བོད་ཟླ་༡༠ ཚེས་༡༥ཉིན་ནི་བོད་ཀྱི་བུད་མེད་དུས་ཆེན།

རྒྱ་གྲོལ།

     བོད་ཀྱི་བུད་མེད་ནི་བོད་ཀྱི་ས་གཞི་ཡིན། ས་གཞི་འདི་ལས་བོད་མི་རིགས་ཀྱི་འཇིག་རྟེན་གྲུབ། མི་རིགས་འདིའི་མདུན་ལམ་ཡང་མི་རིགས་འདིའི་བུད་མེད་དག་ལ་ཐུག་ཡོད་ལ། མི་རིགས་འདིའི་རྒྱུ་སྤུས་ཀྱང་མི་རིགས་འདིའི་བུད་མེད་དག་ལ་འབྲེལ་ཡོད། དེ་བས་མི་རིགས་འདིའི་བུད་མེད་དག་ཤེས་རིག་ལྡན་ཞིང་། སྙིང་སྟོབས་རྒྱས་པ། གཞན་ཕན་ལ་བརྩོན་པ་སྟེ་དཔའ་མཛངས་འཕྲུལ་གསུམ་གྱི་བུད་མེད་དུ་གསོ་ཞིང་སྐྱོང་བ་ནི་ང་ཚོ་མི་རིགས་འདིར་སེམས་ཁུར་བྱེད་པ་ཐམས་ཅད་ཀྱི་འོས་འགན་ཡིན།

     བོད་ཀྱི་བུད་མེད་ཚོས་སྤྲེལ་ཚ་གདོང་དམར་གྱི་བུ་རབས་ཚ་རྒྱུད་ཀྱི་དོན་དཀའ་སྡུག་རི་བོ་ཕྲག་ཏུ་འཁུར་ཞིང་། རྩོལ་བའི་ཆུ་རྒྱུན་རིང་མོ་ཆད་པ་མེད་པར་མདུན་དུ་སྐྱོད་བཞིན་ཡོད། ངོ་མ་བོད་ཀྱི་བུད་མེད་དག་ལ་སེམས་གཏམ་ཞིག་བཤད་ན་ཁྱོད་ཚོས་དཀའ་སྡུག་མྱངས་པ་མང་དྲགས་སོང་། དེ་བས་བུད་མེད་དག་ལ་འཚམ་འདྲིའི་སླད་དང་། བུད་མེད་དག་ལ་དགའ་སྟོན་གྱི་ཆེད་དུ་ང་ཚོས་བོད་ཟླ་བཅུ་བའི་ཚེས་བཅོ་ལྔ་དེ་བོད་ཀྱི་བུད་མེད་ཀྱི་དུས་ཆེན་ལ་གཏན་ལ་ཕབ་པ་ཡིན།

      དུས་ཆེན་འདི་ནི་སྔོན་མེད་པའི་གསར་བ་ཞིག་མིན་ཏེ། བོད་ཟླ་བཅུ་བའི་ཚེས་བཅོ་ལྔ་ནི་བོད་ཀྱི་བུད་མེད་ཁྲོད་ཀྱི་མཛངས་མ། མི་ནས་ལྷ་རུ་གྱུར་པའི་བོད་ཁམས་སྐྱོང་བའི་དཔའ་མོ། མ་ཅིག་དཔའ་ལྷ་མོའི་དུས་ཆེན་ཡིན། སྔོན་ཆད་ཉིན་མོ་འདི་བོད་ཀྱི་སྲུང་མ་ཞིག་གི་དུས་ཆེན་ཡིན་མོད།ད་ལྟ་བོད་ཀྱི་བུད་མེད་ཀྱི་དུས་ཆེན་དུ་གྱུར་འདུག ཉིན་མོ་འདིར་ལྷ་ས་ནས་མ་དང་ཆུང་མ།མཛའ་མོ་དག་ལ་བཀྲ་ཤིས་བདེ་ལེགས་དང་འཚམ་འདྲིའི་ལེགས་སྐྱེས་འབུལ་སྲོལ་ཡོད།

    ཆོལ་ཁ་གསུམ་ནི་བྲག་སྲིན་མོའི་གདུང་རྒྱུད་ཡིན་པས་ལྷ་ས་བའི་དུས་ཆེན་འདི་ཆོལ་ཁ་གསུམ་པོ་ནས་ཡོངས་སུ་སྤྱོད་འོས་པ་མཐོང་། འདི་ལ་རིག་གནས་དང་མཛའ་བརྩེ། སེམས་ཁམས་སོགས་ཕྱོགས་གང་ཐད་ནས་རིན་ཐང་ཆེ་ལ་དགེ་མཚན་ཡང་ཤིན་ཏུ་ཆེ། ང་ཚོས་དུས་ཆེན་འདིར་རོལ་བ་ལ་མི་རིགས་ཀྱི་ཁྱད་ཆོས་དམིགས་སུ་འཛིན་པ་ལས་གཞན་པའི་ལུགས་གཞན་པའི་སྲོལ་དང་འདྲེས་མི་རུང་། དེ་བས་ང་ཚོས་ལྷ་སའི་སྲོལ་བཞིན་བོད་ཀྱི་དུས་ཆེན་འདི་ལ་རོལ་བར་བྱ།

       ཉིན་མོ་འདིར་ང་ཚོས་བོད་ཀྱི་བུད་མེད་ཀྱི་བདེ་སྡུག་སྐྱོང་བའི་བརྟན་མ་བཅུ་གཉིས་དང་། ཚེ་རིང་མཆེད་ལྔ་ལ་གསོལ་མཆོད་འབུལ་བ་དང་། རང་གི་མ་དང་ཆུང་མ། གྲོགས་མོ་དང་མཛའ་མོ། བུ་མོ་དང་ལས་གྲོགས་མ་སོགས་ལ་བཀྲ་ཤིས་བདེ་ལེགས་དང་། འཚམ་འདྲི་ལེགས་སྐྱེས་འབུལ་བ། བོད་ཀྱི་བུད་མེད་རྣམས་ཀྱིས་ཀྱང་རང་གི་མི་རིགས་ཀྱི་ལྭ་བ་གྱོན་ཞིང་། བོད་ཀྱི་བུད་མེད་དང་འབྲེལ་ནས་མི་རིགས་དང་རིག་གནས་གླེང་བ། བུད་མེད་ཀྱི་ཐོབ་ཐང་གླེང་ཞིང་ཉམ་ཆུང་བདག་མེད་ཀྱི་བུད་མེད་དང་གཞན་གྱི་གཉའ་གནོན་མནར་གཅོད་མྱོང་བའི་བུད་མེད་དག་ལ་རོགས་སྐྱོར་བ་བྱེད་པ། དུས་རབས་དང་མཐུན་པར་བོད་ཀྱི་བུད་མེད་དག་གི་སྙིང་སྟོབས་དར་སྤེལ་བྱེད་དགོས་པ་བཅས་སོ།།

      ཁྱོད་ཀྱིས་བོད་ཟླ་བཅུ་བའི་ཚེས་བཅོ་ལྔ་འདི་ནི་བོད་ཀྱི་བུད་མེད་ཚོའི་དུས་ཆེན་ཡིན་པ་མ་བརྗེད། ཉིན་མོ་འདིར་ཁྱོད་མ་དང་ཆུང་། ཡང་ན་མཛའ་མོ་དང་གྲོགས་མོ་བཅས་ཀྱིས་ཁྱོད་ཀྱི་བཀྲ་ཤིས་ཁ་གཡང་དང་པོ་ལ་སྒུག་ཡོད།

ངེད་དྲ་ཚིགས།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s