སྨྱུག་མདའ། (སེ་ར)
ཉི་འོད་ཀྱིས་བཀྲུས་པ་མཛེས་ཉམས་ཤིག།
མེ་ཏོག་གི་མགོ་དཀྲིས་འཇའ་ཚོན་ལྷག།
སྐུད་པ་ལ་ཤར་མར་རྨི་ལམ་འཁོར།།
མུན་པ་ཡི་ཐིག་ལེར་གསལ་ལ་དྭངས།།
སྙན་ངག་གི་དུམ་བུ་མཚོ་ལ་ཟགས།།
མཚོ་མཐའ་ཡི་རླབས་ངོགས་སྒྱུ་རྩལ་སྦར།།
གྲོང་ཁྱེར་གྱི་གཞུང་ལ་དར་ལམ་བྲིས།།
རྐང་སྣམ་གྱིས་ཤ་རྩ་བཅུམ་པ་ཤེས།།
རི་ལུང་གི་འདོད་པ་སྦྲེན་བ་ན།།
སྙན་ངག་གི་མཆི་སྒྲོས་དམར་ཐག་ཆོད།།
སྐད་འཕྲིན་གྱི་མགྲིན་པ་ཉེ་ས་ནས།།
བདག་ཉིད་ཀྱི་ཡི་གེར་འོ་བརྒྱལ་བཟོས།།
སྒྱུ་འཕྲུལ་གྱི་རོལ་མོ་དཀྲོལ་བས་ན།།
ཚོར་བ་ནི་གཏིང་གི་གཏིང་ཞིག་རེད།།
དམིགས་འདུན་གྱི་སྤར་ཁ་མ་ལྷོད་པར།།
དུས་ཚོད་ཀྱི་ཐག་སྣེར་ཤེར་རབ་བྲི།།
ངུ་ཤུམ་ལ་ཁྲེལ་དགོད་ལན་གསུམ་བསྐུར།།
ཚ་སྨུག་གི་ཀློང་དུ་དམ་པོར་བསྡམས།།
རྨི་སྙེག་གི་ཁ་ཕྱོགས་གཡོག་ཏུ་ཚུད།།
ན་ནིང་གི་ཡི་གེ་རྐུབ་སྟེགས་རེད།།
བྱེ་ཐང་གི་བཙོན་ཁང་དྲུད་དེ་ཟུག།
འདོད་རྔམས་ཀྱི་ཁ་རུ་ཡང་ཡང་བརྡབས།།
ཆབ་སྲིད་ཀྱི་ཀླད་པ་གླེང་རྒྱུར་དགའ།།
བདེན་རྫུན་གྱི་སྲིན་འབུ་ཐང་ལ་བརྡལ།།
རི་བོ་དེའི་སླ་ང་ཆུང་དྲགས་པས།།
ཡར་ཀླུང་གི་རྒན་མོ་གྱད་ཀྱིས་ཅེར།།
ཁ་མིག་གི་སོ་བ་ཡོད་ཚད་འདུས།།
བྱ་རོག་གི་གྲིབ་མ་རྐྱེན་དུ་གྲུབ།།
མཆི་མ་ལ་ཉར་བའི་སྙན་ངག་འདི།།
ས་མཐའ་རུ་གཏོར་བ་ཚོད་ཅིག་མེད།།
༢༠༡༥། ༠༣། ༢༩ ཉིན་རང་ཤག་ཤོག་ལྷེའི་གད་ཁང་དུ་སྦྱར།
ངེད་དྲ་ཚིགས།
