རྨི་ལམ་དུ་བསྐུལ་བ།

 སྨྱུག་མདའ།   (སེ་ར)

མཚོ་སྟེ་དབྱངས་ཀྱི་ཐིག་ལེར་ཨོཾ།།

མཛེས་ལྡན་རོལ་མོས་ཕྱི་མིག་མདུད།།

ལྡེམ་ལ་འཁྱུག་པའི་འཛུམ་ངོགས་སུ།།

སྙན་ངག་ཕུང་བོ་མདོག་ཏུ་འཕྱོ།།

 

སེམས་ཀྱི་མཁའ་ལ་སྒྲེང་བྱེད་པའི།།

བརྩེ་བ་ཚངས་པའི་སྐྱེས་མ་ལེགས།།

རྨི་རུ་བརྐོས་པའི་མདངས་མཛེས་མ།།

སྤྲོས་བྲལ་ཀློང་དུ་མགྲོན་ལ་བསུ།།

 

སྲིད་གསུམ་སྒེག་གིས་ཟིལ་གནོན་མས།།

རིག་པའི་རྩལ་ངག་གཅིག་ཏུ་བསྡུས།།

ཀུན་རྟོག་འཕྲུལ་གྱི་སྣང་ངོར་ལ།།

དར་གྱི་ན་བཟའ་དཀར་ཡུག་ཡུག།

 

མི་ཚེས་བྱང་ཐང་འགྲིམས་པའི་ཚེ།།

མེ་ཏོག་ཟིལ་བའི་ཐིགས་པ་གཏོར།།

སྐྱོ་བའི་དབྱངས་རྟ་ནང་དུ་བཀུག།

སྙན་ངག་བརྩམས་ཏེ་མཐོ་རུ་གྱེར།།

 

སྨུག་པ་རུམ་ལ་ཞོགས་པའི་མདང་།།

གླིང་བུའི་ཁུགས་སོར་ངལ་གསོ་བསྟེན།།

སེམས་རྩ་གཉེར་མས་ལྟེབ་ཀྱིན་ན།།

སྐུད་པ་ཕྲ་མོའི་རྟེན་འབྲེལ་བཏགས།།

 

ད་ནི་ཡང་བསྐྱར་ཤེད་ཀྱིས་ལྡང་།།

སྨྱུ་གུའི་གཟུགས་དག་ལྷན་དུ་འཕྱུར།།

ཚེ་ནི་རླུང་བུ་ཡིན་ཀྱང་ཆོག།

ཚོར་བ་སྨིན་པའི་བག་ཆགས་རྙེད།།

 

དངོས་གྲུབ་ཐོབ་པར་འདོད་དེ་ཡིས།།

དེ་ཉིད་སེམས་ཀྱིས་ཐ་སྙད་བརྡར།།

བརྩེ་བ་བརྩིགས་པའི་རྩིབ་མར་སྦྲེལ།།

བདེ་བའི་ཚིག་རྐང་ལྷ་མོར་བཏེག།

 

སྐྱིད་སྡུག་རླབས་ཀྱིས་སྐྱོད་པའི་ཚེ།།

དམིགས་པ་གཏོང་བའི་སྒྲ་ལ་སྙེན།།

འཇའ་ལམ”སྣང་ཡན་དེ་གར་འཁྲུལ།།

སྟོང་བའི་ཁམས་ལ་སྟོང་བ་བཙལ།།

 

ཡིད་ཀྱི་རོལ་མྱོང་ལན་གཅིག་གིས།།

ང་ཡི་ཚོར་བའི་གྲོགས་སུ་སྦྲན།།

མཛེས་པའི་ཆོས་རྣམས་མཚོ་ལ་འཕྲོས།།

ཐག་རིང་བསྙེག་པའི་སྟ་གོན་བརྩམས།།

 

ཀྱེ་མ་དབྱངས་ཀྱི་ལྷ་མཆོག་མར།།

སྨྱུ་གུ་ངར་ལ་ལན་ཞིག་བཏང་།།

དྲན་ཤེས་དབྱངས་ཡིག་ངོས་སུ་ཕབ།།

གཟུགས་བྱད་དཀར་མོ་སྙིམ་པར་སྦྱར།།

༢༠༡༥ ཟླ ༢ ཚེས ༦ ཉིན།

ངེད་དྲ་ཚིགས།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s