བཟི་བ་འདྲ།

མཁན་པོ་ཕུན་ཚོགས་སྤྲུལ་སྐུ

༄༅།། སྣང་སྟོང་ཟུང་འཇུག་ལྟ་བའི་ཡང་རྩེ་མཆོག།
ཇི་བཞིན་སྟོན་པ་འདྲེན་མཆོག་ཤཱཀྱའི་ཏོག།
གང་གི་གསུང་རབ་དམ་པའི་རྗེས་ཞུགས་ཏེ།།
གནས་ལུགས་འཚོལ་བར་བློ་མིག་འདི་ལྟར་གཡོས།།

རྟེན་འབྱུང་བསམས་ན་གང་ཡང་འབྱུང་སྲིད་འདྲ།།
སྟོང་ལུགས་དྲན་ན་ཐམས་ཅད་མི་སྲིད་འདྲ།།
མ་བརྟགས་ཙ་ན་ཐམས་ཅད་ཡོད་ཡོད་འདྲ།།
རིགས་པས་དཔྱད་ན་ཅི་ཡང་མེད་མེད་འདྲ།།

དངོས་ཡོད་བདེན་འཛིན་འཁོར་བའི་རྒྱུ་ཡིན་འདྲ།།
མ་དཔྱད་མྱོང་བར་འཛིན་ཙམ་རྒྱུ་ཡིན་འདྲ།།
དོན་ལ་ཆགས་སོགས་སྤང་བྱ་ཡིན་ཡིན་འདྲ།།
དེས་ན་བྱམས་སོགས་བླང་བྱར་དཀའ་དཀའ་འདྲ།།

རྨི་ལམ་བཞིན་དུ་ཡོད་ཚད་འཁྲུལ་བ་འདྲ།།
དཔེ་དོན་ཁྱད་པར་ངེས་པར་འབྱེད་དགོས་འདྲ།།
ཡར་མཆོད་མར་སྦྱིན་ཁྱད་པར་ཆེ་ཆེ་འདྲ།།
ཐམས་ཅད་བཟང་ངན་རོ་གཅིག་འཐད་འཐད་འདྲ།།

ལས་འབྲས་མི་བདེན་བསམས་ན་ཆད་ལྟ་འདྲ།།
ལས་འབྲས་བདེན་གྲུབ་བཟུང་ན་རྟག་མཐའ་འདྲ།།
འགལ་མེད་འཇོག་ཚུལ་གསུངས་པ་བདེན་བདེན་འདྲ།།
ཇི་བཞིན་ཚད་མས་རྟོགས་པ་ཉུང་ཉུང་འདྲ།།

སེམས་ཅན་རྨོངས་པར་ཚུད་ལུགས་འདོད་དགོས་འདྲ།།
ཀུན་རྫོབ་གཞན་ངོར་བལྟོས་ནས་འཇོག་དགོས་འདྲ།།
ཕན་ཚུན་ལྟོས་གྲུབ་བཤད་པ་ལེགས་ལེགས་འདྲ།།
ལྟོས་གྲུབ་བཙལ་ནས་རྙེད་དཀའ་མཚར་མཚར་འདྲ།།

གཞུང་ལུགས་བསྡུར་ན་ཞིག་དངོས་འགལ་མེད་འདྲ།།
བློ་ཆུང་རིགས་པར་ཞིག་པ་མེད་དགག་འདྲ།།
གསུང་རབ་ལྟར་ན་རང་རིག་འགོག་འགོག་འདྲ།།
གཞན་རིག་འཇོག་པར་རང་རིག་དགོས་དགོས་འདྲ།།

ལས་འབྲས་རྟེན་དུ་ཀུན་གཞི་མི་འདོད་འདྲ།།
རྒྱུ་མཚན་རིགས་པས་དཔྱད་བཟོད་མེད་པས་འདྲ།།
དཔྱད་ནས་ང་ཙམ་རྟེན་དུ་བཞེད་བཞེད་འདྲ།།
རིགས་པའི་ཞིབ་ཆ་འབྱེད་མཁན་དཀོན་དཀོན་འདྲ།།

དོན་ལ་དཔྱད་བཟོད་གང་ཡང་མི་སྲིད་འདྲ།།
ཚད་མས་མ་གྲུབ་ཤེས་བྱ་མེད་ལུགས་འདྲ།།
དེ་ལྟར་བསམས་ན་ཐམས་ཅད་འགལ་འགལ་འདྲ།།
མང་མང་དཔྱད་ན་གང་ཡང་ཤོར་ཤོར་འདྲ།།

མ་དཔྱད་གནས་ལུགས་མཐོང་བ་མི་སྲིད་འདྲ།།
ཚུལ་བཞིན་དཔྱད་ན་ཐམས་ཅད་འགྲིག་པ་འདྲ།།
མདོར་ན་དྲན་ཚད་ཁ་ནས་ཤོར་བ་འདྲ།།
ཡ་མཚན་ལྟ་བ་བཙལ་ནས་བཟི་བ་འདྲ།།

ཕྱི་ལོ་ ༢༠༡༥ ཟླ་ ༡ ཚེས་ ༢༤ ལ་ལས་ཀའི་བར་གསེང་ཞིག་ནས།

ངེད་དྲ་ཚིགས།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s