February ༡༢, ༢༠༡༥

འཇིགས་ཞུམ་བྲལ་བའི་རང་དབང་།

ཨའུང་སན་སུ་ཅི་ཡིས་བརྩམས། ཚེ་དབང་དཔའ་མོ་མཁས་གྲུབ་ཀྱིས་བསྒྱུར།           ལྐོག་ཟ་རུལ་སུངས་སོགས་ཀྱི་ཚུལ་མིན་བྱ་སྤྱོད་ཀྱི་འབྱུང་རྩ་དབང་ཤུགས་མ་ཡིན་པར་དེ་ནི་འཇིགས་སྣང་ཁོ་ན་ཡིན་ཞིང་། དེ་ཡང་རང་ཉིད་ཀྱི་དབང་ཆ་གཞན་ལ་ཤོར་དོགས་ཀྱི་འཇིགས་སྣང་སྐྱེ་པའི་དབང་གིས་དབང་ཆ་བེད་སྤྱོད་བྱེད་མཁན་ཚོ་ཚིལ་མིན་རུལ་སུངས་སུ་གྱུར་གྱི་ཡོད་པ་རེད།  འབར་མའི་ཡུལ་གྱི་སྐྱེ་བོ་ཕལ་མོ་ཆེས་ཨ་ག་ཏི་ 1 སྟེ་འགྲོ་བ་བཞིའི 2 སྐོར་ངེས་གསལ་བཞིན། ཆནྡ་ག་ཏིའམ་འདུན་པས་འགྲོ་བའི་དབང་གིས་རང་གིས་གཅེས་སྐྱོང་བྱེད་པའི་ཉེ་དུ་གཉེན་ཚན་རྣམས་ཀྱི་བདེ་སྐྱིད་ལོངས་སྤྱོད་ཀྱི་དོན་དུ་ལམ་ལོག་པར་ཞུགས་ནས་ལྐོག་བརྔན་ཟ་ལེན་བྱེད་པའི་ལས་བསགས་པ།  དོ་ས་ག་ཏིའམ་ཞེ་སྡང་འགྲོ་བའི་དབང་གིས་རང་ཉིད་ཀྱི་ཞེ་སྡང་སྐྱེ་སའི་དྲག་བོ་ཁ་གཏད་ལ་བརྣག་སེམས་ལོགས་ཀྱི་ལས་ངན་བསགས་པ།  མི་ཧ་ག་ཏིའམ་རྨོངས་པས་འགྲོ་བ་མ་རིག་པའི་དབང་གིས་ལམ་འཆལ་བ་བཅས་བྱུང་ཞིང་། ལྷག་པར་དེ་དག་བཞིའི་ཁྲོད་ནས་ཚབས་ཆེ་ཤོས་ནི་བྷ་ཡ་ག་ཏིའམ་འཇིགས་པས་འགྲོ་བ་ཡིན་ཞིང་། འཇིགས་པས་འགྲོ་བའི་ལེགས་ཉེས་རྣམ་པར་འབྱེད་པའི་ཤེས་རིག་ཡོངས་རྫོགས་སྒྲིབ་པ་དང་། རིམ་གྱིས་ལེགས་ཉེས་རྣམ་འབྱེད་ཀྱི་ཤེས་པ་རྩ་བརླག་ཏུ་འགྲོ་རྒྱུ་མ་ཟད།  འགྲོ་བ་གཞན་གསུམ་པོའི་འབྱུང་རྩ་ཡང་འཇིགས་པས་འགྲོ་བ་དེ་ཉིད་ཡིན། ཆནྡ་ག་ཏིའམ་འདུན་པས་འགྲོ་བ་ནི་འདོད་རྔམས་ཁོ་ནར་བརྟེན་ནས་བྱུང་བ་ཞིག་མ་ཡིན་པར་དེ་ནི་རང་གིས་གཅེས་པར་འཛིན་པའི་ཉེ་དུ་རྣམས་ཀྱི་བདེ་སྐྱིད་ཤོར་དོགས་ཀྱིས་འཇིགས་པ་ལས་སྐྱེས་པ་ཞིག་ཡིན་ཞིང་།  དེ་ཡང་གཞན་རང་ཉིད་ལས་ལོངས་སྤྱོད་སོགས་སྒོ་གང་ས་ནས་ལྷག་པར་འགྱུར་དོགས་དང་།  གཞན་ལྷག་པར་གྱུར་ན་རང་ཉིད་ཉམས་དམས་ངོ་ཚ་ཁ་སྐྱེངས་བྱུང་བ་སོགས་ཀྱི་རྐྱེན་པས་ཞེ་སྡང་འགྲོ་བའི་ཀུན་སློང་སྐྱེ་སྲིད་པ་ཞིག་ཡིན།  དེས་ན་འཇིགས་པས་འགྲོ་བ་དང་བྲལ་ནས་བདེན་དོན་འཚོལ་བའི་རང་དབང་ཞིག་མ་བྱུང་བར།  དེ་སྲིད་རྨོངས་པས་འགྲོ་བ་ལས་གྲོལ་ཐུབ་རྒྱུ་དཀའ་ལ་འཇིགས་པ་དང་འགྲོ་བ་བཞི་གཉིས་དབར་འབྲེལ་བའམ་དམ་ཟབ་ཡོད་པས་འཇིགས་པ་དར་ཁྱབ་ཕྱིན་པའི་སྤྱི་ཚོགས་གང་ཞིག་གི་ནང་དེ་ཙམ་གྱི་མི་དགེ་བའམ་ཉེ་པའི་ལས་གཏིང་ཟབ་པ་ཡོང་རྒྱུ་ཡིན་པ་ཐེ་ཚོམ་མེད་པ་ཞིག་རེད། ༡༩༨༨ ལོར་སློབ་ཕྲུག་གིས་ངོ་རྒོལ་རྔམ་སྟོན་ཁྲོམ་བསྐོར་བྱས་ནས་འབར་མའི་ནང་དམངས་གཙོའི་ལས་འགུལ་བྱུང་བའི་འཕྲལ་རྐྱེན་གཙོ་བོ་དཔལ་འབྱོར་གྱི་དཀའ་རྙོག་ལ་མང་ཚོགས་ཡིད་མ་རངས་པར་བརྟེན་བྱུང་བའི་མཐོང་ཚུལ་བྱུང་ཡོད།  འབར་མར་ལོ་མང་རིང་སྲིད་ཇུས་གསལ་པོ་མེད་པ་དང་། གཞུང་ཕྱོགས་ཀྱི་བྱེད་ཕྱོགས་འོས་འཚམས་མེད་པ། དངོས་ཟོག་གི་རིན་གོང་ཇེ་མཐོར་འཕར་བ།  དེ་བཞིན་མི་སྒེར་གྱི་ཡོང་འབབ་མར་ཆག་པ་སོགས་ཡུལ་གྱི་ནང་དཔལ་འབྱོར་གྱི་གནས་སྟངས་ཐ་ཞན་དཀའ་རྙོག་ཅན་ཞིག་ཏུ་གྱུར་ཡོད་པ་བདེན་པ་ཡིན་ལ།  དེས་རྒྱུན་དུ་གཤིས་རྒྱུད་བཟང་ཞིང་གཤིས་ཀ་འཇམ་པའི་མི་རྣམས་ཀྱི་བཟོད་པ་ཉམས་པར་བྱེད་པའི་འཚོ་བའི་དཀའ་ངལ་བཟོད་གླགས་མེད་པ་ཁྱད་གསད་གདོང་ལེན་རྒྱུན་མར་བྱེད་དགོས་བྱུང་བར་བརྟེན་ནས་ངོ་རྒོལ་རྔམ་སྟོན་བྱས་པ་ཙམ་མ་ཟད།  འཇིགས་སྣང་གིས་བརྒྱུད་བསྐུལ་བའི་ལྐོག་ཟ་རུལ་སུངས་ཀྱི་བྱེད་སྟངས་འོག་མི་ཚེ་ཐ་ཞན་ཡིད་མུག་ལ་ཞིག་ཏུ་གྱུར་བར་བརྟེན་ནས་བྱུང་བ་ཞིག་ཀྱང་རེད།  སློབ་ཕྲུག་ཚོས་ཁོང་ཚོའི་སློབ་གྲོགས་འཆི་སྐྱོན་བྱུང་པར་བརྟེན་ནས་ངོ་རྒོལ་བྱས་པ་ཙམ་མ་ཡིན་པར་སྲིད་དབང་སྒེར་སྡོམ་རིང་ལུགས་སྲིད་གཞུང་གིས་ད་ལྟའི་མི་ཚེའི་དོན་སྙིང་དང་།  མ་འོངས་པའི་རེ་བ་བཅས་འཕྲལ་ཕུགས་གཉིས་ཀའི་མི་ཚེའི་ཐོབ་ཐང་འཕྲོག་པར་ངོ་རྒོལ་རྔམས་སྟོན་བྱས་པ་ཞིག་རེད། སློབ་ཕྲུག་ཚོའི་རྔམས་སྟོན་གྱི་མི་མང་ཡོངས་ཀྱི་ཡིད་ཆད་བློ་ཕམ་གྱི་རྣམ་པ་མཚོན་པར་བརྟེན།  རིང་པོར་མ་སོང་བར་ངོ་རྒོལ་གྱི་རྔམས་སྟོན་ཁྲོམ་བསྐོར་དེ་དག་ཁྱབ་གདལ་དུ་གྱུར་ཏེ་རྒྱལ་ཡོངས་རང་བཞིན་ལྡན་པའི་ལས་འགུལ་ཞིག་ཏུ་གྱུར་པ་རེད། ...
དེ་ལས་མང་པ།

ང་ཅིའི་ཕྱིར་འཇིག་རྟེན་དུ་སྐྱེས།

འབའ་སྲས། ཅིའི་ཕྱིར་སྐྱེས་པ་ཕ་མས་མ་གསུངས་ལ།། ཅི་ལྟར་སྐྱེས་པ་རང་གིས་མ་ཤེས་པར།། སྨྲ་ཤེས་དོན་གོ་མི་ཡི་གཟུགས་ཅན་ང་།། འཇིག་རྟེན་འདི་ན་ཡོད་པ་སྔ་ན་ཤེས།། བཟའ་བཏུང་ཆེད་དུ་ཟེར་ན་དེ་མ་རེད།། གཞན་དོན་ལྷུར་ལེན་བྱ་བ་ངས་མི་ཐུབ།། ཅིའི་ཕྱིར་འཇིག་རྟེན་མི་ལ་སྐྱེས་པའི་ཚིག ། རང་ལ་དྲིས་ཀྱང་ཚིག་ལན་ངས་མ་རྙེད།། ཆུང་ནས་རྒས་པར་གྱུར་བའི་ཉི་མ་དག ། མཚོ་ཆེན་ངོས་སུ་ཁ་བ་བབས་པ་བཞིན།། འདི་བྱས་གང་སྒྲུབ་ཐོབ་པ་གཅིག་མེད་པས།། ལུས་སེམས་སྟོང་བ་འཇིག་རྟེན་ཁམས་སུ་ལུས།། གྲོག་མ་མིག་མེད་བལྟས་ན་ང་མགྱོགས་ཀྱང་།། ཁྲོན་པའི་སྦལ་བར་བསྡུར་ན་ང་འཇོན་ཡང་།། ད་དུང་གནས་མལ་གཏན་དུ་མ་ཁེལ་བས།། ང་ཡི་ལུས་རྟེན་འཇིག་རྟེན་ལྷག་མ་ཞིག ། བྱ་ཞིག་ཡིན་ཡང་བྲག་ན་ཚང་ཞིག་ཡོད།། འབུ་ཞིག་ཡིན་ཡང་འཛུལ་སའི་ཁུང་ཞིག་ཡོད།། ས་མཐའི་རྐང་ལམ་མི་ཚེ་ཕྱེད་ཀྱིས་དེད།། ད་དུང་གནས་མེད་ས་མཐའ་ཞིག་ན་ལྷག ། གཡས་ལ་ཅི་ཙམ་བགྲོད་ཀྱང་གཡས་ཕྱོགས་ཏེ།། གཡོན་དུ་ཅི་ཙམ་བསྐྱོད་ཀྱང་གཡོན་ཕྱོགས་ཉིད།། གཡས་གཡོན་གང་དུ་མ་གཏོགས་དབུས་ལམ་ཞིག ། གང་དུ་ཆས་ཀྱང་བདག་གི་མདུན་དུ་མེད། ལྟོས་དང་སྐུ་སྲས་གཅིག་ལ་ཕོ་བྲང་བརྒྱ།། དེ་ཡི་མཐའ་ན་འཁོར་གཡོག་ལོངས་སྤྱོད་མང་།། བཀའ་མཆིད་གཅིག་གིས་ཆེན་པོ་འདར་བར་བྱེད།། འཇིག་རྟེན་དབང་དུ་བསྒྱུར་བའི་མཛད་པ་མང་།།...
དེ་ལས་མང་པ།