མི་ཤིགས་ཐིག་ལེ།
ཆོས་ཀྱི་ཚིགས་སུ་བཅད་པ་མི་ཤིགས་
ཐིག་ལེའི་དགོད་སྒྲ།
ལས་ཀྱིས་བསགས་པའི་ལུས་རྟེན་འདི།།
ཚོར་བའི་རླུང་ཁར་རབ་དུ་འཕྱོ།།
བདེ་སྡུག་གཉིད་ཀྱི་རྨི་ལམ་ན།།
འཁྲུལ་སྣང་སྒྱུ་མའི་གད་མོ་དགོད།།
གཟུགས་ནི་མི་རྟག་འཇའ་ཚོན་སྟེ།།
མིག་གི་རྒྱལ་མོའི་ལོངས་སྤྱོད་ཉིད།།
སེམས་འདི་དེ་ཡི་རྗེས་ལ་རྒྱུགས།།
ཐོབ་མེད་ཆགས་པའི་བྲོ་གར་ཞིག།
སེམས་འདི་གསལ་བའི་མེ་ལོང་ཞིག།
སྲིད་པའི་འབྱོར་བ་ཉི་མའི་འོད།།
གང་ནས་ཕོག་པའི་འོད་ཐིག་ཅིག།
མྱུར་བའི་རྒྱུགས་མདུར་ངལ་བའི་རྒྱུ།།
རུས་པའི་གསེས་མཁར་ཤ་ཡིས་བཏུམ།།
ཁྲག་དང་རྣག་གི་མཛེས་ཆོས་སྤྲས།།
ནམ་ཞིག་གཏོར་བའི་ས་ཕྱོགས་དེར།།
ཁྱེད་ཀྱང་འགྲོ་བར་འཚེར་སྣང་ཞིག།
དགའ་སྣང་མཐུན་པའི་ལག་གཡུག་འདི།།
དུང་བ་ཆུ་ཡི་རླབས་རིས་བཞིན།།
ནམ་ཞིག་རླུང་དེ་འཇག་པ་ན།།
ཅི་ཡང་མེད་པའི་སྟོང་སྣང་ཞིག།
འཁོར་བའི་གྲོང་ཁྱིམ་ཉམས་དགའ་འདི།།
རྩ་ཕུང་བསགས་པའི་གྲོག་ཚང་བཞིན།།
སྙིང་བོ་བྲལ་བའི་བསགས་པ་འདི།།
མཚར་སྣང་སྒྱུ་མའི་ལྟད་མོ་ཞིག།
ཆགས་དང་སྡང་བའི་སེམས་ངོགས་ན།།
འཇིག་རྟེན་གློག་གི་ཟློས་གར་བཞིན།།
ཅི་ཡང་མེད་བའི་རང་བཞིན་ལ།།
ཤི་ཡང་འཐམ་ནས་གྲོལ་ཐབས་བྲལ།།
གཟའ་སྐར་འགྲོས་དང་མཐུན་པར་ཡང་།།
ཁྱེད་ཀྱི་ལུས་འདི་ལྗོན་ཤིང་བཞིན།།
དུས་བཞིའི་འགྱུར་བག་རེ་རེའི་ཁྲོད།།
འགྱུར་བའི་སེམས་འདི་བསླུ་བའི་ཆོས།།
ལུས་འདི་རིན་ཆེན་སྐས་ཚུགས་ཤིག།
སེམས་འདི་སྐས་སྟེང་ལོང་བ་ཞིག།
ཚོར་བ་བྱིས་པ་བྲ་ཚགས་ཤིག།
གང་ལ་འཐེན་པ་སུ་ཡིས་རྟོགས།།
སྣང་བ་འདི་ཡང་སྒྱུ་ཚོགས་ཙམ།།
ཚོར་བའི་རླུང་གིས་རབ་ཏུ་གཡོས།།
སྟོང་བའི་འཇའ་ཚོན་རི་མོ་བཞིན།།
དཔྱད་ན་སྣང་ཤེས་འཁྲུལ་བ་ཙམ།།
༢༠༡༥:༦:༢༥ ལ།
ངེད་དྲ་ཚིགས།
