འབྲོང་།
འོ་མའི་ཐང་ནས་མེ་ཏོག་དམར་པོ་ཞིག།
རླུང་གི་ལག་པས་བཏོགས་ཏེ་རྣ་བར་བཏགས།།
ཉི་མའི་མིག་ཆུ་འཐོར་བའི་ངོས་དེ་ན།།
གཡའ་མའི་མེ་ལོང་བོར་བའི་གཡུ་མོ་ཞིག།
གྲམ་གཞུང་རྐམ་པོ་དབྱར་གྱིས་བསྐྱུར་ཤུལ་ན།།
ཕག་པའི་མགྲིན་གླུ་གཡང་དུ་མ་ཁུག་པའི།།
ཁང་ཆུང་སྐྱ་བོས་ལྷགས་རླུང་འགམ་པ་འདིས།།
སྨག་གི་ཤ་ཚིལ་ཟ་བའི་རྐན་སྒྲ་རྡེབ།།
ལྕགས་ཀྱི་ཨ་ཀྲད་རྣག་གིས་བཙེམ་པའི་ཚེ།།
སླ་ངའི་མཐིལ་ནས་ཅེར་བའི་མིག་ཟུང་དེ།།
བགྲེས་མོའི་བྲང་གཞུང་བཤེར་བའི་སྲོ་ཤིག་བཞིན།།
གཉིད་ཀྱི་རྒྱུ་མ་བཅད་ནས་གང་དུ་ཆས།།
ལྷ་མོ་བག་མར་བསུ་བའི་སྟ་གོན་ལ།།
གཏམ་གྱི་ཕོ་བྲང་བྲག་གི་ངོས་ལ་བརྩིགས།།
ཟླ་བའི་སྒ་ལ་དར་གྱི་ཚོས་བཏབས་ནས།།
ཐོ་རེངས་སྐར་མའི་ཕོ་ཉ་ད་སོངས་ཤིག།
༢༠༡༥ ༡ ༤ལ་འབྲོང་གིས་རྩེད་མཚར་དུ།
ངེད་དྲ་ཚིགས།
