ་འབར་དང་མཚུངས། །
གཙོ་བོ་ངན་པ་རྟག་བཀུར་ཡང༌། །གསུག་དང་བྲལ་བ་ཙམ་གྱིས་སྡང༌། །
ཆུ་བོ་ཉིན་ཞག་མང་བསྐོལ་ཡང༌། །མེ་དང་བྲལ་བའི་མོད་ལ་གྲང༌། །
ཁེངས་དྲེགས་གདུག་རྩུབ་ཆེ་བ་ཡི། །དཔོན་ལ་སུ་ཡང་བརྟེན་མི་སྤྲོ། །
ཤིན་ཏུ་འཁྲུགས་པའི་རྦ་ཀློང་དུ། །ཉ་ལ་སོགས་པ་སྡོད་མི་བྱེད། །
བརྩེ་ཞིང་ཕན་གདགས་ནུས་པ་དེར། །སྐྱེ་བོ་ཐམས་ཅད་ངང་གིས་འདུ། །
ཡིད་བཞིན་གྱི་ནི་རྒྱ་མཚོའི་ངོགས། །འགྲོ་བ་ཀུན་གྱིས་བསྟེན་པར་བྱེད། །
ཆེ་མཐོ་བསྟེན་པས་དཔལ་ཐོབ་ཀྱང༌། །དེ་ལས་ལྷག་པའི་འཇིགས་པ་འབྱུང༌། །
རྒྱ་མཚོ་རིན་ཆེན་འབྱུང་གནས་དེ། །གདུག་ཅན་ན་ཀྲའི་གྲོང་ཡང་ཡིན། །
རྒྱུས་མེད་མི་ལ་གསར་འགྲོགས་ཀྱིས། །ཡིད་བརྟན་བྱེད་པ་ཉམས་པའི་རྒྱུ། །
རྒྱལ་སྲས་ངང་པའི་སྡེ་དཔོན་ཡང༌། །མཚོ་གསར་བརྟེན་པས་རྙི་ཡིས་ཟིན། །
རྣ་བ་སྲབ་པའི་མཛའ་གཅུགས་དེ། །རིང་མིན་དབྱིན་གྱིས་སོ་སེར་གཏོང༌། །
ཆུ་དང་འོ་མ་རོ་གཅིག་ཏུ། །འདྲེས་པ་ངང་པའི་མཆུ་ཡིས་འབྱེད། །
མཁས་པས་བདེན་བརྫུན་བརྟག་ནས་བྱེད། །བླུན་པོ་གྲགས་པའི་རྗེས་སུ་རྒྱུགས། །
ཆུ་ནང་ཅལ་གྱི་སྒྲ་བསྒྲགས་པས། །གཅན་གཟན་རི་དྭགས་ཕལ་ཆེར་བྲོས། །
འགྲོགས་ན་ལེགས་སྤྱོད་འཕེལ་འགྲིབ་ལས། །དགེ་དང་སྡིག་པའི་གྲོགས་འགྱུར་ཏེ། །
དྭངས་བསིལ་འདྲ་ཡང་ཕན་གནོད་ལས། །སྨན་གྱི་ཆུ་དང་དུག་ཆུར་འཇོག །
སྡིག་གྲོགས་གཡེམ་མའི་འཛུམ་དཀར་ལས། །ཤ་ཚའི་གདུག་རྩུབ་ཁྲོ་གཉེར་བཟང༌། །
ཐན་ཁྱེར་སྤྲིན་གྱི་མདོག་དཀར་ཡང༌། །ཆུ་ལྡན་སྤྲིན་ནག་ཞིང་པའི་གསོས། །
བློ་ལྡན་རང་བཞིན་བཟང་པོ་དེ། །མཆོག་དམན་བར་མ་ཀུན་གྱིས་བསྟེན། །
འཇུག་ངོགས་བདེ་བའི་རྫིང་བུ་ལ། །སྐྱེ་བོ་ཐམས་ཅད་དགའ་ཞིང་འཇུག །
ཁེངས་དྲེགས་སྤྱོད་པ་རྩིང་པ་ལ། །དོན་མེད་རྣམས་ཀྱང་དགྲ་རུ་ལྡང༌། །
རྒྱགས་ཤིང་འཕྱར་བའི་གང་གཱ་མ། །ཛ་ཧུ་ཁྲོས་པས་ཧུབ་ཀྱིས་བཏུངས། །
ཉམ་ཆུང་སྟེང་དུ་དཔའ་ཐལ་ན། །ཉམ་ངའི་གཡང་དུ་ལྷུང་བར་འགྱུར། །
ཆུ་ལ་རྐྱལ་གྱིས་དྲེགས་པའི་ཉ། །སྐམ་ལ་ཡར་ན་འཆི་བར་འགྱུར། །
རིགས་ངན་ཅུང་ཟད་འབྱོར་ན་ཡང༌། །རྒྱལ་པོ་ལྟ་བུའི་ཁེངས་དྲེགས་འཛིན། །
གཅོང་རོང་དོག་མོའི་ཆུ་ཕྲན་དེ། །འུར་སྒྲ་རྒྱ་མཚོའི་རྦ་ཀློང་འདྲ། །
ཡངས་པའི་རྒྱལ་ཁམས་མ་མཐོང་བ། །ས་མཐའི་བླུན་པོ་རང་མཐོང་ཆེ། །
ཁྲོན་པའི་ཆུ་ལ་འགྱིངས་པ་ཡི། །རུས་སྦལ་རྒྱ་མཚོའི་གཏམ་གྱིས་ཤི།
ཐ་ཤལ་རྣམས་ནི་མགུ་སླ་ཞིང༌། །མགུ་བའི་མོད་ལ་ཁྲེལ་ཡང་སླ། །
ཕུག་ཐག་ཐུང་བའི་ཆུ་ཕྲན་དེ། །བྲུབས་དང་བྲི་བ་ཡུད་ཙམ་ཡིན། །
མ་རབས་གཅེས་པར་བསྐྱངས་ན་ཡང༌། །དྲིན་དུ་མི་ཚོར་འཁྲུག་པར་བྱེད། །
བསིལ་བའི་ཆུ་ཡིས་བྲན་ན་ཡང༌། །རྡོ་ཞུན་ལྷག་པར་ཁོལ་ཞིང་ཚ། །
དམ་པ་རྣམས་ལ་གནོད་བྱས་ཀྱང༌། །ཁྲོ་མེད་བཟོད་པས་བདེ་བར་གནས། །
བཙོ་ཡི་སྔགས་ཀྱིས་བཏབ་པའི་ཆུ། །ཁོལ་བཞིན་པ་ཡིས་བྲན་ཀྱང་བསིལ། །
ཁྲེལ་མེད་རྣམས་ལ་ཕན་བཏགས་ཀྱང༌། །བྱ་བ་ཟིན་ན་བརྗེད་པར་འགྱུར། །
ཆུ་བོ་ཕ་རོལ་བརྒལ་བ་ན། །གྲུ་གཟིངས་ལྟོས་པ་མེད་པར་འདོར། །
མི་ངན་རེ་རེའི་བྱེད་པས་ཀྱང༌། །ཡུལ་ཁམས་ཆེན་པོ་ཕུང་བར་བྱེད། །
དྲང་སྲོང་གདུག་པ་མཆོངས་པ་ཡིས། །སི་ཏ་ཚལ་བརྒྱར་གྱེས་ཞེས་གྲགས། །
དམུ་རྒོད་སྐྱེ་བོས་སུན་ཕྱུང་རྣམས། །དམ་པ་ལ་ཡང་ཡིད་མི་ཆེས། །
ཆུ་ཟླས་བསླུས་བྱས་ངང་པ་ཡིས། །ཉི་མོའང་པད་རྩ་ཟ་མི་བྱེད། །
སྐྱེ་བོ་ངན་པ་བཅོས་ན་ཡང༌། །རྐྱེན་དང་འཕྲད་ཚེ་རང་མཚང་སྟོན། །
ཆུ་ཀླུང་འོལ་ཁ་བསྒྱུར་བ་དེ། །བྲུབས་ཚེ་སྔར་གྱི་ལམ་དུ་འགྲོ། །
དམ་པ་མཐོ་དམན་འབྱོར་རྒུད་སོགས། །ཅིས་ཀྱང་རང་བཞིན་མི་འགྱུར་ཏེ། །
ཆུ་བོ་བསིལ་ལམ་ཚ་ན་ཡང༌། །རླན་གྱི་རང་བཞིན་ག་ལ་འདོར། །
མི་བསྲུན་སྐྱེ་བོ་གདམས་པ་ལས། །ནན་ཏུར་ལས་ཀྱིས་གདུལ་བར་སླ། །
གོས་ཀྱི་དྲི་མ་འཁྲུད་པ་ལ། །གཙང་མའི་ཆུ་ལས་འགྱུར་བྱེད་བཟང༌། །
ལུས་ཅན་ནང་གི་སྐྱོན་ཡོན་རྣམས། །ཕྱི་རོལ་སྤྱོད་པས་མཚོན་ནུས་ཏེ། །
ཆུ་སྐྱ་ལྡིང་བས་ཆུ་བོ་དང༌། །དུ་བ་ལས་ནི་མེར་ཤེས་བཞིན། །
གཞན་གྱི་སྐྱོན་ཡོན་མཐོང་སླ་ཡང༌། །རང་གི་སྤྱོད་ཚུལ་མཐོང་བར་དཀའ། །
མཚོ་ནང་ནམ་མཁའི་ཟླ་སྐར་ཀུན། །གསལ་ཡང་རང་གི་གཏིང་མི་མཐོང༌། །
བསམ་ངན་གཡོ་སྒྱུའི་བྱ་བ་ནི། །ལམ་རྒྱུག་འདྲ་ཡང་ཕུགས་སུ་ཕུང༌། །
ཆུ་ཀླུང་གྱ་གྱུར་བགྲོད་པ་ཡང༌། །བབས་ཀྱིན་ཐུར་ནས་ཐུར་དུ་འགྲོ། །
རིཌ་བརྒྱུད་ཟད་འདོད་བུ་ངན་སྐྱེ། །བསོད་ནམས་ཟད་འདོད་བསམ་ངན་འཆར། །
རང་ཉིད་བརླག་འདོད་རིག་པ་རྒོད། །ཆུ་མིག་སྐམ་འདོད་སྙིཌ་མ་མང༌། །
བླུན་པོས་ངལ་བརྒྱས་བསྒྲུབས་ན་ཡང༌། །གྲགས་པ་བློ་ལྡན་གཞན་གྱིས་འཁྱེར། །
རི་ལས་སྐྱེས་པའི་པདྨ་ཡང༌། །སྐྱེས་པའི་གྲཌ་པ་ཆུ་ཡིས་འཐོབ། །
ལུང་རྟོགས་ཡོན་ཏན་མི་ལྡན་ཡང༌། །དམ་པར་སྒྲོག་པས་སྐྱེ་བོ་བསླུ། །
སྦྲང་ཆར་བཅུད་དང་བྲལ་བ་ཡིས། །ཐན་འཁྱེར་སྤྲིན་གྱི་འབྲུག་སྒྲ་བཞིན། །
སྙིགས་དུས་རང་བྱུང་ཀུན་མཁྱེན་རྣམས། །སྦྱངས་ཚེ་ཕལ་པ་ལས་ཀྱང་རྟུལ། །
རང་བྱུང་ཆུ་ཚན་སྔར་ཚ་ཡང༌། །བསྐོལ་ན་ཆུ་གྲང་རྗེས་སུ་འཁོལ། །
དྲེད་པོ་ཁ་ཡི་ཆོས་བཤད་མཁན། །ཤེས་རྒྱུད་གདོལ་པ་ལས་ཀྱང་ཐུ། །
དགུན་དུས་རླངས་པ་ན་བུན་བཞིན། །འཐིབས་པའི་ཀློང་དེ་ལྷག་པར་གྲང༌། །
དམ་པའི་སྐྱེ་བོ་ཉམས་ཐག་ཀྱང༌། །ཆོས་དང་འགལ་བའི་ལས་མི་བྱེད། །
ཆར་འདོད་བྱིའུ་སྐོམ་ན་ཡང༌། །ས་ལ་བབས་པའི་ཆུ་མི་འཐུང༌། །
དགེ་སྦྱོར་བརྩོན་པར་འདོད་པ་དང༌། །ལོག་པའི་འཚོ་བ་སྒྲུབ་པ་འགལ། །
མེ་ཏོག་སྐྱེ་བར་འདོད་པ་ཡིས། །ཆུ་ཚན་བླུགས་ན་ཕན་འགྱུར་རམ། །
ཆེན་པོ་རེ་ཞིག་རྒུད་ན་ཡང༌། །སླད་ནས་གཟི་བྱིན་རྒྱས་པར་འགྱུར། །
འཁྱག་པའི་སྦུབས་སུ་ཚུད་པའི་ཆུ། །སོས་ཀ་རིམ་གྱིས་འཕྱུར་ནས་འོང༌། །
བློ་དང་རྩོལ་བ་ཞན་པའི་མིས། །ཕུན་ཚོགས་ཐོབ་ཀྱང་མོད་ལ་འགྲིབ། །
རྫིང་ཆུང་ལྟག་ཆུ་ཆུད་པ་དེ། །གང་ཡང་མྱུར་དུ་སྐམ་པར་འགྱུར། །
ནོར་མེད་མཆོར་དང་ཁ་ཞིམ་འདོད། །གཞུང་ལུཌ་མ་སྦྱངས་མཁས་ཁུར་འཛིན། །
ཆུ་རྐྱལ་མི་ཤེས་མཚོར་བརྒལ་བ། །བསམ་བཞིན་རང་སྡུག་ཉོས་པ་ཡོན། །
མངའ་ཐང་བློ་རྒྱ་སྐྱེད་ཆེས་པས། །བསོད་ནམས་ཚད་ལས་འགོང་མི་རུང༌། །
མཚོ་ཆུང་རང་གི་ཁྲོན་པ་ཡི། །ཚད་ལས་རྒྱས་ན་བོ་བར་འགྱུར། །
དེན་ཆེན་ཐོག་ཏུ་མ་བབས་པའི། །དུས་ནས་ཐབས་དང་རིམ་གྲོ་བྱ། །
ཆུ་ལོན་སྔར་ནས་མ་བརྩིགས་ན། །བྲུབས་ཀས་འོལ་ཁ་བསྒྱུར་བ་དཀའ། །
དོན་མེད་ལས་ལ་ཕོད་བཙུགས་ནས། །རང་ཉིད་ཉམས་བྱེད་དཔའ་བོ་མིན། །
ཆུ་ཡི་ནང་གི་གཟུགས་བརྙན་ལ། །མཆོགས་པས་སེང་གི་ཤི་དང་མཚུངས། །
དགྲ་བོ་འདུལ་བར་འདོད་ན་ཡང༌། །སྤྱོད་ཚུལ་དལ་ཞིང་འཇམ་པར་བྱ། །
ཆུ་སྐྱར་འཇབ་ཅིང་འགྲོ་བ་ཡིས། །ཉ་ལ་སོགས་པ་འཛིན་ལ་ལྟོས། །
གཞན་གྱི་འབྱོར་པ་ལ་སྡང་བས། །རང་གི་བསོད་ནམས་ཉམས་པར་ཟད། །
ཆུ་ཀླུང་དྲག་པོར་མཆོངས་པ་ན། །བདག་ཉིད་འཆི་ཡི་དེར་མི་གནོད། །
དེ་བས་དགྲ་ལས་རྒྱལ་འདོད་ན། །ཡོན་ཏན་བསྒྲུབ་ལ་འབད་པར་བྱ། །
ཆུ་བོ་ཆེ་ལ་བརྒལ་བའི་ཐབས། །ཐང་ནས་གྲུ་གཟིངས་འཆོས་པ་ཡིན། །
རང་ལས་བསོད་ནམས་མ་ཉམས་ན། །དགྲ་བོ་ཁོ་ནས་མི་ཐུབ་སྟེ། །
ཆུ་མིག་རང་ཉིད་མ་སྐམ་པར། །ས་ཡིས་མནན་ཀྱང་འགོག་ནི་ནུས། །
དབུལ་ཕྱུག་དར་རྒུད་མཐོ་དམན་ཀུན། །སྔོན་སྤྱོད་ལས་ཀྱི་གོ་རིམ་སྟེ། །
ཆུ་ཡི་དཀྱིལ་འཁོར་བསྲུབས་པ་ལས། །རི་གླིང་ཁོར་ཡུག་རིམ་པར་ཆགས། །
མཁས་པ་ཕལ་ཆེར་དབུལ་འགྱུར་ལ། །བླུན་པོའི་སྐྱེ་བོ་ནོར་གྱིས་ཕྱུག །
རྙོག་མ་ཅན་གྱི་ཆུ་བོ་ལ། །སྦལ་ལྕོང་འབུ་སྲིན་ལྷག་པར་མང༌། །
བརྒྱ་ཡི་ནང་ནས་དཔའ་བོ་དང༌། །སྟོང་གི་ནང་ནས་མཁས་པ་སྟེ། །
མ་དྲོས་མཚོ་ལས་ཆུ་གསེར་དང༌། །རྒྱ་མཚོ་ཆེ་ལས་ནོར་བུ་འབྱུང༌།
བློ་དང་མི་ལྡན་སྐྱེ་བོ་ཡིས། །འབྱོར་པ་རྙེད་ཀྱང་སྤྱོད་མི་ཤེས། །
ཁྱི་ནི་སྐོམ་ཡང་ཆུ་ཀླུང་ལ། །ཧུབ་ཀྱིས་མི་འཐུང་ལྡག་པར་བྱེད། །
རང་གཞན་སུ་ལའང་མི་ཕན་པའི། །ནོར་དེ་མེད་པ་ཉིད་དང་མཚུངས། །
ཆུ་མེད་ས་གཞི་རྒྱ་ཆེ་ཡང༌། །མྱ་ངན་ཐང་ཞེས་ཀུན་གྱིས་འདོར། །
ལོངས་སྤྱོད་སྤེལ་བར་འདོད་པས་ཀྱང༌། །ཅུང་ཟད་གཏོང་ཚུལ་ཤེས་དགོས་ཏེ། །
ཁྲོན་ཆུ་བཅུས་ན་འཕེལ་འགྱུར་ཞིང༌། །བཞག་ན་སྙིགས་མས་སྐམ་པར་འགྱུར། །
བླུན་རྨོངས་འབྱོར་པ་རྒྱ་ཆེ་ཡང༌། །སྡུག་བསྔལ་རྒྱུ་ལས་མ་འདས་ཏེ། །
གསེར་རིའི་བར་གྱི་རོལ་མཚོ་རྣམས། །རྟག་ཏུ་མུན་པའི་སྨག་གིས་ནོན། །
འབྱོར་ལྡན་བསོད་ནམས་གསོག་དགོས་ཏེ། །བསོད་ནམས་ཉམས་ན་རྒུད་པར་སླ། །
ལྗོན་ཤིང་ཡལ་ག་རྒྱ་ཆེ་ཡང༌། །ཆུ་དང་བྲལ་ན་སྐམ་པར་འགྱུར། །
བསོད་ནམས་མཐུ་དང་དགེ་བའི་བློ། །ཕན་ཚུན་རྒྱུར་གྱུར་སྐལ་བ་བཟང༌། །
ཆུ་ཡིས་ཆར་དང་ཆར་གྱིས་ཆུ། །རྒྱས་བྱེད་རེས་མོས་གྲོགས་སུ་འགྱུར། །
ཁ་བཤད་མང་ངམ་ཉུང་ཡང་རུང༌། །དགོས་དོན་ལག་ཏུ་བླང་ན་གོ །
ཆུ་ཞེང་ཆེ་ཆུང་ཅི་འདྲ་ཡང༌། །ཟབ་དང་མི་ཟབ་བརྒལ་ན་ཤེས། །
ལེགས་བྱས་སྲོལ་འབྱེད་མཁས་ཕ་སྟེ། །དེ་ཡི་རྗེས་སུ་འཇུག་པ་སླ། །
ཅང་ཤེས་རྟ་ཡིས་རབ་བརྒལ་བའི། །ཕྱི་བཞིན་ཁྱི་ཡང་འབྲང་བར་བྱེད། །
མཁས་པ་ཀུན་ལ་སྙོམས་ལྡན་ཞིང༌། །ཕྱོགས་རེའི་མིག་ཅན་ཆགས་སྡང་ཆེ། །
བུམ་པ་གང་བ་བཀུར་བར་སླ། །ཕྱེད་ཙམ་གང་བ་ཡོ་འཁྱོམ་མང༌། །
བསམ་ཚད་ཁ་རུ་འདོན་པ་དེར། །གཏད་སོ་མེད་ཅེས་ཀུན་གྱིས་བརྙས། །
ཤག་ཤག་འབབ་པའི་ཆུ་བོ་ལ། །བྱིས་པ་རྣམས་ཀྱང་བརྒལ་བར་བྱེད། །
ཁ་ཉུང་བཞིན་འཛུམ་གནད་ཕིགས་པ། །དེ་ལ་ཀུན་གྱིས་བག་ཟོན་བྱེད། །
སྒྲ་མེད་མེར་གྱིས་འགྲོ་བ་ཡི། །ཆུ་ཀླུང་གཏིང་མཐའ་དཔོག་པར་དཀའ། །
ཆུ་ལ་རི་མོ་བྲིས་པ་བཞིན། །སྡིག་སེམས་མོད་ལ་འདོར་བྱ་ཞིང༌། །
དགེ་བའི་དམ་བཅའ་རྡོ་བ་ཡི། །རི་མོ་བཞིན་དུ་བརྟན་པར་བྱ། །
བསམ་པ་བཟང་ན་འཇིག་རྟེན་གྱི། །བྱ་བ་ཀུན་ཀྱང་ཆོས་སུ་འགྲོ །
ཟོ་ཆུན་ལ་བརྟེན་འོབས་ཀྱི་ཆུ། །ཤིན་ཏུ་མཐོ་བའི་རི་རྩེར་འགྲོ །
གཙོ་བོ་ལས་འབྲས་དཀོན་མཆོག་ལ། །བློ་ཕུགས་གཏད་ན་ཅི་བསམ་འགྲུབ། །
ལྷ་ཡི་རྒྱལ་པོས་ཆར་ཕབ་ན། །ལོ་ཏོག་ཕུན་སུམ་ཚོགས་པར་འགྱུར། །
འཇིག་རྟེན་ཚངས་པའི་རལ་ཀློང་དུ། །འཁྱམས་པའི་ས་རྒ་མཐར་སོན་ཏེ། །
སྒྲིབ་གཉིས་དྲི་མ་འཁྲུད་པའི་ཕྱིར། །དམ་པའི་ཆོས་ཀྱི་ལམ་དུ་འདྲེན། །
ཆུ་རིགས་བདུན་ལས་མཆོག་འགྱུར་བའི། །ཆུ་འགོ་གངས་ལ་ཐུག་པ་བཞིན། །
ཆོས་ཀྱང་འཁྲུལ་བྲལ་མ་ནོར་བ། །རྒྱལ་བའི་བཀའ་ལས་འབྱུང་བ་དགོས། །
དེ་ནས་ཟབ་རྒྱས་ཉམས་ལེན་གྱི། །ལམ་གསུམ་རིམ་པར་འབབ་པ་ཡི། །
གདམས་ངག་ཚང་ལ་མ་ནོར་བ། །སྐལ་བཟང་རྣམ་སད་མཆོད་ཡོན་ཡིན། །
འོན་ཀྱང་དུས་ཀྱིས་ཆེར་སྙིགས་ཚེ། །འཇམ་དབྱངས་བླ་མས་གསལ་མཛད་དེ། །
རྒྱ་མཚོར་བྱིངས་པའི་རིག་བྱེད་བཞི། །ཉ་ཡི་གཟུགས་ཀྱིས་བཏོན་པ་བཞིན། །
འདི་འདྲའི་བསྟན་དང་མཇལ་བཞིན་དུ། །ལྟར་སྣང་ལམ་ལ་སུ་ཞིག་འཇུག །
ལྷ་ཡི་ཆུ་བོ་གང་གཱའི་རྩར། །བ་ཚྭའི་ཁྲོན་པ་སུ་ཞིག་བརྐོ། །
བློ་ཆུང་སྐལ་དམན་ཟབ་ཟབ་ཀྱི། །གྲགས་པས་བསླུས་ནས་ལོག་པར་འགྲོ། །
སྨིག་རྒྱུ་ཆུ་རུ་འཁྲུལ་བ་ཡི། །རེདྭགས་དོན་མེད་སྡུག་བསྔལ་མྱོང༌། །
ཆོས་ཀྱི་ལམ་དུ་འཇུག་པ་ལ། །དང་པོ་དགེ་བའི་བཤེས་གཉེན་བསྟེན། །
རྒྱ་མཚོར་བགྲོད་འདོད་བྱ་བའི་འགོར། །དེད་དཔོན་མཁས་པ་འཚོལ་བ་ཡིན། །
འཇིག་རྟེན་འཇིག་རྟེན་འདས་པ་ཡི། །དགེ་ལེགས་རྩ་བ་བླ་མ་སྟེ། །
འཛམ་གླིང་རྩི་ཤིང་ལོ་འབྲས་ཀུན། །མ་དྲོས་མཚོ་གནས་ཀླུ་ཡིན་དྲིན། །
ང་རྒྱལ་སྤངས་ཏེ་ཞི་དུལ་གྱིས། །དམ་ཆོས་སྣོད་དུ་རུང་བར་བྱ། །
ཆུ་བོ་སྒང་དུ་མི་གནས་པར། །དམའ་བའི་གཤོང་དུ་འཁྱིལ་བར་འགྱུར། །
ཆོས་ཀུན་ཅིག་ཅར་མི་ཤེས་ཀྱང༌། །ཅི་ཙམ་ཤེས་བཞིན་དོན་དུ་འགྱུར། །
ཆུ་ཀླུང་རྫོགས་པར་མ་འཐུངས་ཀྱང༌། །ཅི་ཙམ་བཏུངས་པས་སྐོམ་པ་སེལ། །
ཐོས་མང་ཉམས་སུ་མ་བླངས་ན། །རང་གི་རྒྱུད་ལ་མི་ཕན་ཏེ། །
ཆུ་ནང་ལོ་བརྒྱར་གནས་པ་ཡི། །རྡོ་བའི་རང་བཞིན་སྐམ་པོར་གནས། །
སྟོང་རྐྱལ་གོམས་པའི་རིམ་པ་ཡིས། །རྟག་འཇུ་རེས་འཇུ་མི་འཇུ་ལྟར། །
ཐོས་བསམ་སྒོམ་པ་སྒྲ་སྤྱི་ལ། །བརྟེན་པའི་ཚུལ་ཡང་གསུམ་དུ་གསུངས། །
མི་ཡི་གྲུ་གཟིངས་རྙེད་དུས་འདིར། །ཐོས་བསམ་སྒོམ་པའི་བ་དན་ལ། །
བརྟེན་ནས་སྲིད་མཚོ་བརྒལ་བར་བྱ། །གྲུ་འདི་ཕྱི་ནས་རྙེད་པར་དཀའ། །
རིགས་དྲུག་སྐྱེ་སྒོ་མཐའ་ཡང་ཀྱང༌། །དལ་བརྒྱད་ཚང་བ་ཤིན་ཏུ་དཀོན། །
ཆུ་བོ་གྲངས་མེད་འབབ་ན་ཡང༌། །ཡན་ལག་བརྒྱད་ལྡན་རེ་རེ་ཙམ། །
སྐྱེས་པའི་སྐད་ཅིག་དེ་ཉིད་ནས། །མི་སྡོད་འཆི་བདག་ཁར་ཕྱོགས་ཏེ། །
ཆུ་ཀླུང་སྐད་ཅིག་རེ་རེ་བཞིན། །ཕྱིར་མི་ལྡོག་པར་རྒྱ་མཚོར་འགྲོ །
མི་རྟག་སྲིན་པོས་བཟུང་བཞིན་དུ། །སོས་བདེར་སྡོད་པ་ག་ལ་རིགས། །
ཆུ་སྲིན་མཆེ་བའི་ཕྲག་གནས་ལ། །བདེ་བའི་གོ་སྐབས་ནམ་ཡང་མེད། །
བསྒྲུབས་ཀྱང་ཕ་མཐར་ཕྱིན་མེད་པའི། །འཇིག་རྟེན་བྱ་བ་བཙན་ཆོད་བྱ། །
ཆུ་གཉེར་གཅིག་རྗེས་གཉིས་ནོན་ཏེ། །ཅི་ཙམ་བདས་ཀྱང་ཟིན་དུས་མེད། །
བློ་རིག་སྟོབས་དང་རྩལ་ཆེ་ཡང༌། །དུས་ཀྱི་ཕོ་ཉས་དབང་མེད་འཆིང༌། །
ཆུ་ཆེན་རླབས་ཀྱིས་གར་མཁན་མ། །དགུན་དུས་འཁྱག་པའི་སྦུབས་སུ་ཚུད། །
སྒོ་གསུམ་མི་དགེའི་སྤྱོད་ཚུལ་འདིས། །ཕྱི་མའི་སྐྱེ་བ་ངན་འགྲོར་ངེས། །
རི་བོའི་ཟོམ་ནས་འབབ་པའི་ཆུ། །གཡང་ས་བརྒྱུད་མར་བརྡབ་ཅིང་འཕྱོ། །
དེ་ནས་ལོ་གྲངས་བྱེ་བ་བརྒྱར། །བསྲེགས་ཤིང་འཚེད་ཀྱང་འཆི་མེ་ནུས། །
རྡོ་སོལ་རི་ལ་ཆར་གྱི་རྒྱུན། །བབ་པ་བསྐལ་པའི་བར་དུ་འཁོལ། །
འཇིགས་ཆེན་དེ་ལས་སྐྱོབ་པའི་སྐྱབས། །བསླུ་མེད་དཀོན་མཆོག་གསུམ་ལས་མེད། །
ཆུ་བོའི་རྒྱུན་གྱིས་ཁྱེར་བ་དེ། །སྒྲོལ་བྱེད་མཉན་པ་ཁོ་ནར་ངེས། །
མཆོག་གསུམ་བྱིན་རླབས་མཐའ་ཡས་ཀྱང༌། །དད་པ་མེད་ན་ཇི་ལྟར་སྐྱོབ། །
རྒྱ་མཚོ་ཆེ་ཡང་ཆར་སྡོད་ཀྱི། །བྱིའུའི་སྐོམ་པ་སེལ་མི་ནུས། །
འཁོར་བའི་འདམ་ལས་མ་བརྒལ་བའི། །འཇིག་རྟེན་པ་ལ་བརྟེན་མི་བྱ། །
ཆུས་ཁྱེར་ཆུ་ཡིས་ཁྱེར་བ་ལ། །འཇུས་ན་གཉིས་ཀ་བྱིང་བར་འགྱུར། །
མཆོག་གསུམ་བསྟེན་ན་དེ་ཡི་ཁྲིམས། །ལས་འབྲས་བླང་དོར་འབད་པ་གཅེས། །
དེད་དཔོན་བསྟེན་ཀྱང་གྲུ་གཟིངས་སུ། །མི་སྡོད་དེ་ཉིད་ཇི་ལྟར་སྒྲོལ། །
སྣོད་བཅུད་བདེ་སྡུག་སྣང་བ་ཀུན། །འཁྲུལ་མེད་སྔོན་བསགས་ལས་ལས་འབྱུང༌། །
ཆུ་ཕོར་གང་ཡང་འགྲོ་བ་བཞིར། །སྣང་ཚུལ་ཐ་དད་འབྱུང་བར་གསུངས། །
དགེ་དང་མི་དགེ་ཆུང་ངུ་ནས། །བསགས་པས་ཤེས་རྒྱུད་གང་འགྱུར་ཏེ། །
ཆར་གྱི་ཐིགས་པ་བསགས་པས་ཀྱང༌། །མཐའ་ཀླས་ཆུ་ཡི་དཀྱིལ་འཁོར་ཆགས། །
གནས་སྐབས་དགེ་བ་ལྟར་སྣང་ཡང༌། །བསྔོ་དང་འདུན་པས་བསླད་པ་མང༌། །
མཆོག་ཏུ་མངར་བ་གང་གཱའི་ཆུ། །རྒྱ་མཚོར་འདྲེས་ན་ཁ་བར་འགྱུར། །
རྨོངས་པ་མུན་ནག་གིས་ལྡོངས་ཤིང༌། །ལས་ཀྱི་ཞགས་པས་བཅིངས་པ་རྣམས། །
སྲེད་པའི་ཀླུང་གིས་རབ་དྲངས་ཏེ། །མི་ཟད་སྐྱེ་བའི་རྒྱ་མཚོར་འགྲོ། །
འདོད་པ་ལན་ཚྭའི་ཆུ་བོ་ནི། །ཅི་ཙམ་སྤྱང་ཀྱང་མི་ངོམས་པས། །
ཆུ་མཆོར་འཁྱགས་པའི་ངང་པ་ལྟར། །སྲིད་ལས་ངེས་འབྱུང་སྐྱོ་ཤས་སྐྱེད། །
ལས་ཉོན་ན་ཀྲས་ཡོངས་གང་བ། །སྡུག་བསྔལ་འཁོར་བའི་རྒྱ་མཚོ་ལས། །
སྒྲོལ་བྱེད་བསླབ་གསུམ་གྲུ་བོ་ཆེ། །བཟུངས་ནས་ཐར་པའི་གླིང་དུ་གཤེགས། །
ཁྱད་པར་ཁས་བླངས་ཚུལ་ཁྲིམས་ནི། །ཉེས་ལྟུང་དྲི་མས་མ་སྦགས་པ། །
རྒྱ་མཚོ་རེ་དང་མི་འགྲོགས་ལྟར། །རྟག་ཏུ་དྲན་ཤེས་བརྟན་པོས་སྲུངས། །
འོན་ཀྱང་མ་རྒན་སེམས་ཅན་རྣམས། །དོར་ནས་རང་དོན་བྱར་མི་འོས། །
རྒྱ་མཚོའི་གླིང་དུ་གཉེན་བཤེས་ཀུན། །བོར་བ་དེད་དཔོན་སྤྱོད་ཚུལ་མིན། །
མཚོར་གནས་གཡོ་དང་མི་བདེན་པའི། །ཁྱད་པར་གསུམ་ལྡན་ཆུ་ཟླ་ལྟའི། །
འགྲོ་ལ་སྙིང་རྗེ་རྣམ་གསུམ་གྱིས། །ཐེག་ཆེན་ལམ་གྱི་སྲོག་རྩ་ཚུགས། །
བྱང་ཆུབ་སེམས་ཀྱིས་ཟིན་པའི་དགེ །མི་ཟད་བྱང་ཆེན་རྒྱུར་འགྲོ་སྟེ། །
འཛམ་བུའི་འབྲས་བུ་མ་དྲོས་མཚོར། །ལྷུང་བའི་གསེར་སྦྱངས་ཁམས་སུ་འགྱུར། །
རྒྱལ་སྲས་སྤྱོད་པ་མཐའ་ཀླས་ཀྱང༌། །ཕ་རོལ་ཕྱིན་པ་དྲུག་ཏུ་འདུ། །
རི་སུལ་ལ་ལུང་ཆུ་བོ་བརྒྱ། །ཟམ་འོག་གཅིག་ཏུ་འདྲིལ་བ་བཞིན། །
རྒྱལ་སྲས་རྣམས་ནི་བདོག་པ་ཀུན། །འབྲས་བཅས་གཏོང་སྟེ་སྦྱིན་པའི་མཆོག །
ཆར་གྱིས་རྩི་བཅུད་ལོ་ཏོག་ཀུན། །བསྐྱངས་ཀྱང་ལན་དང་རེ་བ་མེད། །
རྣམ་དག་ཁྲིམས་ཀྱིས་ཉེས་ལྟུང་གི །རྙོག་མ་མ་ལུས་དྲུངས་འབྱིན་ཏེ། །
ཀེ་ཏ་ཀ་འབྲས་བྱེ་མ་ཡིས། །ཆུ་བོའི་རྙོག་མ་དྭངས་པར་བྱེད། །
དགེ་ཚོགས་མ་ལུས་སྲེག་བྱེད་པའི། །ཁོང་ཁྲོའི་དགྲ་འཇོམས་བཟོད་པ་སྟེ། །
ཀུན་ཟ་འབར་བའི་མེ་ལྕེ་ནི། །གསོད་བྱེད་གཉེན་པོ་ཆུ་ཡིན་ནོ། །
རྟག་གུས་བརྩོན་པ་མ་བཏང་ན། །མི་འགྲུབ་བྱ་བ་གང་ཡང་མེད། །
ཆུ་ཐིགས་རྟག་ཏུ་འབབ་པ་ཡིས། །བྲག་གི་རི་བོ་འབིགས་ལ་ལྟོས། །
བྱིང་རྒོད་སྐྱོན་བྲལ་ཏིང་ངེ་འཛིན། །གསལ་བར་ཡོན་ཏན་ཐམས་ཅད་འཆར། །
བཻཌཱུརྱར་མེ་ལོང་ཕྱིས་འདྲ་བའི། །དྭངས་མཚོར་གཟུགས་བརྙན་ཅི་ཡང་གསལ། །
དངོས་ཀུན་སྟོང་པར་དམིགས་པ་ཡིས། །འཁོར་བའི་གདུང་བ་ཀུན་སེལ་ཏེ། །
ཆུ་ཀླུང་མཐའ་དག་ཨ་གསྟ་ཡས། །ཧུབ་ཀྱིས་གཞལ་བས་འདུད་རྩིར་འགྱུར། །
ཀླུ་སྒྲུབ་བློ་མཚོ་རྒྱ་ཆེ་བས། །དངོས་པོར་སྨྲ་རྣམས་སྤོབས་པ་འཕྲག །
རྔ་མ་གནག་གཏིང་མཐའ་མི་མངོན་པའི། །རྒྱ་མཚོས་བྱིས་པ་སྐྲག་པར་བྱེད། །
ཟབ་མོའི་དེ་ཉིད་འབྱེད་པ་ལ། །ཐོག་མར་དགག་བྱ་ངེས་དགོས་ཏེ། །
རྒྱ་མཚོར་ནོར་བུ་ལེན་པ་ལ། །འཇིགས་པ་གར་ཡོད་ཤེས་པ་གཅེས། །
གདགས་གཞི་ཕུང་སོགས་འདུས་པ་ལ། །ངའོ་སྙམ་དུ་འཁྲུལ་པ་སྟེ། །
ཀླུང་ཆེན་གདོད་ནས་བྲུབས་འདྲ་ཡང༌། །ཆུ་ཕྲན་དུ་མ་འདུས་པ་ཡིན། །
བཏགས་དོན་རིགས་པས་དཔྱད་པ་ན། །ངོ་བོས་གྲུབ་པ་འགའ་མེད་དེ། །
ཆུ་ཀླུང་ཡུར་བ་བརྒྱར་དྲངས་པའི། །ཤུལ་ན་ཟིལ་པ་ཙམ་ཡང་མེད། །
སྟོན་པས་ཇི་སྙེད་བཀའ་སྩལ་བ། །སྟོང་དང་རྟེན་འབྱུང་འདིར་འཇུག་སྟེ། །
ས་སྟེང་ཆུ་བོ་མ་ལུས་པ། །རྒྱ་མཚོ་ཆེན་པོར་གཞོལ་ཞིང་འབབ། །།
རང་རྒྱུད་སྨིན་པའི་རྒྱལ་སྲས་ཀྱིས། །བསྡུ་བ་རྣམ་བཞིས་གདུལ་བྱ་སྐྱོང༌། །
རྒྱ་མཚོར་འཇུག་མྱོང་དེད་དཔོན་གྱིས། །གཞན་ཡང་ཁྲིད་ནས་ནོར་ལ་སྦྱོར། །
རྒྱུ་ཡི་ཐེག་པའི་ལམ་རིང་ཡང༌། །གསང་སྔགས་ཐབས་ཀྱིས་མྱུར་དུ་འགྲོད། །
ཐང་དུ་འདྲེན་དཀའི་གྲུ་བོ་ཆེ། །རྒྱ་མཚོར་ཞུགས་ན་ཡུད་ཀྱིས་འགྲོ །
རྡོ་རྗེ་ཅན་གྱིས་ལེགས་གསུངས་པའི། །གསང་སྔགས་ནུས་པ་བསམ་མི་ཁྱབ། །
གདུང་བ་མ་ཞེས་བོས་པས་ཀྱང༌། །ལྷ་ཡི་ཆུ་བོ་འགུགས་པར་བྱེད། །
ཟུང་འཇུག་གདེངས་ཅན་བདག་པོའི་གནས། །རྡོ་རྗེ་ཐེག་པ་རྒྱ་མཚོ་ཆེའི། །
འཇུག་ངོགས་བདེ་བའི་འབབ་སྟེགས་ནི། །དབང་བཞི་རིན་ཆེན་ཐེམ་སྐས་ཡིན། །
འོན་ཀྱང་དངོས་གྲུབ་རྣམ་གཉིས་ཀྱི། །གཞི་རྟེན་དམ་ཚིག་སྡོམ་པ་སྟེ། །
རྩ་བ་ཆུ་མཚོ་སྐམ་གྱུར་ན། །རླབས་ཀྱི་ཕྲེང་བ་གང་ལས་འབྱུང༌། །
དེ་ཉིད་རིག་པའི་རྣལ་འབྱོར་པས། །འདོད་པ་སྤྱོད་ཀྱང་ཞེན་པ་མེད། །
ཉ་ནི་ཆུ་གཏིང་ཟབ་མོ་ན། །འགྱུ་ཡང་ཆུ་ཡིས་ཚུགས་མི་འགྱུར། །
ཆགས་སོགས་ཉོན་མོངས་ཉེས་པ་རྣམས། །ཉོན་མོངས་ལམ་བྱེད་ཉིད་ཀྱི་འཇོམས། །
རྣ་བར་ཆུ་སོན་ཆུས་འབྱིན་ཞིང༌། །མེས་འཚིག་མེ་ཡིས་གདུངས་པས་ཞི། །
བསྐྱེད་རིམ་ཕྲ་རགས་རྣལ་འབྱོར་གྱིས། །སྐྱེ་ཤི་བར་དོ་གསུམ་སྦྱོང་སྟེ། །
སྐལ་ལྡན་ཤིང་རྟའི་མཆོད་ཡོན་གྱིས། །དུག་ཅན་དྲི་མ་འཁྲུད་པ་བཞིན། །
དགའ་བཞིའི་ལྷན་སྐྱེས་བདེ་བ་ཆེས། །སྟོང་བཞིའི་ཡེ་ཤེས་རྒྱས་འགྱུར་ཏེ། །
ཆུ་བོ་རྣམ་བཞིའི་རྒྱུན་འབབ་པས། །རྟ་གདོང་མེ་ཆེན་འབར་བར་འགྱུར། །
ཕྲ་བ་གཉུག་མའི་རླུང་སེམས་ལས། །སྒྱུ་མ་ལྒ་བུའི་སྐུར་བཞེངས་པ། །
དྭངས་པའི་ཆུ་ལས་ཆུ་བུར་དང༌། །དག་པའི་མཁའ་ལས་ཆུ་འཛིན་བཞིན། །
རྩྭ་རྩེའི་ཟིལ་པ་རེ་རེར་ཡང༌། །ཟླ་བའི་གཟུགས་བརྙན་སྣང་བ་བཞིན། །
དཔེ་ཡི་རིམ་པ་རེ་རེས་ཀྱང༌། །འཁོར་འདས་ཆོས་ཀུན་མཚོན་པར་ནུས། །
ལོགས་སྤྱོད་འཁོར་ལོའི་ཆུ་གཏེར་ན། །དབྱངས་ལྡན་ངང་མོ་རྣམ་རོལ་བ། །
དེ་ཡི་ཁ་ལས་ལེགས་བཤད་ཀྱི། །རྦ་རླབས་འཁྲི་ཤིང་ཅི་ཡང་གཡོ། །
གང་ཡང་བདག་བློའི་ཆུ་གཏེར་ལས་འཁྲུངས་ལེགས་བཤད་གསར་པའི་ཟླ་བ་ནི། །
འཇིག་རྟེན་རྨོངས་པའི་མུན་འཕྲོག་སྙིང་གི་གདུངས་སེལ་བསིལ་བའི་རེག་བྱ་ཅན། །
དེ་ཡི་དགེ་བ་ས་གསུམ་རྣམ་དཀར་འོད་ཀྱི་གོས་བཟང་འཛིན་པ་དེས། །
སྐྱེ་དགུའི་ལེགས་བྱས་བློ་དང་ལྷན་ཅིག་བསྟན་པའི་ཆུ་གཏེར་རྒྱས་གྱུར་ཅིག།། །།
ཡོང་ཁུངས་དྲ་གནས་གཞན།
