ཙོང་ཁ་ཚེ་བརྟན་རྒྱལ།
༡
མུན་པའི་ཕ་རོལ།
གླེང་འཕྲོ་ཞིག
ངས་ཤར་དུ་ཁྱོད་ཡོད་སྙམ།
ཁྱོད་ནི་རླུང་བུའི་གསེབ་ལ་ཟུག
འཁྱམས་པོའི་ལོ་ཟླ།
དྲན་འཕྲོ་ཞིག
ངས་ནུབ་ཏུ་ཁྱོད་མེད་བསམ།
ཁྱོད་ནི་ཁ་བའི་ཀློང་དུ་འདར།
༢
འཇབ་རྒྱུ་མེད་པའི་ལས་ཤིག་གིས།
མཇལ་འཛོམས་དེ།
གྱེས་བྲལ་གྱིས་ཁྲིད།
མཐོང་རྒྱུ་མེད་པའི་དུས་ཤིག་གིས།
གཞིས་ཀ་དེ།
ཁྱི་སྐད་ཀྱིས་དཀྲོགས།
ངས་ད་དུང་།
སྒུག་དགོས་པ་མང་པོ།
བཙལ་དགོས་པ་མང་པོ།
ཆོས་ཉིད་ལྟར་ཞུ་འདོད།
ཁྱོད་ངའི་ཐག་ཉེ་རུ་མི་འདུག
༣
ཁྱོད་ཀྱིས་ཁ་བར་ཉན་བཞིན་ཡོད་དམ།
ངའི་ཨ་ཇོ།
རི་ཆུ་སྟོང་ཕྲག་གིས།
ངེད་གཉིས་བར་ལ་རྒྱང་རིང་ཞིག་བཞེངས།
ངས་ཁྱོད་ཉིད་རི་མོ་རུ་བྲིས་ཀྱང་།
ཁྱོད་ནི་ཁ་དོག་ཅིག
ངས་ཁྱོད་ཉིད་སྙན་ངག་ལ་བཅོལ་ཡང་།
ཁྱོད་ནི་ཡིག་འབྲུ་ཞིག
༤
གལ་ཏེ་མི་ཡུལ་ཟེར་བ།
བཤད་མི་ཆོག་ན།
ཨ་ཇོ་ལགས།
གལ་ཏེ་བརྩེ་དུང་ཟེར་བ།
དྲན་མི་ཉན་ན།
ཨ་ཇོ་ལགས།
གལ་ཏེ་དྲན་གདུང་ཟེར་བ།
གསོག་མི་ཆོག་ན།
ཨ་ཇོ་ལགས།
༥
ལྕགས་རི་མཐོ་ན་མཐོ་ན།
ཁྱོད་ཀྱིས་བྱེའུ་སྐད་ཨེ་ཚོར།
ལྕགས་རི་མཐུག་ན་མཐུག་ན།
ཁྱོད་ཀྱིས་ཉི་འོད་ཨེ་མཐོང་།
༦
ཨ་ཇོ ངས་ག་དུས་ཁྱོད་རྙེད།
འབོད་དཀའ་བའི་ཁྱོད།
ནམ་ཡང་ས་ཆ་གཞན་ཞིག་ཏུ་ཡོད་དམ།
དེ་རུ་ཁྱོད་གཅིག་པུ་ཡིན་ནམ།
༢༠༡༥ ། ༡༡ ། ༡༣- ༡༦
བདག་དབང་ངེད་དྲ་ཚིགས་ལ་ཡོད་པས་གང་བྱུང་འཁྱེར་མི་ཆོག
