__བོད་ཀྱི་སྐྱེས་མ་རྣམ་པར་བྲིས། མཛོད་དགེ་དོན་འགྲུབ། གངས་ཅན་སྐྱེས་མ། ལས་ཀྱི་རྨི་ལམ། ཚེ་ཡི་གཤོག་ཡ། རྩྭ་ཐང་གི་གཞི་དཀྱིལ་ན་རླུང་གིས་འཐག་པའི་གཡུ་སྦྲ་སྨུག་པོའི་ཆོན་ཐག་རིང་བོ་དེ། ཁྱེད་ཚོའི་ལག་རྩལ་ཡིན་འདུག རྣང་ཞིང་གི་ཚིགས་མལ་ན་རླབས་ཀྱིས་སྐྱོམ་པའི་སྙེ་མ་རི་བོའི་བང་རིམ་གཏོས་ཆེན་དེ། ཁྱེད་ཚོའི་དཀའ་སྤྱད་ཡིན་འདུག གངས་ཅན་སྐྱེས་མ། གནམ་འོག་གི་གཞིས་ཀ འཛམ་གླིང་གི་གཙུག་རྒྱན། ཁྱེད་ཚོ་ནི་མངར་ལ་ཞིམ་པའི་ཚོར་བ་ཉག་ཅིག་ཏུ་རྒྱུ། ཁྱེད་ཚོ་ནི་འོད་དུ་འཚེར་བའི་ཁ་དོག་སྣ་ཚོགས་སུ་གྲུབ། འཛམ་གླིང་རྒྱན་བྱེད་ཀྱི་དངུལ་གྱི་ཏོག་ཆེན་དེ་ཁྱེད་ཚོ་ཡིན་འདུག འཁོར་བ་འཁོར་བྱེད་ཀྱི་མུ་ཁྱུད་ཟླུམ་པོ་དེའང་ཁྱེད་ཚོ་ཡིན་འདུག གངས་ཅན་སྐྱེས་མ། མཐོ་སྒང་གི་འོད་ཀོར། གངས་འདབས་ཀྱི་མུ་ཏིག ཕོ་སྐྱེས་ཚོའི་ཚོར་བའི་འཕར་རྒྱུན་སྐྱེན་པོ་ཨ་ཅག་ཁྱེད་ཚོ་དང་འབྲེལ་ཡོད། ཕོ་སྐྱེས་ཚོའི་རུས་རྐང་གི་གཉུག་གཤིས་དྭངས་མ་ཨ་ཅག་ཁྱེད་ཚོ་དང་བསྲེས་ཡོད། གངས་ཅན་སྐྱེས་མ། ཁྱེད་ཚོ་ཡོད་པས། སྐྱེས་པ་ཚོར་དགའ་སྐྱོ་དུབ་གསུམ་གྱི་སྒང་གཤོང་མང་པོ་ཡོད། ཁྱེད་ཚོ་ཡོད་པས། སྐྱེས་པ་ཚོར་ངུ་ངག་དབྱངས་གསུམ་གྱི་འགྱུར་ཁུགས་ཟད་མཐའ་མེད། ཁྱེད་ཚོ་ཡོད་པས། སྐྱེས་པ་ཚོར་ཐོབ་ཤོར་བརྒྱལ་གཟེར་གྱི་ཚོར་བ་གཏོས་སུ་གྲུབ། གངས་ཅན་སྐྱེས་མ། གནའ་བོའི་སྒམ་ཆུང་དུ་གཅུད་པའི་ཤོག་དྲིལ་བལྟབས་མ། དེ་རིང་ས་ནག་སྟེང་བྲིས་པའི་ཡི་གེ་སྒྲོན་ལྗང་། གངས་ཅན་སྐྱེས་མ། སྲིད་པའི་མེ་སོན། འཚོ་བའི་སྙིང་བོ།...

འཇིགས་མེད་སྙིང་སྟོངས་དཔུང་ཤུགས་བཙན་པོ་ཡིས།། ཤེས་རིག་ནོར་བུའི་སློབ་གླིང་རྒྱལ་མཚན་ཆེར་བསྒྲེང་ནས།།  གངས་ལྗོངས་ཞིང་ལ་དགེ་བའི་སློབ་གླིང་ཞིག། སྐྲུན་མཛད་རིག་པའི་དཔའ་བོ་གཙུག་གིས་བསྟེན།། 　　ཅེས་ཤིས་པར་བརྗོད་པའི་མདུན་བསུས་ཏེ། གླེང་བར་བྱ་བ་ནི་སྙིང་སྟོབས་དང་ལ་རྒྱའི་ཐུགས་རྒྱུད་རབ་ཏུ་ཕྱུག་པའི་ལྷག་བསམ་ཆེན་པོ་སློབ་དཔོན་འཇིགས་མེད་རྒྱལ་མཚན་མཆོག་གི་མཛད་རྣམ་ཉུང་བསྡུས། ཁོང་གི་འཁྲུངས་ཡུལ་ནི་བོད་སྲིད་པ་ཆགས་པའི་ལྷ་འགུའི་ཡ་གྱལ་དང་། རྗེ་ཡི་མགུར་ལྷ་བཅུ་གསུམ་གྱི་ནང་ཚན། བོད་ཁ་བ་ཅན་གྱི་བླ་རི། བན་བོན་གཉིས་ཀྱི་སྲུང་མ། འཛམ་གླིང་གེ་སར་རྒྱལ་བོའི་བཀའ་སྲུང་། རིན་ཆེན་མཛོད་ཀྱི་གཏེར་སྲུང་། གྲུབ་མཐའ་རིས་མེད་ཀྱི་དགྲ་ལྷ་ཆེན་པོ་རྨ་ཆེན་གངས་ཀྱི་རི་བོ་མཛེས་ཤིང་བརྗིད་ཆགས་པ་ངོ་མཚར་དཔལ་གྱིས་ཕྱུག་པའི་ཡུལ་གྲུ། རྨ་ཀླུང་དལ་འབབ་རིང་མོའི་སྟོད་རྒྱུད་ཀྱི་མགོ་ལོག་ཁུལ་རྨ་ཆེན་རྫོང་རྟ་བོར་ཡུལ་ཚོའི་ཡབ་ཧྭ་སྐོར་བསོད་ནམས་རྒྱལ་དང་ཡུམ་ཆུ་བ་ཚེ་རིང་འཚོ་གཉིས་ཀྱི་སྲས་སུ་རབ་རྒྱལ་ཆུ་ཡོས་ ༡༩༦༣ ལོར་འཁྲུངས་ཤིང་། དགུང་ལོ་བཅུ་གཅིག་སྟེང་མགོ་ལོག་ཁུལ་མི་རིགས་དགེ་ཐོན་སློབ་གྲྭའི་སློབ་ཆུང་འཛིན་གྲྭར་ཞུགས་ཏེ་ཤེས་རིག་གི་བདུད་རྩི་བཏུང་འགོ་བརྩམས། སྐྱེས་སྟོབས་ཀྱི་ཤེས་རབ་མྱུར་བས་བོད་རྒྱ་གཉིས་ཀྱི་སྐད་ཡིག་དང་རྩིས་རིག་སོགས་ལ་སྦྱངས་འབྲས་ཆེས་བཟང་བས་མཚོ་སྔོན་མི་རིགས་སློབ་གྲྭ་ཆེན་མོའི་གྲ་སྒྲིག་འཛིན་གྲྭར་རྒྱུགས་འཕྲོད། སྔར་བཞིན་གཤིས་འཇམ་སྤྱོད་བཟང་སྒོས་བརྩོན་པ་ལྷོད་མེད་གནང་བས་དགེ་སློབ་ཡོངས་ཀྱིས་བསྔགས་བརྗོད་ཀྱི་མེ་ཏོག་འཐོར་སའི་གཞི་གཅིག་པུར་གྱུར་བར་མ་ཟད། དོན་གྱིས་ཤེས་རིག་གི་ཐུགས་རྒྱུད་རབ་ཏུ་ཕྱུག་ཏེ་མཚོ་སྔོན་མི་རིགས་སློབ་གྲྭ་ཆེན་མོར་རྒྱུགས་སྤྲོད་པར་བྲེལ་བའི་སྐབས། སྔོན་གོམས་བག་ཆགས་བཟང་བོ་ཡོངས་སུ་སད་དེ་ཁོང་གསང་སྟབས་ཀྱིས་སྐུ་འབུམ་དགོན་པར་ཕེབས་ཏེ་སྐུ་ཕྱོགས་སྐེ་ཀྱཱ་རིན་པོ་ཆེའི་མདུན་ནས་རབ་ཏུ་བྱུང་། དེ་ནས་བླ་བྲང་བཀྲ་ཤིས་འཁྱིལ་དུ་ཕེབས་ནས་བགྲང་བྱ་གསུམ་གྱི་རིང་ངེས་དོན་རིགས་པའི་དབང་ཕྱུག་ཡོངས་ཀྱི་དགེ་བའི་བཤེས་གཉེན་ཆེན་མོ་༧ རྗེ་དགེ་འདུན་རྒྱ་མཚོ་སོགས་མཁས་དབང་དུ་མའི་ཞལ་གྱི་བུམ་བཟང་ལས་ལེགས་བཤད་སྦྲང་རྩི་མངར་མོ་ངོམས་མེད་དུ་བཞེས། དྲིན་ལྡན་ཕ་མ་གཉིས་དང་ཞང་བོ་སོགས་ཀྱི་རེ་བ་བཞིན། དགུང་གྲངས་ཉེར་གསུམ་པ་ཤིང་གླང་ ༡༩༨༥ རྭ་རྒྱ་དགོན་དགའ་ལྡན་བཀྲ་ཤིས་འབྱུང་གནས་གླིང་གི་ཚོགས་གྲལ་དུ་ཞུགས་ཏེ། དགེ་བའི་བཤེས་གཉེན་ཆེན་མོ་མཁན་འོད་ཟེར་བཟང་བོ་དང་། མཁན་བཟོད་པ་རྒྱ་མཚོ། བློ་གྲོས་བཟང་བོ་སོགས་ཀྱི་ཞབས་པད་གཙུག་གིས་བསྟེན་ཏེ་བསྡུས་གྲྭ་ནས་བཟུང་དཔེ་ཁྲིད་དང་ཆོས་གྲྭར་ཆག་མེད་མཛད་ནས་རྟོག་གེ་རིག་པའི་གསང་ཚིག་ལ་ཞིབ་ཏུ་སྦྱངས། ཕྱི་ལོ་  ༡༩༨༦ ལོའི་ཟླ་ ༩ པར་མཚོ་སྔོན་ནང་བསྟན་སློབ་གླིང་དུ་རྒྱུགས་འཕྲོད་དེ། དགེ་བའི་བཤེས་གཉེན་ཆེན་མོ༧ ལྡི་ཚ་ཡེ་ཤེས་རྒྱ་མཚོ་ཚང་དང་།...

_____ཨ་མདོ་རྔ་པ་ནས་བུ་ཕྲུག་བཞི་ཅན་གྱི་ཨ་མ་ཞིག་མེ་ལ་འཐིམ་སོང་བ་དེའི་ཚབ་ཏུ། གཟུངས་ཕྱུག་སྐྱིད།      ཨ་མའི་གཅེས་ཕྲུག   མིག་ཟུང་ཕྱེས་སྟེ་ང་ལ་ཐེངས་ཤིག་ལྟོས་དང་། ཨ་མས་ཁྱེད་རང་གཏན་དུ་བསྐྱུར་ནས་ཐག་རིང་ཐག་རིང་ཞིག་ལ་འགྲོ་དགོས། གནས་དེ་ན་ལམ་ལམ་འབར་བཞིན་པའི་མེ་འོད་དྲོན་མོ་ཞིག་གི་བསུ་མ་ཡོད་ལ། ཕུ་ནུ་མིང་སྲིང་མང་པོ་ཞིག་གིས་ལོ་ཟླ་ངེས་མེད་དུ་བྲིས་པའི་ཁྲག་གི་ཞལ་ཆེམས་ཀྱང་ཡོད་པས། ཨ་མ་ཅིས་ཀྱང་བཞུད་དགོས། གནོན་མི་ཐུབ་པའི་སེམས་ཀྱི་ཚོར་བ་གསོན་པོ་འདི་ལྟར་མེ་ལ་སྒྲོན་བཞིན། འཇགས་དཀའ་བའི་ན་ཟུག་གི་རྨ་ཁ་ཟབ་མོ་འདི་ལྟར་རྣམ་ཤེས་ཀྱིས་འདེགས་བཞིན། ཐག་རིང་ཐག་རིང་ཞིག་ཏུ་འགྲོ་དགོས།      ཨ་མའི་གཅེས་ཕྲུག   ཁྱེད་ཅིས་ཀྱང་སྐྲག་མི་ཉན། ཁྱེད་ཀྱིས་རྟག་ཏུ་རྨི་ལམ་ལས་ཨ་མའི་འཛུམ་ཞལ་ལ་སྒུག་དང་། ཨ་མས་ཁྱེད་ཀྱི་མ་འོངས་པའི་མི་ཚེ་ལ་དུས་ནམ་ཡང་མཛེས་སྡུག་གི་སྨོན་ལམ་འདེབས་ཆོག་ལ། ཁྱེད་ཀྱི་ཡིད་འོང་གི་བཞིན་རས་ལ་དུས་གཏན་དུ་བྱམས་བརྩེ་ཡིས་བྱིལ་བྱིལ་བྱ་ངེས།       དེ་བས་མིག་ཆུ་ཅིས་ཀྱང་མ་གཏོང་ཨང་། འཇིག་རྟེན་སྟེང་གི་བདེ་སྡུག་ཡོད་ཚད་ནི་མིག་ཆུ་ཁོ་ནས་ཚད་འཇལ་ཐུབ་པ་ཅིག་མིན་པ་ཨ་མས་སྔོན་ནས་ཤེས་ཡོད།    སེམས་པ་མ་སྐྱོ་ཨང་། ཤི་གསོན་གྱི་གྱེས་གདུང་ནི་སྐྱོ་སྣང་གིས་ཐེག་ཐུབ་པའི་ཚོར་བ་ཞིག་དེ་བས་ཀྱང་མ་རེད་ཡ། ཞིབ་ཏུ་སོམས་དང་། འཇིག་རྟེན་སྟེང་གི་འཇིགས་སྣང་ཡོད་ཚད་འཆི་བ་ཁོ་ནས་ད་གཟོད་ཡོངས་སུ་བཟོད་ཐུབ་པ་འདྲ།     ལོ་འདི་དག་གི་ནང་དུ།...