གངས་དཔལ། འདི་ནས་ས་ཐག་ཧ་ཅང་རིང་ས་ཞིག་ན།། དེ་རི་ཆོས་སྐད་རྣ་བས་ཐོས་ས་ཞིག་སྟེ།། ཇི་སྙེད་དོན་ཀུན་ཇི་བཞིན་གཟིགས་ས་དེ་རུ།། རིང་ནས་བརྩེ་བའི་མི་མོའི་སྲས་མོ་བཞུགསཡོད།། གླེང་བརྗོད་སྣ་ཚོགས་བྱོ་སའི་ལུང་པ་དེ་རུ།། མགུལ་རྒྱན་གཟི་མཆོང་བཏེགས་པའི་བྲག་རིའི་སྲས་མོ།། ཚིག་ཏུ་གླེང་ཞིང་བརྗོད་དུ་བཟོད་པ་མིན་ཏེ།། གདེངས་ཅན་ཀླུ་ཡི་བུ་མོས་དོ་ཟླ་མིན་ནོ།། མཐོན་མཐིང་རྩེ་ན་འོད་ཀྱི་གོང་བུ་མེད་ཀྱང་།། ཡ་ཆུང་སེམས་སུ་བརྩེ་བའི་འོ་མ་འཁྱིལ་ཡོད།། ཆུ་འཛིན་དཀར་བོའི་གློག་ཕྲེང་དྲ་བ་མེད་ཀྱང་།། འཆར་ཀའི་ཚོན་རིས་འདྲ་བའི་མདངས་ཤིག་ཤར་ཡོད།། དུ་ཀཱ་ལ་ཡི་ལྷ་གོས་གྱོན་པ་མིན་ཏེ།། དེ་བཱི་ཀོ་ཌིའི་ནང་ནས་འདེམས་པ་མིན་ལ།། མེ་ཏོག་མང་པོའི་ཁྲོད་དུ་སྐྱེས་པ་མིན་པའི།། འཕྱོར་མོ་མ་འདི་མྱི་ཕོའི་དུངས་ས་ཡིན་ནོ།། དུང་གི་བུམ་ཆང་མཆོད་པའི་ལྷ་མོ་མིན་ལ།། འཆི་མེད་ཚེ་ཆང་འདྲེན་པའི་ཀླུ་མོ་མིན་པའི།། བདེ་དགེ་མཛེས་གསུམ་ཚང་བའི་སྙིང་རྗེ་མ་འདི།། འབྲོག་རིའི་བུ་མོ་བྲག་རིའི་སྲས་མོ་ཡིན་ནོ།། མངོན་ཆུང་རྫི་ལས་གྲོལ་བའི་བཞིན་མདངས་ལེགས་པོ།། བཙན་གྱིས་གཉེར་བ་མིན་པའི་འཛུམ་དཀར་སོ་ཕྲེང་།། ང་ལ་ཆེད་དུ་མིན་པའི་ཟུར་མིག་མདའ་མོས།། འཁྲིག་སྲེད་སློང་པ་མིན་ཀྱང་གཟེར་ཤ་རྒྱག་འོང་།། སྦྲ་ནག་རླུང་གིས་སྐྱོམས་པའི་མཚན་ལྗོངས་ཤིག་ལ།། ཤ་དྲོད་ཨེན་ཙམ་མཐོ་བའི་བྲག་རིའི་སྲས་མོའི།། འཇམ་པོའི་ངག་གིས་སྙིང་གཏམ་ཆུ་མོ་དྭངས་དྭངས།། བྱམས་ལ་བརྩེ་བས་བདག་གི་སེམས་ཁམས་སྐྱིད་སྐྱིད།། ཐུར་ཏུ་སིལ་བུར་འཕྱང་བའི་ལན་བུ་ཅན་མ།། སྒོ་འཕྱོར་མཛེས་རྒྱན་དཔྱངས་པའི་སྦྲ་ནག་ནང་ན།། དགེ་བཅུ་ཚང་བའི་ཡུལ་ལྗོངས་གསོན་པོ་དེ་རུ།། གོས་ཆེན་རྒྱ་སེའི་ཕྱུ་ཆེན་མཛེས་སེ་ཡོད་དོ།། མོ་ཤ་འཇམ་པའི་འབྲོག་མོ་སོར་གདུབ་ཅན་མས།།...

 སྨྱུག་མདའ།   (སེ་ར) མཚོ་སྟེ་དབྱངས་ཀྱི་ཐིག་ལེར་ཨོཾ།། མཛེས་ལྡན་རོལ་མོས་ཕྱི་མིག་མདུད།། ལྡེམ་ལ་འཁྱུག་པའི་འཛུམ་ངོགས་སུ།། སྙན་ངག་ཕུང་བོ་མདོག་ཏུ་འཕྱོ།།   སེམས་ཀྱི་མཁའ་ལ་སྒྲེང་བྱེད་པའི།། བརྩེ་བ་ཚངས་པའི་སྐྱེས་མ་ལེགས།། རྨི་རུ་བརྐོས་པའི་མདངས་མཛེས་མ།། སྤྲོས་བྲལ་ཀློང་དུ་མགྲོན་ལ་བསུ།།   སྲིད་གསུམ་སྒེག་གིས་ཟིལ་གནོན་མས།། རིག་པའི་རྩལ་ངག་གཅིག་ཏུ་བསྡུས།། ཀུན་རྟོག་འཕྲུལ་གྱི་སྣང་ངོར་ལ།། དར་གྱི་ན་བཟའ་དཀར་ཡུག་ཡུག།   མི་ཚེས་བྱང་ཐང་འགྲིམས་པའི་ཚེ།། མེ་ཏོག་ཟིལ་བའི་ཐིགས་པ་གཏོར།། སྐྱོ་བའི་དབྱངས་རྟ་ནང་དུ་བཀུག། སྙན་ངག་བརྩམས་ཏེ་མཐོ་རུ་གྱེར།།   སྨུག་པ་རུམ་ལ་ཞོགས་པའི་མདང་།། གླིང་བུའི་ཁུགས་སོར་ངལ་གསོ་བསྟེན།། སེམས་རྩ་གཉེར་མས་ལྟེབ་ཀྱིན་ན།། སྐུད་པ་ཕྲ་མོའི་རྟེན་འབྲེལ་བཏགས།།   ད་ནི་ཡང་བསྐྱར་ཤེད་ཀྱིས་ལྡང་།། སྨྱུ་གུའི་གཟུགས་དག་ལྷན་དུ་འཕྱུར།། ཚེ་ནི་རླུང་བུ་ཡིན་ཀྱང་ཆོག། ཚོར་བ་སྨིན་པའི་བག་ཆགས་རྙེད།།   དངོས་གྲུབ་ཐོབ་པར་འདོད་དེ་ཡིས།།...