ཟླ་མཚན་ཆད་པ་དང་རང་ཉིད་བདེ་སྲུང་སྐོར།

       ལང་ཚོ་རྒྱས་དུས་དང་ཟླ་མཚན་ཆད་པའི་དུས་ནི་བུད་མེད་ཅིག་གི་མི་ཚེ་གང་བོའི་སྐྱེ་འཕེལ་གྱི་གསང་རྒྱུད་ཟགས་གཤེར་ལ་འགྱུར་ལྡོག་ཆེན་པོ་འབྱུང་བའི་དུས་གཉིས་ཡིན། ལང་ཚོ་རྒྱས་པའི་དུས་ནི་བུད་མེད་ཚོའི་ཁམས་དམར་འབྱུང་གནས་ཀྱི་འགུལ་སྐྱོད་ཇེ་དྲག་ཏུ་འགྲོ་བ་དང་། ལང་ཚོ་སྨིན་ཞིང་སྐྱེ་འཕེལ་ནུས་པ་ཡོངས་སུ་རྒྱས་པའི་དུས་སླེབས་པ་དང་། ཟླ་མཚན་ཆད་པའི་དུས་ནི་ཁམས་དམར་འབྱུང་གནས་ཀྱི་ནུས་པ་ཇེ་ཞན་དུ་སོང་སྟེ་སྐྱེ་འཕེལ་ནུས་པ་ཉམས་པའི་དུས་སུ་ཐོན་པའི་རྟགས་རེད།  ཁམས་དམར་འབྱུང་གནས་ཀྱི་ནུས་པ་ཇེ་ཞན་དུ་འགྲོ་བ་ནི་སྐྱེ་འཕེལ་གྱི་གོ་རིམ་ཞིག་ཡིན་ལ།  དུས་ཡུན་རིང་པོའི་ནང་མི་རྣམས་ཀྱིས་དེ་ལ་“རྒས་རྟགས་མངོན་པའི་དུས”ཞེས་ཟེར་བཞིན་ཡོད།  ཟླ་མཚན་ཆད་པ་ནི་བུད་མེད་ཅིག་གི་མི་ཚེ་གང་བོར་ངེས་པར་དུ་འབྱུང་བའི་ལུས་ཁམས་ཀྱི་བརྒྱུད་རིམ་ཞིག་ཡིན་པས།  ལོ་ཚོད་དེའི་བུད་མེད་ཀྱི་ཁམས་དམར་འབྱུང་གནས་ཀྱི་ནུས་པ་ཇེ་ཞན་དང་།  བུད་མེད་ཀྱི་སྐུལ་རྒྱུའི་ཆུ་ཚད་ཇེ་དམའ་རུ་སོང་བ་དང་། བུད་མེད་ཀྱི་སྐུལ་རྒྱུས་ཀླད་ཞབས་འཕྱང་གཟུགས་ཀྱི་ཟགས་ཐོན་གྱིས་གསང་རྟགས་གཤེར་རྨེན་གྱི་སྐུལ་རྒྱུ་ལ་ཡར་སྐུལ་བྱེད་པར་མ་ཟད།  ཨོལ་གོང་གཤེར་རྨེན་གྱི་སྐུལ་རྒྱུ་དང་མཁལ་མའི་སྟེང་གི་སྐྱི་མོའི་སྐུལ་རྒྱུའི་ཟགས་ཐོན་ཇེ་མང་དུ་སོང་སྟེ།  ལུས་ཁམས་ནུས་པ་ཇེ་ཞན་དུ་འགྲོ་སྲིད།  ཨོལ་གོང་གཤེར་རྨེན་དང་མཁལ་མའི་སྟེང་གི་གཤེར་རྨེན་གྱི་སྐྱི་མོའི་ནུས་པ་གཟུགས་པོའི་ནུས་ཚད་ལས་བརྒལ་བའི་རྟགས་འབྱུང་བ་དང་། དེའི་ཁར་མི་དར་མའི་དུས་སུ་ལས་གནས་སྟེང་འགན་ལྗིད་མོ་ཁུར་བ་དང་སྒོ་ཕྱི་ནང་གི་ལས་ཀར་བྲེལ་བ་ཆེ་པས།ཅིས་ཀྱང་ངལ་བ་དང་འཁང་རར་བཟོད་བསྲན་བྱེད་དགོས།  དུས་ཡུན་རིང་པོར་བྱ་བའི་ཁུར་བོ་ལྗིད་མོ་ཁུར་བས་དབང་རྩ་དང་གསང་རྒྱུད་ཟགས་གཤེར། རིམས་འགོག་མ་ལག་གི་སྙོམ་སྒྲིག་ནུས་པ་ཉམས་ནས་ནད་རིགས་གཞན་པ་འབྱུང་སྲིད།  དེ་བས་ཟླ་མཚན་ཆད་པའི་དུས་ཀྱི་བུད་མེད་ཚོས་ནན་ཏན་གྱིས་རང་ཉིད་ཀྱི་བདེ་ཐང་ལ་སྲུང་སྐྱོང་བྱེད་རྒྱུ་ནི་བུད་མེད་ཚོའི་འཚོ་བའི་སྤུས་ཚད་དང་ཚེ་སྲོག་གི་སྤུས་ཚད་ཇེ་མཐོར་གཏོང་བར་ཧ་ཅང་གལ་ཆེ་བས།  ཟླ་མཚན་ཆད་པའི་བུད་མེད་ཚོས་གཤམ་གྱི་དོན་དག་སྐོར་ནས་ཅིས་ཀྱང་ཉམས་འཇོག་བྱེད་དགོས།   
      


གཅིག རང་ཉིད་ཀྱི་སེམས་ཁམས་བདེ་སྲུང་བྱེད་དགོས།

  
       ཟླ་མཚན་ཆད་པའི་དུས་སྐབས་ཀྱི་བུད་མེད་ཚོས་མི་ལོ་བཅུ་ཕྲག་འགའི་རིང་གི་དཀའ་སྡུག་གང་མང་བརྒྱུད་མྱོང་བས།  བྱ་དངོས་གང་ལ་ལྟ་ཞིབ་དང་ཐག་གཅོད་བྱེད་པའི་ཉམས་མྱོང་མང་པོ་བསགས་ཡོད།  དེ་བས་རང་ཉིད་ཀུན་ལ་མཁས་པར་སྙམ་ནས་རང་གི་ལྟ་བ་གཞན་ལ་བཀལ་ན་གཞན་གྱིས་གོ་ནོར་འབྱུང་ཡང་སྲིད་པ་དང་།  ད་རུང་དུས་སྐབས་དེའི་བུད་མེད་ཚོར་སུན་སྣང་སྐྱེ་བ་དང་། ཁོང་ཁྲོ་ལངས་སླ་བ། སྐྱོ་སྣང་སྐྱེ་བ། སེམས་ཁྲལ་ཆེ་བ་སོགས་ཀྱི་སྣང་ཚུལ་འབྱུང་སྲིད་པས། སེམས་ཁམས་བཟང་བོ་རྒྱུན་འཁྱོངས་བྱེད་པ་དང་རང་ཉིད་ལ་ངོས་འཛིན་ཡང་དག་བྱེད་པ་དང་། གཞན་ལ་ཐལ་དྲགས་པའི་བླང་བྱ་ནན་མོ་མི་འདོན་པ་བཅས་ནི་ཧ་ཅང་དགོས་གལ་ཆེ་བ་ཞིག་ཡིན། དོན་དག་ལ་འཕྲད་ན་གཞན་ལ་གྲོས་བྱེད་པ་དང་འདས་ཟིན་པའི་འོད་སྟོང་འབར་བའི་ལོ་རྒྱུས་དང་བྱས་རྗེས་དེ་འདྲ་ངོམ་ངོམ་མི་བྱེད་པར། སེམས་མི་བདེ་བའི་དོན་དག་དང་འཕྲད་པའམ་གནད་དོན་ཞིག་ལ་གོ་བ་མི་ལོན་པའི་སྐབས་སུ་སེམས་ལ་བཟུང་ནས་མི་འདུག་པར་བསམ་བློ་གཏོང་སྟངས་བསྒྱུར་དགོས། དཔེར་ན་འཆམ་འཆམ་དུ་འགྲོ་བ། བརྙན་འཕྲིན་དང་གློག་བརྙན་ལ་བལྟ་བ། དཔེ་ཆར་བལྟ་བ་བཅས་བྱས་ན་གནད་དོན་ཐག་གཅོད་པའི་བྱེད་ཐབས་རྙེད་ཀྱང་སྲིད་ལ། མི་གཞན་པ་བྱ་བ་དང་སློབ་སྦྱོང་། འཚོ་བའི་ཁྲོད་ཐུག་པའི་གནད་དོན་ལ་གྲོས་བསྡུར་དང་བློ་འདོན་བྱས་ན་རང་ཉིད་ཀྱི་བློ་སྒོ་འབྱེད་པ་དང་། སྐབས་སྐབས་སུ་སྙིང་རླུང་སྟོད་ལ་འཚངས་པ་དང་འཚིག་པ་ཟ་བ། སེམས་འཚབ་པ། གཉིད་མི་ཁུག་པ་བཅས་བྱས་ན་མི་མེད་སར་སོང་ནས་སྐད་གསེང་མཐོན་པོས་ཀི་འདེབས་པ་དང་གླུ་དབྱངས་ལེན་པ། དཔེ་ཆ་འདོན་པ་བཅས་བྱས་ཏེ་སེམས་ཁམས་བདེ་རུ་འབབ་ཏུ་འཇུག་དགོས།


 གཉིས། རང་གིས་རང་ལ་བདེ་ཐང་བརྟག་དཔྱད་བྱེད་ཤེས་དགོས།

 
       དུས་རབས་ཉེར་གཅིག་པའི་མིའི་བདེ་ཐང་གི་ཚད་གཞིའི་ནང་དུ་ཚེ་སྲོག་གི་རྒྱུ་སྤུས་དང་འཚོ་བའི་སྤུས་ཚད་འདུས་ཡོད། བུད་མེད་ཚོས་དུས་རྒྱུན་གྱི་བྱ་བ་དང་འཚོ་བའི་ཁྲོད་ངེས་པར་དུ་བདེ་ཐང་གི་ཚད་གཞི་དང་རྒྱུན་མཐོང་ནད་ཀྱི་སྔ་བལྟས་ཁོང་དུ་ཆུད་པར་བྱས་ཏེ། རང་གིས་རང་ལ་བརྟག་དཔྱད་བྱེད་པའི་ནུས་པ་ཇེ་མཐོར་གཏོང་དགོས་པ་དང་། དུས་བཅད་ལྟར་རང་ཉིད་ལ་བརྟག་དཔྱད་དང་འབྱུང་གཞིའི་གནས་ཚུལ་ཟིན་ཐོར་བཀོད་ན་ད་གཟོད་དུས་ཐོག་ཏུ་བདེ་ཐང་ཡིན་མིན་དང་རྒྱུན་མཐོང་ནད་ཀྱི་སྔ་བལྟས་ཡིན་མིན་ཤེས་ཐུབ་པས།  སྔ་མོ་ནས་གསོ་བཅོས་བྱས་ཏེ་རང་ཉིད་ཀྱི་བདེ་ཐང་ལ་སྲུང་སྐྱོབ་བྱེད་དགོས།


༡༽ ནམ་རྒྱུན་སེམས་ཞིབ་མོས་བདེ་སྲུང་བཟང་པོ་བྱས་ན། འཚོ་བར་བདེ་སྐྱིད་ལྡན་ངེས།

       བུད་མེད་ཞིག་ལ་མཚོན་ནས་བཤད་ན་ནམ་རྒྱུན་སེམས་ཞིབ་མོས་བདེ་སྲུང་བྱེད་རྒྱུ་དེ་ཧ་ཅང་གལ་ཆེ། བུད་མེད་ཀྱི་བདེ་ཐང་གི་སྐོར་ནས་གླེང་ན་ཕྱི་ལུས་ཀྱི་བདེ་ཐང་ཁོ་ན་ཙམ་ཞིག་ལ་ངོས་མི་འཛིན་པར་གཙོ་བོ་ནང་སེམས་ཀྱི་བདེ་ཐང་ལ་རག་ལས་ཡོད། ཁ་དཔེར་ཡང་སེམས་མ་བདེ་ན་ལུས་མི་བདེ་ཟེར་བ་ལྟར་ང་ཚོར་སྤྲོ་སྐྱིད་ཀྱི་སེམས་ཁམས་ཞིག་དང་བདེ་ཐང་གི་ལུས་ཕུང་ཞིག་ཡོད་ན། ད་གཟོད་འཚོ་བར་དོན་སྙིང་ལྡན་པ་དང་མགོ་མཇུག་ཡོད་པ་རེད། ང་ཚོས་རང་ཉིད་ཀྱི་ལུས་སེམས་གཉིས་ཀར་བདེ་སྲུང་བྱེད་དགོས་པར་མ་ཟད། ད་དུང་བཟའ་མི་གང་བོའི་བདེ་སྲུང་ལའང་འགན་ལེན་བྱེད་དགོས་པས། ནམ་རྒྱུན་སེམས་ཞིབ་མོས་བདེ་སྲུང་བཟང་པོ་བྱས་ན། བདེ་ཞིང་སྐྱིད་པའི་འཚོ་བར་རོལ་ཐུབ།


༢༽ ཅིའི་ཕྱིར་དེང་སྐབས་བུད་མེད་ལ་འབྲས་སྐྲན་ནད་འབྱུང་ཚད་ཇེ་མང་དུ་འགྲོ་བཞིན་ཡོད་པ་རེད།

     དཔལ་འབྱོར་གོང་འཕེལ་དང་འགྲན་རྩོད་ཉིན་རེ་ལས་ཉིན་རེར་ཛ་དྲག་ཏུ་འགྲོ་བའི་སྐབས་འདིར། འཚོ་བ་དང་བྱ་བའི་ཁྲོད་ཀྱི་གནོན་ཤུགས་ཆེན་པོས་མི་ལུས་བདེ་ཐང་ལ་ཤུགས་རྐྱེན་ཐེབས་བཞིན་ཡོད་པ་རེད། བུད་མེད་ཀྱི་བསམ་སེའུ་དང་བུ་སྣོད་ནི་གནོན་ཤུགས་ཚོར་དབང་ཡིན། སྤྱིར་བུ་སྣོད་དེ་ཁུ་ཚུར་གྱི་ཆེ་ཆུང་ཙམ་ཞིག་ལས་མེད་མོད། བུད་མེད་ལ་མངལ་སྦྲུམ་རྗེས་མངལ་གནས་ཕྲུ་གུ་རིམ་གྱིས་ལག་ཆགས་པ་དང་བསྟུན་ནས་བུ་སྣོད་ཀྱང་ལྡབ་འགའི་ཇེ་ཆེར་འགྲོ་བ་རེད། ང་ཚོའི་སེམས་ཁམས་མ་སྐྱིད་པར་སེམས་ཁུར་ཆེན་པོ་བྱུང་བ་དང་དེ་དུས་ཐོག་ཏུ་སྙོམས་སྒྲིག་བྱེད་མ་ཐུབ་ན། ནང་གི་ཟགས་ཐོན་རྙོག་འཁྲུག་བཏང་ནས་ཟླ་མཚན་རྒྱུན་ལྡན་མིན་པར་བཟོ་བའམ་བུ་སྣོད་དང་བསམ་སེའི་ལ་ནད་བསྐྱེད་པ་རེད། དེའི་ཕྱིར་བུ་སྣོད་དང་བསམ་སེའི་ནད་དང་བུད་མེད་ཀྱི་སེམས་ཁམས་གཉིས་ལ་འབྲེལ་བ་ཆེན་པོ་ཡོད་པ་རེད། གནོན་ཤུགས་གྱི་རྒྱུ་རྐྱེན་ལས་གཞན་བུད་མེད་རྣམས་ལ་རང་ལུས་བདེ་ཐང་ཡོང་བར་བྱེད་པའི་ཕྱོགས་ལ་ནོར་འཁྲུལ་ལམ་མི་འདང་ས་འགའ་རེ་གནས་པ་དེའང་བདེ་ཐང་ཕྱོགས་གྱི་རྩ་བའི་གནད་དོན་རེད། བུད་མེད་ལ་ལ་ཞིག་ལ་རང་ལུས་བདེ་སྲུང་བྱེད་པའི་འདུ་ཤེས་ཧ་ཅང་ཞན་པ་རེད། དཔེར་ན། བུད་མེད་ལ་ལས་དུས་གཏན་འཁེལ་སྒོས་ལུས་ཕུང་ལ་ཞིབ་བཤེར་བྱེད་པ་སོགས་གཏན་ནས་མི་བྱེད་པ་དང་། ནད་བྱུང་ནའང་མཐའ་འཇུག་མ་གཏོགས་སྨན་ཁང་དུ་མི་འགྲོ་བས། དུས་ཐོག་ཏུ་གསོ་བཅོས་བྱེད་པའི་གོ་སྐབས་བཟང་པོ་འཆོར་ཏུ་བཅུག་ནས་མཐའ་མ་མི་ཤི་རྒྱུ་སྟོང་གི་མཇུག་འབྲས་ངན་པ་འབྱུང་བཞིན་ཡོད་པ་རེད།


༣༽ ནད་སྟོན་པར་ངོ་ཚ་རུ་བརྩི་བ།    

       བུད་མེད་ལ་ལས་ལུས་ཀྱི་སྐྱེ་འཕེལ་ཕྱོགས་ནས་མི་བདེ་བའི་སྐབས་སུ་མི་བཤད་པ་དང་མཚན་མའི་བདེ་སྲུང་གི་ཕྱོགས་ནས་ལྷག་ཏུ་ཚིག་གཅིག་ཀྱང་མི་བཤད་པ་རེད། ད་དུང་བུད་མེད་མང་པོ་ཞིག་གིས་སྒོར་བརྒྱ་ཕྲག་འགའ་བཀོལ་ནས་ངོ་ཕུར་དང་སྐག་རྫས་སྣ་ཚོགས་གང་འདོད་དུ་ཉོ་བཞིན་ཡོད་རུང་། སྒོར་བཅུ་ཕྲག་འགའ་བཀོལ་ནས་ལུས་ཕུང་ལ་ཞིབ་བཤེར་གཏན་ནས་བྱེད་མི་སྲིད།  ལུས་ཕུང་ལ་ཞིབ་བཤེར་བྱེད་པ་དེ་ཁོ་མོ་ཚོའི་སེམས་སུ་ཧ་ཅང་ངོ་ཚ་བ་དང་དཀའ་ཚེགས་ཞིག་ཏུ་བརྩི་བཞིན་ཡོད་པ་རེད། ནད་བྱུང་ཡོད་པའི་བུད་མེད་ཧ་ཅང་མང་པོ་ཡོད་ནའང་སྨན་ཁང་དུ་ནད་སྟོན་པར་ཡོང་མཁན་ཧ་ཅང་ཉུང་ཉུང་ཙམ་རེད།བུད་མེད་ལ་ལས་རང་ཉིད་ཀྱི་བདེ་ཐང་སྣང་མེད་དུ་བཞག་ནས་ཁྱིམ་མིའི་བདེ་ཐང་གི་གནད་དོན་ལ་གཙིགས་ཆེན་བྱེད་བཞིན་ཡོད། དེ་ལྟ་བུའི་བུད་མེད་ཚོས་ནམ་ཡང་རང་ཉིད་བརྗེད་དེ་བཟའ་མིའི་བདེ་སྡུག་ཁོ་ན་བསམ་བཞིན་ཡོད། སྨན་ཁང་དུ་ནད་སྟོན་པར་ཡོང་བའི་དབང་དུ་བཏང་ནའང་སྐབས་འགར་ངོ་ཚ་ནས་རང་གི་ནད་ཀྱི་གནས་ཚུལ་སྨན་པར་གསལ་བོར་བཤད་མི་ཐུབ། དོན་དངོས་སུ། སྐྱེ་འཕེལ་དང་མཚན་མའི་བདེ་སྲུང་ནི་བུད་མེད་ཀྱི་བདེ་ཐང་གི་གནད་དོན་གཙོ་བོ་ཞིག་ཡིན་མོད། འོན་ཀྱང་མི་རྣམས་ཀྱིས་དེ་ངོ་ཚ་ཞིག་ཏུ་བརྩིས་ནས་སྨན་པར་བཤད་ཐུབ་ཀྱིན་མེད་པ་རེད། སྤྱིར་བུད་མེད་རྣམས་ཀྱིས་ངོ་ཚར་མི་འཛེམས་པར་རང་ཉིད་ཀྱི་གནས་ཚུལ་སྨན་པར་གསལ་བོར་བཤད་ནས་ནད་བབ་འགོར་འགྱངས་སུ་མི་གཏོང་བ་དང་རང་གིས་རང་ལ་གཅེས་ཤེས་ན་ད་གཟོད་དེ་ལས་ལྷག་པས་གཞན་ལ་གཅེས་ཐུབ།


༤༽ བདེ་སྲུང་ལ་དོ་སྣང་བྱས་ན།  མི་ཚེའི་གནད་འགག་གི་སྐབས་སུའང་བདེ་བླགས་ངང་བགྲོད་ཐུབ།

      མི་ཚེ་ནི་ཧ་ཅང་ཐུང་བ་དང་། ལོ་སོ་ལྔའི་སྔོན་ནི་ང་ཚོའི་ལུས་ཕུང་ཧ་ཅང་བདེ་ཐང་གི་སྐབས་ཡིན་པ་དང་། སྐབས་དེར་ལུས་སྟོབས་དང་ནད་འགོག་ནུས་ཤུགས་ཆེས་བཟང་བས་ནད་གཞི་ཡང་མོ་འགའ་རེ་རང་བཞིན་གྱིས་དྲགས་འགྲོ་བ་རེད། འོན་ཀྱང་ལོ་སོ་ལྔ་ནས་ཞེ་ལྔའི་བར་སྐབས་དེར་ནད་རིགས་སྣ་ཚོགས་ཐོག་མར་ལུས་སྟེང་དུ་འབྱུང་བའི་སྐབས་ཡིན་པས། སྐབས་དེར་ནད་གཞི་ཕྱིར་མི་མངོན་ནའང་རང་གི་སྣང་བར་ལུས་པོ་སྔོན་དང་མི་འདྲ་བར་ལུས་སྟོབས་ཇེ་ཞན་དུ་འགྲོ་བ་དང་། ཐང་ཆད་སླ་བ།  ལྷག་པར་དུ་སེམས་ཁམས་མི་བདེ་བའི་སྣང་ཚུལ་འབྱུང་སླ།
ལོ་ཞེ་ལྔ་ནས་རེ་ལྔའི་སྐབས་དེ་ནི་ནད་རིགས་སྣ་ཚོགས་ཕྱིར་མངོན་པའི་དུས་ཡིན་པས།མི་ཚེའི་གནད་འགག་གི་དུས་སྐབས་འདིར་ཚང་མས་མཉམ་འཇོག་གང་ལེགས་བྱས་ནས་བདེ་བླགས་ངང་བགྲོད་ཐུབ་དགོས།


༥༽ རང་སྣང་གང་ཤར་བྱེད་མི་རུང་།

        ལོ་སོ་ལྔ་ནས་ཞེ་ལྔའི་སྐབས་དེར་ནད་རིགས་སྣ་ཚོགས་ཐོག་མར་ལུས་སྟེང་དུ་འབྱུང་བའི་སྐབས་ཡིན་པས། སྐབས་དེར་མི་ལ་ཐང་ཆད་སླ་བ་དང་སེམས་ཁམས་ཀྱི་གནད་དོན་འབྱུང་སླ་བ་རེད། དེ་བས་སྐབས་ཐོག་དེར་རང་སྣང་གང་ཤར་བྱས་ནས་དོན་དག་ཅི་ཞིག་བྱུང་རུང་ཁ་ཡ་མི་བྱེད་པ་གཏན་ནས་བྱེད་མི་རུང་།
ལོ་སོ་ལྔ་ནས་ཞེ་ལྔའི་བར་ནི་ལུས་ཕུང་ཉམས་ཞན་དུ་འགྲོ་བའི་དུས་སྐབས་ཡིན་ལ། བསམ་བློའི་གནོན་ཤུགས་དང་བྱ་བའི་གནོན་ཤུགས་ཆེས་ཆེ་བའི་སྐབས་ཡིན་པས། སྐབས་འདིར་མི་ལེགས་པའི་དོན་རྐྱེན་སྣ་ཚོགས་འབྱུང་སླ་བ་དང་འབྲས་ནད་སྣ་ཚོགས་དང་ཚ་ནད་སྣ་ཚོགས་འབྱུང་སླ་བ་རེད།  དེར་བརྟེན་ནད་བྱུང་ན་སྔ་མོ་ནས་བརྟག་དཔྱད་དང་སྔ་མོ་ནས་གསོ་བཅོས་བྱེད་དགོས།  ལོ་ཚོད་འདིའི་བུད་མེད་རྣམས་ཀྱིས་རང་ལུས་བདེ་སྲུང་ཕྱོགས་ཀྱི་དཔེ་ཆར་མང་ཙམ་བལྟ་བ་དང་བདེ་སྲུང་ཕྱོགས་ཀྱི་ཤེས་བྱ་མང་ཙམ་ཁོང་དུ་ཆུད་པར་བྱས་ནས་རང་ཉིད་ཀྱི་ལུས་ཕུང་བདེ་ཐང་གི་གནས་ཚུལ་ཤེས་པར་བྱེད་དགོས། གཞན་ད་དུང་རང་གི་ཕ་མ་དང་ཁྱིམ་རྒྱུད་ལ་འབྲས་ནད་དང་ཁྲག་ཤེད་མཐོ་བ། གཅིན་སྙི་ཟ་ཁུའི་ནད། སྨུག་པོའི་ནད་སོགས་ཡོད་མེད་ལ་མཉམ་འཇོག་གང་ལེགས་བྱས་ནས་རྒྱུན་དུ་རང་གི་ལུས་པོའི་འགྱུར་ལྡོག་ལ་བརྟག་དགོས།


༦༽ རང་གི་ལུས་ཕུང་ལ་བདག་སྐྱོང་རྣལ་མོ་བྱེད་དགོས།

         རང་ལུས་བདེ་ཐང་ལ་མཐོང་ཆེན་མི་བྱེད་པའི་ིམི་དང་བསྡུར་ན། ཡང་བུད་མེད་ལ་ལ་ཞིག་གིས་བརྡ་ཁྱབ་དྲིལ་བསྒྲགས་སམ་ཡང་ན་མི་གཞན་གྱིས་ངོ་སྤྲོད་བྱས་པའི་སྨན་རྫས་ལ་ཡིད་ཆེས་ནས། རང་གི་ལུས་ཕུང་བདེ་ཐང་ལ་དགོས་མིན་དང་འཚམས་མིན་ལ་མི་བལྟ་བར་མུན་འཐོམ་སྒོས་སྨན་འཐུང་བའམ་ཚད་ལས་བརྒལ་བའི་ངང་ནས་ནད་བརྟག་སྨན་བཅོས་བྱེད་བཞིན་ཡོད། དཔེར་ན། མི་ལ་ལས་ནད་བྱུང་ནས་སྨན་པར་སྟོན་སྐབས། ཆེས་བཟང་བའི་སྨན་རྫས་བཀོལ་རོགས་ཞེས་སྨན་པར་རེ་བ་འདོན་པ་ལྟ་བུ།  སྤྱིར་སྒོར་མོ་ཉུང་ཉུང་ཞིག་བཀོལ་ནས་གསོ་ཐུབ་པའི་ནད་ཞིག་ཡིན་ནའང་ཡིན་གཅིག་མིན་གཉིས་འགྲོ་གྲོན་མང་པོ་བཏང་ན་ད་གཟོད་སེམས་བདེ་བཞིན་ཡོད་པ་རེད།


(2)སྨན་གང་འདོད་དུ་མི་འཐུང་བ།

          ང་ཚོའི་ལུས་ཕུང་ཅུང་མི་བདེ་བའི་སྐབས་སུ་ཚན་རིག་དང་མཐུན་པའི་བདེ་སྲུང་བྱེད་ཐབས་ཉག་གཅིག་ནི། ཟས་སྤྱོད་སྨན་དཔྱད་བཞི་ལ་བསྟེན་རྒྱུ་དེ་ཡིན། དཔེར་ན་ཆམ་ནད་ཞིག་ཕོག་པའི་དབང་དུ་བཏང་ནའང་ཐོག་མར་ཟས་སྤྱོད་སྨན་དཔྱད་བཞི་ལས་ཟས་ཀྱིས་བཅོ་དགོས་ཏེ། ལ་ཙི་སོགས་ཕོག་ཐུག་ཅན་གྱི་ཟས་རིགས་མི་ཟ་བར་ཆུ་ཁོལ་མང་ཙམ་འཐུང་བ་དང་ངལ་བཟང་པོ་གསོ་བ་བཅས་ལས་གཞན་ད་དུང་འཚོ་བཅུད་བེ་ཧྲིན་སུའུ C ཟེར་བ་དེ་ཅུང་ཙམ་འཐུང་ནས་ལུས་སྟོབས་ཇེ་བཟང་དུ་གཏོང་དགོས།  འདི་ལྟར་བྱས་ན་སྤྱིར་བཏང་གི་ཆམ་ནད་མང་པོ་ཞིག་མྱུར་དུ་དྲགས་ཐུབ།
སྨན་རྫས་ནང་དུ་དུག་ཡོད་པས་གང་འདོད་དུ་འཐུང་མི་རུང་།  ལུས་གསོ་སྨན་རྫས་བཀོལ་བ་ཚད་ལས་བརྒལ་ན་ང་ཚོའི་ལུས་ཕུང་ལ་གནོད་པ་ཐེབས་ངེས་པ་དང་།  ལྷག་པར་དུ་བུད་མེད་རྣམས་ཀྱིས་དུག་སྲིན་འགོག་སྨན་མང་པོ་འཐུང་ན་སྐྱེ་ལམ་གྱི་ནད་འབྱུང་ངེས། དེའི་ཕྱིར་ང་ཚོ་བུད་མེད་རྣམས་ཀྱིས་དུག་སྲིན་འགོག་སྨན་གང་འདོད་དུ་འཐུང་མི་རུང་ལ། གལ་ཏེ་ནད་བྱུང་ནས་འཐུང་དགོས་པའི་སྐབས་སུའང་ངེས་པར་དུ་ཆེད་མཁས་སྨན་པས་ནད་བརྟག་སྨན་བཅོས་བྱས་པའི་མཛུབ་སྟོན་གྱི་འོག་ནས་ད་གཟོད་འཐུང་ཆོག

ཡོང་ཁུངས་དྲ་བ་གཞན།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s