སྙན་ཐུང་གི་ཚོམ།

གཅེར་བུ་པ།

མདུན་ཐད་དུ་བལྟས་པ།

སྤྲིན་དཀར་དུམ་བུ་མགུལ་དུ་འདོགས་པ་གན་ནི།།
མིག་རྒྱང་གློད་སའི་རི་བོ་རྩེ་གསུམ་ཅན་ཡིན།།
མདང་ནུབ་ཆར་པས་སྦངས་བའི་གཏམ་བརྗོད་མི་ཁྲོལ།།
དེ་རིང་ནམ་མཁའ་སྔོ་ཞིང་དྭངས་བར་གཟིགས་དང་།།

ཉི་ཟེར་གྲིབ་ཆེན་མཉམ་དུ་ལྡང་ས་གན་ནི།།
ཆུང་དུས་རྩེ་ར་མ་ཡིན་མདུན་གྱི་རི་འདབས།།
ལྗོན་པའི་སྐེ་རྒྱན་མི་ཕུད་ཤིག་ཤིག་འགུལ་སོང་།།
སྤང་གི་མེ་ཏོག་དག་ཀྱང་ཚོད་ཚོད་བཞད་འདུག།

རི་རྐེད་དུ་བའི་ལྕང་ལོ་ཕྱུང་བ་གན་ནི།།
གཞིས་ཀྱི་འབྲོག་སྡེ་མ་ཡིན་འབྲི་གཡག་མི་མཐོང་།།
འདི་གའི་ཡུལ་མི་ཁུ་སིམ་ལྷོད་ལ་ཆགས་པ།།
ནགས་གནས་བྱེ་འུ་ཚོགས་ཀྱང་དེ་ག་རང་ཡིན།།


ག་རེ་བྱས་སོང་།

སྐྲ་ལོའི་མཛེས་པ་རླུང་ཁར་གཡེང་བའི་ཚུལ།།
ཐལ་རླུང་ག་ཚོད་དཀྲིགས་ཀྱང་མཐོང་བ་བྱུང་།།
རི་ཚོགས་ཟམ་དུ་བསྟར་བའི་ཉག་ཁ་འདིར།།
ཀུ་རེ་མི་རྩེ་སེམས་ལ་འཕྲོད་ཐབས་མེད།།

ང་ནི་ཕ་གེར་བབས་ཤིང་ཚུར་ཕྱོགས་མཆོང་།།
སྡོད་ཚུགས་བྲལ་བའི་གཤིས་ལ་ཞུགས་པ་ཡི།།
གཉིད་ཀྱི་བཟི་ཁ་སྟུག་པའི་ལམ་ཁ་རུ།།
འོ་བརྒྱལ་མང་དུ་མྱངས་བ་དོན་ཡོད་མིན།།

དཔེ་སྒྲོམ་ངོས་སུ་ཆགས་པའི་རྡུལ་དག་གིས།།
ཉིན་དང་མཚན་གྱི་རྣམ་ཤེས་གཏིང་ནས་འགྲེལ།།
བར་མཚམས་ཤིག་ནས་སྐར་མ་ཆག་ཀྲུམ་འགའ།།
ཕྲན་གྱི་ངོ་གདོང་ཁྱེར་ནས་འགྲམ་དུ་ཟགས།།


བསིལ་ལྷང་ལྷང་གི་ནངས་མོ་དེར་སྦྱར་བ།

ཤག་ཤག་ཆར་པའི་སྒྲ་ནི་ཤིན་ཏུ་རྩིང་།།
མུན་པའི་ཡོལ་བ་རླུང་གིས་ཁུར་སྙམ་ཤར།།

ནངས་མོ་རི་རྩེར་སྤྲིན་དཀར་ཁྱུ་ཞིག་སྤུངས།།
དཀར་ལ་བཀྲག་མདངས་གསལ་བ་མིག་གིས་འཚོས།།

ནགས་ཀྱི་ཁ་དོག་ལྗང་ལ་སྔོ་བ་ཡིས།།
ཚ་བའི་རླངས་པ་གཏོར་ནས་མགོ་ལྕོགས་ལྡེམ།།

ཞོགས་པར་གྲགས་པའི་མཁར་རྔའི་སྒྲ་ཡིས་ནི།།
ཉེ་བའི་ཆོས་གྲོགས་ཚོ་ལ་འབོད་བརྡ་གཏོང་།།


ཟླ་བ་རྒྱུ་མཚན་མོ་ལས་རང་ཉིད་ལ་བལྟས་པ།

ཟླ་བ་སྤྲིན་དཀར་སྲུབས་ལ་ཡིབ་པ་དང་།།
སེམས་ཆུང་བྱས་ཏེ་མུན་པའི་ལ་མོ་བརྒལ།།

མཚན་མོ་ལ་ཁར་ནམ་མཁའ་མེད་པ་ཡིས།།
བགྲོད་པའི་གོམ་འགྲོས་རླུང་གིས་བཏེགས་དང་མཚུངས།།

དེ་མཚམས་སྤྲིན་ནག་དུམ་ཞིག་ཐོན་པ་ན།།
གུས་པའི་གྲིབ་མའང་ཡལ་ནས་ཁེར་རྐྱང་གྱུར།།

2015. 6.23

ངེད་དྲ་ཚིགས།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s