ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་འཚོལ་བ།

འབའ་སྲས།

གངས་རི་རྩེ་ཡི་ཞི་བའི་རལ་བ་ཅན།།
ལ་རྒྱའི་མཆེ་སྡེར་མི་འཁུམས་རབ་རྣོ་བ།།
གངས་རིའི་གསེབ་ནས་བོར་བའི་གངས་སེང་ཞིག
གང་ན་ཡོད་པ་གང་གིས་ཨེ་རིག་ཐལ།།

བརྩེ་ལྡན་ཆུང་མའི་བརྩེ་བ་རུམ་ཞོར་དུ།།
ཤ་མཆེད་བུ་ཕྲུག་ཞེ་ལ་ཐོག་ཞོར་དུ།།
དོན་ཚན་ལྔ་ཡི་དར་ཆ་འཕྱར་བའི་བུ།།
བུ་རྒོད་དཔའ་ངར་ཅན་འདི་བོར་ནས་འགོར།།

བོད་རིགས་ཡིན་པས་བོད་ལ་ཞེན་པ་དཀར།།
ལ་རྒྱ་ཆེ་བས་ལ་ལུང་རྐང་པས་བགྲོད།།
སྤྱི་དོན་གཙོ་བས་རང་དོན་རིང་དུ་དོར།།
མི་འདི་བོད་མི་རྣམས་ཀྱིས་ཨེ་རིག་ཐལ།།

རང་བཙན་དགོས་ཞེས་ཁུ་ཚུར་སྐམ་པོ་ཞིག །
གྱེན་དུ་སྒྲེང་མཁན་དག་དང་མི་འདྲ་བར།།
དབུ་མའི་ལམ་ནས་དོན་གྱིས་སྐྱོད་པ་པོ།།
མི་འདི་སྐུ་ངོ་རྣམ་པས་ཨེ་རིག་ཐལ།།

ལ་རྒྱའི་སྙིང་གི་ཁྲག་དམར་དེབ་ལ་བྲིས།།
ལྟ་བ་ལངས་ཕྱོགས་བརྟན་པ་རྩོམ་དུ་སྦྲུམ།།
ཤི་ཡང་གསོན་ཡང་བོད་ཀྱི་མི་ཡིན་པ།།
མི་འདི་རྩོམ་པ་པོ་ཚོས་ཨེ་རིག་ཐལ།།

བལ་བོའི་བཙོན་ནས་དམ་བཅའ་གླུ་རུ་བླངས།།
དཀའ་སྤྱད་ལམ་གྱི་རྔུལ་ཆུས་སྙན་ངག་བཙས།།
སྙུ་གུ་ཤོག་བུ་རྩེད་ཆས་མ་བྱས་པའི།།
མི་འདི་སྙན་ངག་པ་ཚོས་ཨེ་རིག་ཐལ།།

འཛམ་གླིང་སྟེང་ན་བོར་དང་རྙེད་པ་སོགས།།
ད་ལྟ་དེ་མ་ཐག་ཏུ་བསྒྲོགས་བྱེད་ཀྱང་།།
བོད་ཀྱི་མི་འདི་བོར་ནས་ལོ་གཉིས་འགོར།།
གསར་འགོད་པ་ཚོས་མི་འདི་ཨེ་རིག་ཐལ།།

འཚེ་མེད་ཞི་བའི་ལམ་ནས་ཆས་སོང་བ།།
བདེན་པའི་ཨུ་ཚུགས་ཁྲོད་ནས་བོར་སོང་བ།།
སྲིད་དོན་པ་ཚོའི་མགོ་ནས་འཕུར་སོང་བ།།
ད་ལྟ་གར་ཡོད་ཀུན་གྱིས་ཨེ་གོ་ཐལ།།

སྐུ་ངོའི་གསུང་བཤད་ཁྲོད་ནས་མེད་སོང་བ།།
སྙན་ངག་བརྗོད་བྱའི་ཁྲོད་ནས་རྙིང་སོང་བ།།
རྩོམ་མཁན་སྙུ་གུའི་རྩེ་ནས་ལྷུང་སོང་བ།།
མི་འདིའི་ཤི་གསོན་ཀུན་གྱིས་ཨེ་གོ་ཐལ།།

སྡེ་བ་འདི་ཡི་བུ་མོ་བོར་སོང་དང་།།
ཚོ་བ་གན་གི་བུ་ཚ་མ་རྙེད་ཅེས།།
མི་འཚོལ་བརྡ་ཁྱབ་མང་མང་སྤེལ་པ་ལས།།
བོད་ཀྱི་དཔའ་བོ་འདི་ཉིད་འཚོལ་བ་གཙོ།།

འཚོ་བའི་ཆེད་དུ་ཇག་ལ་ཆས་པ་མིན།།
ནོར་གྱི་དོན་ལ་བརྐུ་ལ་སོང་མིན་པ།།
མི་རིགས་ཆེད་དུ་མི་བུ་ཁེར་འགྲོ་བ།།
དྲང་བདེན་ལམ་ནས་བོར་སོང་ཚང་མས་ཚོལ།།

ཞི་བའི་འཐད་རྩོད་པ་གླིང་ཚ་ཚེ་བརྟན་རྡོ་རྗེས་བོར་ནས་ལོ་འཁོར་གཉིས་ལོན་པའི་དུས་དྲན་དུ།
༠༧/༠༦/༠༥ ལ་ཕ་རི་སི་ནས།

ངེད་དྲྭ་ཚིགས།

1 Comment on ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་འཚོལ་བ།

  1. དོར་མ། // 06/07/2015 at 5:03 pm // Reply

    རྒྱ་དར་དམར་པོ་ཁུག་རྟའི་གཡོ་སྒྱུ་རེད།།
    འགན་ཁུར་ཅུང་ཙམ་ཁུག་རྟར་ཡོད་པར་ངེས།།
    ལམ་འགྲོ་བྱེད་མཁན་མདོ་སྨད་ཚོགས་པ་རེད།།
    དེར་ཡང་འགན་ཁུར་མེད་ཅེས་འདུག་ས་མེད།།
    བདེན་པའི་ཨུ་ཚུགས་དབུ་མའི་དམ་བཅའ་གཉིས།།
    ཟམ་གདོང་བླ་མར་འབྲེལ་བས་ཁོང་ལ་དྲིས།།
    ཞོར་ནས་གཱན་ངྷི་ཆུང་བ་ཟེར་མཁན་དང་།།
    དཔའ་བོ་ཁྱོད་འདྲ་མེད་ཅེས་བསྟོད་མཁན་ཚོས།།
    རང་གིས་བྲིས་པའི་རྩོམ་ལ་འགན་རེ་ལོངས།།
    ཁ་ནས་མ་བཤད་དོན་གྱིས་འཚོལ་དུ་སོང་།།
    སྐད་ཆ་སྙན་པོ་སུ་ཡིས་བཤད་ཀྱང་ཤེས།།
    རྒྱ་དར་དམར་པོ་ཁུར་བའི་དཔའ་བོ་དེ།།
    རྒྱ་ནག་གཞུང་ཚབ་ཁང་ལ་འཚོལ་དུ་སོང།།
    དབུ་ལམ་དམ་བཅའ་བརྟན་པའི་རྒད་པོ་དེ།།
    གངས་ཅན་སྐྱིད་གཤོངས་སྲང་ལ་བཙལ་དུ་སོང་།།
    བདེན་པའི་ཨུ་ཚུགས་བྱེད་པའི་ཕ་རྒན་དེ།།
    ཟམ་གདོང་བླ་མའི་ཐུགས་ན་གསལ་བོ་ཡིན།།
    འཚོལ་སའི་ཁ་ཕྱོགས་ཙམ་ཞིག་བསྟན་ནས་ཡོད།།
    འཚོལ་དུ་འགྲོ་མིན་ཁྱོད་ཚོའི་སེམས་ན་གསལ།།

    Like

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s