ལོ་ངོ་སྟོང་ཕྲག་འགོར་བའི་ཡིག་རྙིང་ཞིག

ནག་ཀྱཱ་བ་ཤ་བོ་ཚེ་རིང་།

        ཕུ་རི་ཡིག་རྙིང་ནི་ལོ་ངོ་སྟོང་ཕྲག་གི་ལོ་རྒྱུས་ལྡན་པའི་བོད་ཡིག་གི་གནའ་བོའི་ཡིག་ཚང་གྲགས་ཅན་ཞིག་ཡིན་ལ།  འདི་ནི་ཏུང་ཧོང་གི་ཡིག་ཚང་གི་རྗེས་སུ་རྒྱལ་ནང་ནས་གསར་དུ་རྙེད་པའི་ལོ་རྒྱུས་ཀྱི་དུས་ཚོད་རིང་ཞིང་ཉར་ཡུན་ཆེས་རིང་བོའི་གནའ་དཔེ་དཀོན་པོ་ཞིག་ཡིན།  ཕུ་རི་ཡིག་རྙིང་ནི་བོད་ལྗོངས་ཀྱི་གཞིས་ཀ་རྩེའི་ས་ཁུལ་གྱི་གཉའ་ལམ་རྫོང་གི་ཕུ་རི་གྲོང་ཚོ་ནས་གསར་རྙེད་བྱུང་བ་ཡིན།  ཕུ་རི་ཡིག་རྙིང་ལ་རིགས ༡༥༠ལྷག་དང་ཤོག་ངོས ༡༣༠༠ཉེ་བ་ཡོད།  ཆེད་ལས་མཁས་པས་གསལ་འབྱེད་བྱས་པ་ལྟར་ན།  འདི་ཉིད་བྱུང་བའི་ལོ་རྒྱུས་ནི་སྤྱི་ལོའི་དུས་རབས ༡༣གྱི་སྔོན་དུ་གཏོགས་ལ།  དེའི་ཁྲོད་ཀྱི་ཡིག་ཚང་སྐོར་ཞིག་ནི་བོད་བཙན་པོའི་དུས་སྐབས་སུ་བྱུང་བ་རེད།  བོད་ལྗོངས་སུ་བོད་བཙན་པོའི་དུས་སྐབས་ཀྱི་ཡིག་ཚང་ནི་ཤིན་ཏུ་དཀོན་ཞིང་དུས་རབས་སྟོད་ཀྱི་ཐོག་མའི་ཏུང་ཧོང་ཡིག་རྙིང་གསར་རྙེད་བྱུང་བ་དང༌།  མི་མང་བོས་ཡིག་ཚང་འདི་ནི་བོད་བཙན་པོ་རྒྱལ་རབས་ཀྱི་དུས་མཇུག་དང་དུས་རབས ༡༣ གྱི་ཡིག་ཚང་ཞིག་ཡིན་པར་ཤེས་རྟོགས་བྱུང༌།  ཕུ་རི་ཡིག་རྙིང་གི་བརྗོད་དོན་ཟབ་ཅིང་ཧ་ལམ་ལྷ་ཆོས་དང་མི་ཆོས་རྩོམ་བཏུས་ཁག་གཉིས་སུ་དབྱེ་ཡོད་ལ།  དམ་པའི་ལྷ་ཆོས་ཀྱི་ཡིག་ཚང་ནི་གསང་སྔགས་ཀྱི་ཆོ་ག་དང་ནང་ཆོས་ཀྱི་དཔེ་རྙིང་གཉིས་སུ་གཏོགས་ལ།  ཆོས་ལུགས་ཀྱི་གནའ་དཔེའི་ཁྲོད་ཐོག་མའི་ཡིག་བསྒྱུར་གྱི་མ་ཕྱི་དང་དུས་རབས ༡༠ ཡས་མས་སུ་བོད་ལྗོངས་སུ་རྒྱུགས་ཆེ་བའི་དམངས་ཁྲོད་ཆོས་ལུགས་ཀྱི་དཔེ་རྙིང་དང་ཆོ་ག་སོགས་ཡོད།   མི་ཆོས་ཀྱི་ཡིག་ཚང་ནི་སྙན་ཚིག་དང་བསྟོད་ཚིག  མི་སྣའི་རྟོགས་བརྗོད་སོགས་འདུ་ལ།  འདིས་བོད་ལྗོངས་ཀྱི་ཆོས་ལུགས་དང་རིག་གནས་ཀྱི་འབྱུང་ཁུངས་དང་འཕོ་འགྱུར།  འཕེལ་རྒྱས་ཀྱི་ལོ་རྒྱུས་ལ་ཞིབ་འཇུག་བྱེད་པའི་གནའ་རབས་ཀྱི་རྒྱུ་ཆ་དཀོན་པོ་ཞིག་ཡིན་པར་བདེན་དཔང་སྙོམས་མེད་ཅིག་བྱས་ཡོད།  བོད་ལྗོངས་སློབ་གྲྭ་ཆེན་མོའི་བོད་རིག་པའི་ཞིབ་འཇུག་པ་ཤེས་རབ་བཟང་བོས།  ཕུ་རི་ཡིག་རྙིང་ནི་ཀྲུང་གོ་གསར་བ་དབུ་བརྙེས་པའི་རྗེས་སུ།  ཀྲུང་གོའི་ནང་ཁུལ་ནས་རྙེད་པའི་ལོ་རྒྱུས་ཀྱི་རྒྱུན་ཆེས་རིང་ཞིང་ཉར་ཚགས་བྱས་པ་ཆེས་མང་བོའི་བོད་ཡིག་གི་ཡིག་ཚང་རྙིང་བ་ཞིག་ཡིན་ལ།  འདི་ཉིད་གསར་རྙེད་བྱུང་བ་ནི་དངོས་གནས་བྱ་བཞག་ཡག་པོ་ཞིག་ཡིན་པར་འཐད་ལྡན་དུ་སྒྲུབ་ཚུགས་བྱས་ཡོད། ༢༠༠༢ ལོར་བོད་ལྗོངས་གཉའ་ལམ་རྫོང་གི་ཕུ་རི་གྲོང་ཚོའི་སྡེ་དམངས་ཤིག་གིས་ཞིང་ནང་ནས་ས་སློག་སྐབས་གནའ་བོའི་ཤོག་རྙིང་སྐོར་ཞིག་ཕྱིར་བཏོན་པ་རེད། ་འོན་ཀྱང་དེ་ལ་གདེང་འཇོག་དང་དོ་ཁུར་བྱེད་མཁན་མ་བྱུང་བས།   ས་འོག་ནས་ལོ་ངོ་དྲུག་བརྒྱའམ་བདུན་བརྒྱ་ལྷག་ལ་སྦས་པའི་རྩ་ཆེའི་ཡིག་ཚང་འདི་ཉིད་ལུས་སོང་བ་རེད།   སྐབས་དེར་བོད་ལྗོངས་སློབ་གྲྭ་ཆེན་མོའི་དཔེ་མཛོད་ཁང་གིས་བསྡུ་རུབ་བྱ་སྐབས་ཡིག་ཚང་ཤིན་ཏུ་རྙོག་དྲ་ཆེ་ལ།   ཞིབ་འཇུག་པ་དག་གིས་དག་སྒྲིག་བྱས་རྗེས།   སྤྱི་བསྡོམས་པའི་ཤོག་ངོས་ཁྲི་གཅིག་དང་སྟོང་གཉིས་ལྷག་ཡོད་པའི་ཡིག་ཚང་ཞིག་གསར་རྙེད་བྱུང་ཡོད་ལ།  ཤོག་ངོས་ཁྲི་ལྷག་ཡོད་པའི་གནའ་དཔེ་ལེགས་པོ་ཞིག་ཁྱོན་ནས་བསྡུ་སྒྲིག་ཐུབ་སོང༌།  ཆེད་ལས་མཁས་པ་མང་བོས་གསལ་འབྱེད་བྱས་རྗེས།  འདི་དག་ནི་གནའ་རབས་ཀྱི་བོད་ཀྱི་སྣག་ཚ་དང་ཤོག་བུའི་སྟེང་བྲིས་པའི་ཡིག་ཚང་ཞིག་ཡིན་ལ།  ཧ་ལམ་དུས་རབས  ༨ ནས ༡༤ བར་དུ་བྱུང་བ་ཞིག་རེད།  ཤོག་བུ་འདི་དག་ནི་ལྟེབ་ཆགས་མང་བོར་སོང་བ་དང་ཤོག་བུ་ཐར་འཐོར་ཅན་དུ་ཆགས། དེའི་ཁྲོད་ཀྱི་གསང་བ་ལྐོག་གྱུར་གྱི་དམོད་ཚིག་སྐོར་ཞིག་ནི་བོད་ལྗོངས་ས་གནས་ཀྱི་སྟོབས་ཤུགས་སིལ་བུར་འཐོར་སྐབས།  དམངས་ཁྲོད་ཀྱི་ཆོས་ལུགས་ཁག་གི་ཆོ་ག་ཡིན་པར་མ་ཟད།  ལོ་རྒྱུས་འདི་དག་གི་ཁྲོད་དུ་བྱུང་བའི་ཆོས་ལུགས་ནི་གནའ་རབས་ཀྱི་ཡིག་ཚང་གཞན་དག་ཏུའང་ཞིབ་གསལ་ངང་བཀོད་ཡོད།  ཕུ་རི་གྲོང་ཚོ་ནི་འགྲིམས་འགྲུལ་སྟབས་མི་བདེ་བའི་རི་གྲོང་ཞིག་ཡིན་ན་ཡང༌།  འོན་ཏེ་གུང་ཐང་རྒྱལ་རབས་ཀྱི་དུས་སུ་དུས་རབས ༡༠ནས ༡༣བར་ནི་འཕེལ་རྒྱས་མགྱོགས་པའི་རྫོང་ཁག་བཅུ་གསུམ་གྱི་ཡ་གྱལ་ཞིག་ཡིན།  གུང་ཐང་རྒྱལ་རབས་སུ་བཀོད་པ་ལྟར་ན།  གུང་ཐང་རྒྱལ་རབས་དར་རྒྱས་ཆེ་བའི་སྐབས་ཀྱི་ཕུ་རི་གྲོང་ཚོ་དངོས་སུ་གཞི་ཆགས་པ་དང༌།   ཡོན་རྒྱལ་རབས་ཀྱི་དུས་སུ་འགྲོ་མགོན་འཕགས་པ་བླ་མར་གྱུར་བའི་ནང་ཆོས་སྨྲ་བ་དང་ལོ་ཙཱ་བ་མང་བོ་སྤྱན་དྲངས་ནས་དམ་པའི་ཆོས་འཆད་པ་དང་བརྩམས་ཆོས་གྲགས་ཅན་མང་བོ་སྤེལ་བ་རེད།   དུས་རབས  ༡༣ དུས་སུ་ཕུ་རི་གྲོང་ཚོ་ནི་མིང་དུ་གྲགས་པའི་ནང་ཆོས་ཀྱི་གནས་ཆེན་ཞིག་ཡིན།  འོན་ཀྱང་དུས་རབས ༡༥ བར་གུང་ཐང་རྒྱལ་རབས་རྒུད་པ་དང་ཕུ་རུ་གནས་མཆོག་ཀྱང་ཉམས་དམས་སུ་གྱུར་བ་རེད།  ལོ་ངོ་དྲུག་བརྒྱ་ལྷག་གི་རིང་ལ་མི་གཅིག་གིས་ཀྱང་གནས་འདིའི་གཟི་འོད་ཚོར་མ་ཐུབ་པར་རང་སར་ལུས་སོང༌།  ཕུ་རི་ཡིག་རྙིང་གི་བརྗོད་དོན་ཕུན་སུམ་ཚོགས་ཤིང་ནང་ཆོས་ཀྱི་ཆོ་ག་དང་ཆོས་དཔེ་རྙིང་བ།  སྙན་ཚིག  མི་སྣའི་རྟོགས་བརྗོད་སོགས་བོད་མི་དམངས་ཀྱི་སྐད་དང་ཡི་གེ  ཡུལ་སྲོལ་གོམས་གཤིས།  ཆོས་ལུགས་དང་དད་མོས་སོགས་ཕྱོགས་མང་བོའི་རིན་ཐང་ཡོད་པའི་གནའ་བོའི་རྒྱུ་ཆ་མང་བོ་ཉར་ཚགས་བྱས་ཡོད།  ཏུང་ཧོང་རིག་གནས་ལ་རིག་གཞུང་ཞིབ་འཇུག་གི་རིན་ཐང་ལྡན་ན་ཡང༌།  ཕུ་རི་ཡིག་རྙིང་ནི་བོད་མི་རིགས་ཀྱི་སྤྱི་ཚོགས་འཕེལ་བའི་ལོ་རྒྱུས་ཀྱི་རྒྱུ་ཆ་ཚད་ལྡན་ཡིན།  དེའི་ཁྲོད་ཀྱི་བོད་གནའ་རབས་ཀྱི་ཆོས་ལུགས་ཀྱི་ཆོ་ག་དང་མཚོན་བྱེད་རི་མོ་སོགས་ནི་བོད་ཀྱི་ནང་ཆོས་རིག་གནས་ཀྱི་འབྱུང་ཁུངས་ལ་དང་འཕོ་འགྱུར།  འཕེལ་རྒྱས་ལ་འཚོལ་ཞིབ་བྱེད་པའི་གནའ་རབས་ཀྱི་ཤུལ་དངོས་རྒྱུ་ཆ་སྲིད་ན་དཀོན་པ་ཞིག་ང་ཚོར་མཁོ་སྤྲོད་བྱས་ཡོད་པ་རེད།

ཡོང་ཁུངས་བོད་ནང་གི་དྲ་བ།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s