ཀེ་ཐོ། སྨྱུག་མིང་། གློག་ཞགས།
༡༩༧༡ ལོར་མདོ་སྨད་མང་རྫོང་བན་གསར་དུ་སྐྱེས་ཤིང་། ཕ་ཡུལ་ལྡོང་གི་ཤུལ་ཆེན་བཅོ་བརྒྱད་ཀྱི་ཡ་གྱལ་བན་ཤུལ་ཡིན། སྐྱེས་ཡུལ་བན་གསར་སྡེ་བའི་བྱམས་སྐྱོང་ལ་བརྟེན་ནས་ཡུལ་དེའི་སློབ་ཆུང་ནས་བསླབ་བསྦྱང་གི་རྡོག་ངོར་ས་འགོས་ཏེ་རིམ་བཞིན་སློབ་གྲྭ་ཆུང་འབྲིང་བརྒྱུད་ནས། གོ་གཉིས་ལོར་ནུབ་བྱང་མི་རིགས་སློབ་ཆེན་གྱི་བོད་ཡིག་སྡེ་ཁག་གི་བོད་རྒྱ་སྐད་གཉིས་འཛིན་གྲྭ་ནས་སློབ་མཐར་ཕྱིན། གཅིག་དགུ་གོ་བདུན་ལོར་ནུབ་བྱང་མི་རིགས་སློབ་ཆེན་གྱི་དབྱིན་ཡིག་སྡེ་ཁག་ནས་སློབ་མཐར་ཕྱིན།
སྔ་ཕྱིར་བོད་དང་རྒྱ་གར། ཨ་རི་བཅས་སུ་གནས་སྡོད་བྱས་པའི་རིང་ལ་དྲུང་ཡིག་དང་རྩོམ་སྒྲིག་གི་ལས་ཀ་གཉེར་ཞིང་། རྒྱལ་སྤྱིའི་ཕཱེན་རྩོམ་པོ་མཐུན་ཚོགས་ཀྱི་ཚོགས་མི་དང་རྒྱལ་སྤྱིའི་ཕཱེན་བོད་ཀྱི་རྩོམ་པ་པོ་མཐུན་ཚོགས་ཀྱི་རྒྱུན་ལས་ཟུར་བ་བཅས་ཡིན། ད་ལྟ་ཨ་རིའི་རྒྱལ་ས་ཝ་ཞིན་ཐིན་ཏུ་ཡོད་པའི་ཨེ་ཞི་ཡ་རང་དབང་རླུང་འཕྲིན་ཁང་གི་སྙན་སྒྲོན་པ་དང་གསར་འགོད་པའི་ལས་ཀ་གཉེར་བཞིན་ཡོད།
བོད་དུ་མང་ཚོགས་སྒྱུ་རྩལ་དང་བོད་ལྗོངས་ཞིབ་འཇུག་ལྷོ་ཁའི་རྩོམ་རིག་སྒྱུ་རྩལ་བཅས་ཀྱི་སྟེང་དུ། དབྱིན་ཡིག་གི་བསྒྱུར་རྩོམ་དང་ལོ་རྒྱུས་དཔྱད་རྩོམ་སོགས་བཏོན་མྱོང་ཡོད། རྒྱ་གར་དང་ཨ་རིར་གནས་སྡོད་བྱས་པའི་རིང་ལ་དག་གསར་དང་ཁ་བ་སོགས་དཔེ་དེབ་ཉི་ཤུ་ལྷག་རྩོམ་སྒྲིག་བྱས་ཤིང་། འཛམ་གླིང་གི་བརྩམས་སྒྲུང་གྲགས་ཅན་ཨན་ན་ཁ་རེ་ནེ་ན་ཞེས་པའི་དབྱིན་ཡིག་གི་བསྡུས་དེབ་བོད་ཡིག་ཏུ་བསྒྱུར་དེ་པར་སྐྲུན་དང་། རྒྱ་གར་དང་ཨ་རི་སོགས་འཛམ་གླིང་གི་རྒྱལ་ཁབ་འདྲ་མིན་དུ་བོད་རྒྱ་དབྱིན་གསུམ་གྱི་དཔྱད་རྩོམ་དང་སྙན་རྩོམ། བསྒྱུར་རྩོམ་སོགས་བརྒྱ་ལྷག་འདོན་སྤེལ་བྱས་ཡོད་ལ། དབྱིན་ཡིག་གི་བོད་ཀྱི་རྩོམ་རིག་གི་ཕྱི་མིག་ཅེས་པའི་དཔྱད་རྩོམ་དེ་ཉིས་སྟོང་བདུན་ལོར་ཨ་རིའི་ཨིན་རྡི་ཨན་ན་སློབ་ཆེན་གྱི་ལེགས་རྩོམ་དུ་བདམས་ཐོན་གྱིས་སྒྲོག་སྦྱོང་བྱས་ཡོད་ལ། དབྱིན་ཡིག་གི་སྙན་རྩོམ་ང་ལ་ཕ་ཡུལ་ཞིག་ཡོད་མྱོང་ཞེས་པའི་རྩོམ་ཡིག་དེ། འཛམ་གླིང་གི་རྒྱལ་ཁབ་བརྒྱ་ལྷག་གིས་གྲུབ་པའི་རྒྱལ་སྤྱིའི་ཕཱེན་རྩོམ་པ་པོ་མཐུན་ཚོགས་ཀྱིས་རྩོམ་པ་པོ་ཆིག་སྟོང་ལྷག་ལས་ལེགས་བདམས་བྱས་པའི་རྩོམ་ཡིག་ལེགས་གྲས་ལྔ་བཅུའི་ཁོངས་སུ་བདམས་དེ་འཛམ་གླིང་གི་དཔེ་ཁང་གང་སར་འགྲེམས་སྤེལ་བྱས་པ་མ་ཟད། དབྱིན་ཇིའི་རྩོམ་པ་པོའི་མཐུན་ཚོགས་ཀྱི་ཚོགས་གཙོ་ཨན་ཐོ་ཉེའུ་ལགས་ཀྱིས་དམིགས་བསལ་གྱིས་བསྟོད་བསྔགས་དང་གདེང་འཇོག་ཐོབ་ཡོད། ལེགས་བདམས་བྱས་པའི་རྩོམ་ཡིག་ལྔ་བཅུའི་བདག་ཉིད་ཅན་གྱི་དཔེ་དེབ་དེའི་ནང་དུ། ཉིས་སྟོང་ལྔ་ལོར་ནོ་བྷེལ་རྩོམ་རིག་བྱ་དགའ་ཐོབ་པའི་ཧཱ་རོལ་དྷི་ཕེན་ཐིར (HaroldPinter) མཆོག་གི་འཆི་བ་ཞེས་པའི་སྙན་རྩོམ་དང་། ཉིས་སྟོང་དྲུག་ལོར་ནོ་བྷེལ་རྩོམ་རིག་བྱ་དགའ་ཐོབ་མཁན་ཨོར་ཕམ་ཁི་མཆོག་ (OrhanPamuk) གི་སྨྱུ་གུའི་རང་དབང་ཞེས་པའི་རྩོམ་ཡིག།གཞན་ཡང་གོ་གཅིག་ལོར་ནོ་བྷེལ་ཞི་བདེ་རྟགས་མ་ཐོབ་མཁན་ལྕམ་ཨང་སང་སུའུ་ཇི་མཆོག་ (AungSanSuuKyi) གི་འཇིགས་སྐྲག་ལས་བྱུང་བའི་རང་དབང་ཞེས་པའི་ལྷུག་རྩོམ་སོགས་བདམས་ཡོད།
གཞན་ཡང་རྩོམ་ཡིག་ཁ་ཤས་ཉི་ཧོང་དང་ར་ཞི་ཡའི་སྐད་དུ་བསྒྱུར་ནས་དེ་གའི་དུས་དེབ་གྲགས་ཅན་དུ་འདོན་སྤེལ་བྱས་ཡོད་པ་བཅས་སོ༎
ངེད་དྲ་ཚིགས།
