མགར་བཟའ། ཁུ་སིམ་ལྷིང་འཇགས་ཁྲོད་ན་སྡང་ཟུག་ཞིག། འུར་ཟིང་འདུ་འཛིའི་ཁྲོད་ན་དུངས་པ་ཞིག རང་སེམས་ཁད་ཀྱིས་རྨས་པའི་ན་ཟུག་གིས།། སྟོང་བའི་ཐང་ཆེན་དཀྱིལ་ལ་གླུ་ཞིག་བླངས།། རི་ཆུ་སྟོང་གི་འགག་ཕྲེང་རྔམ་ཞིང་བརྗིད།། རེ་བའི་མིག་ཟུང་དེ་ལས་རྒྱང་དུ་བསྲིངས།། གནམ་ཟླའི་དྲོད་འཁྱག་བར་གྱི་སེམས་པ་འདི།། སུ་ཡིས་མི་རྟོགས་འཆར་ཡན་ལྷགས་མ་ཞིག། ལོ་རྒྱུས་རྟགས་ཐམ་དམར་པོའི་གས་སྲུབས་ནས།། དཔའ་བོའི་ཁྲག་རྩ་དྲོན་མོ་མེ་རུ་འབར།། རི་བོ་རྨང་ནས་འགུལ་བའི་འཇིགས་སྣང་གིས།། ཕམ་ཉེས་ཉི་ནུབ་འདར་བའི་ངང་ཚུལ་མཐོང་།། ཚོར་མེད་རྡོ་ལུང་ནག་པོའི་ཁྲེལ་དགོད་ལ།། རི་ལུང་སྨྲེངས་པའི་མིག་ཆུ་འོད་དུ་འཚེར།། མི་གཟུགས་མི་ཡིས་འཆའ་བའི་དུར་ཁྲོད་ནས།། རེ་བའི་རྣམ་ཤེས་གསོན་པོ་གང་དུ་ཡལ།། ༢༠༡༤ལོའི་ཟླ་༩པའི་ཚེས་༡༨ཉིན་བྲིས། ངེད་དྲ་ཚིགས།...

འབྲོང་། འོ་མའི་ཐང་ནས་མེ་ཏོག་དམར་པོ་ཞིག། རླུང་གི་ལག་པས་བཏོགས་ཏེ་རྣ་བར་བཏགས།། ཉི་མའི་མིག་ཆུ་འཐོར་བའི་ངོས་དེ་ན།། གཡའ་མའི་མེ་ལོང་བོར་བའི་གཡུ་མོ་ཞིག།   གྲམ་གཞུང་རྐམ་པོ་དབྱར་གྱིས་བསྐྱུར་ཤུལ་ན།། ཕག་པའི་མགྲིན་གླུ་གཡང་དུ་མ་ཁུག་པའི།། ཁང་ཆུང་སྐྱ་བོས་ལྷགས་རླུང་འགམ་པ་འདིས།། སྨག་གི་ཤ་ཚིལ་ཟ་བའི་རྐན་སྒྲ་རྡེབ།།   ལྕགས་ཀྱི་ཨ་ཀྲད་རྣག་གིས་བཙེམ་པའི་ཚེ།། སླ་ངའི་མཐིལ་ནས་ཅེར་བའི་མིག་ཟུང་དེ།། བགྲེས་མོའི་བྲང་གཞུང་བཤེར་བའི་སྲོ་ཤིག་བཞིན།། གཉིད་ཀྱི་རྒྱུ་མ་བཅད་ནས་གང་དུ་ཆས།།   ལྷ་མོ་བག་མར་བསུ་བའི་སྟ་གོན་ལ།། གཏམ་གྱི་ཕོ་བྲང་བྲག་གི་ངོས་ལ་བརྩིགས།། ཟླ་བའི་སྒ་ལ་དར་གྱི་ཚོས་བཏབས་ནས།། ཐོ་རེངས་སྐར་མའི་ཕོ་ཉ་ད་སོངས་ཤིག། ༢༠༡༥ ༡  ༤ལ་འབྲོང་གིས་རྩེད་མཚར་དུ། ངེད་དྲ་ཚིགས།...