བསླབ་བྱ་རིན་ཆེན་ཕྲེང་མཛེས།

པཎ་ཆེན་བློ་བཟང་ཆོས་རྒྱན།

 ༄༅། ན་མོ་གུ་རུ་མཉྫུ་གྷོ་ཥཱ་ཡ། བསླབ་བྱ་རིན་ཆེན་ཕྲེང་མཛེས་ཞེས་བྱ་བ། 

བདེ་གཤེགས་ཀུན་གྱི་སྐུ་གསུམ་གྱི། ཡེ་ཤེས་གཙང་མའི་རང་གཟུགས་ལ།

ཤཱཀྱ་སེང་གེར་མཚན་གསོལ་བའི། སྟོན་པ་མཆོག་དེས་བདག་སྐྱོངས་ཤིག

མཁྱེན་པའི་ཆ་ཤས་ཕྲ་མོས་ཀྱང་། མཁའ་ལྟར་ཡངས་པའི་ཤེས་བྱའི་ཁྱོན།

རྡུལ་ཕྲན་གོ་སར་འགོད་མཁས་པ། འཇམ་པའི་དབྱངས་ཀྱིས་དགེ་ལེགས་སྩོལ།

བདག་ལ་ཕན་འདོད་གྲོགས་རྣམས་ལ། མངོན་པར་མཐོ་དང་ངེས་ལེགས་ཀྱི།

ལམ་བཟང་མཚོན་ཕྱིར་དམ་པའི་གཞུང་། ཇི་བཞིན་འབེལ་བའི་གཏམ་འདི་གླེང་།

    དྲན་པ་ཡིས་ཀྱང་གདུང་སེལ་བ། ཁམས་གསུམ་འགྲོ་བའི་བླ་མ་དེས།

བློ་ལྡན་ཁྱིམ་ན་གནས་པས་ཀྱང་། དོན་མཆོག་བསྒྲུབ་པའི་ཐབས་འདི་གསུངས།

འདི་ཕྱིའི་ལེགས་ཚོགས་ཀུན་གྱི་གཞི། བླ་མ་མཆོག་ལ་རག་ལས་པས།

ཡོན་ཏན་བཅུ་ལྡན་དམ་པ་དེ། ལེགས་བརྟགས་ཚུལ་བཞིན་བསྟེན་པ་གཅེས།

ཉམ་ཐག་འཁོར་བར་རྒྱུ་བའི་ཚེ། བསླུ་མེད་དཀོན་མཆོག་གསུམ་པོ་ལ།

ལྷག་པའི་སྐྱབས་གཞན་མ་མཆིས་པས། སྙིང་ཁོང་རུས་པའི་གཏིང་ནས་ནི།

ཉིན་མཚན་དུས་དྲུག་སྐྱབས་འགྲོ་ཞིང་། དེ་ཡི་བསླབ་བྱའི་རིམ་པ་དང་།

དཀར་ནག་ལས་འབྲས་ལེགས་བསམ་ནས། ཕྲ་ཞིང་ཞིབ་པའི་བླང་དོར་འཚལ།

སྡིག་པ་ཆུང་ངུ་བྱས་པས་ཀྱང་། འཇིག་རྟེན་ཕ་རོལ་འཇིགས་ཆེན་དང་།

ཕུང་ཀྲོལ་ཆེན་པོ་བྱེད་འགྱུར་ཏེ། ཁོང་བར་སོང་བའི་དུག་བཞིན་ནོ།

བསོད་ནམས་ཆུང་ངུ་བྱས་པས་ཀྱང་། འཇིག་རྟེན་ཕ་རོལ་བདེ་ཆེན་འདྲེན།

དོན་ཆེན་དག་ཀྱང་བྱེད་འགྱུར་ཏེ། འབྲུ་རྣམས་ཕུན་ཚོགས་སྨིན་པ་བཞིན།

རྒྱལ་སྲས་ཞི་བ་ལྷ་ཡིས་ཀྱང་། ཡིད་ལ་བསམས་པའི་དགེ་བྱས་པས།

གང་དང་གང་དུ་འགྲོ་འགྱུར་བ། དེ་དང་དེར་ནི་བསོད་ནམས་དེས།

འབྲས་བུའི་ཡོན་གྱིས་མངོན་མཆོད་འགྱུར། སྡིག་པ་བྱང་བ་བདེ་འདོད་ཀྱང་།

གང་དང་གང་དུ་འགྲོ་འགྱུར་བ། དེ་དང་དེར་ནི་སྡིག་པ་དེས།

སྡུག་བསྔལ་མཚོན་གྱིས་རྣམ་འཇོམས་གསུངས། དཔལ་དང་ལྡན་པའི་ཁྱིམ་པ་ལ།

ཕན་པར་མཛད་པའི་བསླབ་གཞི་ལྔ། གསུངས་ཕྱིར་ཡོངས་རྫོགས་མ་ནུས་ཀྱང་།

སྣ་གཅིག་སྣ་འགའི་ཚུལ་གྱིས་བསྲུང་། ཁྱད་པར་བཟང་པོའི་དུས་རྣམས་ལ།

གསོ་སྦྱོང་ཡན་ལག་བརྒྱད་པའི་ཁྲིམས། བཞེས་ཤིག་མཐོ་རིས་འགྲོ་བ་ཡི།

ལམ་བཟང་ཟླ་དང་བྲལ་བ་ལགས། དྲང་པོའི་རང་བཞིན་གཡོ་སྒྱུ་མེད།

ཚིག་བཙུན་བདེན་པར་སྨྲ་བ་དང་། འདོད་ཆུང་ཆོག་ཤེས་དུལ་བ་ཡི།

མི་ལ་དཔལ་མགོན་ཉེ་བར་གནས། དོན་ཆེན་བྱ་བ་ཅི་བསྒྲུབ་ཀྱང་།

གྲོས་དང་འཇམ་པོའི་སྒོ་ནས་བསྒྲུབ། གྲུབ་ན་མཆོག་ཡིན་མ་གྲུབ་ཀྱང་།

སྐྱོན་དུ་མི་འགྱུར་མཛེས་པ་ཡིན། བློ་ཆུང་མགུ་སླ་ཁྲོ་བ་སྐྱེན།

གསར་འགྲོགས་ཆེ་ཞིང་ཕྱི་ཐག་ཐུང་། ངག་ནི་ཅལ་ཅོལ་ར་མ་ལུག

དེ་འདྲ་མཁས་པས་དུག་བཞིན་སྤང་། སེམས་ཅན་མོས་པ་སྣ་ཚོགས་པ།

མང་པོའི་ནང་དུ་ཕྱོགས་ཞེན་དང་། གཉེན་པོ་བསྟེན་ཕྱིར་གང་ཟག་དང་།

ཆོས་ལ་སྨོད་པ་འབྱུང་ཉེ་ཡི། དེས་ན་ལྷ་བཅས་སྟོན་པ་དེས།

ངའམ་ང་འདྲའི་གང་ཟག་གི ཚོད་བཟུང་གཞན་གྱིས་བཟུང་གྱུར་ན།

ཉམས་པར་འགྱུར་ཞེས་གསུངས་པའི་ཕྱིར། ཐལ་བས་གཡོགས་པའི་མེ་དོང་ལ།

བག་ཡོད་བསྟེན་པ་ཇི་བཞིན་དུ། རྩེད་མོ་ག་ཞའི་ཆེད་དུ་ཡང་།

བརྙས་སྨོད་ནམ་ཡང་བྱ་བ་མིན། གང་གིས་བྱང་ཆུབ་སེམས་དཔལ་ལ།

ངན་སེམས་བསྐྱེད་ན་དེ་སྙེད་ཀྱི། སྐད་ཅིག་གྲངས་མཚུངས་བསྐལ་བ་ནི།

དམྱལ་བར་གནས་ཞེས་ཐུབ་པས་གསུངས། དེ་བཞིན་འཕགས་པ་ལྷ་ཡིས་ཀྱང་།

འགྲོ་ལ་ཕན་ཕྱིར་གང་ཞིག་ལ། འཇིག་རྟེན་སྲིད་དུ་གནས་ཡོད་པ།

དེ་ལ་སོར་གནས་དག་ཕུད་ན། སྡང་ལ་བསམ་ཐག་ཅི་ཡོད་གསུངས།

དེ་བཞིན་རིགས་གཟུགས་ཐོས་པ་དང་། ལང་ཚོ་དབང་ཐང་གིས་རྒྱགས་པས།

སྒོ་གསུམ་བརླང་པོར་སྤྱོད་པ་དེ། དགྲ་ལྟར་ཀུན་ཏུ་གཟིགས་པར་མཛོད།

རྣམ་མང་སྐྱེ་བོ་འདུས་པའི་སར། དཔའ་རྩལ་ངོམ་དང་ཉམས་དགའི་ཕྱིར།

གཞན་ལ་གནོད་པའི་བསམ་སྦྱོར་དག འབྱུང་བས་བླང་དོར་ཚུལ་ལ་བརྟག

རྩྭ་ཆུ་ཙམ་གྱིས་འཚོ་བ་ཡི། བྱ་དང་རི་དྭགས་ཉ་ལ་སོགས།

མགོན་སྐྱབས་མེད་པ་འདི་རྣམས་ནི། སྙིང་རྗེར་འོས་ཤིང་གཞན་དག་ལའང་།

གནོད་འཚེ་ཆོམ་རྐུན་བྱི་བོ་བྱེད། ཚིག་རྩུབ་ཕྲ་མ་ལྕེ་གཉིས་དང་།

ངོ་ཚ་ཁྲེལ་བོར་མྱོས་འགྱུར་ལ། བག་མེད་སྤྱོད་ལས་ལྡོག་པའི་རིགས།

ཁྱོད་ཀྱིས་འབངས་འཁོར་གཞན་དག་ཀྱང་། སྙོམས་པར་བུ་བཞིན་སྐྱོང་བྱས་ན།

དེ་དག་གིས་ཀྱང་ཁྱོད་ཉིད་ལ། ཕ་བཞིན་སྙིང་ཉེ་བཀུར་བར་འགྱུར།

ཉེ་རིང་སྐྱེ་བོ་མཐའ་དག་ལ། །ཚིག་ངན་མདེའུ་རྩེ་མི་སྟོན་ཏེ།

རྣམ་སྨིན་ཕར་ཞོག་འཕྲད་དུ་ཡང་། དེ་ལན་བྲག་ཅ་བཞིན་དུ་འབྱུང་།

མངག་གཞུག་ཡིན་ཡང་ཞེན་ལྡན་པ། རྒན་ནམ་གཞོན་ཡང་བློ་ཅན་ལ།

དགྱེས་པར་མཛད་ཅིང་དེ་དག་གི ཚིག་ཀྱང་སྦྲང་རྩི་ལྟ་བུར་བཟུང་།

བརྩེ་ཞིང་གུས་པས་གཞན་དག་གིས། གསོལ་ལ་བརྙས་པར་མི་བྱ་སྟེ།

རྟ་ཡན་སྲབ་མེད་ལྟ་བུ་ལ། ཕྱིན་ཆད་ཕན་པར་སྨྲ་བ་དཀོན།

བྱ་བ་ཅི་དང་ཅི་བྱེད་ཀྱང་། དང་པོར་ལེགས་པར་བརྟགས་ཏེ་བྱ།

མ་བརྟགས་གྱ་ཚོམ་བྱས་པ་ལས། འགྱོད་ཅིང་ཉེས་པར་གྱུར་པ་མང་།

རང་སྐྱོན་རང་གིས་ཤེས་དཀའ་བས། མང་པོ་མཐུན་པར་བདག་གི་སྐྱོན།

བརྗོད་ན་མཁས་པས་ངེས་བྱས་ཏེ། ཕྱིན་ཆད་ཁྲག་ངན་བཞིན་དུ་དབྱུང་།

དགྲ་གཉེན་ངེས་པ་མ་མཆིས་ཤིང་། ཆགས་སྡང་ཅན་གྱིས་མ་ཁྱབ་པ།

ཕྱི་ནང་གང་ནའང་མེད་མིན་པས། སྒོ་གསུམ་དྲང་པོའི་ལམ་དུ་སྲོངས།

དཔལ་ལྡན་མར་མེ་མཛད་དཔལ་གྱིས། མང་པོའི་ནང་དུ་ངག་ལ་བརྟག

གཅིག་པུར་འདུག་ཚེ་སེམས་ལ་བརྟག གསུངས་པ་ཇི་བཞིན་ཉམས་སུ་ལོངས།

ཡོན་ཏན་ཕན་འདོགས་སྡུག་བསྔལ་ཞིང་། འདི་དག་ཕན་གནོད་ཆུང་ངུས་ཀྱང་།

འབྲས་མང་འགྲུབ་པས་གནག་སྤོངས་ལ། དཀར་པོའི་ས་བོན་རྒྱུན་དུ་ཐོབ།

གྲོགས་མེད་སྲིད་པར་འཁྱམས་པ་ན། སྦྱིན་དང་མཚུངས་མེད་གཉེན་མཆོག་མེད།

དེའི་ཕྱིར་འཇུངས་པའི་སེམས་བྲལ་བས། གཏོང་ལ་རྟག་ཏུ་དགྱེས་པ་སྐྱེད།

གྲགས་པ་ཉམས་འགྱུར་དྲུག་སྤངས་ནས། དགེ་བའི་ལས་ཀྱི་ལམ་བཅུ་ལ།

གོམས་པར་བྱས་པས་ལྷ་དང་མིའི། གོ་འཕང་འཐོབ་པར་འགྱུར་བ་ལགས།

ཁོན་དུ་འཛིན་པས་ཕུང་ཀྲོལ་དག བསྐྱེད་པས་སྡང་དང་ཁྲོ་སྤངས་ཏེ།

བཟོད་དང་དེས་པའི་རང་བཞིན་གྱིས། ནད་མེད་གཟུགས་བཟང་དམ་པ་སྒྲུབས།

ཆོས་གསུམ་འདི་དག་ཕལ་མོ་ཆེ། རྒྱལ་བས་ཁྱིམ་པ་རྣམས་ལ་བསྔགས།

དེའི་ཕྱིར་འདི་འདྲའི་ཚུལ་སྤྱོད་པའི། ཁྱིམ་གནས་བྱང་གྲོལ་ཐེམ་སྐས་ལགས།

ཚེ་འདི་རྨི་ལམ་གློག་དང་མཚུངས། འཇིག་རྟེན་ཕ་རོལ་འཇིགས་པ་ཆེ།

དེས་ན་ཕྱི་མའི་ལམ་རྒྱགས་དང་། གྲོགས་དག་འབད་པས་བསྒྲུབ་པའི་རིགས།

འདོད་ཡོན་རོ་ལ་བརྐམ་པ་དང་། ཚེ་འདིའི་སྣང་བ་འབྲིད་མཁས་པས།

དོན་ཆེན་ཡལ་བར་འཆོར་བས་ན། དགེ་ཚོགས་བསྒྲུབ་ལ་བཅད་རྒྱར་མཛོད།

སྙིགས་དུས་སྐྱེ་བོའི་ཚེ་སྲོག་དང་། སྲིད་པའི་ཕུན་ཚོགས་མཐའ་དག་ལ།

ཡིད་བརྟན་ཅུང་ཟད་མ་མཆིས་པས། རྟག་ཏུ་བག་དང་ལྡན་པར་འཚལ།

རྒྱལ་བའི་བཀའ་དང་དགོངས་འགྲེལ་གྱི། རྣམ་མང་བསྟན་བཅོས་མཐའ་དག་ལ།

མཁྱེན་པའི་སྤྱན་ཡངས་བཀྲམ་བྱས་ནས། ལེགས་བཤད་མང་པོ་དེ་ལས་འབྱུང་།

ལེགས་བཤད་མང་དུ་མཐོང་ཐོས་ཀྱང་། བླང་དོར་ཚུལ་བཞིན་མ་བྱས་ན།

མིག་ཅན་གཡང་ལ་མཆོང་དང་མཚུངས། དེས་ན་ཉམས་ལེན་སྙིང་བོར་དྲིལ།

གལ་ཏེ་རྫོགས་པའི་སངས་རྒྱས་ཀྱི། གོ་འཕང་དམ་པ་འཐོབ་བཞེད་ན།

བྱམས་དང་སྙིང་རྗེའི་རྩ་བ་ཅན། བྱང་ཆུབ་སེམས་མཆོག་བསྐྱེད་ཀྱང་འཚལ།

འཁོར་འདས་ཆོས་རྣམས་མ་ལུས་པ། སྒྱུ་མ་ཆུ་ནང་ཟླ་བ་ལྟར།

བདེན་མེད་རྟོགས་པའི་ལམ་གོམས་པས། ཉེས་བརྒྱའི་རྩ་བ་དྲུངས་ནས་འབྱིན།

འདི་ལྟའི་ཉམས་ལེན་ལ་གནས་ནས། ལུས་ནི་ཟབ་གསལ་ལྷ་ཡི་སྐུ།

ངག་ནི་གྲག་སྟོང་སྔགས་ཀྱི་སྒྲ། ཡིད་ནི་སྣང་སྟོང་ཆོས་དབྱིངས་དང་།

དྲན་ཤེས་རྒྱ་ལས་མ་གྲོལ་བར། སྤྱོད་ལམ་ཀུན་ཏུ་སྐྱོང་བྱེད་ཅིང་།

ཀུན་ཏུ་བཟང་པོའི་སྨོན་ལམ་གྱིས། ཡང་དང་ཡང་དུ་བརྒྱན་པ་གཅེས།

འདི་འདྲའི་སྤྱོད་ཚུལ་ལ་གནས་པ། སྐྱེས་པའམ་བུད་མེད་ཡིན་ཡང་རུང་།

ཁྱིམ་གྱི་དཔལ་ལ་སྤྱོད་བཞིན་དུ། མཐོ་རིས་རྣམ་གྲོལ་དག་འཚལ་བགྲོད།

སྙིགས་མའི་གདོན་གྱིས་ཡིད་མྱོས་པས། ཕན་པར་སྨྲ་དང་དེ་ཉིད་ཀྱི།

རྗེས་སུ་འཇུག་པ་ཆེས་དཀོན་ཡང་། སྐལ་བཟང་རྣམ་དཔྱོད་ཡངས་པ་ཡིས།

ཡུན་རིང་ཡམ་དང་ཡང་བསྐུལ་པས། ལེགས་བཤད་རིན་ཆེན་འཕྲེང་སྤེལ་ཏེ།

བློ་ལྡན་མགུལ་བའི་རྒྱན་ཉིད་དུ། ཆོས་ཀྱི་རྒྱལ་མཚན་ཞེས་བྱས་བཀོད།

དགེ་བས་འགྲོ་བ་མ་ལུས་པ། མི་བཟད་སྲིད་པའི་མཚོ་བརྒལ་ཏེ།

སྐུ་གསུམ་ནོར་བུའི་གླིང་མཆོག་ཏུ། བདེ་བླག་འཇུག་པའི་རྒྱུ་རུ་བསྔོ།། །།

ངེད་དྲ་ཚིགས།

དཔྱད་མཆན་སྤེལ།

%d bloggers like this: