འུ་ཅག་འཚོ་སའི་ཤམ་བྷ་ལ།

མཚོ་ལྷོ།     འབའ་དུང་སྲས།

གནམ་སའི་བར་ཐག་འབྱེད་པའི

ངའི་དད་རྟེན་གྱི་སྒོ་འཕར་ཕྱེས་པའི་ཆོས་སྡེ་ཆེན་མོ

འདི་ཕྱིའི་བང་སོ་གཏོད་པའི

ངའི་བླ་སྲོག་གི་རིན་ཐང་གཞལ་པའི་མི་ཡུལ་གྱི་ཤམ་བྷ་ལ

ཁྱེད་ཀྱི་རྒྱ་ཕིབས་སེར་པོའི་ཐུ་འོག་ནས

ང་དང་ཁྱེད

ཡང་ན་འུ་ཅག་ཚང་མས

རྨི་ལམ་ཡག་པོ་ཞིག་གི་རེ་ཕུགས་འཚོལ་བཞིན

དམ་བཅའ་གཙང་མ་ཞིག་ལ་ཁ་དོག་བསྐྲུན་ཡོད

ང་དང་ལས་དབང་གཅིག་པའི་ཁྱོད

ཁྱེད་དང་བསམ་ཕྱོགས་མཐུན་པའི་ང

ངེད་ཅག་ཚང་མས

ལག་ཟུང་གཅིག་སྒྲིལ་དང

གོམ་ཁ་གཅིག་གཤིབ་ཀྱིས

འུ་ཅག་འཚོ་སའི་ཤམ་བྷ་ལ་སྟེ

མི་ཡུལ་གྱི་དག་ཞིང་འདི་རུ

འོད་ཀྱི་བཅུད་དང

དྲོད་ཀྱི་རྟེན

ཡང་ན

ཚོར་ཤེས་མ་བོར་བའི་ཧ་ཅང་ཉམ་ཐག་པའི

རང་ཉིད་ཀྱི་གཟུགས་བརྙན་དེ་དག

ཁྱེད་ཀྱི་གསལ་ཞིང་དྭངས་པའི་མིག་ལམ་དུ་བསྐྱལ་འདོད་ཀྱང

ཁྱེད་ཀྱི་བརྟན་ཞིང་བརླང་བའི་བླ་སྲོག་གི་གཞི་རྟེན་དུ་བཅོལ་འདོད་ཡོད

ལོ་ཟླའི་ཁ་ཆར་གྱིས་མ་རྙིངས་པའི་གནས་དེ་ནི

གཟི་ཉམས་དང་དཔའ་སྤོབས་ཀྱིས་འགྱིང་བའི

མཛེས་སྡུག་གི་མཁའ་དབྱིངས་ཞིག་སྟེ

འུ་ཅག་འཚོ་སའི་ཤམ་བྷ་ལ

མཚར་སྣང་གི་རྨི་ལམ་ལ་ཕྱོགས་དྲགས་པའི

ངའི་མིག་ལམ་དུ

གཡུ་ཡི་འདབ་མ་ས་ལ་འཕོས་འདྲའི

མི་ཡུལ་གྱི་དག་ཞིང་དུ་སྒོམ་མྱོང་ཞིང

གསེར་གྱི་ལོ་འདབ་མཁའ་རུ་འཕྱུར་བའི་ལྷ་ཡུལ་གྱི

གནས་མལ་དུ་སེམས་མྱོང་ཡོད

འུ་ཅག་འཚོ་སའི་ཤམ་བྷ་ལ

བཞུད་ཟིན་པའི་མེས་པོ་ཚོའི་ཤེས་རབ་བླ་ན་འཕགས་པའི་མ་ཡུམ

འཚོ་བཞིན་པའི་སྐྱེས་ཆེན་ཚོའི་བདེན་ལུགས་གཏིང་མཐའ་ཆོད་པའི་བསྟི་གནས

སད་རྟོགས་ཀྱི་བསམ་ཕུགས་དྲག་པོས

ང་དང་ངའི་ལས་དབང་གི་ཁ་དོག་བསྒྱུར་ཀྱང

རེ་སྨོན་གྱི་རྨུ་ཐག་རིང་མོས

འུ་ཅག་ཚང་མའི་འཚོ་བའི་གྲིབ་བསིལ་གྱི་ཟུར་ཁ་རེ་རེར

གནས་ལུགས་མི་འདྲ་བའི་ཁ་དོག་སྣ་ལྔའི་མཛེས་ཆ་བཏོད་ཡོད་པ་སུ་ལ་གསང

གངས་རི་དཀར་པོའི་ནུ་ཞོ་དང་བྲལ་མ་མྱོང་བའི་ཁྱོད

གསལ་བྱེད་སུམ་ཅུའི་དབྱངས་རྟ་དང་གྱེས་མྱོང་མ་བའི་ཁྱོད

ལྷ་ཆོས་ཟབ་མོའི་རེ་འདུན་གྱིས་སྟོང་མ་མྱོང་བའི་ཁྱོད

འུ་ཅག་འཚོ་སའི་ཤམ་བྷ་ལ

ནམ་རྒྱུན་ངའི་ཡིད་ལ་བརྣག་ཅིང

སེམས་ལ་ཐོགས་ཡོད་པའི་ཤམ་བྷ་ལ།

༢༠༡༣  ༦  ༣ ཉིན།

ངེད་དྲ་ཚིགས།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s