འོད་དཀར་དྲ་ཚིགས།

འཁོར་བ་རྗོད་ལ་ད་ནི་ངོ་ཡང་ཚ།།

བྱེ་མའི་རི་བོར་ལག་རྗེས་འཇོག་པ་བཞིན།།

རླུང་ཚུབ་སྐོར་ཞིག་ལྡང་བའི་དེ་མ་ཐག།།

སླར་ཡང་ངོས་སྙོམ་སྔར་ལས་མཁྲང་པོར་བསྒྱུར།།

ཀླད་པ་གྱང་གི་ངོས་སུ་བྲིས་པ་ན།།

འགྲོ་བ་རིགས་དྲུག་གང་དུའང་མི་གཏོགས་པའི།།

དཀར་ནག་སྣེ་དགུ་སྡེབ་པའི་སེམས་ཅན་ཞིག།

བུད་པར་སྙམ་ནས་ང་རང་ཅུང་ཟད་འཇིགས།།

ཟུར་མིག་མདའ་ལས་ཚ་བའི་བུ་མོ་ཞིག།

སྔས་སུ་འཕྱངས་བའི་ཐང་ཀའི་ངོས་སུ་དོད།།

འདོད་པའི་ཡི་དྭགས་སྲེད་པའི་མིག་མདངས་ལས།།

གློག་ཞུ་འོད་ཀྱང་སྐྱེངས་བའི་སྐབས་ཤིག་བྱུང་།།

རི་དག་ཆོས་འཁོར་འགྲམ་གྱི་བྱ་བྲུན་གྱིས།།

དགོན་གྱི་བད་འདབས་སྐྱ་བོར་བཏང་བ་ན།།

ཕྱོགས་མཚམས་དག་ཏུ་བཏགས་པའི་དྲིལ་བུ་སྒྲ།།

གྲོང་ལ་ཟུག་པའི་ཆོ་འཕྲུལ་ཅུང་ཙམ་མཐོང་།།

ཐོག་རྩེག་མང་བའི་ཤག་ཏུ་འབྲོངས་བ་ན།།

སྲིད་པའི་ཕུན་ཚོགས་ཞེ་ལ་འཁོར་འཁོར་བྱུང་།།

རང་ལུས་གཅེར་བུར་ཕུད་ཀྱང་ཅི་ཕན་ཏེ།།

ཁྱེད་ཀྱི་མིང་ནས་སྨོས་ཚེ་ཅུང་ཟད་ཞི།།

ངེས་འབྱུང་རྣ་བ་ཕུག་པ་ལྟ་བུ་འདི།།

བརྡ་རྟགས་ཡིན་ན་ཅུང་ཟད་དལ་བར་ཡོད།།

རྒྱུ་ལམ་སྣ་ཚོགས་འགྲིམ་པའི་ཟུར་ཞིག་ཏུ།།

བཙུན་པའི་ཁུངས་ནི་ལུང་གིས་སྐྱེལ་བར་བྱེད།།

ཐེ་འུ་ཞིག་གི་སྐྱ་རྣམས་གཞིག་པར་ཕྱོགས།།

ད་དུང་སྦྲང་མ་རེ་འགའ་དེ་རུ་འཐམ།།

བར་ཅིག་ལུས་སུ་ཤ་འོད་རྒྱུག་པ་ལྟར།།

དུས་ཀྱི་མགྲོན་པོས་ལ་མོར་སྐྱེལ་མ་ཞུས།།

མིག་ཟུང་གང་ལའང་ཕྱོགས་ཁོམ་མེད་པ་ཡི།།

དུས་ཀྱིས་བྲན་དུ་བཀོལ་བའི་མི་དག་ཀྱེ།།

བར་རྡོ་ཟེར་བའི་ས་ཚིགས་མཐའ་མ་རུ།།

ང་ལ་སྒུག་པའི་བཀའ་ཁྲོལ་གནང་བར་ཞུ།།

སྐྱེ་འཆི་ཤོག་བུ་བཞིན་དུ་གསེད་པ་ཡིས།།

ཁ་མཆུ་ཐུག་སྟེ་ཁྲིམས་རར་ཚུད་ལ་ཉེ།།

འདམ་རྫབ་ཁྲོད་ཀྱི་ཞལ་རས་དཀར་པོ་ཡིས།།

སྔར་བྱས་དག་ནི་འཕྲེང་བར་བརྩིས་ཏེ་བཤད།།

ང་ནི་མི་ཁོམ་ཟེར་བཞིན་ཁོམ་པར་གནས།།

དུར་རྡོ་དག་ལ་གཡའ་རྩི་འགོས་པར་ཡོད།།

མིང་བྱང་བརྗེས་པའི་སྟོན་མཇུག་དེ་ག་རང་།།

ཁྲོ་བ་མི་མངའ་སྡང་བའང་ག་ལ་མངའ།།

ཆོས་ཉིད་བཀའ་ལུང་ཞིག་ཏུ་འགྲེལ་ཚུལ་དེས།།

བདག་ལ་གོ་རྟོགས་ཅི་ཡང་ཐོབ་མ་གྱུར།།

ཡང་ཡང་སོང་བའི་སྨག་གི་ངོས་ཤིག་ཏུ།།

མཛའ་བའི་སྙིང་གཏམ་ཤི་རོ་མང་དུ་ཐོབ།།

དེ་མཐར་བདག་ནི་ནོར་ལ་ཆགས་པར་གནས།།

མ་རེད་རོ་སྐོགས་ཙམ་ལའང་བརྐམས་པར་གནས།།

མཆི་མ་མི་འདུག་སྡུག་ཡུས་ཇི་ལྟར་བགྲངས།།

ཕལ་པའི་མི་ནི་རྣམ་འགྱུར་རང་ལ་འཐོམ།།

རི་ཤོད་རི་སྟེང་ཉལ་བའི་སྤྲིན་གྱི་ཁྱུ།།

ལ་ཁར་ལྡིང་ཞིང་ནམ་མཁའི་བྲང་ངོར་འགྲོ།།

སྒྱིད་ལུག་ལྷས་ལ་བཏགས་པའི་ནགས་ཚལ་དག།

འགུལ་ཙམ་འགུལ་ཙམ་ངང་དུ་བདེ་བར་གནས།།

འགྱངས་བའི་སྐད་ཀྱིས་ངོ་གདོང་ནོག་འགྲོ་འམ།།

ཚིག་པ་ཟོས་ནས་རང་གཤིས་འགྱུར་སོང་ངམ།།

ང་རང་ག་ལེར་ན་ཚོད་རྫོགས་པར་འདུག།

མེ་ཏོག་ཚོགས་ནི་ཡང་བསྐྱར་སྐྱེ་བར་ངེས།།

འཆམ་བསྐྱོད་ཙམ་གྱིས་འཆར་སྣང་ཐན་ཐུན་ཡང་།།

ལམ་དང་གཞི་མདོ་མང་ས་དེ་རུ་ལུས།།

མེ་ཏོག་ཚོང་བའི་བུ་མོ་སྐོར་ཞིག་གིས།།

ཧི་མ་ལ་ཡར་མེ་ཏོག་མང་རབ་ཟེར།།

མེ་ལོང་ངོས་སུ་ང་རང་གྲུ་སུམ་ཤར།།

མི་རྣམས་མིག་ཏུ་ནར་ནར་གོར་གོར་སོགས།།

བཟོ་ལྟ་འདྲ་མིན་སྣེ་དགུ་ཤར་ན་ཡང་།།

སྤྲུལ་པ་མ་བསྟན་ང་ནི་རང་འཇགས་ཡིན།།

རི་ཞིག་ཕ་རོལ་རི་ཞིག་ཚུར་རོལ་ཏུ།།

གནའ་བོའི་སྙན་ངག་མཁན་དག་དྲན་པར་བསླེབས།།

དུས་ནི་དེ་ཚོད་མང་དུ་འདས་ཟིན་ཡང་།།

ཁྱེད་ཀྱིས་བཞེངས་བའི་སྐྱེ་དངོས་ད་དུང་ཡག།

སྐད་ངག་མི་ཁྲོལ་ཨོལ་མདུད་རྒྱུ་ཞོར་དུ།།

དགོན་པར་མཐའ་སྐོར་རྒྱག་པའི་བུ་མོར་བལྟས།།

དེ་ལས་ལྡོག་སྟེ་ནང་ལས་ཙག་ཙིག་གཉེར།།

ད་དུང་དུས་ཚོད་ཐེ་བ་མང་དུ་ལུས།།

པར་སྒྲོམ་ཞིག་ཏུ་བཤམས་ཀྱང་མི་ཆོག་པའི།།

ཁོག་གི་ནང་སྙིང་འདི་ཚོ་རྩྭ་ལྡུམ་བཞིན།།

གང་སར་བསྟབས་ཀྱང་ང་ནི་ངོ་མིི་གནོངས།།

གཞན་གྱིས་ཅི་ཞིག་ཟློ་ཡང་ཐེ་མི་ཚོམ།།

ད་ནི་ཡིག་འབྲུ་ཕལ་ཆེར་རྫོགས་གྲབས་འདུག།

སྲིད་པར་ཕུལ་བའི་སྙན་ཞུ་ཁྲི་མ་འབུམ།།

ལོ་མང་རིང་དུ་བརྫངས་ཀྱང་བསོགས་མ་གྱུར།།

སྨྲེ་སྔགས་ཕལ་ཆེར་ཆུ་བོའི་སྒྲ་དང་མཉམ།།

རྣམ་ཤེས་དམར་རྗེན་བུད་པའི་གཞུག་མ་རུ།།

མིང་ཐོ་ནག་པོ་ཅན་གྱི་མི་ཚོགས་རྣམས།།

གང་ནས་གང་དུ་བཞུད་འགྲོ་སྙམ་པའི་ཚེ།།

མེ་འཁོར་དུང་བརྡ་སྐད་ཀྱིས་ཕྱིར་ཤོག་བོས།།

དེ་མུར་འདུར་བཞིན་རྗེས་སུ་འབྲངས་བ་ན།།

གནམ་སའི་ཁ་མཚམས་ཐུག་པའི་ལྟད་མོ་མཐོང་།།

རི་ནས་མཆོང་ཞིང་ཐང་དུ་རྒྱུག་པ་ཡི།།

ཆུ་ཉལ་གཟུགས་ཀྱི་འོད་དཀར་སྐོར་ཞིག་མཐོང་།།

གཅེར་བུ་པས་2015. 4. 15. ཉིན་བྲིས།

ངེད་དྲྭ་ཚིགས།