དགུང་ལོ་༤༨ ལ་ཕེབས་པའི་ལྕམ་ལེན་ལགས་དབྱིན་ཡུལ་གྱི་ཡི་ཤུའི་ཆོས་དཔོན་དུ་འདེམས་ཐོན་བྱུང་སྟེ། ཡི་ཤུའི་ཆོས་ལུགས་ཀྱི་ལོ་རྒྱུས་ནང་བུད་མེད་ཆོས་དཔོན་ཐོག་ཆགས་ཡོད་པ་རེད། ལྕམ་ལི་བྷེ་ལེན་(Libby Lane) ལགས་ནི་དེ་སྔོན་དབྱིན་ཡུལ་གྱི་གྲོང་ཁྱེར་གྱི་ཆོས་ཚོགས་ཤིག་གི་ཆོས་དཔོན་ཡིན་ཞིང་། ཕྱི་ཟླ་༡༢ པའི་༡༧ ཉིན་དབྱིན་ཡུལ་གྱི་གྲོང་སྡེ་སི་ཀྲོག་པོ་ཊི་(Stockport) ནང་ཡི་ཤུའི་ཆོས་ལུགས་ཀྱི་ཆོས་དཔོན་དུ་བསྐོ་བཞག་བྱས་ཏེ། ཡི་ཤུའི་ལོ་རྒྱུས་ནང་བུད་མེད་ཆོས་དཔོན་ཐོག་མ་དེ་ཆགས་ཡོད་པ་དང་། ལྕམ་ལེན་ལགས་ཀྱིས་དེ་སྔར་གནས་ ཆོས་དཔོན་གྱི་ལས་རོགས་དང། དེ་བཞིན་ཆོས་ཚོགས་ཀྱི་འཛིན་སྐྱོང་དོ་དམ་པ། ཡི་ཤུའི་བུད་མེད་ཀྱི་ཞལ་ངོའི་ལས་འགན་བཅས་འཁུར་མྱོང་ཡོད་པ་རེད། ཐེངས་འདིར་ལྕམ་ལིན་ལགས་ཡི་ཤུའི་ཆོས་དཔོན་དུ་བསྐོ་བཞག་བྱས་པ་དེས། བུད་མེད་ཚོས་འདས་པའི་མི་ལོ་༢༢ རིང་ཆོས་དཔོན་གྱི་ཐོབ་ཐང་ལ་འཐབ་རྩོད་བྱས་པའི་འབྲས་བུ་མངོན་འགྱུར་བྱུང་བ་ཞིག་ཡིན་པ་མ་ཟད། ལོ་བརྒྱ་ཕྲག་མང་པོའི་རིང་ཕོ་རྒྱུད་གཅིག་པུས་ཡི་ཤུའི་དབུ་ཁྲིད་ཀྱི་གོ་གནས་བཟུང་བའི་སྲོལ་རྒྱུན་གྱི་ལམ་ལུགས་མཇུག་བསྒྲིལ་བ་ཞིག་ཀྱང་ཡིན་འདུག དེ་ཡང་རེས་གཟའ་ལྷག་པའི་ཉིན་དབྱིན་ཡུལ་གྱི་རྒྱལ་མོས་བུད་མེད་ཞིག་ལ་ཆོས་དཔོན་གྱི་གོ་གནས་ཐོབ་པར་བསྔགས་བརྗོད་དང་སྦྲགས། འོས་འདེམས་ལེགས་གྲུབ་ངོས་ལེན་ཡོད་པའི་གསལ་བསྒྲགས་སྤེལ་ཡོད་དང་། དེ་བཞིན་དབྱིན་ཡུལ་གྱི་སྲིད་བློན་ཁེ་མར་རོན་ (David Cameron) གྱིས་ཀྱང་ལྕམ་ལེན་ལགས་གྲོང་སྡེའི་ཆོས་དཔོན་དུ་བསྐོས་པར་འཚམས་འདྲི་དང་། མང་མོས་འོས་བསྡུ་དེ་ནི་ལོ་རྒྱུས་རང་བཞིན་ཅན་ཞིག་ཡིན་པ་མ་ཟད། ཕོ་མོ་ཐོབ་ཐང་འདྲ་མཉམ་གྱི་གལ་ཆེའི་ཉིན་མོ་ཞིག་ཀྱང་ཡིན་སྐོར་བརྗོད་འདུག། གསར་འགོད་པ་བསྟན་འཛིན་ཟླ་བ། ཡོང་ཁུངས་བོད་ཀྱི་བང་ཆེན།...

ཡི་དམ་ཚེ་རིང་། དོར་ཞི་གདོང་དྲུག་སྙེམས་བློས་བསྒྱུར། ༼ཀ༽ ང་རང་མི་ལུས་བླངས་པའི་འཇིག་རྟེན།། དམ་པའི་ཆོས་ཀྱིས་སྐྱོང་བའི་ཞིང་ས།། འོན་ཀྱང་ཡ་རབས་མི་ཡི་ཁྱིམ་སྒོར།། གཤིན་འདྲེའི་ངུ་སྐད་རྒྱུན་པར་ཚོར་རོ།། ཨ་མའི་རུམ་ལ་མགོ་བོ་བརྒྱབ་དུས།། ལྷ་ཡུལ་ལས་ལྷག་སྐྱིད་སྣང་འཆར་ཡང༌།། དྲིན་ཅན་མ་དེ་འོངས་པའི་ལམ་དུ།། འཇིགས་སྐྱོབ་སྒྲོལ་མར་འོ་དོད་མ་ཆད།། མགོ་བོ་ཨ་མའི་བྲང་ལ་གཏད་དེ།། ཁུ་སིམ་ཁ་རླངས་ལྷོད་པོར་བརྔུབས་ཀྱང༌།། ལག་པས་ནུ་སྟོང་འཕུར་བའི་མ་རྒན།། འཁོར་བའི་སྡུག་བསྔལ་མིག་ཆུས་འཁྲུད་དོ།། ཨ་མའི་སྙིང་གི་འཕར་སྒྲ་ཉན་ཚེ།། རྒྱང་ནས་དཀྲོལ་བའི་ཌ་དྲིལ་སྒྲ་བཞིན།། སྒྲ་དེ་སྙན་པའི་གདངས་སུ་འཕོས་ནས།། མ་སྨིན་སྙིང་གི་དཀྱིལ་ནས་བརྡོལ་ལོ།། ང་རྩེ་བཞིན་རྩེ་བཞིན་དགུང་ལ་འགྲོ།། ཕོ་ཆུང་འབྲུག་དང་ལྷན་དུ་རྩེ།། ང་རྩེ་བཞིན་རྩ་བཞིན་རྫ་ལ་འགྲོ།། འབྲོང་ཕྲུག་དག་དང་ལྷན་དུ་རྩེ།། ༼ཁ༽ ངའི་རྐང་གཉིས་ས་ལ་བབས་པའི་འཇིག་རྟེན།། རི་མཐོན་པོས་གནམ་སྔོན་འདེགས་པའི་ས་ཆ།། སྡུག་ཤུགས་རིང་ནར་ནར་འབྱིན་པའི་ཨ་མའི།། ལུས་སྒུར་བོ་གྱེན་ལ་དགྱེ་བར་མི་ནུས།། ངས་ཨ་མའི་ལག་པའི་ཕུ་རུང་འཐེན་ཚེ།། སེར་གྱི་ལིའི་ཉི་ཟེར་ལག་པས་ཟིན་འདྲ།། མ་དྲིན་ཅན་ང་ཡི་ལག་པ་བཟུང་དུས།། མའི་རེ་ལྟོས་ཡོད་དགུ་ལག་ཏུ་ཆུད་འདྲ།། ང་ཨ་མའི་རྒྱབ་ལ་འབྱར་བའི་ཚེ།། སེང་དཀར་མོ་གངས་ནས་འགྱིང་བ་འདྲ།། ངའི་ཨ་མས་ང་རང་འཁུར་བའི་ཚེ།།...