འདུ་འབྲལ་སྙིང་པོ་མེད་པར་རྟོགས་པའི་གླུ།


དགེ་འདུན་ཆོས་འཕེལ།

སྲིད་པའི་འབྱོར་བ་ལ་ཁའི་ན་བུན།།
འདུས་པའི་གཉེན་གྲོགས་ཚོང་འདུས་མགྲོན་པོ།།
མ་ངེས་སྐྱིད་སྡུག་མདང་གི་རྨི་ལམ།།
བསམ་ཞིང་བསམ་ན་སྙིང་པོ་མི་འདུག།

རྒྱུས་མེད་གཤིན་རྗེ་ཕོ་ཉས་ཁྲིད་ནས།།
ཕྱི་མའི་འཕྲང་རིང་འགྲིམ་པའི་གྲོགས་ལ།།
སྐྱབས་ཀྱི་དམ་པ་རྩ་གསུམ་ལྷ་ཡིས།།
ཐུགས་རྗེའི་སྤྱན་གྱིས་སྐྱེལ་མ་མཛོད་ཅིག།

སྐྱེས་ནས་འཆི་བ་འཁོར་བའི་ཆོས་ཉིད།།
བསྒྱུར་དུ་མེད་པ་སྒྱུ་མའི་རང་མདངས།།
མི་བཟློག་གཤིན་རྗེ་རྒྱལ་པོའི་བཀའ་ཡིག།
ཉམ་ཆུང་གྲོགས་ཀྱི་སྟེང་དུ་སླེབས་སོང་།།

སྔོན་སྨོན་ལས་ཀྱི་ཆར་ཟིམ་བབས་ཚེ།།
ཡོད་ཡོད་འདྲ་བའི་དགུང་གི་འཇའ་ཚོན།།
དུང་སེམས་ཉི་མ་གསལ་དུ་སོང་ཚེ།།
མི་མཐོང་ནམ་མཁའི་དབྱིངས་སུ་ཡལ་སོང་།།

ན་གཞོན་ལང་ཚོའི་མེ་ཏོག་རྒྱས་དུས།།
ཡིད་ཀྱི་ཆུ་བོ་གཅིག་ཏུ་འདྲེས་པའི།།
འདྲིས་འདྲིས་ཆུང་གྲོགས་སེམས་ཀྱི་ཚེར་མ།།
ད་ལྟ་རིགས་དྲུག་གང་དུ་ཡོད་ན།།

སྐྱིད་ཤོད་ལྷ་སའི་གྲོག་ཆུ་ཕྲ་མོ།།
ཞག་གསུམ་འཛོམས་པ་འགྲོགས་པའི་ཐ་མ།།
མི་རིང་ཕྲད་པའི་ཁ་ཆད་བྱས་པ།།
རྨི་ལམ་ངང་ནས་མཇལ་དུས་སླེབས་སོང་།།

རྒན་དང་བར་མའི་སྐྱེ་བོ་ཐམས་ཅད།།
ངེས་ངེས་འཆི་བའི་ངང་ཚུལ་མཐོང་ཡང་།།
ཆུང་སྐྱེས་གྲོགས་ཀྱིས་བོར་བའི་ཕྱོགས་ལ།།
ནང་གི་དུང་སེམས་ཆོད་ཐབས་མི་འདུག།

ཤེས་རྗེས་འགྱོད་པ་བླུན་པོའི་ངང་ཚུལ།།
ལུས་སེམས་རྒུད་པའི་རྒྱུ་ལས་མེད་ཀྱང་།།
ཡུན་རིང་འདྲིས་པའི་སེམས་ཀྱི་བག་ཆགས།།
གོམས་པའི་ཤུགས་འདི་བཟློག་ཐབས་མི་འདུག།

ལུས་ཟུངས་ཟད་པའི་ཀེང་རུས་གཟུགས་བརྙན།།
གསོན་དུ་རེ་བའི་ཁོ་ཐག་ཆད་དེ།།
འཆི་བའི་མིག་གིས་ཅེ་རེར་བལྟ་བའི།།
གཏམ་དེ་བདེན་ན་སྙིང་ལ་གཟན་པ།།

མ་བརྟག་སེམས་ཀྱི་འཆར་ཚུལ་ཞིག་ལ།།
ད་དུང་དྲུང་ན་ཡོད་ཡོད་འདྲ་བ།།
དྲན་པའི་གཞུ་མོ་ནང་དུ་བཀུག་ཚེ།།
སྙིང་ཁུང་སྟོང་བའི་རྒྱུ་ལས་མི་འདུག།

བརྩེ་ཞིང་འགྲོགས་པའི་ཕྱི་ཐག་བསམ་སྟེ།།
མཆོག་གསུམ་བསླུ་བ་མེད་པའི་ཞིང་དུ།།
དགེ་བའི་དངོས་པོ་ཅུང་ཟད་སྒྲུབ་པ།།
ཕྱི་མའི་ཡུལ་དུ་གྲོགས་ལ་བསྲིངས་སོ།།

ངེད་དྲ་ཚིགས།

མཆན་ཞོག

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s